تجربتي مع الخلاطات والشوارات في زيارة خاطفة للاحساء والخبر

[CiTy]

السلام عليكم ورحمة الله ،،

كان لدي مواصفات معينة في أنواع الخلاطات والشوارات من حيث الشكل والمقاسات .

بخصوص بعض الخلاطات كان المطلوب خلاط ذو رقبة طويلة يصلح لمغسلة النساء
وكان الاختيار على خلاط جروهي نوع جرانديرا مذهب في الأطراف
سعره في الدوحة حسب ما أتذكر من 2200 الى 3200 تقريبا خلاط واحد فقط هذا سعره
98117
قلت اشوف في الاحساء حسب بحثي في المنتدى كان في موضوع عن محل اسمه سارا
دخت السبع دوخات لحد ماعرفت موقعه
توجهة لهم لكن للأسف ماعندهم اللون الذهبي وكان الموجود الفضي فقط وكان سعره في حدود 2200 يعني نفس
سعر المذهب في الدوحة ،، والا بعد لازم بالطلب ^_*
من الملاحظ ان أي بضاعة اصلية في أي بلد تكون اغلى من الدوحة هذا اللي انا شفته نادر ما حصلت بضاعة
اصلية ارخص من قطر ،،

قلت اروح الخبر يمكن احصل شي غير لفيت على السريع من بعيد
واخر المطاف خذت نوع صيني ماركة تريديكس
المحل تابع لمحل سارا
خذت شاورات وخلاط المطبخ وخلاطات مغاسل المجالس
الشاور الواحد كلفني 850
خلاط المطبخ 370
الباقي 300 - 325 - 295
98118

98119

98120
اسمحوا لي اكتب وانا مستعجل ،،،

تقبلوا تحياتي

[بوخالد911]

مشكور جدا لنقل تجربتك لنا.

[Azizuk]

صحيح كلامك ان الماركات الأصلية نفس سعر الدوحة وتتعب لين تحصلها

ولاكن انا اخذة خلاطات هانز غروهي من الصديقي ( سفانة المتحدة ) في الدمام وفرة تقريبا فوق 30 الف ريال

واللي خلاني أخذ من هناك في شور نازل جديد والمتحدة في قطر قالو لي بنطلبه لك بس بسعر 10 آلاف للواحد

اخذة من السعودية ب 7500 آلاف ريال الواحد

واحتاج 5 شورات من هالنوع وهذا غير باقي الخلاطات تفرق في كل خلاط 300 ريال

وشور حمام الغرفة الرئيسية في الدوحة قبل الخصم 21 الف مع كامل اكسواراته وبعد الخصم 18 الف

طلع على ب 13500 هناك

نوع بلاط في المتحدة المتر ب 185 ريال بعد الخصم

جبته من السعودية المتر ب 132 ريال وألف ريال توصيل الى البيت

حمل الأغراض الظهر من الدمام وصل عندي الدوحه مع اذان العشا

تخليص جمركي ب 300 ريال مع دفع الضرايب 900 ريال

سماعة شور مع مسطرة ( عامود مثبت بالحائط ) ب 130 ريال سعر الجملة خذتهم من الوكيل الهدبانية وكيل اخر لماركة هانز غروهي والمحلات في السعودية تنباع بين 160 الى 180 ريال

شفتها في الدوحه على 600 ريال مب حرام عليهم هالتجار عندنا

وكنت طالب بلاط من العاصمة شهر وانا انتظر يقول لي ماوصلت البضاعة وآخر شي قال لي تعال اختار نوع اخر لان النوع اللي انت تبيه خلص

هذا اللي ينفرك من السوق المحلي وتلجأ الى الدول المجاورة

بضاعة متوافرة ومصداقيه في التعامل وغير هذا أرخص

ماركة تريدكس انا مجربها ماشالله عندي خلاط مطبخ من 8 سنوات ممتاز

وعندي خلاطات مغاسل كلهم اختربو

بس في الآونة الخيره شفت انواع خلاطات وشورات تريدكس عند محل فليو أند بخ في الحسا ممتازة وأعجبتني

واسعار وإلا اروع

تنبية للأعضاء اللي حاب يشتري من الدول المجاورة

يدخل على موقع الاكتروني الماركة اللي تعجبه ويشوف من الوكيل في الدولة اللي يبي يشتري منها

وياخذ عنوانهم وأرقام تلفوناتهم ويتكلم معاهم ويسال عن النوع اللي موجود عندهم مع الأسعار

وياخذ عنوانهم في الخارطة ويتجه لهم وفي نفس اليوم يخلص شغلة ويرجع

البلاط اللي أخذته من شركة محمد محمد الدوسري بس اتصلت لهم وردو على خدمة المسج حطيت رقم جوالي وهم اتصلو على قسم الاستفسارات واستفسرت منهم عن نوع البلاط المطلوب

وطلبت منهم رقم أحسابهم وحولت لهم المبلغ وانا ماتحركت من مكاني بس وصلت لهم الحوالة وفي نفس اليوم تحملت البضاعة وصلت عندي مرتبه ومغلفة

الأمور طيبه بس بعض الأوقات الواحد يتثيقل يتصل او يتعنى يسافر

تنبية اخر محلات محمد محمد الدوسري عنده معظم انواع البلاط من برسلنوسا لان هو احد الوكلاء في السعودية بس المتحدة عنده جميع الموديلات الموجودة من المصنع

اللي في السعودية اذا في نوع انت تبيه غير المعروض يطلبه لك وفي خلال 45 يوم يكون موجود وبنفس السعر ومايأخذ عليك زيادة على الطلب

لان يقول في موديلات غير مرغوبة يجيبها على حسب طلب العميل

الأشياء البسيطه اخذها من الدوحه حتى لو أغلا بس بالنسبة حق كميات كبيرة لا اخذها من الدول المجاورة وأوفر فيها

معليش انا منفعل لأني مقهور من طريقة تجارنا وتعاملهم مع العميل

وافضل محل اشوفه يتعامل مع العميل في قطر هو محلات كافود ونابينا

[معماري قطري]

الخلاطات خذتها كلها قروهي من دبي وخذت انواع غير للمجلس وللغرفة الرئيسية خذت داميكسا بلجيكي شكله حلو وصناعته جيدة من دبي ... للمغسلة ذهبي لان شبه معزولة ومحيطها ذهبي من مسكات الزجاج للبرواز المراية الخشبي المذهب .. الدخل صوب الشاور كروم لان القطع هناك شاور وجكوزي جاي كروم من الأصل

اكتشفت داميكسا موجود في قطر عند الطيب وارخص من الفطيم

[سالم الزهران]

لاحظت وجود اسعار في قطر ارخص من السعودية و لا تستغربون و اظن ان اللي يرفع سعر السلعة هو الاقبال عليها

بالنسبة لي لو الله وفق و بنيت البيت , تذكرة للصين و خذ لي كونتينر كامل فيه اللي ابي بالمواصفات الأوروبية نفسها شرط

احد اقاربي ابتدأ بهذا الأمر و أثث عمارة كاملة المستلزمات من الجاكوزي الى مقبض الباب بسعر خيالي و الجودة مقابل السعر اكثر من رائعة

فكرة الصين حلوة و الناس اليوم عندنا ما عادت تأثث الا من الصين و لو تبيه يكتب لك اسمك على الأسبلت يكتب ماركة بو سعد و بستمية ريال و شرط ان الخط الثاني في المصنع هو اللي يصنع الفوجي وطقته