مطلوب مبلط حوش

[HSMK]

السلام عليكم ورحمة الله وبركاته
اخواني الكرام
ابي منكم ولا عليكم امر شخص من الجنسيه الاسيويه
يبلط لي الحوش وعندي تصميم معين ابيه يطبقه لي بس يكون محترف في التبليط
والصبيات الخاصه بالسيارات ويكون حد منكم مجربه ومضمون شغله يعني يكون محترف بمعنى اصح
لان اغلب الي بالسوق للاسف
ماعندهم خبره او مصداقيه ولكم جزيل الشكر

[معماري قطري]

عليكم السلام ورحمة الله وبركاته

لازم تحدد له شتبغي وتتفق معاه .. أعرف مقاول زين باكستاني ممكن يسوي هذي الشغلات بس خل نقاط الاتفاق واضحة

أول شيء خله يجيب لك دفان يعدل السلوبات حسب وزنية يسويها بالحديد ويحط علامات لين وين بيدفن ولين وين بتكون الصبية .. ولو الحوش مساحته معقولة أضمن لك تسوي الأرضية كلها خرسانة بعد ما تحدد أماكن الزراعة بطابوق وتحفرها للدفان وتمدد الماي والكهرباء

دوم نصيحتي ابتعد عن البودرة والصبية حتى لو كانت معمولة في الموقع مب ردي مكس ما عندك مشكلة بس خله يستخدم معاها خلطة فايبر مقوي وبدون حديد ويصبها على بلاستيك سميك ويسوي فواصل تمدد .. لو الصبية بسمك 10 سم كل 10 متر فاصل في الاتجاهين ولو 12 سم كل 12 متر

الوزنية خله يسويها لك بخيط في البداية شلون بيكون المستوى قرب البيت حتى تضمن شكل زين وسلوب زين .. ولا تنسى تسوي نعلات 20 سم في الأطراف ولو تبيها بشكل أحسن سوها افقية كخط وخل السلوب من تحت متغير يعني في مكان بتكون 10 سم مثلاً وفي طرف ممكن 30 سم ولو تسويها رخام وحتى لون يختلف ممكن تطلع أحلى

[معماري قطري]

هذا الموضوع بيفيدك نوعاً ما ومواصفات الفايبر بتحصلها في الموضوع المثبت عن التعاقد

http://www.qatarshares.com/vb/showthread.php?619355-%C7%E1%DD%D6%C7%C1%C7%CA-%C7%E1%CE%C7%D1%CC%ED%C9-%E1%E1%E3%C8%C7%E4%ED-landscaping&p=10450411#post10450411

[HSMK]

الله يعطيك الف عافيه اخوي معماري قطر
على ردك الطيب والمعلومات المفيده فيه وانت دايم تتحفنا بمعلوماتك المهمه
والمفيده للجميع ماتقصر ياخوي وحاليا حصلت واحد وبطبع الكلام الي كتبته
عشان اطبقه معاه وان شاء الله يكون يعرف يضبط الي ذكرته
ماقصرت عزيزي وبارك الله فيك لاهنت

[معماري قطري]

الله يوفقك اخوي

السلوبات كثيرين ما يوزنونها من البداية وبعضهم يبالغون فيها بحيث رامب دخول البيت تحك فيه السيارة .. لكل متر يفترض ننزل سنتيمتر او حتى نص سم لو المسافة طويلة

لو جبت مساح بعد لتحديد الارتفاعات والسلوبات اضمن لك .. الخيط والماي ما يكون دقيق او جهاز الليزر يعطيك سلوب واضح ودقيق وسعره رخيص بس بعض المقاولين ما يتطورون كلش

[سعود.]

أهم شي مايكون نفس هذا الاخ

98464

:eek5: