استشاره بخصوص عمل بلكونه اضافه للمنزل

[q6ryah]

السلام عليكم والله يعطيكم العافيه
حبيت اضافه بلكونه للصاله وتكون جهه مفتوحه والنص الثاني مغلقه تكيف وتطل على الحديقه
انا حابه يكون التصميم زجاج بس اخاف ماتكون بارده بسبب الشمس وعيالي يبون تصميم كوخ وواجهته زجاج ياريت احد يقدر يفيدني شلون اقدر اسويها طابوق لازم ولا فيه مواد ثانيه تستخدم

[q6ryah]

وهذه الصوره للفكره الي انا والعيال عاجبتنا ياريت حد ينصحني ويدلني على مكان يشتغل مثل هالافكار

[شموخ دائم]

,

,

مرحبا

حياك الله

عذرا على التاخير الصوره ما كانت طالعة معاي

ورفعتها من جديد حتى يطلع عليها الاعضاء


http://www2.0zz0.com/2016/10/01/12/148087426.jpg

نصيحه لاتسوينها مفتوحه نهائيا بقطر ماينفع شي مفتوح او برنده او بلكونه مفتوحه
راح يكون فيها الكثير من الغبار

خليها مسكره كامله والواجهه زجاج
ممكن تخلين الزجاج ينفتح وقت الحاجه للهواء الطبيعي
ويتسكر

ان شاء الله تلاقين الكثير من الاقتراحات للتنفيذ

,

,

,

,

[معماري قطري]

ما فهمت شلون الوضع .. هل هي في الدور الأرضي أو فوق؟ المساحة تسمح والمحيط حولها وشو ؟ ممكن تطل على الجيران ويكشفونها

الكوخ الخشبي شكله جميل بس بيكون غالي وايد وشركة مختصة تسويه وبعدين يحتاج لصبغ خاص حماية .. لو المساحة خلفية وما تخرب الواجهة ممكن نسويها مثل العريش خشب دنجل أو مربع مصبوغ أو حتى منظف ومصنفر بدون صبغ .. لو فوق ممكن نسوي لها حائط حامل من الطابوق المملوء بالخرسانة حتى يثبت ويقوى وفوقه أرضية خشبية وعليها صبية بسيطة .. وهذي شفتها في فلوريدا أو حتى خرسانة بحديد تنشبك مع الجسر الموجود وفوقها ممكن نظام الكوخ أو سقف خشبي مايل عليه قرميد والعمدان ممكن نكمل على الطابوق وممكن نسويها خرسانة ونسوي أقواس

لو سويتي درايش معزولة حتى لو مواجهة للشمس الحرارة تجي خفيفة وممكن تكون غرفة للتشمس والجزء المفتوح أصغر ما يمكن يكفي لكرسيين وطاولة

[معماري قطري]

موضوع بناء الغرفة في الحوش للأخ شموخ دائم مثال حق شيء ممكن تعملينه وممكن تكون غرفة مستطيلة وجزء بسيط مفتوح لو تحبين

الجزء المفتوح ممكن نسوي فيه باربيكيو أو حتى جلسة خارجية ليلية أو وقت الأجواء زينة

[q6ryah]

المكان بأذن الله راح يطل على الجهه الخلفيه للمنزل وتقريبا الحوش نظام ساتر ماله اي مطل على البيوت الجيران وفيه خصوصيه لذلك حبيت فكره جهه مفتوحه لو مساحتها صغيره تتبع الفيلا بالدور الارضي والباقي مغلق مكيف طيب لو احد عنده فكره عن تلبيسات تعطي شكل الخشب تتلبس على الحوائط وتكون معالجه

[معماري قطري]

بتطلع حلوة ان شاء الله وحتى لو التوسعة تكون تحت وفوق تسوون ممكن غرفة تشمس فوق حتى لو صغيرة او اي شيء ثاني حتى مخزن

التخشيب داخلي احلى وأي منجرة تسويه والأخشاب انواع كثيرة

لو بتلبسين خشب نصيحة خلي فراغ بين الحائط والخشب بخشب مربع وحتى تمديدات الكهرباء ممكن تكون في التجويف وحتى بلاستر لتخلينهم يسوون الا خارجي

ونفس طريقة بناء اخوي شموخ دايم بس ممكن اساسات منفصلة واصغر لو الارض قوية وممكن تسوون الارضيّة نازلة والجلسة تكون نازلة ما تعيق الروية للخارج

[q6ryah]

الله يعطيك العافيه ويزيدك من العلم تبارك الله نستفيد منك

[معماري قطري]

الله يعطيك العافيه ويزيدك من العلم تبارك الله نستفيد منك

الله يعافيج ويتمم عليج الشفاء

[sweet qatar]

عادي حبيبتي تقدرين تسوين الي تبينه

ممكن تحطين ابواب زجاج فولدنج تفتحينهم في الجو الحلو وتسكرينهم في الحر