أستشارة زراعية

[amer_almarri]

السلام عليكم ورحمة الله وبركاته

الله يعطيكم الف عافية جميعا على جهودكم الطيبة

ابغي استفسر أيش أفضل الاشجار اللي تعتبر من مصدات الريح،
وكيف تكون زراعتها؟ في صف واحد؟ او صفين؟ وكم متر بيكون بين كل شجرة والاخرى؟
ما هو الافضل والانسب؟

ماهي الاشجار اللي تنمو بسرعة ويكون لها ظل واسع للاستفادة من الظل؟

ما هو الحاجز الانسب للزرع؟

استفسار ثاني هل فيه جهه في قطر اقدر استفيد منهم كستشارة في الزراعة والامور الزراعية؟

وشكرا

[فنجان قهوة]

اخي الكريم ممكن تستفيد من مشتل البلدية الى قريب من المطار القديم ..على يدك اليمين وانت جاي من برج عبدالغني اتجاه جسر ابو عبود ..فيه اشجار جيده متنوعة وبسعر رمزي .. ويوجد مهندسين زراعيين ممكن تستفيد منهم وسوف يرشدونك بكل ما تريد.

[Rider]

ياخوي روح اي مشتل وطلب منه لي تبغيه وهو بيوفر لك وبيقولك كل الي تبغيه

[معماري قطري]

عليكم السلام ورحمة الله وبركاته

كل نوعية من الأشجار الكبيرة لها عمق حفرة مناسب ولها نوعية تربة معينة خصوصاً لبعضها .. شجر جوز الهند يحتاج تربة ملحية مثلاً وبعض الأشجار تتطلب نوعية معينة من التسميد

الحوض بعمق 2 متر وبحماية الأطراف بطابوق وعزل عن تسرب الماء للأساسات القريبة ضروري والتربة وخلطها مع السماد كذلك ضروري وضروري وضعها على طبقات وبدايتها تكون طبقة طينية خالصة في القاع حتى تمسك الماء ولا تسمح بتسربه بعدها سماد شوي وبعدها رمل مع طين مع سماد وتقلل السماد كل ما وصلت فوق وتقلل الطين

النخل بعد فترة بتحصل جذوره طالعة فوق والسواتر كثيرة منها السدر تطلع بسرعة وأنواع القرط المزهر منظر ومصدات والسرو منظر جميل وممكن تزرع جنب بعض

لو عندك مساحة كبيرة تقدر تسوي حائط حاجز للدفان وتسوي مثل التلة الصناعية من الدفان المرتفع والمائل وتزرع أعلاه شجر سرو مثلاً متقارب وممكن كل نص متر شجرة اتوقع بس تأكد من مختص الزراعة .. الحائط يسمونه حائط استنادي زين حصلت المعنى بالعربي .. ترجمة له retaining wall وهذا ممكن يكون ملامس للحائط الخارجي وحماية له من وزن التلة ومن تسرب المياه .. ممكن تسويه بارتفاع متر أو أكثر ولو حبيت تزرع بعد السرو نخل أو واشنتونيا أو سدر ممكن وممكن تسوي كم صف من الزراعة والسقي عن طريق التنقيط أفضل

المزارع بركات اتوقع موجود وهو صعيدي سواق شيول ويزرع حسب فراغه ومشارك في لكل ربيع زهرة من زمان والوقت الحين وقت زراعه واللي يبي رقم بركات يراسلني وان شاء الله بس يكون متفرغ لأنه أوقات يكون مشغول طول الوقت

[سالم الزهران]

ما اضيف شيء ، الا ان تحط في بالك ان الناس صارت تتأذى من الاوراق و البذور اللي تعبي الاحواش لذلك اختر الشجر اللي طرحه للورق اقل من غيره ،، وكذلك ان يكون الشجر بعيد عن خطوط التصريف لان بعض الشجر له جذور قوية تكسر الدنيا ،،، ( عندك استاذنا المعماري معطيك طرق الحماية و لا يهونون الربع بعضهم مجرب مشاكل وحلول وبيفيدونك ان شاء الله ).

[النهار]

السلام عليكم ورحمة الله وبركاته

الله يعطيكم الف عافية جميعا على جهودكم الطيبة

ابغي استفسر أيش أفضل الاشجار اللي تعتبر من مصدات الريح،
وكيف تكون زراعتها؟ في صف واحد؟ او صفين؟ وكم متر بيكون بين كل شجرة والاخرى؟
ما هو الافضل والانسب؟

ماهي الاشجار اللي تنمو بسرعة ويكون لها ظل واسع للاستفادة من الظل؟

ما هو الحاجز الانسب للزرع؟

استفسار ثاني هل فيه جهه في قطر اقدر استفيد منهم كستشارة في الزراعة والامور الزراعية؟

وشكرا

ياخوي مر على قطر حضراء في منطقة الدحيل ان شاءالله تجد الاجابه على ستفساراتك

[qatarman8008]

وين رجل تعليم.. ؟
دكتور في هالمجال..

[رآعي موآجيب]

حياك الله يا عمير

فيه حساب قطري متخصص في هذه الامور على تويتر

بيفيدونك بأذن الله

اسم الحساب / زراعة قطر أو qatar_zera3a@

موفق ان شاء الله

[م. عبدالعزيز]

ياخوي مر على قطر حضراء في منطقة الدحيل ان شاءالله تجد الاجابه على ستفساراتك



السلام عليكم اخوي الغالي
انا اليوم مريت عليهم لكن مبناهم مهجور ومافيه حد ، هل تغير مكانه ولا شلون. حتى ارقام هواتفهم مقطوعه.

[amer_almarri]

الله يعطيكم العافية جميعا
وجزاكم الله خيرا
على المعلومات القيمة والمفيدة

حبيت أخبركم أن الزرع بيكون في أرض فضاء ولا يوجد جنبها أي بنيان

عندي سؤالين:

السؤال الاول: وشو أفضل زرع من جميع النواحي التالية يكون عبارة عن مصدات ريح ذو ظل كثيف وسريع النمو؟

السؤال الثاني: ماهي الخضراوات التي أقدر أزرعها بين النخل اذا كان بين كل نخلة والاخرى 7 امتار؟

وشكرا جزيلا لكم

أخوكم / عامر المري

[QtrGate]

شجرة الغاف معروف بأنها من مصدات الرياح العمودية
لكن وين تحصلها اهني المشكلة

وعندك شجرة الاكاسيا معروفه وتستخدم في قطر تقدر تسوي بحث عنها

أنا اشوف السدر ( الكنار ) تنفع كمصد للرياح ونستخدمها في قطر

والحلو تقدر تزرع انواع منها وانتاجها كثيف

واذا عندك وقت تقدر تزور بعض المزارع وتشوف انواع الشجر الي زارعينها