استفسار عن حديقه المنزل

[م. عبدالعزيز]

السلام عليكم ورحمه الله وبركاته

اقوم حاليا باعداد مخططات منزل لي لأرض على شارع واحد واجهته 15 متر وعمقه 35 متر ، وكنت محتاج يكون عندي حديقه صغيره لاني اشوفها من احتياجاتي الاساسية ، وسويت حوش صغير في واجهة البيت (مساحة 15 * 8) ، وبعد المناقشه ودراسه المخطط اتضح بحاجتي لغرفة سائق وتكون على زاوية البيت للشارع (على اساس افتح لها باب للخارج مباشرة). وبهالطريقة تقريبا ضاع الحوش في واجهة البيت .

عقبها المهندس اقترح علي اسوي حوش ورا البيت ، وبالفعل رتب التصميم مره ثانيه وخله الحوش بالواجهة 6.5 * 15 وورا البيت سوالي حديقه صغيرة اضافية مساحتها 10 امتار * 9.5 متر وبجانبها الملحق خلاها بالطول بدل ماتكون بالعرض. على اساس ان يكون الحوش الامامي فيه ممشى وزرع واحواض زراعه والخلفي ساحة مفتوحه استغلها باللي ابغيها.

وايضا اقترح علي المهندس ان تكون غرفة جلوس العائلة (المعيشه ) مطله بشباك كبير على الحديقه على اساس اللي قاعد داخل يطالع الحديقة واليهال. وهي فكره جديده. وارى انها نوع من الخصوصيه .

السؤال:
هل فكرة الحديقة خلف المنزل جيدة؟ ماهي تجارب الاشخاص اللي سووا الحديقة ورا المنزل؟
وهل المساحة 10 *9.5 متر اقدر استغلها بحديقة ممتازه؟ (ماعندي مشكلة من ناحية الميزانية اذا كان المقترح worth) احب يكون بالحديقة كمن شجرة وجلسه بسيطة ومكان شوي وعلى الزاوية شلال.
هل من حل آخر لغرفة السائق حتى استغل المساحة بالواجهه بشكل افضل؟ يهمني كثيرا ان يدخل ويطلع السائق مباشرة للشارع. مع العلم اني ناوي اسوي سرداب.
هل ترشحون لي مكتب استشاري ممتاز لاحتياجي غير المكاتب التالية اللي مريت عليها (الاقصى، المها، الرشيد) ويكون عنده أفكار مبتكره عنده خبره بالاحتياجات القطرية .

وشكرا

[معماري قطري]

عليكم السلام ورحمة الله وبركاته

لو تبغي اقتراحات أكثر مستعد يا رفيق المهنة .. شوف موضوع مراجعة المخططات المعمارية وفيه أفكار كثيرة ومستعد اراجع مخططاتك لو تحب

بالنسبة لغرفة السايق بابها ينفتح على برا في بعض المناطق يسمحون وبعضها لا .. بيت الوالد مسوين بس طلبوا منهم ارتداد للحائط بحيث الباب ينفتح على أرض البيت بس يكون خارجي قرب الباب الكبير

حل ثاني ممكن تسوي الغرفة نص بيسمنت بحيث تكون نازلة نصها تحت الأرض ونصها فوق وتدفن حولها مثل التل وتزرع .. تحتاج عوازل جيدة أكيد

المكاتب القوية غالية .. جرب حظك مع ديوان العمارة - والسد يمدحون فيه ناس وايد - والعلي للاستشارات الهندسية - جماعة العمارة العربية - اتحاد قطر للتخطيط غالي بس متخصصين وتقدر تفاوضهم - الاستشاريون العرب محرم باخوم والا الفرع الثاني نسيت اسمه

خايف اقول المكاتب السيئة وما تحصلوني بينكم واللي قلتهم غالبيتهم لي تجربة معاهم .. شوف بعد غلف ديزاين كونسبت هذا قبل جسر بو عبود وانت جاي من غرب متجه شرق .. مكتب ابراهيم الجيدة بعد جيد ( المكتب العربي للشؤون الهندسية ) ومكتب عمار عندهم بارتنرشب مع مكتب أرابيسك الأمريكي بس قالوا لي ما نبي بيوت وتقريباً كل اللي ذكرتهم غاليين ولا يصممون بيوت عادية بس جرب حظك ما تخسر شيء

[sweet qatar]

عليكم السلام ورحمة الله و بركاته




غرفة الدريول ممكن تبنيها مع البيسمنت لكن ما تكون متصلة بداخل البيت (باقي البيسمنت) ، ولها مدخل خاص

https://s-media-cache-ak0.pinimg.com/736x/6f/de/74/6fde746fdabfb6ed92a66729b86c3c98.jpg


بهالطريقة بتاخذ حيز اقل من الحوش وما بتشوه المنظر



اما بالنسبة للحديقة خلف المنزل فهي فكرة ممتاااااازة وانا من اشد مؤيديها (عن تجربة)

لانها توفر لك جو رايق وخاص جداً ، و ممكن تخطط حديقتك مثل ما تحب ولكن باعتبارات معينة منها حركة الشمس

واهم شي التنفيذ يكون بالمستوى الي تطمح له

بصراحة اغلب البيوت هني الشلالات فيها تشوه الحديقة ما تجملها

وبما ان حديقتك صغيرة .. فتحتاج حرص اكبر في مرحلة التصميم والتنفيذ

http://www.floatproject.org/wp-content/uploads/2011/10/garden-design-ideas-for-small-backyards.jpg




موفق ان شالله

[م. عبدالعزيز]

السادة الأفاضل

المهندس / معماري قطري
sweet qatar

كل الشكر والتقدير على ملاحظاتكم الهامة وانا سعيد جدا بمساعدتكم لي كوني جديد في البناء وتصميم المنزل

فكرة غرفة السايق في البيسمنت فكرة جيدة وتميت افكر فيها وبتخليني استغل السرداب صح ، لكن مب متخيل شلون بيكون واجهة البيت (3 مداخل : واحد للمجلس والثاني للصاله والثالث لغرفة السايق) على اساس اني ببني بارداد متر ونص عالجنبين.

بالنسبة للحديقه انا سعيد اني حصلت حد مجرب الفكرة ومستفيد منها ، لاني ودي اصمم الفيلا بشكل مميز عن الباقي.

راح ارسل لكم المخطط الاخير اللي عجبني من احد المكاتب المذكوره اعلاه على الرسائل الخاصه عقب شوي ، وبكون اسعد لو اشوف اقتراحاتكم وافكاركم لمساعدتي للحصول على افضل تصميم واكثر استفادة من المساحات.

وشكراً

[معماري قطري]

شفت التصميم اخوي عبدالعزيز وان شاء الله بيطلع حلو وملموم .. البيسمنت عندك معمول بالطريقة التقليدية .. الدور الأرضي مرفوع والنوافذ قريبة السقف وغالبيته مساحة مفتوحة .. جزء غرفة السائق ممكن يكون في الطرف اليمين وقريب من مواقف السيارات ومتر ونص كفاية وزود تحتاج نصها لبايبات الصرف والنص الثاني لدرج لتحت وتعزلها عن باقي البيسمنت

بالنسبة للعتبات للمداخل كثيرة والسبب ارتفاع الدور الأرضي حتى تترك مسافة لدرايش البيسمنت .. تقدر تخلي الدور الأرضي بإرتفاع بسيط 3 عتبات على الكثير وتسوي بلكونات نازلة للبيسمنت .. صج متر ونص مسافة بسيطة وضيقة بس تقدر تسوي لو تحب حديد فوق للمرور حول البيت وفيه فتحات يدخل منها النور والهواء لمناور البيسمنت .. تقدر تسوي المناور بعمق كامل أو بنص عمق حق دريشة عادية

حتى الرامب عندك 4 متر وارتفاع الدور الأرضي على فرض كل عتبة 15 سم بيكون 1.05 متر يعني سلوب حول 26% وهذا خطر للكرسي المتحرك المعقول 15% والستاندرد الطبي حول 7%

المطبخ الخارجي ترتيبه في رايي غلط .. الأحلى ينفتح على الحديقة ولو تسمح نحطه في موضوع مراجعة التصاميم المعمارية أكيد بتستفيد آراء أكثر ونتابع هناك أفضل .. شرايك؟

[sweet qatar]

الشكر لك اخوي على أسلوبك الراقي في الخطاب :)


و بصراحة فكرة غرفة البيسمنت جات من تعليق استاذي معماري الله يعطيه العافية


ان شالله بشوف مخططاتك وارد عليها

عندي لك اقتراح دامك تبي الشي غير تقليدي

بس لازم ادخل من لاب توب عشان اشوف المخططات و اشرح لك عدل


بالنسبة للمكاتب ليش ما تشوف مكتب تصميم في دبي او الكويت

أشوفهم مبدعين اكثر في هالمجال


بعكس مكاتبنا الي تصاميمها تتشابه وبس يعدلون عليها!

[r3aad]

تقدر تخلي غرفه السايق على يسار الباب الرئيسي وتخلي الباب الرئيسي مسقف نفس القصور وبهالشي تكون خدمت الواجهه وضبطت غرفه للسايق وغرفه السايق ظ£*ظ£ تكفي