ألا ماأقبح سوءالظن!

[الشفق الحالم]

السلام عليكم ورحمه الله وبركاته..

صبااح الخير .. صباحكم دعاء ومغفره..

هذا اول موضوع لي بالمنتدى اتمنى لي ولكم الفائده بإذن الله..

الموضوع عن سوء الظن.. فكرت بالموضوع بسبب بموضوع انحذف امس عن حادثه صارت بالدوحه مابي اذكر تفاصيلها حتى لايتحور مسار الموضوع، لكن انا استغربت من كميه الاتهامات في التعليقات
لأطراف بالقصه بدون ان يكون لأي احد ادنى معرفه بالحقيقه ولابالشي اللي صار!
سوء الظن ياجماعه الخير ليش سوء الظن؟ هل صرنا لهالدرجه بس نسيء الظن بالناس لان سوء الظن يعطينا قصص مثيره اكثر وماده دسمه للحديث!!! طيب والذنوب اللي خذتوها!! ومافكرتوا ان يمكن صاحب القصه يقرأ بقلب موجوع كميه الاتهامات وسوء الظن له ولأهله!!

في واحد غني مره طالع من مطعم هو وعائلته وفطريقه للسياره لقى رجل فقير جاي عنده، قال الغني لزوجته هذا اكيييد جاي يطلب فلوس كعادة هالشحاتين اللي ينتظرونا لما نطلع من المطاعم ! قرب منه الرجل الفقير وقال: لو سمحت اخوي خذ محفظتك طاحت منك وانت طالع!

ياجماعه ليش نكون افكار مسبقه عن اشخاص بأنهم سيئيين ؟ ليش التعميم مثلا ان هالشخص اللي جنسيته كذا هو انسان كسول او انسان غير ذكي أو أو ! ليش التعميم ان كل زوجة اب هي انسانه كريهه ؟
الطفل يعتقد ان كل الاكواب ساخنه وتحرق لمجرد انه انلسع من كوب واحد!! بس احنا الكبار صرنا نخاف ونسيء الظن بكل شي بدون لانجربه حتى ! بمجرد انه نسمع سالفه يبدى التحليل وسوء الظن.. بس بالاخير لاتنسوا حديث الرسول عليه الصلاة والسلام: إِيَّاكُمْ وَالظَّنَّ ، فَإِنَّ الظَّنَّ أَكْذَبُ الْحَدِيثِ ، وَلاَ تَحَسَّسُوا ، وَلاَ تَجَسَّسُوا ، وَلاَ تَحَاسَدُوا ، وَلاَ تَدَابَرُوا ، وَلاَ تَبَاغَضُوا ، وَكُونُوا عِبَادَ اللهِ إِخْوَانًا.

بالنهايه ياجماعه هذي نصيحه وفكروا فيها، سوء الظن شيء عظيم وسبب للقطيعه والدمار والهلاك بين الناس وبين الأمم، ولو ماكان سوء الظن شيء خطير ماكان ذكر بالكتاب والسنه ..

جزاكم الله خير.

[شبح الصمت]

وعليكم السلام ورحمة الله وبركاته ..

الله يجزاك خير على التذكير بالظن ..

والله يغفر لنا ويرحمنا

[CH Engineer]

مب وقت حسن الظن في حالة وفاة صارت لطفله

معقوله أنسى طفل من بداية دوامي لنهايته بالسياره
هل المرأة مصابه بالزهايمر

ياخي ليش ماتكون توفت قبل لتركب السياره

حسن الظن غير مطلوب اخوي ولا حتى سوء الظن الأفضل إغلاق الموضوع لان في جهات مختصه تقوم بدورها

[بومحمد المطاوعه]

وعليكم السلام ورحمة الله وبركاتة ..

صباحك رضى الرحمن

جزاك الله خير يالشيخ

هذي المصيبه
ولا صار بعد فيها عنصريه

اكيد مب قطريين لان القطريين مايسوون جذي

يعني الغير قطري عادي يسوي جذي لو صج سالفه النسيان ,.؟
ولو كانت مب قطريه المتوفيه
خلاص عادي الموضوع يعني مب مؤلم ولا يعور القلب لأن انسانه المتوفيه
وطفله صغيره في العمر

حتى لو كانت كافره هذي الصغيره
بعد ستصبح حادثه مؤلمه مالها ذنب هذي الطفله

استغفرالله على عقول البعض


بارك الله فيك اخوي

[Qt.1]

سوء الظن خسرنا ناس عشنا معاهم طول عمرنا , سوء الظن مصيبه ممكن يهدم بيت حتى ,,

[الشفق الحالم]

جزاكم الله خير..

[نوفا91]

الحين يقولكم ليش سوء الظن تردون على سالفة البنت

وبعدين بومحمد قطرية والا يهودية البنت توفت والقطرية مب منزله من السماء ، انا اعرف انه نادرا تصير هالحالات عندنا بس خليتوا الموضوع كله وتميتوا تدورون جنسيتها :(

[بومحمد المطاوعه]

الحين يقولكم ليش سوء الظن تردون على سالفة البنت

وبعدين بومحمد قطرية والا يهودية البنت توفت والقطرية مب منزله من السماء ، انا اعرف انه نادرا تصير هالحالات عندنا بس خليتوا الموضوع كله وتميتوا تدورون جنسيتها :(


مقصد كلامي ان مافي فرق لو كانت شنو جنسيتها
المؤلم في الموضوع موت الطفله

وليس المؤلم جنسيتها واصلها وديانتها

هذي المفروض الي يتم النقاش عليه

لكن البعض
يهمه قطري او لا
اذا اي قال مستحيل
واذا لا قال عادي تصير

ليش مادري
في كل شي جذي نشوف للأسف

[بانغ بانغ]

اذا كان بخصوص الموضوع الأمسي / الواحد يتحرى الدقة ومافيها شي لو حط احتمالات بدون تلفيق تهمة في حد ولا اتهام ضد شخص وانما طلب معلومات اكثر لاتضاح الصورة

اما اذا كان موضوع بشكل عام في سوء الظن / فجزاك الله خير على نيتك

[ورد الدوحه]

جل من لايسهو سبحانه
والله الواحد ايصير انه ينسى عياله في السياره
خاصة اذا كانوا وايد وواحد منهم نايم ورى:rolleyes2:
نسأل الله أن يصبر أهل البنت يعوضهم خيراً مما فقدوا..

[الشفق الحالم]

جل من لايسهو سبحانه
والله الواحد ايصير انه ينسى عياله في السياره
خاصة اذا كانوا وايد وواحد منهم نايم ورى:rolleyes2:
نسأل الله أن يصبر أهل البنت يعوضهم خيراً مما فقدوا..

آمين ,

[سالم الزهران]

كلنا معرضين لأن نسيء الظن و الله المستعان و لكن نتذكر مقولة ان نلتمس سبعين عذر

الإنسان يلجأ أحياناً لسوء الظن لأنه يعتبر اختصار للوقت في التفكير و التفتيش عن الأسباب و الإحتمالات الأخرى ( نروح على اول فكرة تخطر على بالك و ممكن تخطر على بال الياهل ) فكرة ساذجة و غالباً فيها سوء ظن

[بوفاطمه]

جهات الاختصاص هي الي تتولى بالموضوع.

[BoFahed]

جل من لايسهو سبحانه
والله الواحد ايصير انه ينسى عياله في السياره
خاصة اذا كانوا وايد وواحد منهم نايم ورى:rolleyes2:
نسأل الله أن يصبر أهل البنت يعوضهم خيراً مما فقدوا..

صدقت وبحكم معرفتي بالتفاصيل والاب لانه عيالي وعيال اخواني يدرسون بنفس المدرسة ابو البنت باكستاني بريطاني مسلم مدرس للرياضة وامها باكستانية مسلمه وزوجة لاب افريقية مسلمه مدرسة في نفس المدرسة وراحت ام المرحومه و كلمت الشرطة علشان يفرجون مرة زوجها في التحقيقات لانها توها ربت ومخلصة اجازة امومة ومداومة وعندها رضيع في البيت ومسامحتها وقالت هذي مثل اختي مالها ذنب

جزاك الله خير يا كاتب الموضوع الموضوع جا في وقته لانه الصراحة كمية الاتهامات واللعن والدعاوي اللي جات على مرة الاب بشكل غير طبيعي من الثواني الاولى للخبر قبل ما تطلع نتايج التحقيق من الجهات المختصه وتنعرف الحقيقة واتهام بابشع جريمة وهي القتل العمد ولا حول ولا قوة الا بالله

الله يرحمها ويتقبلها طير من طيور الجنه على فكره اسم البنت المرحومه فردوس وهي صديقة بنت اخوي وامها بعثت رساله لكل للي يعرفونها قالت بنتي فردوس وسبقتني للفردوس

عسى الله يثبتها ويصبر قلبها

[Hamad5882]

معاك ان سوء الظن شي غير محمود
بس غصب عنك تسئ الظن من خلال التجارب اللي صادفتك في الحياة تضطر لذلك الى ان يثبت العكس.
اذا قصدك التحليل والتاويل والتفسير هذا يندرج تحت مسمى (كلن يرى الناس بعين طبعه)

[BoFahed]

معاك ان سوء الظن شي غير محمود
بس غصب عنك تسئ الظن من خلال التجارب اللي صادفتك في الحياة تضطر لذلك الى ان يثبت العكس.
اذا قصدك التحليل والتاويل والتفسير هذا يندرج تحت مسمى (كلن يرى الناس بعين طبعه)

ان بعض الظن اثم

[المحاميه]

انا اشهد ان موضوعك عالجرح
وانا انظلمت من موقف للاسف شابه سوء الظن .. وليت اللي مايعرف التفاصيل يسأل قبل لايحكم وحتى لو تظن السالفه واضحه .. اكيد فيه تفاصيل الواحد مايعرفها فليش يحكم عالظاهر؟


قال تعالى:
" يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىظ° مَا فَعَلْتُمْ نَادِمِينَ "

[الشفق الحالم]

انا اشهد ان موضوعك عالجرح
وانا انظلمت من موقف للاسف شابه سوء الظن .. وليت اللي مايعرف التفاصيل يسأل قبل لايحكم وحتى لو تظن السالفه واضحه .. اكيد فيه تفاصيل الواحد مايعرفها فليش يحكم عالظاهر؟


قال تعالى:
" يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىظ° مَا فَعَلْتُمْ نَادِمِينَ "

انا للعلم مب وحده مب واحد.. :nice:
وانا نفسج انظلمت واسيء الظن فيني ، والله ان هالشي يولد كره وبغض في القلب تجاه الشخص اللي ظلمج وصعب اني اسامحهم

[الحياة الخالدة]

جل من لايسهو سبحانه
والله الواحد ايصير انه ينسى عياله في السياره
خاصة اذا كانوا وايد وواحد منهم نايم ورى:rolleyes2:
نسأل الله أن يصبر أهل البنت يعوضهم خيراً مما فقدوا..

اللهم آمين
سبحان الله .. كلامج في محله
و صارت مع أخوي مرة .. رادين البيت متأخرين هو و مرته و عياله
نزلوا من السيارة تعبانين حدهم و كل واحد راح غرفته ينام
بس أخوي بالعادة يشيك على عياله قبل لا ينام
دش غرفة البنات ما حصل وحدة منهم .. سأل أختها وين فلانة قالت مادري وهي نعسانة كلش .. تقول عبالي نزلت معانا
راح يدورها حصلها نايمة في السيارة .. نزلوا وما انتبهوا عليها

الشاهد أن هالأمور ممكن تصير من غير قصد ولا نية مبيتة .. والله أعلم بالسرائر
الله يحفظ الجميع .. و يكفينا شر سوء الظن

[المحاميه]

انا للعلم مب وحده مب واحد.. :nice:
وانا نفسج انظلمت واسيء الظن فيني ، والله ان هالشي يولد كره وبغض في القلب تجاه الشخص اللي ظلمج وصعب اني اسامحهم

مافهمت .. مب واحد ومب وحده .. ههه عيل انت شنو؟


اختي او اخوي .. انا مش معاك في ان تكره الشخص اللي اساء الظن فيك .. معليه فيه امور في ظاهرها بداهة تجلب سوء الظن للاسف .. فاذا هو ماحاول يعرف الحق ويعرف التفاصيل ظناً منه انه فاهم الموضوع صح.. فانت/انتي بادري ووضحي السالفة وحطي نقاطج عالحروف .. وبعدين حتى لو خذ عنج فكرة سيئة تقدرين تغيرينها مع الوقت باثبات عكس ذلك وباسلوبج وطريقتج .. وبعدها بيتيقن الشخص ان مستحيل هالفعل يصدر من هالانسانه

والسلام خير ختام :tease:

[مهرة]

^^

والي يقولج انه في ناس صدق تحب سوء الظن.!!

وتسيء الظن على أسس معلومات وضيعة تم جمعها على لسان فلانه وفلتانه وحتى لو بين انها غلطانه لا يمكن تتراجع عن غلطها وتكابر وتكمل إنغماسها في متاهات الظنون السودا والصدور المليانه أعوذ بالله أهم شي ماتنزل كلمتها القاع والي قالته هو الصح وان زاد عليها اللوم تغير السالفة ولا تغيب لها كم يوم وترجع تلطف الجو بس بطرق غير مباشرة.!

اختي الشفق الحالم يعطيج العافية على هذا الموضوع وللأسف اختي بيتم يحاصرنا دام ان القلوب لآهية وسآهية والله يعينا على سوء الظن والوشاية لأنهم وجهين لعملة واحدة.,

وانا ماطلع نفسي من هالسالفة قد تعرضنا لسوء الظن سواء فيني أو مني والحمدلله تداركنا هالمرحلة بكثير وتعلمنا وكبرنا راسنا.

[الشفق الحالم]

وحده مب واحد آسفه الكيبورد يشير ههههه

[بوخالد911]

الله يعوض اللي راح
ونستفيد من الأخطاء.