استشاره

[r3aad]

انا خلصت التخطيط والتصميم وحصلت المقاول الحمدلله
بس هل تنصحوني اصمم البيت 3دي داخل وبرى قبل البناء؟؟؟

واذا تنصحوني تقدرون تدلوني على محل زين يصمم لي ويحسب لي الكميات ويكون المواد متوفره فالسوق


وجعلكم على القوه وماقصرتو

[معماري قطري]

حساب الكميات زين بس يعتبرونه البعض سلاح ذو حدين وكثير من المقاولين تبين نيتهم عند تسعيره وبعضهم تحصلهم يسعرون بعض البنود تسعير خيالي

زين للمفاوضة والنقاش ولو سواه مكتب قوي متماشي مع المواصفات وشروط التقاعد يكون صج المقاول مجبر على التنفيذ والاستشاري يتابع بسهولة وبأريحية وبدون لخبطة وحتى إنت كذلك .. تلاحظ المكتوب ككمية وكمواصفة وكطريقة شغل يتنفذ على الواقع .. ممكن تحاسب المقاول مثلاً كل شهر وتعطيه فلوسه حسب كمية الأعمال المنجزة وممكن حسب المراحل بس كل مرحلة بتجيك غير مبلغها لأنها محسوبة بدقة .. بعض المراحل تتطلب مبلغ كبير ووقت قصير وبعضها مبلغ بسيط ووقت طويل

كل مقاول شاطر يسوي حساب كميات خاص به يسجل الثغرات اللي يقدر يتلاعب فيها ويحط مواصفات أقل ويزيد ربحه ويحط حدود ربح مضمونة في كل البنود .. المقاول لو علاقتك معاه طيبة وتتفاوض صح ممكن يجهز لك الحساب بالمواصفات وبطريقة واقعية ويلزم نفسه بها ويلتزم معاك

كثير من المقاولين يتعاملون مع مكاتب خاصة للتسعير ولحساب الكميات ويعطون المقاول جدول مفصل بالتكلفة المتوقعة حسب أسعار اليوم والمقاول يزيد عليها بحدود معقولة حتى يضمن ربحه بس يعتبر هالجدول والتسعير سر على المالك ويعرض عليه تكلفة المرحلة بدون تفصيل للسعر وللبنود وما يسمى Lump Sum Quotation

وينفعك أكثر شيء في المناقصة بس ما دام انك محصل المقاول يبقى تحديد المواصفات وطريقة البناء والتنفيذ بدقة أكثر وكتابة هذا بتوصيف استشاري جيد ووضعه في عقد مفصل وبحيث يتماشى مع الرسومات والرسومات تكون واضحة لكل شيء

شيء ثاني عندك الأُمور اللي بتتفق عليها انت مثل اليو بي في سي أو الألمنيوم والنجارة والجبس والدرابزين .. هذي لازم المقاول الرئيسي يحميها ويجهز لها حسب الرسومات والشروط

طريقة تركيب البلاط والرخام ولو عندك رخام بتتفق مع مقاول خارجي عليه وشي واجبات المقاول الرئيسي لازم تنكتب واضحة .. البناء يستحسن خرسانات تخلص وبعدها يتركب الطابوق .. والخرسانات تنقسم الى قسم تحت الأرض بعزل خاص وسمك خاص ونوعية خرسانة مقاومة للأملاح والكبريتات ويستحسن حديد مغلف وفوق التربة الخرسانةعادية ويستحسن كذلك نستخدم الحديد المغلف

شاللي عليك توفيره وعلى المقاول تركيبه وهل بتنقله انت للموقع وتستلمه وتتأكد من صلاحيته أو بتخلي الاستلام والنقل والحماية على المقاول .. إنت بس تختار وتدفع .. تفصيل تركيب البلاط مهم والدك والصبية وطبقات العزل ومعالجة التربة عن الأرضة ونوعية الدفان .. كثيرين بيقولون لك البودرة وانا نصيحتي من الموقع ومزالة الحجارة الكبيرة بالغربلة أكبر من 5 سم آوت أو لو تحب 7 سم

[معماري قطري]

تقدر تخلي المقاول يوزع ميزانية البنيان على المراحل حسب خبرته وتتفق معاه على دفعة مقدمة 10% وتحتجز من كل دفعة مستحقة 5 - 10% كضمان صيانة وحسن أداء فيستوي المقاول متى ما طلب الدفعة 1 يستحق 90% منها على أساس 10% ياخذها من المقدمة .. ناقص دفعة الضمان المحتجزة اللي تحددها بالاتفاق معاه

دفعة الضمان المحتجزة لها مدة بعد استلام البيت في العادة 400 يوم أو حسب الإتفاق .. بعد ما تسكن أي شيء تلاحظه غلط تنادي المقاول يصلحه أو تصلحه من دفعة الضمان .. وهذي لها آلية لازم تذكر في العقد .. أما عن طريق فاكس الاستشاري أو حسب محضر رسمي أو ببساطة بالتصوير وايميل عادي بس مهم تكون فيه وثيقة لو كانت مطالبات ومحاكم

[معماري قطري]

الدفعات لو توزعت حسب الانجاز لكل مرحلة بتكون غير منتظمة .. يعني ممكن المقدمة مثلاً تطلع 100 ألف لمشروع بمليون .. ومرحلة الأساسات تكلف فرضاً 150 ألف فتنحسب الدفعة 150000 - 10% = 150000 - 15000 ( هذي تؤخذ من ال 100 ألف المقدمة ) يستوي يستحق المقاول 135000 وننقص منها فرضاً 10% للصيانة لو متفقين على 10% تستوي دفعته 120000

وعلى فرضية دفعة الخرسانات فوق الأرض ونفترض هذي قسمناها الدور الأرضي والأول أو كلها في دفعة ولنفترض كلفت 80000 حسب الاتفاق .. يكون الحساب 80000 ناقص 10% للدفعة المقدمة و 10% لدفعة الضمان = 80000 - 8000 - 8000 = 64000

قبل الإتفاق هل المالك قادر على توفير الدفعات في الوقت المحدد؟ + شراء المواد المتفق تكون عليه + الاتفاق مع مقاولين الباطن ( إن وجدوا ) وبأسعار مناسبة وفي وقت مناسب ويخلص البنيان بدون تأخير من طرف المالك .. وشيصير لو المقاول شغله ماشي والمالك تورط مع شركة ألمنيوم تأخرت عليه وايد والمقاول عليه حماية الموقع بناطور وغرامات تأخير سببها المالك والمالك الموضوع مب في يده .. مثل هالسيناريو لازم يتم الاتفاق عليه باليوم كتكاليف حراسة الموقع على المقاول الرئيسي

بعدين المالك يكون عنده جدول واضح يمشي عليه ويرتب الأُمور أول بأول عن التأخير

[معماري قطري]

كل هذي البنود لازم ترتب تحت اشراف استشاري مشرف ( فاهم ) حتى ممكن يتدخل في الدفعات والدفعات مب ضروري تكون 10 دفعات ممكن أي رقم .. لو فرضاً 20 دفعة وأكيد بتكون أقل ومن كل دفعة نحتجز 5% على أساس المقدمة و5% تروح لقيمة الدفعة المحتجزة للضمان

[المهندس عبدالعزيز]

تصميم 3 d ما انصحك، لأن التكلفة كبيرة، اذا التكلفة ما تهمك سو

حساب الكميات في العادة الاستشاري للمشاريع الصغيرة ما يسويها، ممكن تطلب منه يسويها علشان دفعات المقاول واهم شي في حساب الكميات ان التكلفة الرئيسية ما تكون على الحفر وعلى الاساسات لأن المقاول ممكن ياخذ ربحه من الدفعة الاولى وبعدي يشرد وما يكملك البيت وفي المحكمة حوادث كثيرة مثل هذا الشي

[معماري قطري]

مع المهندس عبدالعزيز تصميم الثري دي مب ضروري للخارج الا لو مهم عند المالك يتخيل الشكل الخارجي .. للتوزيعات الداخلية كذلك مب مهم الا لو فيه عندنا تصميم داخلي مفصل

[r3aad]

ماقصرتو والله لايهينكم يا اخواني وبيض الله وجيهكم
خلاص كنسلنا هههههه

[معماري قطري]

ماقصرتو والله لايهينكم يا اخواني وبيض الله وجيهكم
خلاص كنسلنا هههههه

تبغي تخيل للشكل وتطوير أكثر للتصميم مستعد وحتى لو بديت البنيان أشياء بسيطة تتعدل للأفضل ممكن .. بس نصيحة خله يبدأ أول الخرسانات وبعدين الطابوق

[r3aad]

والله ياخوي معماري ودي اتخيل الشكل واشوف الاغلاط من الحين احسن

[معماري قطري]

والله ياخوي معماري ودي اتخيل الشكل واشوف الاغلاط من الحين احسن

ما تبين لك الأغلاط ثري دي .. أكثر الأغلاط يحط لك باب مكان عمود ولا عمود طالع بالغلط .. تبي اراجع لك طرش لي الرسومات كاملة بصيغة اوتوكاد باحطها فوق بعض وبيبين بسهولة

بعدين واجهات تكرم دورات المياه والمطابخ تقدر تحط شرط على المقاول يسويها أو تسويها 2 دي عند استشاريك المشرف حسب البلاطات والنقشات والكبتات ونقاط الكهرب .. حتى السقف يسوي له رسم بتشكيلة الجبس .. ولو تتعامل مع رافكو أو مودرن ديزاين يسونه لك مع العقد

[r3aad]

الله لا يهينك ياخوي معماري بس ياخوي شلون اطرش لك الملف والتصميم

[CiTy]

السلام عليك ورحمة الله
انصحك وبقوة انك اتشوف شكل البيت من الداخل خاصة اذا التوزيع مميز
وانصحك اكثر انك اتكلف مهندس هو يقوم لك بجميع الاعمال وانت اتحط ريل على ريل صج بتدفع
لكن في النهاية بترتاح وبتحصل شي مرتب وعلى اصول وراح تتعامل مع شخص واحد بس
وبيفكك من التعامل مع جميع الاطراف ، شوف لك مكتب تصميم وتنفيذ ولا تعور راسك
نصيحة .

[r3aad]

حنا حصلنا حد زين وسيده وقلنا لا

[معماري قطري]

الله لا يهينك ياخوي معماري بس ياخوي شلون اطرش لك الملف والتصميم

توني منتبه لمشاركتك وسامحني .. بارسل لك ايميلي خاص

[r3aad]

لاهنت ياخوي معماري وماقصرت

[معماري7]

الثري دي شى مهم للغاية ويوضح لك التصميم الصورة العامة ... لكن ايضا من التصميم يمكن معرفة ان وجد خطأ . والله الموفق ان شاء الله

[معماري قطري]

لاهنت ياخوي معماري وماقصرت

العفو يا اخوي ما اسوي الا الواجب