2000 ريال سنويا

[حمد 2002]

السلام عليكم ورحمه الله وبركاته

2000 ريال سنويا
بعض الشركات بقطر تقوم بكفاله المقيمين نظير قيامهم بدفع مبلغ سنوي مقداره من 1500 ريال الى 2000 وهكذا مع تكفل الاجنبي بدفع رسوم تجديد اقامته السنويه ، فنجد تلك الشركات تكفل اعداد هائله من المقيمين ، لنظرب مثال بسيط شركه قامه بكفاله 100 شخص ويقوم هؤلاء الافراد باعطائها 1500 ريال سنويا ، المجموع = 150 الف ريال على اقل تقدير وكلما كثر العدد زادت ارباح الشركه السنويه ، وقامت ادارت العمل مشكوره باعطاء بلوك للشركات الي ماتحول رواتب عمالها عن طريق البنوك ولكن تلك الشركات تقدر تتحايل على ذلك عن طريق تحويل راتب 1000 ريال شهريا للشخص ، ومن ثم اعادته الى حساب الشركه عن طريق العامل او عن طريق الاحتفاظ ببطاقات العمال المصرفيه .

ومن اثار تلك الظاهره هو انه هؤلاء الاجانب يشتغلون اي شغله في سبيل الحصول على المال ، فتجد الي يشتغل تاكسي خصوصي غير مرخص ، والي يشتغل مقاول غير قانوني وغيرها المزيد من المهن ..


تحياتي

حمد 2002

[راجي الْعفو]

وعليكم السلام و رحمة الله و بركاته

موضوع اخذ الرسوم على الكفالة ، هذا المال مشكوك في كونه حلال ، لان الاصل في عقد الكفالة عدم اخذ مقابل

من اسوأ الاشياء موضوع العمالة الفايضة
شي يعور الراس
مسوين زحمة من لاشيء
لا ، و ربعه اللي هني يضبطون وضعه و يرتبون امور هروبه من الكفيل و يشغلونه في شغلهم الخاص
نتمنى تشديد الرقابة في مثل هالموضوع
لان المساوئ من ورا هالسالفة كثيرة على الدين و الاخلاق و العادات وانتشار الفوضى..الخ

[بوخميس]

عرفتوا ان البلا كله في الكفيل القطري؟!

[بانغ بانغ]

من كذا مساكين البتان والنيباليين امنثرين في الشوارع عمالة سايبة

[راجي الْعفو]

من كذا مساكين البتان والنيباليين امنثرين في الشوارع عمالة سايبة

ماصار للقطريين خصوصية
ما تعرف تاخذ راحتك في مكان
الله المستعان

[الامتياز]

الله المستعان

[معماري قطري]

كان عندي سايق هندي شغله ياكل ويرقد ويتنرفز لو ودى العيال مكان

المدارس كانت قريبة وهذا قبل يمكن 8 سنين وأُم العيال ما تسوق يوصلها بنفس خايسة وتكشيرة .. وتعود كل سنتين قبل ليسافر بفترة يقول لي تبي ارجع زيد معاشي والا عطني نقل كفالة باشتغل في شركة وبسبب الوقت ضيق اوعده اني بازيده وازيده لين رجع

ولين خلاص مليت من لعبته وقبل ليسافر بفترة قال لي نفس القصة قلت له خلاص ولا يهمك شوف كفيل وباوقع لك على نقل الكفالة .. وبديت اعلم ام العيال تسوق وهو يضحك ومستغرب في شهرين الا مطلع ليسن لها وتسوق خلاص وطلبت سواق بنغالي .. جنن السواق وحاول يشرده بأي طريقة نذل مشتغل عندي حول 14 سنة بس ما يبين في عينه وضار .. وتميت كل ما قربت الاجازة اقول له وين كفيلك انا باسافر ثرى وهو يماطل بعدين قال لي كفيله الجديد مسافر .. قلت له خلاص دبر نفسك ما ابيك انا باسافر وبارجع وبانقل كفالتك وهو قال باسكن عند ربعي قلت زين حتى ما يشرد البنغالي

المهم رجعت واتصلت به وبعد يماطل قلت له لك شهر لو ما جبت كفيل أما تجي اسفرك أو بابلغ عنك وباخلي مسؤوليتي .. إكتشفت النذل يسوق وهو على كفالتي لأني طلبته اسوي معاه مخالصه ادفع له معاشه كان باقي له شهر واوقعه على أوراق انه ما يطالبني بشيء واستلم رواتبه كاملة وبينقل كفالته ووقعت له على نقل الكفالة .. بس انصدمت يوم شفته يسوق وقلت له انا لازم اخلي مسؤوليتي وابلغ عنك حول ست شهور ما سوى نقل الكفالة .. بلغت عنه وامسكوه واشتغلوا ربعه وجابوا كفيله الجديد وسلفوه مبلغ 4500 اعتقد اللي هو الغرامة وسووى نقل الكفالة وافتكيت

بقى حول 8 سنين ما راواني ويهه الا يوم اتصلت به اسئل عنه مع إنه ساكن قريب .. المهم من أيام جاتني اتصالات من الهند ومن عمان .. شصاير زوجته من الهند وزوج اخته من عمان يكلموني يبوني اطلعه من السجن .. قلت وين كفيله انا ما اقدر اتدخل ومنيه منيه تفرغت بعد ما رجعت من سفرة قصيرة كلمني نسيبه وقدرت اتفاهم معاه .. شمشكلته قال محصلين عنده ممنوعات .. هو قال مفتشين غرفته ومتهمينه وهو ما سوى شيء .. قلت وين انا لو اروح بيحطوني معاه هذا مسوي مشاكل ليش كفيله ما يطلعه انا ما اقدر ولا اتجرأ بعد

كسرت خاطري مرته مسكينه برسالتها لي رسالة صوتية على الوتس أب بس شسوي