سناب

[الصغيره]

تبي تعرف جارك

تبي تعرف صديقك

تبي تعرف مديرك

تلميذك

طبيبك

سناب

هذا المغرد الذي لا يمل ولا يتعب

كاشف
معري
فاضح
خلاص ماعاد به ستر ولا سر ولا غموض

فقط ضف الذين حولك

بتعرف من تزوج
من خطب
من سافر
من جاه ولد او بنت
من سكن بيت جديد
من شرى فنجال
من فصل ثوب
من بنشر تايرسيارته
من التهب صبعه
من اوجعه ضرسه
من طاح من العتبه
من استقدم خادمه من ودع سايق
من ومن
فقط شغل اسناب تجيك الاخبار وللاسف صار تعري للبيوت خلاص مابه خصوصيه فلان سافر بروحه لا معه عياله
فلان جاه ولد سموه عبد الصمد
فلان عرسه لا طلق
فلان فرحان لا زعلان

هناك سنابات تعتبرمدرسه مجرد تتابعها ترتقي فكريا نوافذ ثقافيه

وهناك سنابات فضايح متنقله

وهناك سنابات اشاعات ملونه

ولك الاختيار

كم بيت بهذا العيد تعرى ونشر مافيه من رقص وفرحة عيد على الهواء مباشره

حتى الواحد لقد هله بيخطبون له صار بالسناب شف واختار

للاسف للاسف السناب سلاح هدام اذا مسكته يد جاهل مهما بلغ من درجه تعليميه الا انه لا يوجهه الا انسان عاقل يسلطه لخدمة قضيه او نشر وعي او ثقافه نافعه

اخواني اخواتي لابد ان تراقبوا خصوصا الصغار من العايله وما ينشرون

واتمنى من كل واحده عندها سناب فيه رجال او خلط نساء او رجال تحذر من تصوير البعض بدون علمه او نشرشيء خاص مثل الحفلات وما يحدث فيها من رقص او تعري للنساء وتبثه وهي معها عيالها او اخوانها او زوجها او خالها و عمها لانها هنا تعتبر كشفت ستر


وكل مسنب وله ضميره وله يده غدا يحمل خير او يحمل شر


وعيدكم مبارك :victory:

[بريق الحق]

في حد غيري ماعنده سناب !!(:

[بوخالد911]

السناب كاشف الأسرار.

[Rider]

الحمد الله انا ماعندي لا سناب ولا غيره تلفون بس حق المكالمات فقط

[نيساني]

جزاج الله خير اختي على الكلام الجميل



بالنسبه لي عندي بس ماعرف استعمله للاسف


وشكراً

[السكين]

الناس تطور نفسها بالتكنولوجيا بس الكثير يستخدمه إستخدام خاطيء ويلقى باللوم على السناب المسكين ، كحال الإنترنت سابقاً كان مجرد ذكر كلمة إنترنت كفيلة بجعلك شبهة .

[جبر ال جبر]

يالربع نصيحتي لكم صورو الي تبون الا بيوتكم ماله داعي ترى عيب والله تصور لنا الي داخل بيتك شمستفيد يعني نقولك خوش ديكور! ولا ماشاءالله اثاث فندق 7 نجوم ولا قصر زين وبعدين
باختصار السناب صار مرتع وبيئة خصبه لمحدثي النعمه والمهايطيه يصورلي سياراتهم وف العيد ينثر الفلوس كنه ماشاف خير في المجلس ويصورهم مع ربعه
يعني السناب شي حلو خصوصا الي ينشر ثقافته ومثلا زيارته لدوله مانعرف عنها شي او معلومات مفيده
اما تصورلي اكلك ولا فلوسك ولا رقم سيارتك ولا تكرمون نعال انا شمستفيد؟

[جبر ال جبر]

الناس تطور نفسها بالتكنولوجيا بس الكثير يستخدمه إستخدام خاطيء ويلقى باللوم على السناب المسكين ، كحال الإنترنت سابقاً كان مجرد ذكر كلمة إنترنت كفيلة بجعلك شبهة .

اوب ذكرتني يالسكين ،،، واحد من الربع من المتشديين كان يقول التلفزيون حرام وعقب الله هداه وعدل من رايه
ويوم ادخلت خدمه الانترنت في قطر 1996 وقبلها كانا في لندن نستخدم النت حشرنا انه حرام ومايجوز وماكن ذلك الوقت بالانتشار الحالي حتى قوقل ماطلعت ايام ال م ار سي وشبكه الخليفي والفري تل والشبكه كانت ضعيفه دايل اب كونكشن لين نزلنا الباالتوك وغير فكرته تماما وخصوصا ربعنا الي كانو يدرسون برا ودش وياهم وغير فكرته واقتنع انه كل شي سلاح ذو حدين ايجابي وسلبي انت تختار وين تبي والسناب نفس الشي تماما

[الخيالة]

انا كان عندي سناب و كنت ضايفه رفيجاتي و اللي معاي في الدوام و كنت اصور يومياتي بس بعدها بفترة تحسفت و ندمت و فعلا عرفت ان ماله داعي سويت ديليت حق الكل واللي موجودين الحين معاي في اللسته فقط خواتي و اخواني هاي بعد لان مو عايشين في نفس المكان بس عشان أشوفهم و أصورهم امي وأبوي و يشوفونهم اما الباقي اللي كانوا معاي حذفتهم العين حق و الناس مااقول كلهم أكثرهم مايتمنون الخير لبعض لا و أكثرهم متكلمين من ورأي ان اهيه احذفتنا من سناب مع ان قبل لا اشيلهم كتبت ان بسوي ديليت حق اكاونتي و زعلانين من اللي سويته و من هالكلام قلت مايهمني اهم شي انا الحين مرتاحه

[وحيد-الشوق]

انا سنابي كله صحون وقلاصات بس وساعات لقطات من هنا وهناك ومب ضايف غير الاخوان والاصدقاء وبعض الزملاء

[جاسم الدوحة]

ما عندي سناب
ولا تويـتـــــــــر
ولا فيسبـــــوك

عندي واتسأب فقط
ومكالمات عادية

وكلما أراقب الوضع من حولي
أزداد ابتعاداً عن هذه البرامج

أؤمن طبعاً بأن الأمر يعود
إلى كيفية الاستخدام ، وليس إلى البرامج ذاتها

ولكن من باب راحة البال
وكسب الوقت لأمور أهمّ .

[كيلو حديد]

السناب يعتمد عليك لا على من فيه
أحسن الإختيار يصبح منصة علمية مفيدة جدا

أفضل الحسابات الي اعرفها

خالد اليحيا
لحدان المهندي
هادي فقيهي
سلطان المجروب
عبد الله السلوم
عبد الله الميموني
محمد الحاج
علي السند
علياء المؤيد
د محمد قاسم
د بشير

[bohilal191]

عندي سناب واصور كل شي ماعدا بيتي وعيالي ونفسي واللي ضايفهم ربعي وبعض المشاهير اللي عندنا واللي منهم فايدة وشكرا لج وكل عام وانتي بخير

[البرونزي]

لانزلته ولا بنزله افضل القراءه عن البريره وعوار الراس

[Charisma]

http://up.arabseyes.com/uploads2013/19_05_15143201174376731.jpg


https://pbs.twimg.com/media/CeMA9X7WoAEvwT_.jpg

[نفسي عزيزه]

قررت الغي السناب والانستقرام

[راجي الْعفو]

احذفوا هالبرامج و شوفوا الراحة والوقت الطويل اللي قاعد يضيع فيها

[تاجر كشخة]

هههه فعلا السناب فضيحة لكن انا الحمدلله ولا عمري صورت بالسناب لكن المصيبه اذا صار السناب في يد اليهال انواع الفضايح

[معماري قطري]

في حد غيري ماعنده سناب !!(:

انا معاك أبرياء

[معماري قطري]

http://up.arabseyes.com/uploads2013/19_05_15143201174376731.jpg


https://pbs.twimg.com/media/CeMA9X7WoAEvwT_.jpg

أغلبها مواضيع تافهة ما تعتبر أسرار المشكلة اللي فاضي يتابعها ويقراها شيستفيد

[النهار]

انا معاك أبرياء

حطني معاكم في اللسته

[مضارب دوسري]

فالفتره الاخيره صار سناب منبر للشذوذ
باعلاناته التي تجبرك وتعرضها ببوست كبير


لذلك اراه غير مفيد وينبغي ابعاد الابناء عنه لكي لا ينجرفون خلف دعاياتهم

[معماري قطري]

حطني معاكم في اللسته

انا توقعتك معانا وزين صار

[ameeer3]

لا سناب ، ولا تويتر، ولا فيس بوك ، ولا ولا ولا ... الخ ، شاري راحتي ، والاغلب الا الكل يحسدني على ذلك .

واستخدم تلفون فيرتو لانه استخدمه حق المكالمات فقط ، مقارنه بالايفون والسامسونج الي استخدامه حق البرامج التافه افضل.

[سالم الزهران]

مب عندي لاهو ولا انستقرام و المشكلة دوم في الاستعمال وليست في البرامج

[Qt.1]

ما عندي سناب
ولا تويـتـــــــــر
ولا فيسبـــــوك

عندي واتسأب فقط
ومكالمات عادية

وكلما أراقب الوضع من حولي
أزداد ابتعاداً عن هذه البرامج

أؤمن طبعاً بأن الأمر يعود
إلى كيفية الاستخدام ، وليس إلى البرامج ذاتها

ولكن من باب راحة البال
وكسب الوقت لأمور أهمّ .


طلعنا اثنين على بالي بس انا ,,

[بريق الحق]

حطني معاكم في اللسته

بنسوي قروب بلوتوث شرايكم (:

[الصغيره]

فيه حسابات والله مفيده اذا انت اخذتها كمشاركين كتاب او رحاله او مواضيع مفيده

لكن المشكله اللي ماخذين السناب للنشر

وياليت بس ينشروع عن انفسهم لا حتى بزياراتهم يصورون أي مكان هم فيه وينشرون بدون استاذان
وياما ماشاكل صارت

بالعيد كنا قاعدين وقامت وحده تدور بسنابها تروي كل اللي قاعدين عرس فلانه اللي هي مسكينه ماتدري يعني اللي قاعدين شافوا الحناء وشافوا العرس
وللاسف للاسف البنات مستهترات بصورهم الشخصيه عبر مقاطع السناب وكلهم ثقه بصديقاتهم

للاسف برنامج مامنه نفع ويستغل من البعض بطريقه خاطئه

وفيه برنامج اسمه الموجز هذا اذا نزلته من الابل ستور نزل لك كل السنابات للكتاب المشهورين والمواضيع الجيده يغنيك عن السناب بكبره

الحين السناب صار مكان المعايده والتهنيئه حتى

وللاسف حتى الاطفال عشرسنوات سبع سنوات عندهم سناب والامهات يتباهن ان عيالهم عندهم سناب ويستخدمون السناب

يستخدم لكن بحذر واكثر فئه خدمها التاجرات

اشكر اللي ضافوا ردود واللي شاركوا

والصور فعلا معبره عن الحال

[بريق الحق]

عندما نشاهد مثل هذي الأمور وأصبح السناب شات والخ من هذي البرامج هو المربي والقدوة ويتحكم بهم ( الا من رحم الله ) لا نستغرب كيف سيتبع الناس الدجال

[السكين]

اوب ذكرتني يالسكين ،،، واحد من الربع من المتشديين كان يقول التلفزيون حرام وعقب الله هداه وعدل من رايه
ويوم ادخلت خدمه الانترنت في قطر 1996 وقبلها كانا في لندن نستخدم النت حشرنا انه حرام ومايجوز وماكن ذلك الوقت بالانتشار الحالي حتى قوقل ماطلعت ايام ال م ار سي وشبكه الخليفي والفري تل والشبكه كانت ضعيفه دايل اب كونكشن لين نزلنا الباالتوك وغير فكرته تماما وخصوصا ربعنا الي كانو يدرسون برا ودش وياهم وغير فكرته واقتنع انه كل شي سلاح ذو حدين ايجابي وسلبي انت تختار وين تبي والسناب نفس الشي تماما

صادق والله ، كان إمام مسجدنا ما عنده غير كلمة الإنتررررنت والإنترررررنت ويقولها بعصبية .. والمشكلة الكبار واللي ما عنده انترنت كان يصدق كلامه وانه مافيه ولا فايدة .. كان خاطري أطلع المنبر وأقوله ..الإنترنت ممكن يسوي منّـك عالم لو إستخدمته صح ..بس صعب الإقناع هذاك الزمن ..

وأرجع وأقول .. نعيب سنابنا والعيب فينا .. وما لسنابنا عيب سوانا ! :nice:

[راعي الكورفت]

الحمدلله ماعندي سناب ولا عمري حملته ولا أفكر احمله.

تواصلي مع الناس بالتليفون أو واتس آب فقط .

[توشيبا]

انا عندي سنابات مب سناب واحد وكلها فل بشر

شسوي اذا عندي معجبين ومعجبات

والحمدالله سنباتي كلها صياعه وزحف وقلاعه

بس عندي ملاحظه بسيطه اذا حد انسرق بيته واهو مدمن سناب شات لا احد يتشكى

تسافر تقول مسافر وتقول الخدامه عند بيت عمتي

وتقول متى نرجع

وتقول من بيحي يشيك البيت

وتقول ماحب اغير ارقامي السريه من وانا صغير

اشلون ماتبغي الحرامي يبوق البيت وانت مخطط له كل شي