شوركم بغيت أخذ طراد

[الحمر]

السلام عليكم

أخوكم يبي يشتري طراد للحداق وراح يكون أول طراد وخبرتي في البحر مب لين أهناك فبغيت شوركم بس ابيه حجم وسط لان راح يكون صاف جدام البيت وراح أستخدم القلص للتنزيل فوشو أفضل نوع ومكاين وشو المعدات المطلوبة والأسعار اشلون الجديد ولا المستعمل وهل في فرق كبير.

ويعطيكم العافية .

[البرونزي]

عليكم السلام ورحمة الله وبركاتة

اذا بغيت ل 6 اشخاص مرتاحين خذ لك حجم من 22 الى 24 قدم
وهالحجم مناسب وماتعاني معاه اذا بتنزله من السيف او من الفرضه
والتيدر اهم شي يكون رولات حتى من تريوس وتضرب بريك الطراد ينزل لحاله
وماتعاني اذا كان البحر ثبر ولازم يكون نوعه قلفنايز حتى مايصدي والتيادر
تلقاها في محل دولفن للادوات البحرية
ونوع المكاين الافضل ياماها حجم 85 حصان وعلى حجم طراد 24 قدم لازم تركب مكينتين
حتى يكون سيفتي اذا ماشتغلت مكينه تكون الثانيه شغاله وترجعك لين السيف
وانواع الطراريد كثيره والاكثر رغبه هو الضاعن والدرازي والنورس والرنر
والسموحه على القصور عطيتك المختصر المفيد

[البرونزي]

ونصيحه خذلك مستعمل وتحصل طراريد استعمال خفيف وممشى المكاين ولا شي
لان اذا كل شي جديد بيكلفك فوق 100 الف وانا اشوفها كثيره
وممكن تحصل لك مستعمل وحالته ممتازه والمكاين شبه جديده ومايكلفك اكثر من 50 الف

[مخطط قطري]

مشكور يالبرونزي استفدنا من ملاحظتك بعد اذن راعي الموضوع

[بوخالد911]

موووفقين.

[البرونزي]

مشكور يالبرونزي استفدنا من ملاحظتك بعد اذن راعي الموضوع

العفو ياخوي مخطط قطر وحاظر لك ولجميع المشاركين
تحياتي للجميع

[الحمر]

أخوي البرنزي كفيت ووفيت . بس المستعمل يعني كم سنو سنتين ولا عشر سنين