انخفاض اسعار العقارات في قطر..

[qatarman8008]

السلام عليكم..
انا من متابعين سوق العقار لاني ابي اشتري ارض ابني عليها بيت..
لاحظت في الفترة الاخيرة اخر 3 شهور انخفاض سريع في اسعار العقارات وكثير منها ما ينباع حتى مع تخفيض السعر..
كان فيه اراضي في ام قرن والوكير مثلا.. الفوت فيها واصل 350 وراعيها رافض البيع..
اليوم الفوت نزل تحت الميتين ولايزال العرض قائم عادها ما انباعت الى اليوم..
ايضا الفلل المعروضة للبيع بعضهم صار لهم سنتين مصكرين ما انباعوا..
دخلت كم بيت شفت ديكور الجبس بدا يتشقق والطوف بدات تتشقق ايضا وارضية البيت بدات بالهبوط..
طبعا السبب الرئيسي هو ان البناء تجاري تستخدم فيه ارخص انواع مواد البناء..
السبب الثاني هو ان البيت لم يسكن للايجار ولم يباع..
..
كانت هذه المقدمة فقط..
اللي كنت ابي اقوله ان كان كثير من المحللين الاقتصاديين وملاك العقارات ينفون حتى احتمال ان تنخفض اسعار العقارات في قطر..
الان وقد انخفضت.. هم نسوا تصريحاتهم السابقة والان هم ينفون احتمال هبوطها اكثر مما هي عليه..
اعتقد والعلم عند الله ان اسعار العقارات ستواصل الهبوط الى مستواها الطبيعي والغير مبالغ فيها..
اعتدنا دائما على سماع جمله " انصح تشتري الاسعار هذي ما بتشوفها بكرة "
الان وقد شفناها انصح باقي المقبلين على شراء العقارات ان يتريثوا قليلا قبل الاقبال على شراء العقارات
هذا والله اعلى واعلم..
..

[محمد سعيد]

في بيوت عندنا طالبين فيها 3200000 على مساحة 450 متر بعد 6 شهور انباعت على 2800000

واذا استمر السوق في النزول بيوصل 2000000

والبيوت تجارية وماعليها ضمان للاسف ومافي حد يتابع من البلدية جودة البنيان


اذا سو اتمام بناء للبيت المفروض بعد يسون شهادة جودة للبنيان يعطي البلدية تصريح لمتابعة البناء من قبل الشركات والتأكد من جودة شغلها

الله المستعان

[qatarman8008]

في بيوت عندنا طالبين فيها 3200000 على مساحة 450 متر بعد 6 شهور انباعت على 2800000

واذا استمر السوق في النزول بيوصل 2000000

والبيوت تجارية وماعليها ضمان للاسف ومافي حد يتابع من البلدية جودة البنيان


اذا سو اتمام بناء للبيت المفروض بعد يسون شهادة جودة للبنيان يعطي البلدية تصريح لمتابعة البناء من قبل الشركات والتأكد من جودة شغلها

الله المستعان

والله ياخوي موضوع شراء بيت جاهز هذي انخدعوا فيه ناس واجدين..
بسبب البناء التجاري العشوائي..
اعرف واحد شرى له بيت بثلاث ملاسسن وميتين الف..
وتم يصلح فيه من الين دفع حول ثلاثمية الف اذا مو اكثر لان كل شي فيها كان خربان..
الحمامات وانتوا بكرامة تخر ماي والتوصيلات الكهربائية كلها تعبانة..
حتى الطوف اللي كان يبي يهدها يقول بضربة مطرقة وحدة من البتاني يطيح نص البلاستر اللي عالطوفة..

[نمر بن عدوان]

العقار في قطر متضخم عن باقي دول الخليج ولازم ينزل اكثر خصوصا مع اكتمال مشاريع الدوله مثل مشروع لوسيل وبعض المجمعات السكنيه .

[بانغ بانغ]

شيخ نمر لا تعور قلبي .....

شاري ارض في لوسيل والحين انزلت اسعارهم

[qatarman8008]

بخصوص اللي شاريين اراضي لانشاء مسكن خاص لهم هذول ما تضرروا..
اللي شاريين للاستثمار حق المستقبل ف اعتقد لازم يصبرون لين وقت كاس العالم..

[بانغ بانغ]

والله يا قطرمان

كنت ناوي استثمرها بس بابنيها واجأرها شكلي لان اجارة اجبرونا نبني

الحمدلله على كل حال

[بورصجي_جديد]

شهر ظ© راح ينزل العقار اكثر ابو ظ£ مليون ونص بيصير علي مليونين وشوي يعني كله بنزول نصيحه لحد يشتري الاحين

[بانغ بانغ]

شهر ظ© راح ينزل العقار اكثر ابو ظ£ مليون ونص بيصير علي مليونين وشوي يعني كله بنزول نصيحه لحد يشتري الاحين

صح بس اعتقد ان اللي عنده كاش ايخم له كم ارض في موقع استراتيجي

[MAZEN37]

اهم شي تنزل اسعار الاراضي التجاريه

[بورصجي_جديد]

اكثر ناس الذكيه مايشتري الا الي يبي موقع مميز وراعي الكاش الي عنده فلوس لكن الغالبيه عارفين الطبخه وعارفين في نزول واكثر سمساسره الاجانب يحاولون يشوفون مشترين ويعلون سعر البيت والعقار في نزوول

[شموخ دائم]

,

,


مرحبا

اخوي الكريم

شكرا على الموضوع

تعلمنا من سوق قطر الكثير

من 2007 الى 2008 من دخلت المنتدى
وانا اسمع هذا السجال !!
الاراضي بتنزل او الاراضي في ارتفاع

وصلت القمه في 2007 ووصلت القاع في الازمه العالميه في 2009
من استفاد من هذا الي حدث !!!

وفي سنه 2014 الى سنه 2015 وصلنا القمه مره ثانيه في ارتفاع الاسعار
من استفاد ومن وقف يتفرج !!!

والان احنا في انخفاض من جديد !!
هل من مستفيد من هذا الي يحصل !!

بعيد عن السجال والكلام الدنيا فرص و ( عمل )
وها نحن في فرص جديده !!!! هل من متحفز لهذه الفرص !!
ويترك عنه الكلام الي ما يودي وما يجيب !!

والعقارات لها قمه ولها قاع ومن الطبيعي بتجي سنوات ينزل فيها العقارات تدريجي
وفي سنوات بترجع الاسعار الى القمه تدريجي ايضا

وحصل هذا الموضوع 3 مرات الان في ال 10 سنوات الماضيه الى اليوم

الي شرى الله يبارك له في القمه
وسوى خرائط وبناء الارض وسوى عليها فيلا او سكن
فهو استفاد ممن الوقت والان هي جاهزه ( للايجار ) او السكن له

الوقت مهم جدا في الحياه
ولان يتفرغ الى مشروع ( ثاني )

والفرق كله في الارض الصغيره ما يتجاوز من 200 الى 300 الف
وبيعوضه في الايجار السنوات الجايه

والي ما اشترى الى الان
فهذا شي طيب ويقدر يشتري الحين ويسوي خرائط
ويبني عليها بتاخذ معاه وقت ما يقل عن ( سنتين )
بين اوراق وخرائط وبناء

( الوقت ) يا جماعه الخير مهم جدا جدا

والدنيا فرص والان الاسعار ( طيبه ) لمن يريد ان يشتري
ولكن الاراضي الي موقعها ممتاز ( صاحبها ما يبيعها ) لانه يعرف قيمتها ويصبر عليها عادي اذا مو محتاج او مديون
لاتنسون هذا الموضوع

الفرص القديمه والضربات القويه في الربح ( انتهت ) الان السوق
له سعر ومعروف للجميع في البيع او في اعاده البيع
( والربح ) ايضا معروف للجميع

اهم شي الانسان ( يعمل ) ويشتغل

سنه 2015 ماذا دخلت من صفقات !!
2016 ماذا ربحت !!!
2017 !! شنو مخططك وشنو تتوقع تربح من السوق !!
اذا ما اشتغلت في العقار 2016 طبيعي ما بتربح شي 2017 لان
ما يمديك تشتري وتعمر وتبيع او تاجر !!

لاتهدر عمرك في ( الانتظار )

انهيار ما يحصل ولكن يحصل نزول تدريجي ويرجع صعود تدريجي

وهذه الفرص الان بين يديك

لو يرتفع البترول السنه الجايه وهذا متوقع بترجع الاسعار في الصعود

محد يعرف ادني سعر واذا جاتك فرصه في ارض زينه توكل على الله وخذها
الفرص ما تتكرر كثير واذا تكررت الفرصه ما تدري ساعتها ( الكاش ) موجود او لا

:)

,

,

[qatarman8008]

رد جميل اخوي.. ولكن..
ارتفاع اسعار الاراضي والبيوت له علاقة طردية مع ارتفاع الايجارات..
واذا في ناس كثير بيغادرون البلد نفس اللي قاعد يصير حاليا ..
اعتقد ان حتى اللي يفكر يشتري ارض عشان ياجرها بيتراجع عن هذا القرار..
وهذا سبب كافي لنزول الاسعار..

[بوجبر]

كل شي راح ينخفض ...

اسهم...سندات...عقار ...تضخم السلع الاستهلاكية

[بورصجي_جديد]

يا اخوان مب انانيه ولا شي في ناس وانا منهم مب قادر اشتري ارض وبصراحه نفس لحظه ما اتمنى خساره تجار لكن بالعقل والمنطق اقل ارض قيمتها ظ¢ مليون بالوكره او الثمامه حتى شمال غالين بعض الاماكن وفي ناس مثلي مب قادره انا مغ نزول وجعل البيت كحد اقصى مليونين ونص فقط اكثر من هذا سعر خيالي وغالبيه شباب الي مثل عمري مايقدرون يبنون او حاطين لهم قرووض ومايصفى شي من راتبهم الحمدالله راتبي قوي ولكن مابيلخذ قروض واخر شهر يصفالي ظ¥ظ*ظ*ظ* خصوصا لو خذت قرض للارض والبنيان في انتظار النزول يارب والله يكرمني ويكرم غيري بسكن وخصوصا احنا قطرين هم حتى المقيمين الله يوفقهم بسكن

[بن يوسف الثقفي]

العقار قاعد يسوي ريجيم قاسي للوصول الى سعره الطبيعي
اضرب مثال
من بعد قرار كأس العالم كل الناس اللي عاشين على الكرة الأرضية قررو عمل تجارة في قطر
وأكثر شي شدهم التجارة في العقار والذكي اللي عمل مضاربات بالعقار وطلع من السوق بالملايين
وتأكد دام أن تسعيرة برميل النفط تغيرت كل شي راح يتغير سعره خاصة في دول النفط
وشي ثاني قرارات الدول من بعد نزول سعر برميل النفط بأثر على سعر العقار مثل فرض الضرائب

مجرد تحليل خاص والله اعلم

[معماري قطري]

الوقت الجاي للبورصة إن شاء الله والعقار لازم بينزل خصوصاً فيه ناس تفكر تستغل الفرصة قبل 2022 وكلها شهر وكل شيء معمول حسابه

[دايموند]

شكرا ع الموضوع

بس ماشوف في نزول في اسعار الايجارات في المحلات التجارية..ع ايام قبل نحصل محل بايجار 8 الى12 الف مع ميزانين في شارع تجاري ..

اللحين 15الف ورايح وبدون ميزايين بعد

[qtr qtr]

شكرا ع الموضوع

بس ماشوف في نزول في اسعار الايجارات في المحلات التجارية..ع ايام قبل نحصل محل بايجار 8 الى12 الف مع ميزانين في شارع تجاري ..

اللحين 15الف ورايح وبدون ميزايين بعد

العقارات والاجارات التجاريه ماراح تنزل لقلة الاراضي والمحلات التجاريه

[qtr qtr]

بوادر النزول بدا من 2014 وذكرته في نهاية 2013 بان العقارات راح تنزل بداية 2014 والسبب وصول لاسعار اللمت وفلكيه ما منها فايده ربحيه كعائد سنوي او مضاربه .
وغير ان اكثر المشاريع راح تنتهي نهاية 2018 والوافدين والعمال الليموجودين بسبب مشاريع الدوله راح يروحون لبلادهم وهذا راح ياثر على اجار العقارات بزيادة العرض وقلة الطلب والمستأجر راح يتدلع ويتخير بالعقار اللي يناسبه ويأثر معاه قيمة العقار بالنزول لعدم وجود مردود ربح سنوي يغطي من قيمة سعر العقار .

الله يرزق الجميع

[cavok]

اي نزول اي بطيخ أسعار مثل ما هيا وخلونا انكون واقعيين اشوي

[qatarman8008]

بو تقرا موضوعي من الاول بتعرف ان فعلا فيه نزول ونزول ملحوظ ايضا..
ليس كلاما سمعته ولكن من خلال واقع تجربة شخصية..

[ALKASER]

اهم شي خل الاجارات تنزل لانها ضو... خاصة التجارية!
المؤجرين معاندين وما يبون ينزلون

[qatarman8008]

اهم شي خل الاجارات تنزل لانها ضو... خاصة التجارية!
المؤجرين معاندين وما يبون ينزلون

لااااا .. ابشرك نزلت الايجارات..
وفيه ناس بينتهي عقد الايجار مالهم قريب وقاعدين يدورون مستاجرين جدد بسعر اقل بكثير من الاول..
خصوصا مجمعات الفلل..

[qatarman8008]

اشوف في السعودية ايضا انخفاض كبير في سوق العقارا..
اراضي المخططات الجديدة عندهم اللي كانت تنباع ب مليون ونص صارت تنباع باسعار تحت المليون..

[راشد محمد]

ان شاء الله تنزل أسعار العقارات