محل اثاث تفصيل مودرن

[العملة النادرة]

السلام عليكم ورحمه الله وبركاته
حاليا عندي مشروع تاثيث المجلس محتاجه بعض المساعده
اولا المجلس عندي من غرفتين غرفه جلوس + غرفه طعام
غرفه الجلوس دائرية ومريت على ميداس وذا ون ما حصلت اطقم دائرية قريت عن فن الفخار بس بصراحه مب ستايلي ابي شي مودرن من شكليات
ميداس وذا ون
السوال هل في محل يفصل بس مودرن بدون الخشب الظاهر والستايل المغربي او الاسلامي وتكون الكراسي المريحه
ثاني سوال بالنسبه للمغسله عندي في المجلس مكان لثلاث مغاسل مريت اكثر من محل اشوف شي جاهز ما حصلت جاهز بثلاث مغاسل اكثر شي مغسلتين وما يتعدى المترين وانا عندي المساحه 3 امتار
مريت بعد على افاق لرخام ومركز الرخام مشكلتهم ما عندهم غير الرخام انت تشتري المرايه والمغاسل والمكسرات
شنو اقتراحاتكم لمحلات عندها الطقم كامل وسعره مناسب انا شفت العبيدلي بس عنده الرخام الصناعي في احد جربه
وشكرا ..

[معماري قطري]

عليكم السلام ورحمة الله وبركاته

عندج اختي الديكور الأندلسي على طريق سلوى بس دوم مشغول مهندسهم وفيه مهندس مغربي صوب السنتر فوق وكالة الجاكوار اتيليه 99 اعتقد أو رقم غير هذا يتعامل مع مناجر .. بس الاثنين أو غيرهم خليهم يعطونج عينات لكل المواد

واحد سوى لنا جلسة مغربية من أيام بس مربعة وباخذ رقمه إن شاء الله وبارسله خاص لو تبينه .. الدائري زين ياخذون المقاس على بورد كرتون على الطبيعة ويطبقون عليه

ومن رايي المغاسل بالمرة خليهم يعطونها شوي من نمط الديكور الموجود في المجلس وحتى لو تبغين جبس حتى يكون تصميم بنكهة وحدة

المغاسل وايد اختيارات لهم حتى القزاز المقوى يصلح ولازم تمرين بثلاث مراحل مع إن شغلتهم بسيطة .. مرحلة الرخام أو التبليط والتأسيس ومرحلة تركيب المغسلة ومرحلة باقي التشطيب والاكسسوارات حتى المراية ممكن تسوينها تفصيل .. شوفي موضوع الجديد في المطابخ والحمامات في نفس الصفحة وبتحصلين أمثلة وصور كثيرة

[العملة النادرة]

لا انا ما ابي الستايل المغربي او الاسلامي
ابي تفصيل بس مودرن

[معماري قطري]

منجرة نابينا تسوي وكذلك المفتاح بس يخافون من المشاريع الصغيرة والغريبة كالدائري لأن يحتاج مقاس على الواقع وتأكيد كم مرة .. اتيليه 99 يتعامل مع مناجر مزرعة العطية وشغلهم معقول وسريع خصوصاً لو يهمج التنجيد والخشب يكون مخفي

نصيحة أخيرة لا تتدخلين في المقاس وخليه يسوي المقاس الانساني 42 ارتفاع الأرضية الخشبية مع الحشوة كمعدل وعرضها 40 - 45 والمسند يكون غير حسب عرضه وانتفاخه بالحشوة

[معماري قطري]

المفروض يسوون اللي تبين والمودرن وايد أسهل حتى للمغاسل