نصيحة مهمة جدا و من خلال تجربة ....

[$الملياردير$]

السلام عليكم و رحمة الله وربركاتة و اسعد الله صباحكم بكل خير ...و اسال الله لكم البركة في الرزق و المال و الولد

حبيت انصحكم اخواني ومن خلال تجربة شخصية ..اهمية معرفة ابعاد و مساحات البيت .... فهناك ناس يصيدون صاحب المشروع و يستغلون جهلة لقضية الابعاد و المساحات و سعر الوحدة ف يضرب ضربته .


مثال ( مجموع تكسية الفيلا بالحجر 900 م تلاقية حاطها 1200 ف تلاقي 400 متر سارقها ويقولك عملت لك خصم محد خذه غيرك ههههههههه )

طبعا صارت لي عندي مجموعة عروض اسعار للحجر و لا واحد منهم يطابق في المساحة الكلية علما انها نفس الفيلا ههههههههه

مثال ( تجيب واحد يمتر الله يعزكم الارضيات و حوائط الحمامات و الصالات تلاقيهم يزدون وصارت لي في خانة تسعير الحوش فرق 300 متر عسى ماشر .


من وجهة نظري حتى لوعاجبك شخص معين جيب كذا عرض سعر بنفس المواصفات عشان تعرف ايش الفروقات .

طبعا مع و جود جدول حساب الكميات عندك كصاحب مشروع يريحك في كل المراحل وكذلك ملفات اوتوكاد التي تبين المساحات السنتي ميتر

مثل ماتفضل اخوي معماري في موضوع سابق بعض الاحيان يكون جدول حساب الكميات سلاح ذو حدين عشان بعض المقاولين يلعبون على عملية l.m اجمالي مايبي اللي يعطية بالدقة بعدين يشلون يبوق هههههه .

بعض الاحيان لماتقدم مواصفات و اصول صنعة للشخص اللي تبية ياخذ الشغلة ...تلاقية يشل علية و لايرجع يقولك هذا فاهم و بيدقق علي .

فانت تكون بين نارين نار انك تدور شخص محترم و زين ويبي البركة و الرزق الحلال ومخرجاته ممتازة وهذا عمله نادر ...... او شخص غير ملتزم ومخرجاته سيئة ولوتي .

اترك الموضوع مفتوح للنقاش و ابداء الراي

يعطيكم العافية

[eXpert*]

موضوع ممتاز ومهم

السؤال هو : كيف أعرف الأبعاد والمساحات ؟

[$الملياردير$]

هلا اخوي ...شرفني مرورك الكريم
يوجد كذا طريقة
اما عن طريق الاستشاري يعمل لك جدول يبين حساب الكميات مفصل بالمتر المربع و تتم عروض الاسعار على اساسة
لو ماعندك استشاري حاليا ممكن تجيب ناس يرفعون الموقع ع الطبيعة ( حسب البناء القائم ) والحين توجد اجهزة قياس حديثة باليزر يعطيك حساب دقيق
يجب ان تحتفظ في هذي القياسات على طول راح تحتاجها في جميع اعمال التشطيب من بلاستر او صبغ او معجون او تبليط مايكون عليك الا ضرب سعر الوحدة في المساحة المطلوب .

ملحوظة اخيرة يجب اخذها بعين الاعتبار ....في بعض الناس يأخذ القياس اجمالي بدون مايخلي الابواب و الشبابيك ...تفرق كثير في السعر خاصة للي عنده واجهات كبيرة زجاجية او شبابيك كبيرة .

[المهندس عبدالعزيز]

اخوي حساب الكميات مش اساسية في مشاريع lump sum اذا في خطأ في حساب الكميات المقاول يتحملها ، واغلب مشاريع البيوت هي lump sum

[$الملياردير$]

اخوي حساب الكميات مش اساسية في مشاريع lump sum اذا في خطأ في حساب الكميات المقاول يتحملها ، واغلب مشاريع البيوت هي lump sum مشكور الغالي ع مرورك الكريم .. انا اقصد لما تجي تشطب بنفسك وتبي تسعر بند معين مثل بند الأرضيات او الصبغ ... يعني حاجة بتاحسب عليها بالمتر ... دمت بود

[Azizuk]

صارت معاي مع واحد لبناني حاول يحسب لي ارتفاع الحمام 4 متر و10 سنتيمتر

والبنقالي حاسبه مع البناني على 3 متر

بعد ماكتشفت النصب اعترف لي البنغالي

يقولي ان دايمن البناني يقص على أهل قطر

والمشكلة أن أهل قطر لما البنغالي ينبهم بالنصب عليهم مايصدقونه

تبي تعرف الحسبة أثناء تركيب بلاط الحمامات دايمن يكتبون الحسبه على حايط فريم باب الحمام ومدخل المطبخ

وانتبهو من حسبة اي جنسية دايمن يزيدون في إعداد الأمتار

وإذا حس انك تعرف حق عيارتهم يشرد منك أو يحاول يطلع روحه أن هذا شغله

مره جاني بنغالي شاف البيت قعد يحك راسة جاب المتر مع الدفتر دخل كم حمام وقعد يتفكر ويسوي لي تمثيلية

بعدين قال لي كم حمام عندك عطيته العدد

بس على طول طلع الآلة إلا طاخ طيخ يقولي بيطلع عليك 80 الف

بس تخمين من رأسه قيم الشغل

انتبهو انتبهو منهم تراهم غشاشين

[$الملياردير$]

صارت معاي مع واحد لبناني حاول يحسب لي ارتفاع الحمام 4 متر و10 سنتيمتر

والبنقالي حاسبه مع البناني على 3 متر

بعد ماكتشفت النصب اعترف لي البنغالي

يقولي ان دايمن البناني يقص على أهل قطر

والمشكلة أن أهل قطر لما البنغالي ينبهم بالنصب عليهم مايصدقونه

تبي تعرف الحسبة أثناء تركيب بلاط الحمامات دايمن يكتبون الحسبه على حايط فريم باب الحمام ومدخل المطبخ

وانتبهو من حسبة اي جنسية دايمن يزيدون في إعداد الأمتار

وإذا حس انك تعرف حق عيارتهم يشرد منك أو يحاول يطلع روحه أن هذا شغله

مره جاني بنغالي شاف البيت قعد يحك راسة جاب المتر مع الدفتر دخل كم حمام وقعد يتفكر ويسوي لي تمثيلية

بعدين قال لي كم حمام عندك عطيته العدد

بس على طول طلع الآلة إلا طاخ طيخ يقولي بيطلع عليك 80 الف

بس تخمين من رأسه قيم الشغل

انتبهو انتبهو منهم تراهم غشاشين
هلا اخوي ... جزاك الله خير بالضبط هذا اللي كنت اقصده بموضوعي ...فقصتك مع اللبناني و البنغالي خير مثال ع الواقع الحالي الا من رحم الله

[معماري قطري]

موضوع ممتاز ومهم

السؤال هو : كيف أعرف الأبعاد والمساحات ؟

سهلة يا اخوي وانا قبل نصحت الكل يشيكون حتى ورا الاستشاري المشرف .. كلها متر وتقيس به أو جهاز ليزر مضبوط ونسبة الخطأ فيه بسيطة جداً

بعض المقاولين عندهم متر غير صحيح .. يقيس المتر ناقص 10 سم أو 20 سم حتى لو قاسوا جدامك طلع القياس زايد .. وبعضهم يقيسون بالنظر ويحاججونك إن قياسهم صح وهذا تخصص العرب وانا اطردهم سيدة لأَني أعرف انهم مب صادقين ولا مهتمين

زين نجي للدوائر والمنحنيات وهذي قياسها صعب لكن بمقياس الرسم على الكمبيوتر تطلع المساحة بدقة متناهية ولازم يسويها الاستشاري وانا اقدر اسويها عن طريق الكمبيوتر ورسم الكمبيوتر وكذلك باقي المساحات بسهولة وسرعة .. ترسل لي الرسومات اوتوكاد وارسل المقاسات والمساحات اللي تبغيها

[سالم الزهران]

اشكر صاحب الموضوع واتفق معه ، واظن المشكلة مستمرة و المقاولين اذا ما ردته ذمته محد يرده و لذلك من خلال مثل هذه المواضيع اظن اهل قطر بعد فترة بتتشكل لديهم قوائم بالمحلات الزينة و عكسها بناءً على تجاربهم و لابد من الرقابة والمتابعة حتى لو يتنفذ البناء في سنتين ولا ثلاث لكي تضمن اقل نسبة اخطاء .

[معماري قطري]

اخوي حساب الكميات مش اساسية في مشاريع lump sum اذا في خطأ في حساب الكميات المقاول يتحملها ، واغلب مشاريع البيوت هي lump sum

هي استرشادية لو احتديت تصبغ مثلاً عن طريق مقاول آخر وبسعر المتر المربع .. بعضهم يعتبرون الدرايش جزء من الحائط المصبوغ لأَن بيضطر يحميها وبعضهم يسعرونها غير .. المهم الإتفاق .. وحتى حساب الدرايش والأبواب كل مختص يطلع المساحة غير .. بس لو عندك مقاسة وعارف سعر المتر بتقدر تحاججه وتفاوضه في تنزيل السعر أو بتلاحظ الفرق الكبير وبتقول له آوت

الدرايش معمل يو بي في سي يقول لك سعري المتري 400 وغيره يقول لك 600 والأخير جودة لا تضاهى وتعطيهم المقاسات بعضهم يوثقون فيها ويسعرون على أساسها وبعضهم في مخهم المريض حسبة ثانية .. ولو تجرب تخليهم يقيسون بتحصل سعر ال 600 الاجمالي قريب من سعر ال 400 .. بس مهم تدقق في رسم الواجهات للدرايش في العقد ومواصفاتها وعددها حتى ما يكون فيه تلاعب ويقولون بعدين نسينا نحسب درايش معينة أو غلطنا في مساحتها .. لذلك رسم الواجهات لازم يكون دقيق من الاستشاري ولو غيرت في الواقع كبرت أو صغرت وجاء اللي يقيس يرفع القياس يكون حاسب الكل ورافع قياس الكل عن التلاعب

[معماري قطري]

صارت معاي مع واحد لبناني حاول يحسب لي ارتفاع الحمام 4 متر و10 سنتيمتر

والبنقالي حاسبه مع البناني على 3 متر

بعد ماكتشفت النصب اعترف لي البنغالي

يقولي ان دايمن البناني يقص على أهل قطر

والمشكلة أن أهل قطر لما البنغالي ينبهم بالنصب عليهم مايصدقونه

تبي تعرف الحسبة أثناء تركيب بلاط الحمامات دايمن يكتبون الحسبه على حايط فريم باب الحمام ومدخل المطبخ

وانتبهو من حسبة اي جنسية دايمن يزيدون في إعداد الأمتار

وإذا حس انك تعرف حق عيارتهم يشرد منك أو يحاول يطلع روحه أن هذا شغله

مره جاني بنغالي شاف البيت قعد يحك راسة جاب المتر مع الدفتر دخل كم حمام وقعد يتفكر ويسوي لي تمثيلية

بعدين قال لي كم حمام عندك عطيته العدد

بس على طول طلع الآلة إلا طاخ طيخ يقولي بيطلع عليك 80 الف

بس تخمين من رأسه قيم الشغل

انتبهو انتبهو منهم تراهم غشاشين

حاسبها بدقة والعشرة سم هذي تعبته

[$الملياردير$]

اخوي معماري شرفني مرورك الكريم على موضوعي ... يوم قلت لمدير الشركة الفورمن اللي رفع القياس زايد 300 متر في الحوش من جايبها قال لي بنحقق في الموضوع و ح ارفده ... عيار ههههههه خنقتني العبرة :nice:

[معماري قطري]

اخوي معماري شرفني مرورك الكريم على موضوعي ... يوم قلت لمدير الشركة الفورمن اللي رفع القياس زايد 300 متر في الحوش من جايبها قال لي بنحقق في الموضوع و ح ارفده ... عيار ههههههه خنقتني العبرة :nice:

التحقيق سهل ما يبي له فهلوة .. كان قلت له الميدان يا حسنين ويالله شوف القياس وتأكد .. ويمكن يطلع لك نصاب أكبر من اللي قبله

لو فيه جهة حكومية تتابع هالأشكال كان من زمان بنيانا بخير

[بوخالد911]

انا منتبه لهاشغله
وخاصة لرخام الدرج
بركب بعد اسبوعين تقريبا
عندي كذا عرض
ولاحظت فروق بسيطة جدا في الأمتار.

[بوخالد911]

وعن نفسي لما أواعد حد بياخذ المقاس. اتعمد اني اوقف احذاه وأشوف القياس
ولما يكتب بالورقة. اقوم أصور الورقة واحتفظها بجوالي.

[معماري قطري]

نصيحتي لمن يبني يقيس الأساسات ويقارنها بالخرائط ويشوف طريقة عزلها ويقارنها بالمواصفات

يلاحظ الرجاج في الموقع ولازم يشتغل في كل الصبيات .. الصب قد ما يقدر يكون في جو تحت 35 درجة حرارته ولا يكون هواء قوي .. الخرسانة لو مايعة وفيها ماي وايد ولا توقف عند فحص القمع يرفضها ولازم الاستشاري يكون موجود .. ويشوف شهادات استلام الخرسانة ومواصفاتها من المعمل ويقارنها بالتصميم

نصائح كثيرة وباكتبها على أجزاء

[(عبدالله)]

أغلب المقاولين يحبون يتعاملون مع أهل قطر اللي مالهم بارظ او مزاج في الحسبة والمتابعة ويكتفون بالثقة العمياء للمقاول

كنت أحسب المساحات بنفسي وكذلك كنت أستعين بالاستشاري واتابعه لين يسوي لي الحسبة بشكل دقيق..

من خلال رحلة بناء بيتي اللي استمرت 3 سنوات بالتمام ابتداءاً من الحفر شهر 6 /2012 إلى ما سكنت شهر 6/2015 ماخليت مقاول ولا ومسؤول مبيعات سيراميك وبلاط إلا وحكرت له ونشفت ريجه لدرجة إني وايد تهاوشت مع اللي يتحايلون علي في حساب المساحات وخاصة مسؤولين المبيعات في الخزاين والبلاط والبورسلان والدرابزين..إلخ

حتى إني لما استلم أي بضاعة.. أأخر نفسي ساعة كاملة أفتح الكراتين كرتون كرتون واطلع البلاط وأستبدل التالف بسليم..

لكنها.. رحلة بناء بيت العمر عبارة عن سنتين او 3 استحملها.. وكل ريال بتدفعه تراك تعبت عليه وما تستاهل إلا انك تدفعه حق اللي يستاهل ثمرة جهدك وتعبك..

ما أدعي المثالية في طريقة متابعتي تراني انغشيت وانقرصت في البداية بسبب جهلي و كسلي وثقتي العمياء في البعض في البدايات وتعلمت من التجارب..

واحد من اللي غشوني باكستاني مدد لي وايرات التلفزيون والتلفون والسماعات وعطيته فلوسه قبل لا أعمل اختبار لشغله.. وطلعت انه استغل انشغالي بباقي التشطيبات وشرد بالفلوس.. الحمدلله على كل حال والحمدلله تصليح الخربان ماكلفني وايد..

الحمدلله الآن ما واجهت مفاجآت ما بعد السكن إلا القليل مقارنة باللي أشوفه من تجارب باقي الشباب..

لذلك.. نصيحتي.. فترة بناء بيت العمر فرغ نفسك وتركيزك حق بيتك ولا تخلي أحد يستغلك لأنك بتكون محط أنظار ومحط استغلال الجميع

وكذلك.. ادفع زيادة عشان تكسب ضمانات.. مثلاً.. قبل لا أتعاقد مع مقاول الحجر الطبيعي تميت شهرين لين صغت معاه العقد + دفعت حق مكتب 1500 ريال ينفذ لي خريطة تصميم تلبيس حجر

وعالرغم من أن مقاول الحجر كان أمين وشغله نظيف لكن صار خلاف بسيط في مساحة في الفيلا قال ما بيلبسها حجر ولازم أدفع 5000 ريال لين رجعنا حق الخريطة واقتنع ونفذ..

والله ييسر لكم ويوفقكم جميع

[$الملياردير$]

جزاك الله خير اخوي عبدالله بمرورك العطر وإثراء الموضوع من خلال تجربتك

[معماري قطري]

البنيان لازم يكون على أساس فريم قبل خرساني وبعدين الطابوق وبعدين التشطيب .. ليش وليش ما نتبع الطريقة اللي يسمونها الشعبية .. لأن ذيك طريقة قديمة وتعتمد على التحميل على الطابوق وهذي طريقة حديثة والطابوق يعتبر حشو ولا يتعرض للضغوطات التحميلية لأَن الضغوطات استوعبها الهيكل والحديد

كثير يقنعون المالك بأن الطريقة الشعبية هي الأفضل .. منها يوفر في الخشب وما تبين عيوب الصب لأَن العمود محاط من جانبين بالطابوق .. ولا يرش كل الجهات بالماء واستقامة العمود ما نقدر نضمنها لأَن الطابوق مغطي

نفس الشيء شائع استخدام الحديد العادي وعندنا في قطر الأملاح موجودة في ماء الخلط للخرسانة وتاكل الحديد ويخترب بالصدأ .. لازم المالك يصر على استخدام الحديد المغلف والفرق في حدود 15% ولا يسوى .. أسيام التربيط تكون مغلفة كذلك

كثير يركبون الطابوق بمونه بسيطة وهذي تتسبب في ظهور شلخ على شكل مدرج يبين تفاصيل التقاء الطابوقة بطابوقة .. وعندهم فن في تركيب الطابوق بحيث يبين فيه مونة لكن لو تحرك طابوقة تقوم ويبين من داخل المونة بس في الطرف .. هذي برعوا فيها الفراعنة ما قلت المصريين حتى محد يزعل

نقطة تصميمية وأيضاً تنفيذية اللي هي عمل قاعدة للدرابزين بالطابوق وبارتفاع طابوقة واحدة وتنملي بالخرسانة .. ويتركب الدرابزين فوقها والصحيح يتثبت الدرابزين في الخرسانة ولا فيه داعي لهذي الطابوقة ولو نبي نسوي مكانها خرسانة مقواة بحديد يثبت الجدار الصغير بالأرضية .. النتيجة نقطة التقاء الطابوق بالأرضية يستوي شلخ عرضي قبيح .. كذلك الحال لسور السطح .. أما نعمله بطابوق ونمدد العمدان لأعلاه والطبقة الأخيرة جسر خرسانة مع حديد وخرسانة في فجوات الطابوق أو نسوي عارضة مقلوبة مرتفعة من السطح وفوقها يتركب الطابوق مع التثبيت في الأعمدة اللي نمددها تمسك السور عدل

[معماري قطري]

من أخطاء البناء الشائعة لدينا عدم عزل المنزل عزلاً حرارياً كاملاً .. مع عزل الرطوبة عن البيسمنت وعن الأجزاء تحت والمتلصقة بالتربة وعن السقف جيداً

تفصيل العازل للسقف الأفضل هو ما يسمى بالدبل سكريد وهو عبارة عن صبية أساسية بسلوب ثم عازل مائي وطبقاته وحراري ثم صبية ثانية .. وميزة هذا النظام عمل عازل فوقه سهل وسريع

كذلك ابعاد الرطوبة عن جران البيسمنت ضروري بالعوازل وبنظام تصريف المياه المتسربة

[معماري قطري]

نصيحة مهمة كذلك اللي هي الموازنة في الاحتياجات والتشطيبات وعدم المبالغة في شيء على حساب شيء أهم

مثلاً نهتم بالمنظر الخارجي ونركب نظام بايبات تعبان أو نسترخص نوعية جيدة وأصلية وتسوى ونروح ناخذ نوعيات رخيصة ومن صناعة رديئة .. خصوصاً في شغل المياه والكهرباء ناخذ النوعيات اللي تدوم ومن وكيل موثوق وقوي أو عن طريق مختصين .. هذي الأُمور ما اعتمد فيها على خبرتي الشخصية واشوف مختصين استشارات كهربية وميكانيكية يسوون لي المواصفات واشيك على شغلهم بمهندسين ثانيين والتنفيذ لازم عليه اشراف وتشييك كذلك على الاشراف

كذلك النظام الانشائي مهم وبعض المهندسين يسوون تصميم انشائي مناسب ويوفر علينا حول 20% من الحديد و 10% من الخرسانة ويكون مدروس صح وقوي وبعضهم يخسرونا هذي النسب ويطلع البنيان ضعيف في بعض الأماكن ومبالغ في قوته في بعض الأماكن وندفع مبلغ يزيد حول 200 ألف عن الجيد والمناسب .. واللي مروا في هذي التجارب وأعادوا التصميم الانشائي عن طريق مهندسين خبرة يؤيدون كلامي أكيد .. يعني ادفع 50000 لتصميم يوفر علي 200000 أكون موفر 150000 ومحصل شغل زين ويعمر وقت أطول بدون مشاكل

في هذا الوقت ذمم كثير من المهندسين استوت تحت خط الحرام .. يسوون نظام انشائي مبالغ فيه ووقت التسعير المقاول يسعر على حسب الورق والخرائط والمطلوب ويطلع غالي .. ووقت التنفيذ من تحت الطاولة يتفقون مع المقاول على التقليل حتى بنسبة 25% فيوفرون في الكميات والشغل والبنيان يعيش ويكون قوي كفاية وهم يتقاسمون الغنيمة .. وهذا ينطبق على كل المواد يجيب شيء رخيص تحت المواصفات بوايد ويوافق عليه الاستشاري

بعض الاستشاريين يطلعون بمبلغ كبير من كل مشروع يقارب المليون ويتقاسمه مهندس الموقع مع الفورمان أو مدير الشركة الغير قطري والمالك ما يدري ومدير المكتب المالك ما يدري وحتى مدير الشركة المالك ما يدري .. الخبث كله يجي من الادارة الوسطى