مقاس فتحة صيانة مكيف الدكت سبليت

[captin]

السلام عليكم ورحمة الله جمعيا.

حبيت استفسر اذا كان هناك مقاس ستاندرد لفتحة صيانة مكيف الدكت سبليت اللي في السقف.

انا مركب وحدات دكت سلبيت للبيت والوحدات حاطينهم اما في ممر او في الحمامات بحسب القرب للغرف
والصالات والمجلس.

شركة التكييف تقترح تكون الفتحة بقياس 120x60 عشان تسهل عمليه الوصول للوحدة للصيانة او اذا اخترب
الموتور اللي في الوحدة يقدرون يفكونه ويغيرونه ويسون الصيانة اللازمة بسهولة ويرجعون كل شي مكانة بدون ما يتأثر السقف
مجرد باب ينفتح تصير الصيانة المطلوبة وبعدين يتسكر.

مقاول الجبس طالب ان الفتحة ما تزيد عن 60x60 لان الحمامات كلها صغيرة 3x2 ويقول ان الفتحة الكبيرة
بتاخذ المساحة وماراح يقدر يحط الليتات ومروحة الشفط في نص الحمامات بشكل متوازن وراح السقف يفقد الجمالية المطلوبة
ويصير شكله دفش بوجود باب شكبره وقال ان فتحتة 60x60 تكفي لاعمال الصيانة الروتينية مثل تنظيف الفلتر وغيرها
وفي حالة حدوث صيانة رئيسية لازم نشيل سقف الجبس كله ونسوي الصيانة ونرجع نركب سقف جديد لان الوحدة اصلا كبيرة
وفي حال الفك والتنزيل مقاس 120x60 ما راح يكفي.

السؤال مع واقع مواصفات المشروعات وخصوصا لمثل موضوع فتحة الصيانة في السقف
هل يوجد مقاس مثالي مطبق في كل المشروعات؟؟؟ ولا العملية تقديرية بين مشروع ومشروع

[معماري قطري]

الله يعينك ولازم تعتمد طلب شركة التكييف

من ناحية جمالية ومعمارية لنفترض الفتحة بتكون في وسط أو طرف السقف لنفترض في الطرف قرب الباب 60 من المترين بتبقى عندك 140 سم تحتاج كورنيش بسيط بحدود 10 سم أو أقل وعندك مجال واسع لليتات .. ولنفترض ال 120 جاية بالطول وبتبتعد من الحايط 60 سم بتبقى عندك 120 سم للطرف الآخر بعدين الفتحة تنعمل بالخشب لو مارين بلايوود أفضل ويتركب عليه الجبس المضاد للرطوبة

مروحة الشفط ممكن تجي ورا فتحة الصيانة حتى بعشرين سم في الثلث الأخير ومب شرط تكون وسطية .. الليتات تقدر تركب سبوتات موزعة حسب الحاجة مع ليتات المراية أو لو حاب النيون مثلي تقدر تركب خطين طوليين في الجبس قرب فتحة الصيانة .. تكون عندك ثلاث مفاتيح للاضاءة جزء للمراية وجزء للسبوتات وجزء للعام اللي هو النيون .. السبوتات تكون مركزة وعشوائية فقط على القطع ومكان الشاور أو البانيو

[معماري قطري]

كالعادة نسيت رد السلام وعليكم السلام ورحمة الله وبركاته

إخوي كابتن لو تبي ارسم لك مخططات لسقف معكوس مع توزيعة الحمامات عطني شكلها شلون ولين وين وصلت وان شاء الله باسوي بسرعة

[الســـهم]

السلام عليكم ورحمة الله وبركاته ..

انا مع مقاول الجبس في رأيه , فعلا فتحة 60*60 او 70*70 راح تكفي وزيادة للصيانة الروتينية , وفبيتي حاليا مركب فتحات صيانة بنفس الاحجام المذكورة شريتهم جاهزين من شركة العمودي ، واكثر من مره صارت عندي صيانة بدون اي عوائق تذكر ، والفتحة الكبيرة راح تاخذ حيز مب هين من السقف وتجبرك على توزيعات غير صحيحة للاضاءة ..

سقف الحمامات (الله يكرمكم) وغرف الملابس عندي ارتفاعها بحدود 4 متر , ركبت الجبس بارتفاع 2.70 متر تقريبا , واخر مره اشتغلوا عالموتور وافتحوه بكل سهولة ، اهم شي الارتفاع داخل السقف هو اللي يعطي فني الصيانه مجال لعمل الصيانه اللازمة لانه يشتغل وهو مرتاح ..

[captin]

كالعادة نسيت رد السلام وعليكم السلام ورحمة الله وبركاته

إخوي كابتن لو تبي ارسم لك مخططات لسقف معكوس مع توزيعة الحمامات عطني شكلها شلون ولين وين وصلت وان شاء الله باسوي بسرعة





مرحبتين اخوي معماري عزيز وغالي والله ويعطيك العافية على ردودك و آرائك الفنية النيرة .

هو الان الحمامات موزعة وجاهزة ووحدة التكييف تم تركيبها في مكان معين في السقف وتم تسكير سقف الجبس
بس باقي عمل فتحة الخدمات وفتحات الليتات والمروحة.
وللعلم موقع الوحدات في كل حمام تختلف عن الثاني يعني بتلقى في حمام الوحدة في النص مثلا وفي حمام ثاني في النص لكن مائلة الي اليسار

وعندي في مكان ياي ورى الصالة الرئيسية والاصنصير ناوي اسويه مكتب صغير مساحته 5x3 فيه وحدتين تكييف خاصين بالصالة الرئيسية
وفي نفس الوقت فيه الاضاءة وفتحة الهواء الدافع وفتحة الهواء الراجع يعني تصور المكان بيكون محشور ومع كل هذا فتحتين للخدمة.

وبعض الوحدات في منطقة المغسلة اللي قبل الحمام بالنسبة للمجالس.

سألت أكثر من واحد ولقيت الغالبية من مهندسين واستشاريين يفضلون تكون الفتحة 60x60 ويقولون ان هذا المقاس ستنادرد ويسمح
انك تسوي الصيانة الروتينية العادية بدون مشاكل.

البارحة كنت في المكتب في الشركة وكان معاي مهندس مشاريع سالته عن هذا الموضوع قال عطني فرصة اشيك في المواصفات
القياسية القطرية وارجع لك وهو بعد يميل ان الفتحة ما تزيد على 60x60.

مرة ثانية مشكور اخوي معماري على مداخلتك وارائك الطيبة

[معماري قطري]

توكل على الله وراي اخوي السهم نفس الشيء ثرى بعضهم يبالغون لراحتهم في المستقبل

[captin]

السلام عليكم ورحمة الله وبركاته ..

انا مع مقاول الجبس في رأيه , فعلا فتحة 60*60 او 70*70 راح تكفي وزيادة للصيانة الروتينية , وفبيتي حاليا مركب فتحات صيانة بنفس الاحجام المذكورة شريتهم جاهزين من شركة العمودي ، واكثر من مره صارت عندي صيانة بدون اي عوائق تذكر ، والفتحة الكبيرة راح تاخذ حيز مب هين من السقف وتجبرك على توزيعات غير صحيحة للاضاءة ..

سقف الحمامات (الله يكرمكم) وغرف الملابس عندي ارتفاعها بحدود 4 متر , ركبت الجبس بارتفاع 2.70 متر تقريبا , واخر مره اشتغلوا عالموتور وافتحوه بكل سهولة ، اهم شي الارتفاع داخل السقف هو اللي يعطي فني الصيانه مجال لعمل الصيانه اللازمة لانه يشتغل وهو مرتاح ..



بارك الله فيك اخوي السهم وجزاك خير على الرأي

فعلا الكل أكد أن المقاس المثالي لفتحة صيانة وحدة التكييف هو 60x60 انا شيكت مع اكثر من مهندس
سواء معماري او مهندس ديكور أو كمشرف على مشاريع الجميع أكد ان المشاريع السكنية مثل الفلل والشقق والفنادق
تكون الفتحة بهذا المقاس ....

بينما المباني الكبيرة العامة مثل الاسواق والصالات الرياضية وغيرها تكون فتحة الصيانة أكبر
لغرض صيانة الاجزاء الاخرى لان تحت طبقة الجبس تكون في خدمات مثل تمديدات انظمة امنية وتمديدات للانظمة المسموعة والمرئية
وربما المياة واطفاء الحرائق وغيرها.