استفسار عن مشكلة في نيسان باترول الفل أوبشن ...

[asulaiti]

عندي نيسان باترول 2011 الفل أوبشن مع خمس كاميرات ... مرات أكون سايق الموتر، ولما أقرب من أدوار أبدأ أشيل رجلي من على الريس وأحطها على البريك بدون ما أدعس .. بس أجهز نفسي علشان أهدئ السرعة ..
لكن فجأة يكع الموتر بريك بشكل قوي لدرجة أغراض سيارتي تتناثر تحت عند الدواسات !! .. هذه صارت معاي بس ثلاث مرات تقريباً في عمر امتلاكي للموتر من يوم ما نزل في الخليج .. الأمر غريب ..
ولأن مايصير معاي إلا كل سنة أو سنتين تقريباً .. ما اهتميت في الموضوع لأني شككت بأنني أنا بالخطأ دعست البريك بقوة .. لكن هالمرة الثالثة اللي صارت لي من يومين تأكدت من أنني لم أدعس البريك بهذه القوة ..
وكع الموتر بقوة والحمد لله مافي حد وراي ولا كان صار حادث ..

فهل حد صادفته هذه المشكلة؟
هل هذه المشكلة من حساس البريك الموجود فوق دواسة البريك؟
شفت فيديوهات في اليوتيوب لتبديل هذا الحساس .. بس المشكلة اللي يتكلمون عنها هو إن السيارة مرات ماتشتغل بسبب هذا الحساس ..
لكن أنا ما صارت معاي هذه المشكلة .. اللي صار معاي هو (( كع الموتر )) فجأة .. أقولها بدون مبالغة .. بريك قوي يعني حتى أنا لو مو رابط الحزام كان لصقت في السكان !!
هي نادراً ماتصير معاي .. وفي المرتين اللي صارت معاي قبل كنت شاكك إني أنا يمكن دعست البريك يقوة بدون ما أدري ..

لكن اللي صار معاي أول أمس .. تأكدت أن السبب مو مني .. لأني كنت منتبه أكثر لما وصلت الإشارات .. والحمد لله أن مافي حد وراي ولا كان دعمني ..

فهل حد صادفته هذه المشكلة ؟؟
هل هو عيب مصنعي ؟؟
هل هناك مشكلة في نظام الردار ؟؟ لأن النيسان الفل أوبشن فيه خاصية مثبت السرعة مع تشغيل خاصية الردار وهذه تخلي النيسان يهدئ السرعة لما تقرب من موتر جدامك ..
ويضرب بريك كذلك بنفسه دون تدخل من السايق .. فقلت في نفسي يمكن في مشكلة فنية فيه .. لكن مثبت السرعة في كل الحالات اللي صارت معاي ما كان مثبت !!
أنا أثبت السرعة بس في السفر ... ومع ذلك تحدث المشكلة فقط عندما أشيل رجلي من على الريس وأحطها (بدون دعس) على البريك علشان أجهز نفسي للتوقف أو تهدئة السرعة ...

[سعود.]

هذي خاصية غير عن السواقة خلال الضباب او تثبيت السرعه الي تتكلم عنها البريك التلقائي يشتغل بروحة حتى لو انك موب مثبت السرعه .عندك رادار في الجامة الي قدام والثاني في الصدام الامامي تحت الرقم . واحد منهم مسوؤل عن البريك اتوقع الي بصدام يمكن علية وصاخة او عالق علية شي وسبب هذي المشكلة او سبب فني ريح نفسك . عن طريق الشاشة ادخل علي مساعدة السائق وسوى ايقاف لهذة الخاصية .
98287

[asulaiti]

اخوي سعود مشكور على الإضافة .. باشوف اليوم هذا الاختيار وين أحصله ..

لكن غريبة ياخوي إن ما يصير معاي إلا في (السنة احسنة) !!
يعني مب بشكل دايم .. وما اعتقد أن الموضوع بسبب وصاخة عالقة في الردار .. لأن لو فعلاً كذلك كان وقف الموتر فجأة أكثر من مرة في اليوم الواحد ..
لكن خطأ فني أو عيب مصنعي احتمال كبير .. ومتخوف من الأمر لأن ماعندنا قانون ينصفنا نحن المستهلكين ..
ممكن أودي السيارة الوكالة ويقول لي الرادار اخترب (يعني مش عيب ظهر فيه) والضمان انتهى وبدله على حسابك بالشيء الفلاني !!

أتمنى بس أعرف .. هل في أحد عندي نفس موتري .. نيسان فل أوبشن أبو خمس كاميرات (ستي تايب على قولة الوكالة) صادفته هذه المشكلة ؟؟

اللي شفته من مشاكل البريك في المنتديات هو أن الموتر مايشتغل بسبب عطل وعيب فني في حساس البريك ويتم تبديله بواحد جديد من الوكالة يكون مصنع من جديد بحيث
يتم حل مشكلته وهي عيب التصنيع ..

لكن .. إن يكع الموتر فجأة هالشكل بدون سبب واضح .. ما عرفت الحين اذا في حد صادته هذه المشكلة ..
والمشكلة خطيرة اخوي سعود .. يعني لو واحد وراي شوي ملصق .. بالراحة كان دعمني ..

اخبر في واحد من شباب الدوحة خبير نيساين الشكل جديد .. واعتقد أنه له تواصل مع الوكالة في الدوحة .. والمركز الرئيسي للشرق الأوسط في دبي ..
أذكر اسمه في المنتديات .. قاهر الدروب .. أو قاهر الصحراء .. شيء من هذا القبيل .. اذا تعرفه اخوي سعود أو حد من الأعضاء أبغي أوصل له .. وأكلمه في هذا الموضوع ..
يمكن عنده فكرة عن الأمر ..

ومشكور يا سعود مرة ثانية على المداخلة ...

[سعود.]

لاوالله ماعرفه ؟؟؟

اخوي حلك الوكاله . وحاليا الغي الخاصية لين تشوف لها حل . لانه فعلا البريك التلقائي قوي جدا ولو وراك موتر احتمال كبير تسبب حادث لاسمح الله .

والعفو اخوي

[بعيد النظر]

اخوي تاكد انك ما ترجع القير من d لل N

مرة صارت معاي في 22 فبراير .. في موتر واحد من الربع
وبالتوفيق

[asulaiti]

اخوي تاكد انك ما ترجع القير من d لل n

مرة صارت معاي في 22 فبراير .. في موتر واحد من الربع
وبالتوفيق

في البداية للمرتين اللي صارت لي قبل .. شكيت أني يمكن بالغلط رجعت القير لـ n ..
لكن المرة الأخيرة تأكدت إني ما رجعت القير .. وكلامك صحيح لو بالغلط رجعت القير يكع الموتر لو انت دعست بريك ..
صارت معاي مرة لكن مب في النيسان ...... أظن ..

الحادثة الأخيرة خلتني متأكد من أن هناك مشكلة في البريك 100% .. لأن الوقفة كانت قوية جداً وهناك مسافة كبيرة بيني وبين الإشارة ..
وأسوق وأنا منتبه .. يعني أكيد راح أحس بحركة غير طبيعية مني لو إني دعست بريك بقوة .. لكن أنا كنت مركز والأمور عادية بالنسبة ..
وبديت أجهز نفسي لتهدئة السرعة .. وفجأة !!!!!

لا حول ولا قوة إلا بالله .....

[asulaiti]

تذكرت شيء .... ما أدري ... يمكن له علاقة بالموضوع .................

وهو هناك حادث بسيط جداً جداً صار لي في بدايات استخدامي للنسيان ..
كنت واقف في الإشارة مع الزحمة .. ولهيت شوي عن الشارع وأنا واقف انتظر الاشارة تفتح ..
كنت اثبت الجوال في الشاحن اعتقد .. ولا لهيت مع شاشة النيسان ..المهم النيسان تحرك شوي ودعمت اللي جدامي دعمة خفيفة ..
ماصار شي لصدام موتري .. يمكن خدش بسيط ماتشوفه إلا إذا ركزت .. واللي جدامي كذلك نفس الشيء .. بس الخدش كان واضح لموتره هو ..
المهم رحنا المرور طلع ورقة هو .. وأنا ما طلعت لأن الموضوع بسيط ومركب حماية وسالفة .. فقلت ما يحتاج ..

لكن .... هل يتضرر الرادار اللي مثبت أسفل اللوحة بهكذا حادث بسيط ؟؟؟

[بونووف]

يوم ضرب بريك كان في موتر قدامك ولا .؟ صادني الموقف مرتين وكله لانه في مواتر قدامي عدم ترك المسافه راح يوقف الموتر .. ومره طلع ليت فالطبلون لانه العدسه كانت مغطيه بالطين

حاول تنظف البوكس اللي يكون داخل الصدام فالنص او اذا ماتبغي الخاصيه تقدر تسكرها عن طريق الدقمه تحت عن ركبتك اليمنى

[asulaiti]

في كل مرة يكون هناك موتر جدامي نعم .. لكن بعيد أو مسافة آمنة مع سرعة السيارة .. يعني آخر مرة عند اشارات المجنون وكنت ماشي بسرعة معتدلة يعني 80 أو أقل لأن زحمة الشارع ..

لكن الحين بانظف البوكس وباشوف .. أما الدقمة بادور عليها .. عند الركبة اليمنى هناك مفاتيح فتح الشنطة وتعديل المناظر وطيها .. ومفتاح تعديل مستوى اضاءة الاصطابات ..
ما انتبهت أو مب ذاكر اذا فيه مفتاح ثاني للأمور هذه .. لو تذكر لي اسمه هو رسمة الآيقونة مالته ؟؟
كأن في زر عليه رسمة سيارة تطلع منه دوائر ؟؟
هذا الزر تقصد ؟؟

[بونووف]

بس عيل العدسه مافيها مشكله .. لانه نفس الشي صادني وقفت السياره عند المطبه وعلى قياسي انه السياره اللي قدامي بتنزل من المطبه وبتحرك لكن البريك ظرب مره وحده .. ونفس الشي صار تحت اشارات الاند مارك كنا ماخذي يسار والسياره تمشي شوي شوي وانا وراه لكن بعد على حسبتي انه اوكي والمسافيه كافيه بس البريك كان مفاجيء والحمدالله انها عدت على خير

ادقمه على اليمين تحت ماراح تشوفها اذا قاعد انزل من السياره وطل تحت على اليمين بتلاقي دقمه بروحها عليها 3 حروف bmi او ebm .. اللي تتكلم عنه كله يسار

[رآعي موآجيب]

الصراحه الموضوع مهوب بسيط ويخوف فعلا ، انا استخدمت هالمواتر ولا زال عندي واحد ، بس كلهم بدون رادار وكانت نيتي واحد ابو رادار مع الفيس لفت القادم ، لكن الظاهر اني برجع للقاعده اللي تقول ( كثرة الاوبشن يعني كثرة الصيانه )

عموما الشيخ مهم جدا تلغي الخاصيه اللي وضحها اخونا سعود ، اخسر تقنيه لكن احافظ على عمري والركاب واللي بيكون وراي في الشارع

ننتظر اللي بيصير معاك

[asulaiti]

مشكور على التوضيح يا بونووف .. اليوم إن شاء الله باشيك عليه في الليل ..
وباتأكد من العدسة هل فيها شيء أو وصخ عالق .. والله المستعان ..

بس انت كلمت الوكالة عن مشكلتك ؟؟
وش قالوا لك ؟؟

[بونووف]

العفو اخوي السليطي والموضوع بسيط بأذن الله

.. مب مشكله لانه هذي قراية الرادار وردة فعله ماتوقع الوكاله بتفيدني .. وديت لهم الموتر مره بس يوم طلع ليت في الطبلون بالكود الي قلت لك عنه EBA او EBI .. قعدوا ساعه لين عرفوا شسالفه واللي هو قلت لك طلع طين مغطي الرادار وفصل ومنها قالوا لي وين مكان الزر اللي يفصله على طول وانصحك تفصله وان شاء الله ماتحتاجه... الموتر بعته من زمان وخذت لي se قبل شهر

[asulaiti]

الصراحه الموضوع مهوب بسيط ويخوف فعلا ، انا استخدمت هالمواتر ولا زال عندي واحد ، بس كلهم بدون رادار وكانت نيتي واحد ابو رادار مع الفيس لفت القادم ، لكن الظاهر اني برجع للقاعده اللي تقول ( كثرة الاوبشن يعني كثرة الصيانه )

عموما الشيخ مهم جدا تلغي الخاصيه اللي وضحها اخونا سعود ، اخسر تقنيه لكن احافظ على عمري والركاب واللي بيكون وراي في الشارع

ننتظر اللي بيصير معاك

بالعكس اخوي راعي المواجيب .. الخاصية جداً مفيدة خاصة في السفر أو حتى بعض الأحيان أقبض خط محلي مو متأكد من أماكن الردارات أثبت السرعة الذكية مع خاصية الرادار علشان ما أتعدى السرعة بالغلط ..
وفي نفس الوقت الموتر بروحه يهدئ السرعة ويزيد بنفسه لما يفتح الخط معاه .. أنا استخدمه بأمآن في الوقت الحالي (بس طبعاً أكون يقظ ومتحضر لأي طارئ) .. يمكن يطفئ الرادار بروحه !! لكن طالما شغال
أكون مريح ارجولي بس ماسك السكان ومركز في الطريق ..

لكن مشكلتي هو بدون مثبت السرعة .. والمشكلة ما صارت معاي إلا ثلاث مرات منذ 2011 وحتى اليوم .. تظل مشكلة تؤرق فعلاً .. لكن حدوثها بين فترة وأخرى متباعدة جداً هو اللي خلاني أنسى الموضوع !!

لكن راح اشوف موضوع الدقمة هذه وباشوف الوكالة وش يقولون ....

[بن قطر]

هذي خاصية غير عن السواقة خلال الضباب او تثبيت السرعه الي تتكلم عنها البريك التلقائي يشتغل بروحة حتى لو انك موب مثبت السرعه .عندك رادار في الجامة الي قدام والثاني في الصدام الامامي تحت الرقم . واحد منهم مسوؤل عن البريك اتوقع الي بصدام يمكن علية وصاخة او عالق علية شي وسبب هذي المشكلة او سبب فني ريح نفسك . عن طريق الشاشة ادخل علي مساعدة السائق وسوى ايقاف لهذة الخاصية .
98287

كنت اعاني من نفس المشكلة لين سكرت الخاصية اللي قالك عنها الاخ سعود،،
هذا هو الحل ان شاء الله

فمان الله

[asulaiti]

أشكر الجميع على مداخلتهم ...

الآن تبين لي فعلاً أنني لست الوحيد الذي صادفته المشكلة .. وهذا واضح بأن المشكلة عيب مصنعي ..

طيب الإخوان اللي صادفتهم هالمشكلة .. ما تكلمتوا مع الوكالة عن هذا الموضوع ؟

وإذا نعم .. ماذا كان جوابهم ؟؟

[سعود.]

[B]
أشكر الجميع على مداخلتهم ...

الآن تبين لي فعلاً أنني لست الوحيد الذي صادفته المشكلة .. وهذا واضح بأن المشكلة عيب مصنعي ..

طيب الإخوان اللي صادفتهم هالمشكلة .. ما تكلمتوا مع الوكالة عن هذا الموضوع ؟

وإذا نعم .. ماذا كان جوابهم ؟؟

هلا اخوي

يمكن موب الكل صارت له هذي المشكلة . يمكن موديل عن موديل يفرق ؟؟؟

الموتر عندي وكالة 400 le من 2013 كامل الزيادات ولا صارت لي بس اعرف انة بيكون بريك قوي جدا ومفاجئ . وعرفت هذي المشكلة من حساب مختص في الانستقرام . وذكرتها لكم

وشكرا

[وحيد-الشوق]

وانا كنت احسب اني موسوس يعني مب انا بس صارت معاي مرتين مادري ثلاث ام النكبة زين مادعمت حد موتري 2013 le فل اوبشن

شيء خطير بس مب عارف من وشو معقول حساس البريك يشتغل بروحه ويوقف السيارة المشكلة شلون نفهم الوكالة !!!

[qatarman8008]

هذي طال عمرك الرادار اللي قدام السيارة..
هو يفترض انك بتدعم السيارة اللي قدامك ويمسك بريك..
لكن الموضوع كله فيوز تفصله وخلاص..

[بوخالد911]

أشكر الجميع على مداخلتهم ...

الآن تبين لي فعلاً أنني لست الوحيد الذي صادفته المشكلة .. وهذا واضح بأن المشكلة عيب مصنعي ..

طيب الإخوان اللي صادفتهم هالمشكلة .. ما تكلمتوا مع الوكالة عن هذا الموضوع ؟

وإذا نعم .. ماذا كان جوابهم ؟؟

هلا
ليش ما رحت الوكالة وتقولنا النتيجة؟؟؟
لا هنت.

[الذوق1]

موفق يالغالي

سبحان الله وبحمده ... سبحان الله العظيم

استغفر الله العظيم واتوب اليه

لا اله الا انت سبحانك اني كنت من الظالمين

[وحيد-الشوق]

هذي طال عمرك الرادار اللي قدام السيارة..
هو يفترض انك بتدعم السيارة اللي قدامك ويمسك بريك..
لكن الموضوع كله فيوز تفصله وخلاص..

حد ممكن يفيدنا شلون نفصله

قبل اسبوع صارت معاي في اللؤلؤة بعد وزين محد كان وراي ولاقدامي البريك كان حده قوي انا والعبري تصرقعنا هل هذا عيب مصنعي في السيارة ؟؟

[سعود.]

حد ممكن يفيدنا شلون نفصله

قبل اسبوع صارت معاي في اللؤلؤة بعد وزين محد كان وراي ولاقدامي البريك كان حده قوي انا والعبري تصرقعنا هل هذا عيب مصنعي في السيارة ؟؟

شوف الرد رقم 2 للموضوع .

[وحيد-الشوق]

شوف الرد رقم 2 للموضوع .

شكراً لك ياخوي والسموحه ماكنت منتبه عالرد لأني قلت يمكن في فيوز بعد نفصلها

اتمنى ماتصير معاي بعد لأنه صج نكبه ورب العالمين حفظنا

جزاك الله خير

[ولد المنصور]

يالربع هذا امان لكم ,, وصارت معااااي وايد وحتى على سرعات عاليه ..

والموضوع بسيط اترك مسافه كافيه بينك وبين اللي قدامك ...

[t1978]

كلامك صح مليون في الميه انا تبهدلت ولا في فايده رحت الوكاله يقولون مافي شى قهروني اشلون اراويهم المشكله ماقدر بالصدفه يصير معاي يكع ابريك كانك مسوي حادث
من القهر بعت السياره

[sos 12]

أنا عندي نيسان 2010 ... صارت معاي اكثر من مره .... وطبعا الوكالة كالمعتاد مايعرفون الخلل .... اسلم طريقه تترك مسافه أمنه ولا تحاول تلحم في الي قدامك .... خاصتا عند المطبات ... او البكس الي في الصدام بسكروب تشيله اذا كانت سواقتك متهورة

[{ابوعبدالله}]

هذي خاصية غير عن السواقة خلال الضباب او تثبيت السرعه الي تتكلم عنها البريك التلقائي يشتغل بروحة حتى لو انك موب مثبت السرعه .عندك رادار في الجامة الي قدام والثاني في الصدام الامامي تحت الرقم . واحد منهم مسوؤل عن البريك اتوقع الي بصدام يمكن علية وصاخة او عالق علية شي وسبب هذي المشكلة او سبب فني ريح نفسك . عن طريق الشاشة ادخل علي مساعدة السائق وسوى ايقاف لهذة الخاصية .
98287

للاسف مافي فايده فصلتها وصارت معي بعد فصلها المشكله ان قوة البريك مبالغ فيه لدرجة ان ولدي عمره 3 سنوات طار من الكرسي الخلفي و حصلته جنبي بس للحمدلله الله ستر

[وحيد-الشوق]

‏
يالربع هذا امان لكم ,, وصارت معااااي وايد وحتى على سرعات عاليه ..

والموضوع بسيط اترك مسافه كافيه بينك وبين اللي قدامك ...

اي امان الله يرضى عليك :swoon2:الا دمار الي تقصده ياخوي وقت ماتشغل النظام بالزر الاخير الايمن في السكان هذا نظام يكع الموتر بروحه اذا قربت تدعم بس انا مب مشغله ولا شيء وصارت معاي في شارع مافيه سيارات اخر مره في اللؤلؤة صوب كمبنسكي طلعة الفندق الظاهر الموتر حسباله جبل ويكع ذاك البريك الخايس

‏
كلامك صح مليون في الميه انا تبهدلت ولا في فايده رحت الوكاله يقولون مافي شى قهروني اشلون اراويهم المشكله ماقدر بالصدفه يصير معاي يكع ابريك كانك مسوي حادث
من القهر بعت السياره

المشكله من بتفهم هناك اكيد هذا عيب مصنعي في السيارة ومحد يدري الظاهر مالنا الا ننتظر استدعاء للسيارات!

‏
أنا عندي نيسان 2010 ... صارت معاي اكثر من مره .... وطبعا الوكالة كالمعتاد مايعرفون الخلل .... اسلم طريقه تترك مسافه أمنه ولا تحاول تلحم في الي قدامك .... خاصتا عند المطبات ... او البكس الي في الصدام بسكروب تشيله اذا كانت سواقتك متهورة

مره صارت معاي عند المطبه طيب والي صارت معاه في مكان فاضي وماحوله احد

‏
للاسف مافي فايده فصلتها وصارت معي بعد فصلها المشكله ان قوة البريك مبالغ فيه لدرجة ان ولدي عمره 3 سنوات طار من الكرسي الخلفي و حصلته جنبي بس للحمدلله الله ستر

الله يحفظه لك والله صادق البريك مبالغ فيه شدعوه جذي والقهر صارت معاي في مكان مافي سيارات !!!!!

يا اخوان اكيد في طريقه نفصله على طول عشان مايخرف ويشتغل بروحه يليت نلقى افاده والله يحفظكم