مساعدة ضروري

[shoog]

السلام عليكم ورحمة الله وبركاته

الاخوان الكرام الي عندهم خبره رجاءاً تساعدوني في مشكله عندي فالبيت
عندي بيتي في مرحلة التشطيب ولله الحمد وانا مسويه ارتفاع كبير للصالات ارتفاع 4 متر ونص اعتقد
عندي خمس اقواس تطل على الحديقه وهذي الاقواس ابي اسويها بيبان تفتح كامله لين فوق
ولما رحت اسوي عند الاختصاصي الاوروبي ubvc قال مستحييييل باب يفتح لج لين فوق

شدعوه تحطيم تحطيم انا اتخيل شي ويقولي العكس يقول لازم فواصل من فوق قزاز ثابت ومن تحت الباب والباب مب كبير الطول العادي هل هالكلام صحيح مافي مجال اسوي طيب القصور الي يسويلك الباب طوله 20 متر هاي وين مسوينه وبيوت الاجانب الي نشوفها فالصور احلى من الخيال بيبانهم طويله وتفتح كامله لين فوق يعني ماعتقد طلبت شي مستحيل قالها لي انا بلسانه مستحيل مكان فالدنيا يسويلج باب على هالاقواس يفتح كامل لازم في فاصل

ماقدر احصل حد يسويلي نفس الفكره الي ابيها في الدوحه حتى لو السعر غالي
وبعد فكرت ان لو اخليهم قزاز ثابت مايتحرك ووحده بس الي اسويها باب وقال بعد ماضمن لج انه مايتكسر فالمستقبل مع الهوا بليز شورو علي شسوي

98036

[سعود.]

وبعد فكرت ان لو اخليهم قزاز ثابت مايتحرك ووحده بس الي اسويها

98036

لو مكانك بسوي درايش حق الاقواس الاثنين الاخيرة اليمين واليسار وازيد طابوقة واحدة

والمنتصف باب .

[معماري قطري]

المشكلة المفصلات ما تمسك الباب

شوفي المنيوم تكنال الفرنسي عند الاختصاصي ممكن يقدرون او اقسميها قسمين ثابت وينفتح

[shoog]

المشكلة المفصلات ما تمسك الباب

شوفي المنيوم تكنال الفرنسي عند الاختصاصي ممكن يقدرون او اقسميها قسمين ثابت وينفتح

مب حلو شكله بيطلع القسم الثابت مسوي لي اياه فالرسمه بنفس طول الباب انا قلت له عالاقل بس شوي القسم الثابت قال مايقدر بيكون الباب ثقيل وبيتكسر بسرعه انا ماعجبني رده حسيت انه مغرور ومش مقتنع برايي ولما كلمت شركة ثانيه قالولي اكثر ارتفاع للبيبان 3 متر و20* هاي اكثر شي والباقي لازم ثابت

وممكن التوضيح ف اسم الشركه لان اكثر من مكان اسمه الاختصاصي او رقم التلفون لو سمحت

[shoog]

لو مكانك بسوي درايش حق الاقواس الاثنين الاخيرة اليمين واليسار وازيد طابوقة واحدة

والمنتصف باب .

شكلي جذي بسوي شي مفتوح وشي مسكر انجبرت معن خاطري كلهم مفتوحين لين الارض

[CiTy]

السلام عليكم ورحمة الله ،،
كلشيء ممكن لكن يحتاج بحث ودفع فلوس زيادة
الطريقة المنشودة ممكن تتنفذ بالألمنيوم مثل ما تفضل اخوي معماري قطري
تكنال مع ان المحل او اللي فيه شكلهم ما يفهون شيء بس الله يعينك
المنطقة الصناعية اكيد فيها مصنع يقدر يسوي الفكرة ،، بس لو القوس اللي فوق يكون ثابت
بيطلع شكله افضل ، واذا فتح كامل مع القوس أتصور بيكون شكله غير مريح

[Azizuk]

ممكن يسويه بس يكون يفتح نصين يفتحون يعنى ( درفتين )
بس اللي اشوفه ان عرض الشباك صغير مقارنه مع الارتفاع

اتوقع الاقوس ثابت احسن وامن لو بيفتح الشباك كامل بيكون ثقيل

القصور يكون بابهم خشب تيك او سولد

وخشب التيك الحين سعره غالي جدا يوصل المتر ب 20 الف ريال للهندي والتيك الافريقي ارخص شوي

الالمنيوم تنكال مثل ماتفضل اخوي معماري عند الاختصاصي بعد هم نفس شركة الاختصاصي الاوروبي متخصصه في upvc بس شركة الاختصاصي متخصصين في الالمنيوم عندهم المنيوم امارتي المتر على 450 ريال

والفرنسي على 1500 ريال للمتر والوان محدوه للفرنسي اخضر ورمادي

انا عندي شباك ارتفاع 2 متر ونص وقال لي العريض القوس بيكون ثابت والشبابيك على الزوايا بيفتحون كاملين لان عرضهم صغير وبيزيد المفصلات للشبابيك اللي تفتح كامله
او ممكن يكون الشباك مشغول حديد بس بيكون شكله بايخ

[معماري قطري]

مب حلو شكله بيطلع القسم الثابت مسوي لي اياه فالرسمه بنفس طول الباب انا قلت له عالاقل بس شوي القسم الثابت قال مايقدر بيكون الباب ثقيل وبيتكسر بسرعه انا ماعجبني رده حسيت انه مغرور ومش مقتنع برايي ولما كلمت شركة ثانيه قالولي اكثر ارتفاع للبيبان 3 متر و20* هاي اكثر شي والباقي لازم ثابت

وممكن التوضيح ف اسم الشركه لان اكثر من مكان اسمه الاختصاصي او رقم التلفون لو سمحت

الاختصاصي للالمنيوم وعندج بعد الشرق للالمنيوم .. وشوفي شركات اليو بي في سي مثل الاختيار الألماني وقطر يو بي في سي والاختصاصي يو بي في سي لهم دعاية في المنتدى .. هذي الثلاث شركات عندهم حلول بالتقوية بقطاع حديد

ثلاثة متر ارتفاع زين بيكون والباقي ثابت بس مهم الفريم يكون قوي ويركب على الجزء الثابت ولا يسرب .. اللي نشوفه في دول ثانية أوقات ما يكون فيها غبار وعادي ما يسكر عدل ويسرب هواء والمهم المنظر عندنا الثبات والإغلاق المحكم

[sweet qatar]

عليكم السلام ورحمة الله وبركاته

الله يعينَّا ويعينج على شركات قطر :(

عزيزتي اعتقد الفتحات هذي في التصميم المفروض تتسكر بقزاز كامل

أشوفها درايش اكثر من انها بيبان

اذا انتي عاجبج الفرنش دور ما بينفع تنفيذه مع هالقياس

لكن شوفي هذا قريب منه hung window

https://s-media-cache-ak0.pinimg.com/236x/37/18/fc/3718fced74569553d602f374c0eeae4b.jpg

https://s-media-cache-ak0.pinimg.com/236x/e6/96/f2/e696f2c8963bf2261dfa503aeee228c8.jpg

http://www.landscape-america.com/art/monticello/greenhouse_5297.jpg


ماقدر انصحج بمحل معين دوري السوق كله وإذا ماحصلتي حد ينفذ لج الي تبينه روحي الكويت


موفقة ان شالله

[shoog]

شكراً على الردود

صراحه مع احترامي الي قلتو اخليه درايش انتو مش فاهمين قصدي او يمكن ماوضحت الفكره

هي الفكره شفتها في اكثر من تصميم فالنت ف بيوت الاجانب و بعد متكرره في اكثر من مكان في اوروبا خصوصا في فرنسا بعض الفنادق

بس العرض عندي متر حق كل قوس وهالشي مزعج بس انجبرت فهالحجم بسبب الاساسات او كانت بتكون ثنتين كبار ووحده صغيره بيكون شكلهم مب حلو ف خليتهم كلهم خمس اقواس

هاي كانت الصوره الي عطيتها المهندس بس كان ضروري تنحط بعض الاساسات الي خربت من فكرتي
ولو سويتها نفس الصوره بتطلع روعه
98070

مثل ماتشوفون كلهم بيبان ينفتحون على الحديقه

98071

وهذي بتكون اقرب شكل ابي اوصله مع التنفيذ بس من الي بيضبطها

[معماري قطري]

شيختنا الصورة اللي فوق واضحة الباب بارتفاع عادي وأربع مفصلات والجزء العلوي ثابت وفريمه راهي وسمين

اللي تبين تسوينه شوي خارج عن المألوف ويسوونه بس المختصين وغير المختصين ما يضمنونه

الممكن تسوين نفس الصورة الاولى والباب صفاقتين ممكن على عرض متر فريم اليو بي في سي من خمسة سم الى ثمانية بياخذ عشرين سم من المتر الى اثنين وثلاثين سم تقريبا وارتفاع ثلاثة متر كافي ويبقى القوس ثابت

اليو بي في سي يجي بجلاد خشبي للداخل وللخارج ممكن يكون ابيض حتى يقاوم الشمس ولا يتغير اللون

القزاز تقدرين تسوينه شفاف بدون تعتيم لو عندج حديقة خاصة ورا

اخيراً ظلمج اللي مسمي نفسه مهندس العمدان ذي أساس واحد وصغير يكفي لها وممكن يسويها باي شكل

شوفي فوق الطاولة حدها ارتفاع تسعين سم لو مرتفعة وممكن ستين لو نازلة ونسبة وتناسب ارتفاع الباب حده اثنين ونص متر وإنتي محصله فوق ثلاثة توكلي على الله وسويه

خليهم بدون ستاير وينفتحون للداخل ولهم مفصلات قفل متعددة بدون الفتح اليدوي من تحت بالمسمار مثل الالمنيوم وتكون لهم نعلة تحت غير منفذة للهواء

شوفي قطر يو بي في سي والاختيار الألماني والاختصاصي ومعماري قطر

[sweet qatar]

عزيزتي الصورة واضحة


انا اختصرت ردي عليج عشان القياسات والعدد

و اقترحت عليج بديل مناسب من وجهة نظري من نفس الستايل
شوفي الصورة الي حطيتيها في اخر رد تحسين جو الغرفة تغير لان الستايل مختلف



بس للامانة ما توقعت ان الفكرة عندج من قبل البنيان ، حرام فيه كلمة مهندس
كان يقدر يحلها بسهولة و يسوي لج الي تبين


على العموم مافي شي مستحيل وان شالله تلقين لج محل ينفذ لج الي في خاطرج

[بوحارب]

سوي قزاز ثابت ابرك لج

بتدخل اضائه حلوه للبيت

مانصحج في فكرة الأبواب احسها مب عملية

[sweet qatar]

في زجاج يتركب للاسقف الزجاجية وممكن ينفتح السقف بالكامل

بس مادري ليش ماشفت منه للدرايش !!

[معماري قطري]

مصنعية الزجاج والفريمات متدنية عندنا وغالية اكثر من اللازم

[معماري قطري]

سوق الزجاج ومصنعيته بكل أنواعه وفريماته المفروض يدخل تحت متابعة ورقابة جهة حكومية مختصة اللعب فيه على مستوى عالي وللاسف العملاء حتى الكبار منهم وللمشاريع الكبرى يدورون الرخص ومشتغلين الزجاج يرخصون على حساب الجودة .. وأحيانا يسوون فريم مبالغ فيه وغالي كثير

من مشاهداتي مسوين سقف زجاجي بفريم حديد مغلف بالامنيوم والزجاج مزدوج وكل قطعة زجاج حول 60 x 60 والفريم ماخذ مساحة كبيرة ومكلف كثير غالي