سويت عملية ازالة الحصوة من الكلية والحين فيه ألم !

[بـن عدوان]

السلام عليكم

يوم الثلاثاء سويت عملية منظار تفتيت حصى تخدير كامل

حطوا لي قسطرة ودعامة

القسطرة شلوها بعد العملية والدعامة امس شليتها

عقب ماشليتها بساعة تقريبا جاني الم شديد في الكلى مكان العملية

على طول رحت الطواري وعطوني ابرة مسكن وقالوا هاي طبيعي !!!

رجعت البيت وخذت بروفين

واليوم قمت ونفس الشي جاني الم قوي وخذت بروفين خف شوي وبدا يرجع لي

هل هالشي فعلا طبيعي ؟

ياخي الم الكلى يذبح

[لبيبة]

وعليكم السلام ورحمة الله وبركاته،

اول شي الحمد لله على سلامتك،

وثاني شي روح الطوارئ وطالب بدكتور متخصص وقول لهم ان الالم لا يحتمل.

اعتقد ان الطوارئ عندهم اسلوب تصريف المرضى بدون ما يقدمون علاج حقيقي في اول زيارة،

كرر زيارتك لهم وورطهم بأنهم ما عالجوك وطالب بطبيب متخصص وتصوير وكل اللي يقدرون يسوونه.

والله يشافيك ويعافيك.

[بوNasser]

ما عندي جواب بس حبيت اتشكر لك بالسلامة

لا باس طهور ان شاء الله،

تكفير ذنوب ورفعة درجات بإن الله،

وماتشوف شر.

[بانغ بانغ]

ما تشوف شر بن عدوان اجر وعافية

[بـن عدوان]

رجعت الطواري وبعد الفحوصات

طلع 4 ملم حصوة في الحالب

ويقول الدكتور عملية

والعملية متعب مايصير عمليتين ورا بعض

عندكم نصايح عشان تنزل

[بانغ بانغ]

اشرب عصير قصب السكر ايدر البول الله يكرمك بس لازم علاج احسن لم

[aloosh]

السلام عليكم
نصيحه لوجة الله سافر اقرب مكان وافحص لا تثق في مستشفى حمد نهايا ولا تستهين في الالم

وشفاك الله وعفاك

[بـن عدوان]

شاكر لكم ردودكم

للحين الحصاة موجودة .. حصوتين بعد من الصوبين صغار

في عيادات ممكن تشيلهم بالليزر او اياً كان غير العملية ؟

[بوخالد911]

خطاك الشر.

[عوآآآآشـي]

خطاك الشر ان شاء الله وربي يخفف عليك الامك

[asulaiti]

مأجور إن شاء الله ... ماتشوف شر

[حليتان*]

ماعليك شر ان شاء الله

طهور يالغالي


اشرب بير (شعير) ينظف الكلى

[سالم الزهران]

لا باس عليك و الله يمتعك بالصحة والعافية ، وان شاء الله بيفيدونك الاخوان ، الف سلامة يبن عدوان

[بصمة قطرية]

ما عليك شر إن شاءالله ..
إذا تقدر تروح البحرين
الدكتور عيسى أمين من أفضل دكاترة الكلى
و غالبية مرضاه من قطر ..

[الرايــق]

ما تشوف شر ان شاء الله

[المحاميه]

ماتشوف شر
وحمدالله ع سلامتك
الله يخفف عنك الالم ..

ياريت اللي يعرف يساعده ..

[عاشق العديد]

ماتجوف شر يارب ..

ما انسى يوم جاني اللم وانا فطياره .. ولا يقولك من صغر الحصاه ماتبين اساسا .. بس ناشبه بمكان وماتبي تتحرك ..

الله يعين يارب

[مــاي ورد]

في محلات العطاره فيه شي ينباع اسمه الصمغ العربي مطحون وجاهز للشرب
وموجود في سوق العلي عند محل الاصاله

تشربه يوميا قفشة او قفشتين مع قلاص ماي وايد زين لتشغيل الكلية ونفس الوقت ينظم عملها ويذوب الحصا

ممكن تقرون عنها في النت

وشفاكم الله