مطلوب فيلا او بيت شعبي

[الخيالة]

مطلوب فيلا او بيت شعبي للإيجار
الايجار بين 10 الاف لين 12 الف
الغرف اقل شي 4 غرف
المناطق
المطار القديم الهلال الثمامه عين خالد

نحتاج ضروري قبل العيد
وعندي استفسار و مساعده بما أني ماعرف وايد في امور العقارات انا حصلت فيلا عن طريق موقع بروبرتي فايندر قطر اللي يحطون إعلانات بيوت الايجار حصلت فيلا 5 غرف في المطار القديم و الاجار 12 الف رحت مع امي و ابوي شفنا البيت و قلنا اوك لما راح يوم ثاني اخوي ان بعد يشوف البيت الهندي سال انتوا كم عددكم لما قال 7 ان هو و زوجته و أمه وابوه و ثنتين خوات قال الحين بيصير اجاره 15 الف لان انا فكرت انتوا 4 أشخاص من متي يحسبون جذيه؟ شلون بعرف نصاب او لا و قال اقل شي عقد سنتين وأجار شهر مقدم و نص اجار للمكتب ندفع يقول راعي البيت مايبي يكلم حد بس عن طريقنا و هو لما عرف عددكم سبعه قال بيزيد الاجار و من هالكلام

[مخطط قطري]

مب من حقه يسال انتم كم عددكم انتم مب حاجزين فندق بيت ونصيحتي لج السوق مافيه كنترول وصاير لعبه خلج اذكى منهم قوليلهم احنا بس 4 ومشي عليهم هالنظام مع انه سؤالهم ماله خص بس مستغرب هل معقوله لحد الان ماحصلتو ايجار مناسب مش بس انتي اعرف ناس وايد تبي فلل تاجرها ومب محصله عيل الكلام الي نسمعه ونشوفه من هبوط ونزول وين راح؟؟؟؟؟

[الخيالة]

ماعرف وألله
الحين قلنا له و ناطرين الرد و للحين مافي رد

[أم عزوزي]

الله يعينج اختي

نفس الحال والله صوبنا ,,, لم كلمنا المندوب جان يقول راعي الحلال مايبي قطريين يخاف منهم انهم ما يلتزمون او يسددون الايجار !!! والطامة الكبرى لمن سالته ليش ايش جنسيته قال قطري!!!

ليش يعني من متى هالتفرقه .. احنا عيال الديره الزم ان نلاقي بيت يضفنا لحد ما نخلص أمور البنيان وغيره

وفوق هاي يرفعون عليك الأسعار ويكلمونك تبي ولا كيفك

شالسالفه بالضبط!!!!!!!!!!!!!!!!!!!!

[الخيالة]

كلمنا الهندي اليوم قال نفس الشي ان صاحب البيت قايل اذا اخوي و زوجته بيسكن بس مع عيالهم 12 الف و اذا بيجيب أمه و ابوه و اخته اجار بيصير 15 الف

[<اضرب واشرد>]

كلمنا الهندي اليوم قال نفس الشي ان صاحب البيت قايل اذا اخوي و زوجته بيسكن بس مع عيالهم 12 الف و اذا بيجيب أمه و ابوه و اخته اجار بيصير 15 الف

السلام عليكم
أقترح التالي:
ماعليكم من الهندي وكلامه، عليكم من (سعر السوق)، اعرضوا بيانات الفيلا على وسيط أو وسيطين (المنطقة، عمر الفيلا، مساحة الأرض، عدد الغرف ..) وخلوه يقيّم لكم الإيجار، إذا كان 15 ألف أو أكثر .. فعرض الهندي مناسب وفي حدود السوق.

لأن ماندري الحين هو خفّض الإيجار لـ 12 رحمة منه
ولا رفعه لـ 15 طمع منه؟
لذلك اعرضوها على وسطاء يقيمون الإيجار المناسب، حسب خبرتهم
وبعدين فاوضوا الهندي ينزل لكم لـ 13 - 13.5 / شوفوا غيرها

[الخيالة]

مشكور اخوي اهمه اصلا حاطين اعلان ان اجاره 12 الف ريال عشان هاي كلمناهم و لما شفنا البيت نفس الشي قال 12 الف يوم ثاني لما اخوي قال بيودي امي تشوف البيت قال له ليش انت في حد معاك غير زوجتك و اثنبن من عيالك اخوي قال أمي وأبوي واختي قال لا عيل صاحب البيت قايل اذا اكثر من عائله 15 الف ريال

[busnaidah]

مافيه أي شي في عقد الإجار يلزمكم بعدد محدد. المالك يلزمكم بعدم إعادة تأجير العقار وبس.

[الخيالة]

مايقول جذيه الهندي يقول صاحب البيت قايل لي جذيه و مب راضي احنا نكلم صاحب البيت هو بس يتواصل

[captin]

النصيحة ابعدوا عن هذا المؤجر

ماله حق يحدد كم شخص يسكنون في البيت .

وماله حق يغير قيمة الايجار من 12 الف الى 15 الف ريال دام حاط اعلان رسمي بموقع الشركة .

للأسف مافي مصداقية ومحد مخرب سوق العقار الا الدلالوة والوسطاء
راعي العقار مغيب عن الموضوع .

جربوا حطوا انتوا اعلان بمواصفات العقار اللي تبونه وبالقيمة المناسبة لكم والمناطق المرغوبة
واكتبوا في الاعلان مطلوب فيلا بمنطقة كذا عدد غرف كذا بسعر ايجار لايزيد عن مثلا 12 الف ريال لعائلة قطرية .

والله الموفق .

[الخيالة]

الله كريم مشكور ع المرور

[الخيالة]

اتمني إغلاق الموضوع

للاسف محد قدر يساعدني و اضطرينا نأجر بيت و الاجار غالي بس شنسوي ماكان عندنا وقت و رمضان و حر و الوالد تعب وايد ماقول غير حسبي الله و نعم الوكيل في صاحبة البيت اللي كذبت علينا علي حسب الورقة اللي كانت حاطه اخر وقت لنا في العيد و عقب بيهدمون البيت خلاص و لين يومكم امر من عند البيت لا هدم ولي شي و الباكستاني اللي كان ساكن معانا فوق للحين موجود و اهيه بهدلتنا بهالطريقه و كانت تدري بظروفنا ماقول الا حسبي الله و نعم الوكيل

[جبر ال جبر]

بكم اجرتووو البيت الجديد ووين!! واضح انه الملاك عنيدين ومتمسكين بالاسعار الغاليه لانهم يعرفون الطلب قوي ع العقار

[الخيالة]

13500 ريال طبعا مع ماي و كهرباء بيزيد بندفع قريب 14 الف او 14 و 500 مع ان نحاول قد مانقدر مانصرف وايد ماي و كهربا اضطرينا بسبة كذبة صاحبة البيت القبلي ماقول غير حسبي الله عليها

[جبر ال جبر]

كان الله في عونكم

[الخيالة]

امين ....

[داااايم السيف]

اختي ترى القانون في صفكم لو ثبت انهم طلعوكم على اساس انهم يهدمون البيت ، وعقب غيروا رايهم عقب ماطلعتوا ، تقدرين تشتكين عليهم ويعوضونكم مبلغ 65 الف ريال
تقدرون تتأكدون من هذا الخبر في لجنة فض المنازعات
روحي اشتكي وحقكم مايضيع ان شاءالله

[الخيالة]

اخوي دايم سيف
مشكور ع الرد
انا ماكنت اعرف شي عن هالقانون اهيه بهدلتنا وخلتنا نغير بيتنا في رمضان في الحر و الصيام و هالشي تعب ابوي اكثر و ماقدر يصوم كله منها حسبي الله عليها واخرتها عرفنا تبي تعدل البيت و تاجر مع ان احنا كننا راضيين تزيد لين عشر الاف بس مانطلع كانت تقول لا بيهدمون مو بيدي و من هالكلام

[داااايم السيف]

رفعي قضيه وباذن الله راح تحصلين تعويض
من رايي لاتستعجلين حتى تتأكدي ان البيت تأجر
عقب رفعي قضيه وان شاءالله*بيعوضونكم

[الخيالة]

ان شاءالله
مشكور اخوي