هل فكرت تشارك حد في مشروع تجاري وفكرت شلون تضمن حقك ؟

[احمد1]

السلام عليكم اخواني وخواتي اصبح عليكم بالخير واسال؟؟؟
هل فكرت تشارك حد في مشروع تجاري وفكرت شلون تضمن حقك ؟

حدث معاي واني اجتمعت مع اكثر من واحد وناقشنا مشروع شراكه مع شخص وقالي بفتح معاك مقاولات وعندي خبره وعلاقات قوية بالسوق وراس مال ودراسة جدوى دقيقه ... هل تبي مقطوع ولا نسبه وكان كاشخ وشكله ممكن يقنع وكان كل شوي يذكر شخص من التجار الكبار او الدبلوماسيين والمشاريع الي نفذها .... المهم خلص كلامه وقلت له بقولك الي عندي ......:)

اندش شراكه مع بعض ورسمي وهذا يخليك تتحمل نص المسؤولية وانه النص .....

بعد مانصدر الرخص التجارية تأجر مكتب وتفتح حساب في بنك بأسم الشركة وتحط فيه رااس مال فعلي يغطي لاول سنه ايجار المكتب +الكهربا والامور هاذي طبعا :eek5:

تبدأ المشاريع بمعدات تأجرها او تشتريها بما انك تقول عندك راس مال ولا تقولي باخذ اقساط وبسدد من المشاريع لالالالا ابيك تربح من المشاريع وتشتري معدات

ابي وصولات شهريه كل راس اول شهر بدفع الاجارات والكهربا والرواتب الخ
لا تطلب شيك ضمان بنكي الا وانت حاط المبلغ بالبنك ....

واخيرا التوقيع في قيد المنشأ مابعطيك اياه الا اذا مرت سنه من الشراكه ووثقت فيك ...
هنيه يبين الي جاد في التجاره ولا جاي يقط سلفيات وقساط عليك ويتسلى فيك ... طبعا طلبت الفاتوره وكان المنجو كيك عجيب دفعتها وتوكلت وقلت له رقمي عندك فكر وكلمني ...... خخخخخ ما اتصل عقبها ...

[شبح الصمت]

وعليكم السلام ورحمة الله وبركاته ،،،

قليل الي مثلك راح يفكرون بنفس تفكيرك ونفس المتطلبات والشروط الي تبيها ..

لانه البعض ما يبون عوار الراس
ويبون المدخول السريع السهل ..


وشكراً لك على موضوعك الطيب الي اح يفيد الكثير وراح نستفيد من النقاط الي ذكرتها ..

والله يوفقك ويوفق الجميع

ونصيحة بعد لا تفكر توكل له اي شيء في الامور المالية وبالذات المقاولات ترى بعد تحمل اطيح فيها
حتى لو توكيل تصريف امور او مادري وشو

رفيجي كانت عنده شركة مقاولات ووكل الي معاه مش على الامور المالية على تصرريف امور الشركة
قام وباع الاغراض البمب ومواد بناء وقبض الفلوس كاش وشل عليه ..


خلك حذر ما نقول الدنيا مافيها خير
بس بعض البشر مافيهم خير للامانة

[Riku3]

المفروض تغليب الشك في مثل هالامور والي ماله بارض يتابع ويداوم مع شريكه لا يدخل شراكه احسن .. او على الاقل يفتح شركة مع اخوه او شخص من هله يكون واثق فيه هو الي يتابع مع الشريك الثالث .. ولما يكونون 3 تتوزع الصلاحيات ونسبة الشراكة ويزيد المخولين بالتوقيع ويكون صعب عليه التلاعب ..

والثقة بعد سنة بعد خطأ .. اعرف واحد انصب عليه بعد 4 سنوات من شخص عربي لحيته لين صدره ونص كلامه عن الدين واخرتها طلع حرامي .

[فيصل99]

اذا اعرفه من زمان وواثق فيه ممكن ادش معاه ليش لا واغلب حسن الظن على الشك

[شموخ دائم]

,

,


مرحبا

شكرا على الموضوع الطيب

الموضوع مهم جدا في قطر وخاصه انه يمثل شراكه ولها وعليها تبعات

بالنسبه لي ( افضل ) التدرج مع الشريك

بعد اختيار الشخص المناسب ( والخبرات الي يمتلكها بنفس المجال )
خبرات عمليه وخبرات اداريه

والسؤال عن ( ماضي الشريك )

بعدها احب ( يقدم ) دراسه شامله للمشروع
مبين فيه المصروفات الشهريه والسنويه المتوقعه
والدخل المتوقع اول ( 3 شهور )
والدخل المتوقع ( 6 شهور ) والدخل المتوقع السنوي

وكل 3 شهور نعمل اجتماع ( نقيم ) الوضع
هل تحققت الدراسه او قريب منها او هناك ( اخطاء ) والدراسه مجرد ورق

على ان تكون اول 6 شهور ( تجربه ) المشروع وهو ( المدير ) وليس شريك ولايدخل اسمه بالسجل
وفي حال ( نجاح ) وتطبيق الدراسه من
( الورق ) الى ( الواقع )

نبتدي اجرائات ادخاله كشريك رسمي حسب المتفق

تذكر دائما ادخال شريك عمليه سهله اما اخراج الشريك فهي عمليه
معقده قانونيا وتصل الى المحاكم
لذلك التمهل كثير في ادخال شريك

لاحظنا في السوق للاسف اشكاليتين


1- عدم خبره الشريك وجديته ولا يمتلك مقومات العمل الصحيح لنقص الخبره
حيث كان مجرد عامل ( وحب يكون شريك ) دون درايه بالعمل الاداري وكيفيه احظار المشاريع
حساباته خاطئه جدا ويتسبب في خساره فادحه للشركه
لانه يريد مشاريع بسرعه ويقدم عروض رخيصه لاثبات انه قادر على احظار مشاريع
وتنكشف الخساره لاحقا

ولا يعرف حتى اداره المشروع او التحدث مع مدراء الشركات او البنوك او الامور القانونيه
وكل خبراته انه كان موظف فقط لاغير


2- سلوكيات الشريك احيانا يكون ( مهمل ) يسهر ولا يتواجد في العمل بدري اختياره للموظفين
محسوبيات اما قرايب له او اصدقاء او من جنسيه بلده او المتاجره في الفيز
دون النظر الى الكفائه والتخصص والعصبيه في التعامل وعدم الاحترام
والمماطله في دفع الحقوق للناس

لذلك فتره التجربه 6شهور ( ضروريه جدا جدا ) لكشف حقيقه الشريك وامكانياته العمليه
ولدراسه شخصيته اثناء العمل ( تحت الضغط )

وبعد التجربه نستطيع ان نتخذ القرار بكل سهوله


شكرا على الموضع

,

,

[Miss]

جمله حافظتها مثل اسمي :

(( رفيجك لا تشاركه ولا تناسبه ))
فكر فيها قبل ما تدخل مع حد في شراكه

[احمد1]

اشكر الجميع على اثراء الموضوع وفعلا والله مشاءالله عليكم استفدت كثير وزدتونا بمعلومات مفيده ماقصرتو ...

[معماري قطري]

انا بغيت افتح مكتب استشاري وكان معاي شريك وجنني مع ان المقر كان موجود في بناية لوالدتي الله يحفظها وكنت انا اللي علي اغلب الشغل بس ما كان جاد وتفركشت السالفة

المحاولة الثانية اثنين واحد في التخطيط وواحد في المكتب الخاص عزموا بي وما سوينا شيء .. الثالثة بتكون انا مع انا بعد ولا شريك ولا ما يحزنون

[حمد 2002]

انا لا أثق في اي أحد ..

سواءا اجنبي أو قطري ..

[Stranger Man]

انا بغيت افتح مكتب استشاري وكان معاي شريك وجنني مع ان المقر كان موجود في بناية لوالدتي الله يحفظها وكنت انا اللي علي اغلب الشغل بس ما كان جاد وتفركشت السالفة

المحاولة الثانية اثنين واحد في التخطيط وواحد في المكتب الخاص عزموا بي وما سوينا شيء .. الثالثة بتكون انا مع انا بعد ولا شريك ولا ما يحزنون

الله يوفقك يابوعبدالله وييسر امورك ، تستاهل الخير

[معماري قطري]

الله يوفقك يابوعبدالله وييسر امورك ، تستاهل الخير

امين ويوفقك ربي يا طويل العمر

[MAZEN37]

انا اشوف انه
انزل الميدان ياحميدان
شريك اهلا وسهلا انا وياك ومكتبنا في الموقع والصبح نشرب الشاي
تقولي شريك وادارة تنفيذيه من طرف واحد وقرر زيادة
مافي فايده

[متروس]

ابعدوا عن الشراكة ومشاكلها الغير متوقعه

احسن طريقة للشراكة هي في مشترى الاراضي وتكون الانصبة واضحة والربح واضح وراس المال محفوظ

[BoFahed]

ابعدوا عن الشراكة ومشاكلها الغير متوقعه

احسن طريقة للشراكة هي في مشترى الاراضي وتكون الانصبة واضحة والربح واضح وراس المال محفوظ
صادق اخوي وما انصح بالمشاركه مع اي شخص ومن واقع تجربة

اذا قريبك وخسرتو بتطيح عليك و القلوب بتشيل
لان المال عديل الىوح
واذا اجنبي غالبا بينصب عليك لانه القطري مستهدف من 99 بالميه من الاجانب ومترسخ فيهم فلوسه وايد وما يهمه الخساره ( اضرب واشرد )

اهم عامل من عوامل نجاح التجارة هي المتابعه اليوميه من راعي الحلال