استفسار عن الرنج روفر فوج لاهنتو !

[نتفـه]

السلام عليكم ..

انا ابي اشتري سيارة تحديدا رنج روفر فوج ..
هل تنصحون بها والا لا ؟ يعني ياليت اللي مجربين ينصحون هل هي heavy duty ؟؟ يعني سيارة تستحمل لان بصراحه وايد غاليه واخاف اخذها واتوهق فيها ! مع ان خاطري فيها من قلب .. فيهمني اعرف اذا هي سياره تستحمل الجو وتطول مع الشخص اللي يهتم فيها والا تخترب على اقل شي ؟؟ ومايسوى ادفع دم قلبي عليها ! ووايد أخاف اخذها ويتغير الشكل السنه الجايه او اللي بعدها وانصدم !! حد عنده فكره اذا بيتغير الشكل وسنة كم ؟؟؟؟؟؟؟

واذا ما تنصحون فيها شنو تنصحوني ؟؟ ببالي مرسيدس او لاندروزر في اكس ار .. وانا مافكرت بالفي اكس ار لانه منتشر وبيتنا كله كروزرات ف تمللت :/

يهمني راي اهل الخبره .. وجزاكم الله خير

[Rider]

والله ياخوي السيارة ماعليها كلام بس بشرط الصيانة الدوريه مطلوبه سيارة كرف لا يعني موتر كشخه

[blueZircon]

الفوج موتر حلو فخم وبنفس الوقت مريح ومب وعر لكن سعره غالي مقارنه بباقي المواتر. اذا اتفكرين تاخذين انصحج تشوفين لج شي مستعمل استعمال خفيف لانه الجديد من الوكاله غالي ويفرق سعره عن المستعمل واعتقد الحين السوق المستعمل متروس رنجات وبااسعار نازله. حطي ببالج ان الوكاله اسعارهم ماتعترف بالركود الاقتصادي.

بس قبل ماتقررين تاخذين الرنج، شوفي المزراتي الفوريل الجديده حلوه وقويه وتناسب البنات، وعندج بعد المرسيدس gle , هالموترين جداد بالسوق و 2016 اول موديل لهم ، يعني تضمنين ماراح يتغير شكلهم الا بعد خمس سنين.

نقطه اخيره وانا اشوفها مهمه جدا الا وهي الوكيل. انا الصراحه الحين ماقمت اخذ سيارات الا من الفردان بحكم سمعته القويه في خدمة مابعد البيع . ومقارنه مع خدمة المرسيدس ، الفردان وايد احسن من ناحية التعامل والاهتمام بالعميل. وطبعا الفردان خدمته اتكون درجات على حسب نوع السياره. طبعا الفيراري والميزراتي هم افضل خدمه على الاطلاق ومن بعدها البيئم والرنج.

[البرونزي]

لكزس فورويل مابعدها سياره
كشخه وسياره قويه ومافيها مشاكل وتعطي عمر والاهم سعرها ماينزل
كثير نفس باقي السيارات واذا نويتي تبيعين قبل لاتعرضينها بتروح هههههههه

[ذكي جدااا]

الفوج ماعليه كلام وخاصة ان ضمان الفردان ممتاز. بس في مشكلة بسيطه المنتشر حاليا ان الفيس لفت بيكون 2017 ونا كلمت الوكاله قالوا لا الفيس لفت بيكون 2018 فما ندري متى بالظبط بينزل الفيس لفت لانه بعد الفيس ليفت بيتغير كليا 2021. فنصيحتي انك تاخذ 2018 وخاصة اذا بتاخذ من الوكاله أصفار.

[aloosh]

انصحك من شخص مجرب ابعد عنه طاح بجبدي وهو جديد
خذ لكزس افضل منه في كل شي حتى لو قدر الله وتبي تبيع ماتخسر كثير
وشركه مو ذاك الزود ترى في الخدمات
ولاهو سياره كرف سياره دلع انا عن نفسي ما امن اسافر فيه مسافات طويله

[نتفـه]

الله يجزاكم الجنه على ردكم اللي افادني وايد .. وحطيتو ببالي خيارات بديله عن الرنج روفر في حال التغيير ووايد ناااااااااااس وااااااااااااااااااااايد قالو لي لكزس فورويل من بينهم مع ان خاطري بالرنج .. ما قصرتو ..

[حليتان*]

في الجاغور الفورويل حلوه وليحن مانتشرت بعد وعندهم الوان حلوه



بس ها ترا السيارات مب نفس الكروزر ماتنفع معاهم الدفاشه ف نصيحه بي كيرفووول

[نتفـه]

الله يجزاك الجنه .. ما قصرت

[تاجر كشخة]

تبي الصراحة اخ لاخوه اذا راتبك من 35 الف وفوق اشتريها

اذا غير كذا تراها سيارة نكبه وتجيب لك العيد هي سيارة مظاهر اكثر من ماهي عملية اشتري نيسان باترول 400 حصان ولا تشتري رنج

[بو راشد 1]

انتبهي لقضية باكج الضمان من الرنج، غير واضح، الرنج عندي اذا نزلت الدريشيه (ايام البراد) الفتحة تطلع صوت من الهواء، يوم التشيك قلت لهم في الوكالة عن المشكلة، قالوا تدفع 136 ريال عشان نفحص ونشوف ايش المشكلة، و بعدين نقرر اذا على الضمان او عليك؟
كلمت مسؤلهم قلت عيل 650 الف ريال على وشو انا دافعها؟ و السيارة اصلا ما كملت سنه؟ قال لي باكج الضمان ما يشمل كل شي!!!! و بدء يشرح: مثلا اذا احترقت اللمبة عليك، اذا ما ادري ايش اخترب علينا، و القائمة طويلة!!! و يقول اصلا الفلوس الشغل انا ماخذها يا منك يا من الوكالة الام.

[eXpert*]

إذا لازم فورويل عليك بـ بي ام دبلو أكس فايف أو سكس ،، كفاية الضمان الشامل من الصدام للصدام .

في هالزمن أهم الضمان وخدمة العملاء.

المرسيدس كلام فاضي والرنج عليه ملاحظات ،، تويوتا من زمان مطلقها ،، النيسان جيدين .

[نتفـه]

بيض الله وجوهكم والله ماقصرتو وحطيت كل ملاحظاتكم بعين الاعتبار وشكلي غيرت رايي مابين لكزس ال اكس او في اكس ار ،، الرنج بعد الفيس لفت ان شاء الله

[NBA_]

في اكس ار ظ¢ظ*ظ،ظ¦ من أفضل المواتر صراحة استعمال كرف كرف حق كل شي ..
وعندة موتر لكزس بناتي فئة nx بعد ممتاز حق استعمال يومي ..

موفقين

[نتفـه]

تسلم الشيخ ما قصرت على الافاده