إستفسار عن أفضل مقاول و إستشاري

[الكفــــــو]

بسم الله الرحمن الرحيم

السلام عليكم و رحمة الله و بركاته ...

يا إخوان يا أهل الفزعة

أنتهيت من تصميم الخرايط وجميع الموافقات والإشتراطات القانونية

بقى البحث عن مقاول و إستشاري إشراف شطر أمينون يخافون الله ، و أسعارهم معقولة

من واقع تجاربكم وإطلاعكم و خبرتكم بما تنصحوني في بيت العمر

ذكروا لي بعض الأخوه مقاولين كـ ( وارث ، شركة النمر ، شركة المحدار، شركة طيف )

فما هو رأيكم بهم ومن تعاون معهم ؟

[معماري قطري]

ما يمنع بعد تشوف شركات قوية ومعروفة ككونسيرف + حمد بن خالد بن حمد + الأنصاري + حسنسكو + ييلز أند أندرو

وفيه واحد بنى مسجد في منطقتنا من النعمة وبنيانه وتعامله كثير زين شركة علي بن محمد وهو المالك والمدير يداوم فيها بين المغرب والعشاء في الغالب

كونسيرف جربناهم مرات كثيرة وقمة الجودة وكلهم لازم تحط لهم مواصفات واضحة ومخططات صحيحة حتى ينفذون وقبلها يسعرون صح .. إتش كي اتش كذلك هم بنوا بيتي .. وعندك بعد شركة مافا في شارع آل شافي سووا لي شغل بسيط ولا رضوا ياخذون مقابل ومالكها ومديرها قطري محترم وزميل لي بس ما جربتها في شغل كامل

شركة أخيرة يديرونها باكستانيين ويشتغلون بذمة وصبغوا بيتي من كم شهر وسووا صيانة .. كان أحد الأقارب متفق معاهم بس يقول بطيئيين كثير وسحب العقد منهم وأعطى شركة العلي للمشاريع ووفر في السعر النهائي ومؤكد في الجودة .. وشركة العلي للمشاريع شركة قوية وبنت مجمعات كبيرة وساهمت في بنيان كثير للدولة ومديرها محمد بن راشد العلي وهو مهندس معروف

المكاتب كثيرة وذكرناهم كم مرة بس لازم تهتم بعقدك معاهم وتطلب اشراف فعلي مب بس توقيع مثل ما يطلب الكثيرون

[الكفــــــو]

تسلم طال عمرك

[معماري قطري]

تسلم طال عمرك

الله يسلمك الشيخ

دوم تأكد الأفضل غالي وفيه شركات واستشاريين كذلك يعتذرون من البداية بسبب عدم قبولهم مشاريع صغيرة .. مثل حمد بن خالد ومدماك والكات وهندسة البناء القطرية .. هذي الشركات وقت الأزمات تسرح عدد من عمالها الغير جيدين وتفنش وتسفر البعض ولا تاخذ مشاريع صغيرة

اللي كتبت أسماؤها مجربة ومتوسطة السعر وعالية الجودة ومناسبة لبنيان فلل ومشاريع صغيرة .. شركة ييلز أند أندرو هي شركة أمريكية داخلة بالتضامن مع شركة تابعة لهندسة العمارة القطرية ونسيت كم عدد عمالهم وموظفيهم اعتقد 1600 .. سعروا مرة لقريب لي بسعر كثير جيد وكذلك لصديق وعندهم جدية واضحة .. بنوا قبل الاندماج لنا بناية سنة 1998 وكان اسمها جي ال سي وما واجهنا معاهم تأخير ولا تقصير ومشاكل الصيانة كانت قليلة جداً وبسبب سوء الاستعمال وتحويل معرض لمطعم وعمل مطبخ يسرب منه الماء لغرفة الكهرباء والمصعد .. غيرها ما فيه مشاكل والحمد لله ومقربين نكمل عشرين سنة

[بوخالد911]

مووووفق.

[الكفــــــو]

وياكم جميع

هل من نصائح من الغير و لاقصور من اللي شاركوا

[بوحارب]

انصحك تشوف حد من ربعك مجرب وباني وتاخذ المقاول حقه

احسن حل

[ashhal_q]

في شركة اتعاملت معاهم اسمها جفرا .. ولهم مشاريع في المطار والوكره ... اذا لك خاطر اطرشلك رقمهم ...


بالتوفيق ... وفالكم طيب

[مرتبش]

واستشاريين؟

[hamadazoz]

شركة الصباح , العفيف غالي شوي ,المانع هذي شركات زينة انا افضل شركة الصباح من واقع تجربة

[معماري قطري]

واستشاريين؟

الاستشاري المفروض تعينه قبل المقاول والمقاول تتفق معاه عن طريق الاستشاري

الأفضل غاليين ومشغولين بس جرب حظك وفاضل بينهم .. اللي اسمع إنهم مختصين فلل العلي للاستشارات الهندسية وجماعة العمارة العربية يشتغلون وايد مع الأوقاف وجيدين .. رحت مع واحد من الربع حق استشاري كنت انصح به قال لي ندفع 8 ملايين رواتب شهرية تبينا ناخذ فلل تعرقل شغلنا وفايدتها بسيطة ومعاه حق

السد يقولون زين بس ما جربتهم والاتحاد واللستة قبل حطها إخوي شموخ دائم مع تصنيفاتهم وأرقامهم وأكيد موجودة في موقع البلدية أو التخطيط .. بس ما عجبني تصنيف بعض المكاتب ( أ ) وهم ما يستاهلون لسوء شغلهم ولسرقاتهم عينك عينك

في النهاية المكتب المؤسس صح وفيه كل التخصصات وعقده واضح وتضيف عليهم إن يصورون ويرسلون لك وتس أب عن كل زيارة حتى تتابع وتتأكد إنهم يمرون .. وممكن التصوير مقاطع فيديو وكلام ما يتعبه بكتابة وتقرير مفصل مع إن هذا جزء من شغله

[Rayane]

استفسار ياخوان عن تسعيرة البناء.

اللي اعرفه انهم يسعرون بالمتر... واحد من الاخوان نصحني بالعفيف كجودة. عندكم خبر بكم.....؟

وكم بيكون متوسط سعر المتر في السوق الحين حق فله + بنت هاوس + مجالس خارجيه + ومطابخ خارجيه

مشكورين

[معماري قطري]

استفسار ياخوان عن تسعيرة البناء.

اللي اعرفه انهم يسعرون بالمتر... واحد من الاخوان نصحني بالعفيف كجودة. عندكم خبر بكم.....؟

وكم بيكون متوسط سعر المتر في السوق الحين حق فله + بنت هاوس + مجالس خارجيه + ومطابخ خارجيه

مشكورين

شوف يا اخوي اللي يسعر بالمتر يكون مقاول ظالم نفسه وفي الغالب يسعر بنيان عظم ويخليك تتورط مع الباقي وهم يصلحون شغله .. وكثير ناس داخلين المقاولات ومكتبهم سيارتهم وعمالهم من السوق .. قلة يسعرون بخبرة وشوية واقع وذيلا المقاولين الطيبين القديمين في السوق واللي ما تهمه التفاصيل ويحاسبك بالاقناع وحسب الاتفاق

وهناك المقاول المختص واللي عنده مقر كامل وموظفين تسعير بدرجة حاسب كميات .. يسوي تحليل لكميات بيتك ويحط بنود حسب المواصفات .. كثير منهم يخلونها مخفية عنك وقلة لو تطلبهم يوضحون لك وحتى يقولون لك ربحنا على هذي الشغلة من كذا لكذا .. قعدت مرة مع مدير شركة وشغل لي الكمبيوتر وتم يراويني الحسابات وكيف في بعض المشاريع يطلعون خسرانين وبعضها كيف يقل سعر المواد ويطلع ربحهم أكثر من المتوقع وكله بحساب كميات

إعذرني على هذا المثال لو بتروح تشتري قماش ينباع بالمتر ومواصفاته واضحة ويوضحها لك البائع وبعد تحتاج خبرة ولازم تلف على كم محل .. البنيان عبارة عن بنود ولكل بند تفاصيل خاصة .. بعض الاستشاريين مواصفاتهم مبهمة وتخوف المقاول .. مثل يقول لك الأبواب لازم تكون خشب تيك سولد أو مصمت بالعربي والتصميم حسب إختيار المالك أو يحدد معدل سعر يكون غير واقعي .. المقاول الذكي يحط احتياطه وممكن يسعر سعر مبالغ فيه لو وافق المالك يكون ضامن ربحه ولو المالك ماطل في التفاصيل وبغى كذا وكذا وشغل متعب بعد يكون المقاول مغطي نفسه .. لكن الاستشاري الشاطر اللي يحدد اتفاق المقاول على ترتيب الفتحات بطريقة هندسية وتفاصيل محددة ويذكر بأن بند الخشب سيتم الاتفاق عليه مع مقاول مختص وعلى المقاول حماية شغل المقاول المختص وتوفير المساعدة له في كذا وكذا لو لها ضرورة يعني

مقاول الخشب أو المنجرة بيوضحون لك تصميم معين وبيعطونك حتى عينات خشب وكذلك مقاول المطابخ وكذلك مقاول الألمنيوم أو اليو بي في سي وبتكون متفق اتفاق واضح وبحضور الاستشاري الفاهم وتحت اشرافه .. وطبعاً عمل المقاول الأساسي محدد وصعب يتهرب منه وناطوره في الموقع والفورمان موجود ويجهز حق كل الترتيبات هذي

الجبس كذلك شغلة تخصصية والصبغ ومن رأيي حتى الصبغ نخليه على المقاول الأساسي الا لو نبي نبالغ ونسوي شيء صعب .. يبقى البنيان من الهيكل لين الطابوق لين التمديدات لين البلاستر ونوعيته وطريقته والاشراف عليه كله مذكور ومن واجب المقاول .. وفي رأيي لو توفقنا بمقاول جيد سواء يشتغل معاه مقاول ثاني بالباطن أو هو مختص حتى في شغل الكهرباء والصرف الصحي وتمديد المياه نخلي هذي كلها في اتفاق واحد

مقاول التكييف هذا تخصصي ومن الواجب إختياره من بدايات البنيان حتى يعطيك متطلباته وحتى يتدخل في حسابات التكييف وتحت اشراف الاستشاري وأَيٍ كان نوع التكييف عندك يحتاج تصميم ودراسة ويتابعه الاستشاري

التسعير بحسبة بسيطة كل متر يختلف حسب موقعه من البيت .. لو بنتكلم بس عن الأرضيات .. بعضها ب 30 وانت رايح لين مبالغ خيالية للمتر المربع بس تكلفة المواد .. بعض الأرضيات الغريبة سعر مترها سعر بيت كامل صدقني .. لكن كمعدل موجود في سوقنا من 30 الى 10000 لبعض أنواع الغرانيت في 2004 محصل نوع ب 7500 .. وكمعدل حالي للبنيان عظم بدرجة جيدة من 1500 لحد 2000 ريال ورخيص أكيد بتحصل ناس تحرق الأسعار لكن شغلهم غش ويقنعك ما تحط حتى استشاري

تشطيب حسب كلام مدير مكتب هندسي قال من 4000 لين 6000 هذا شامل البنيان كامل .. والحكومة حالياً تركز على ضبط المواصفات والالزام بها وهذا متأخر وايد كان المفروض من زمان .. والظاهر اللي مأخرهم فكرة الأسعار بتطير .. لكن نتكلم عن ديمومة وبناء مستدام ومواصفات رخيصة وشغل عشوائي هذي معادلة ما تمشي ولازم تطبيق المعايير الهندسية كاملة سواءً على المواد والا العمل الهندسي والا مجال المقاولات وخبرات البناء .. لازم نوصل لمرحلة كلمة ( حسب أُصول الصنعة في العقد ) تكون محددة بالقانون وهذي الأُصول مفصلة تفصيل كامل .. وحتى بدون ذكرها يفترض هناك حالات افتراضية ما نحددها في العقد مثل المواصفات القطرية والقوانين القطرية .. طول ما المقاول يشتغل في قطر مجبور يطبقها وطول ما هو مقاول وبينك وبينه اتفاق وتدفع فلوس لازم يسوي شغله حسب القوانين والاصول .. مثل الطريق له قانون اللي يتجاوزه واضح ولازم يعاقب كذلك عملية البناء

[الكفــــــو]

حد مع أو تعامل مع شركة سبورت فيجن ؟