الحذر يا اخوان [الأرشيف] - منتديات شبكة الأسهم القطرية

مشاهدة النسخة كاملة : الحذر يا اخوان

جبر ال جبر

31-10-2016, 12:34 PM

اذا عندك اي سلعه ناوي تبيعها سواء منزل او سياره او رقم او اي شي قيمته عاليه والطرف الاخير يبي يحرر لك بها شيك اطلب منه Manager Cheque شيك مصدق ولاتردد ,,,, لاتاخذ شيك عادي واذا هو عنده فعلا المبلغ ماراح يتردد فاعطاءك الشيك قوله دامك تبي تعطيني شيك عطني شيك مصدق او روح جيب المبلغ كاش
الي داعاني لكتابه هذا الموضوع خلال هالسنه حصلت 3 مواقف لاصدقاء لي اخرها الخميس الماضي كلهم شيكاتهم رجعت والسبب مافيها رصيد
واحد من الربع باع سيارته يوم الخميس بملغ 320 الف ريال قطري وهو منزل اوردي في سعر السياره للمشتري وعطاه شيك يوم الخميس بالمبلغ يوم راح البنك قالك الموظف مافيه رصيد؟؟ قاله زين يمكن الريال بيودع اخر النهار ارجع لكم العصر او اجيكم الاحد قاله لاتعب نفسك هذا دايمن شيكاته ترجع زين شالحل وين اودي الشيك قاله بعطيك ورقه للعاصمه قسم الشيكات يفيد بانه مافي رصيد لهالشيك وفعلا تم هالشي وراح العاصمه قبل ينتهى دوامهم وقابل الضابط هناك ولمن شافه الضابط ضحك قاله انسى شيكك!!!!!!
الله يعوض عليك (بغض النظر عن فعل هالضابط السلبي والغير جدير بالمسؤليه)ولكن هو الواقع لانه اجراءات طويله ومعقده في انتظار صديقنا صاحب الشيك والحق معاه
عادها بتروح النيابه ومن النيابه محكمه وينتظر علي شيكه سنوات والله يعوض عليه فعلا السبب ضعف القوانين الي صارلها 30 و40 سنه وماتطورت اضف الى ذلك قل الوعي لدى اكثر الناس وثقتهم حبيت احذركم وانبهكم لهذا الامر الهام جدا عساها تجنب قطري او حتى مقيم مسلم في الوقوع لمثل هذي العثرات مستقبلا وخصوصا الي عندهم بيوت او اشياء بالملايين مايسوى عليه يضيع بيته او حلاله عشان نصاب استغل ثغره قوانين ويعرف انه ماراح يتحاسب الا بعد سنوات ( هذا اذا تحاسب بعد)
يكون دخل قيمتها اضعاف اضعاف بالحرام......

ضوى

31-10-2016, 12:36 PM

اشلون يسجل له السيارة قبل لا يقبض المبلغ ؟

المفروض حتى لو عطاه شيك مايسجل الا لما يستلم الفلوس والا شنو الضمان انه فيه رصيد ؟

اسمح لي رفيجك غلطان

لبيبة

31-10-2016, 12:41 PM

جزاك الله خير على التحذير، والله يعوض على اللي راح عليه الشيك.

بس سؤال، هل الواحد يقدر يطلب Manager Cheque من مؤجر بيعطيه الشيكات مقدما بتاريخ كل شهر لفترة الايجار كاملة؟

مرشد الاخوان

31-10-2016, 12:44 PM

اسمحلي صاحبك ابله ولا يستحق حماية القانون اذا كان ممكن تصديق القصه من الاساس وفي هذا الزمان اللي كل شي واضح وضوح الشمس ... رغم كل هذا القانون في صفه ولا عليك من الضابط روح المركز وقدم الشيك واتبع الاجراءات ولا تخلي السالفه تروح على الفاضي

شبح الصمت

31-10-2016, 12:55 PM

جبر ال جبر

31-10-2016, 01:00 PM

يالربع على رسلكم شوي هدووو ... اول شي الرجال بالعكس موقفه سليم شدخل مايتسحق حمايه القانون الرجال اعتمد على الله وع القانون اصلن في حقه بموجب شيك له قيمه
والشاري النصاب فحص السياره وقاله ابيها وهذا شيكك وكان يوم اربعاء عطاه الشيك بتاريخ الخميس وراحو المرور وسجل يعني شرايك انت يطلب كاش مثلا 320 الف ؟
بالعكس اي شخص ممكن يمر بالي مر فيه صاحبنا عطني رايك انت في المساله تبي اول شي يقبض فلوسه وبعدين يسجل يمكن الشراي مايرضى بعد يقوله شلون اعطيك فلوس على شي ماملكته تعال نسجل واستلم فلوسك وكون المبلغ كبير هذا شيك لك ؟
انا نصحتكم بناء على موقف تعرض له اكثر من صديق لي خلال هالسنه واحنا هنيه نتنتاقش في افضل السبل والممارسات الي تجنبا الوقع في مثل هالمواقف لانه قانونا مازال ضعيف جدا في الردع لمثل هولاء انا اقترحت شيك مصدق خصوصا للمبالغ الكبيره من ربع مليون وطالع انت عطني اقتراحك احنا هنيه مش بس ننصح ونحذر ايضا نقترح حلول
اما مساله صديقي كان مغفل او مب منتبهه الرجال يحسب انه الشيك له قوه يقدر يسحب راعيه من خشمه ويجيب حقه في نفس اللحظه مايدري انه الموضوع محتاج سنوات عشان تجيه فلوسه فالخطاء في وجهه نظري الشخصيه من قله وعيه مش انه مغفل او ابله يليت نرتقى شوي في الفاظنا

جبر ال جبر

31-10-2016, 01:04 PM

الله يجزاك خير وتكلمت من قبل

قلت انه صارت مع اثنين اعرفهم

ولنفس الشخص

عطاهم شيكات فالليل على اساس بيصرفون المبلغ وياخذ توقيع الضابط اذاعليه رقم مميز ومن الصبح وهو محضر فالمرور ينزل الرقم ويركب رقم ومع السلامة

وراحو البنك عشان يصرفون مبالغهم وطلع مافي رصيد

وعقب راحو اشتكو عليه وما اعرف شلي صار معاهم بعدها ..

فنفس ما تفضلت لاحدن يثق في حد ويعطيه الثقة شخص ما اعرفك لك كل الاحترام والتقدير عالعين والراس
لكن الحق حق ..

لانه موضوع الشيك سالفة ولازم يرجعونه البنك 3 مرات عقب يعطونك اورقه للعاصمة وتروح تقدم بلاغ

الله يعوض كل شخص انصب عليه
والله ياخذ حق كل مظلوم من كل ظالم ونصاب ..

وحسبنا الله ونعم الوكيل

جعلك حي وسالم كلامك صحيح بس لو لا معرفه هذا النصاب بضعف القانون ماتجراء وكتب شيك بدون رصيد ودليل على ذلك كثره القضايا عليه وحتى البنك مانتظر 3 مرات يرجع الشيك عطاه ورقه العاصمه سبب رجوع الشيك وهو واقف وعلمه انه الرجال عليه شيكات وايد راجعه المفروض اقلها يسكرون حسابه..... في احد الدول المجاوره مانبي نذكر الاسم عشان محد يتحسس ينفض الواحد قبل لايحرر شيك بدون رصيد من قوه القانون عندهم

بانغ بانغ

31-10-2016, 01:16 PM

صحيح المنجر شيك ينصرف في دقايق وهو حجز على فلوس صاحب الحساب يعني ضمان

الدوحه1

31-10-2016, 01:26 PM

صارت معاي واستلمت فلوسي بعد حوالي سنه ولكن بعد وجع راس مع المحاكم!!

اللي قاهرني وباط جبدي ليش "الأجنبي" اللي يعطي شيكات بدون رصيد مايتسفر ويمنع من دخول البلد مره ثانيه؟؟
اش الفايده من وجود هالنصابين في البلد؟؟؟

سبق وان طالبت إعادة النظر في قانون العقوبات لان بعض القوانين قدييييييييييييييييييييمه ولاتكفي لردع المجرمين والنصابين!!!!!

Dana’1

31-10-2016, 01:27 PM

قانون وإجراءت قضائيه ظالمه للأسف ،،وإالا البشر يطلع منها كل شي
الله يعوض عليهم
وجزاك الله خير للتنبيه

شبح الصمت

31-10-2016, 01:35 PM

جعلك حي وسالم كلامك صحيح بس لو لا معرفه هذا النصاب بضعف القانون ماتجراء وكتب شيك بدون رصيد ودليل على ذلك كثره القضايا عليه وحتى البنك مانتظر 3 مرات يرجع الشيك عطاه ورقه العاصمه سبب رجوع الشيك وهو واقف وعلمه انه الرجال عليه شيكات وايد راجعه المفروض اقلها يسكرون حسابه..... في احد الدول المجاوره مانبي نذكر الاسم عشان محد يتحسس ينفض الواحد قبل لايحرر شيك بدون رصيد من قوه القانون عندهم

ويحيك ويسلمك الرحمن ياخوي

مساعة قاعد اسولف مع واحد شغال في مكتب محامه

قلت له ياخوي ليش ما يطبقون نظام الاتصال وطرحناه من قبل انه اذا في شخص ابي استفسر وهو معاي بيحرر لي شيك اتصل في مكتب في العاصمة واعطيهم رقم بطاقته الشخصية واسمه بالكامل ..
قالي لا ما يصير هذه اشياء سرية ..
قلت له اكيد سرية وقال في يمكن شخص عليه شيك شيكين مسترجعين وبينهم فترات

قلت له انا ما اقصد الشيك شيكين هذولي مب مشكلة تعثر شيء

بس على الناس الي شغاله صرف شيكات ..
وشيء ثاني البنك نفسه اشلون يحرر دفتر شيكات لواحد شيكاته ترجع
مفروض اللوم يقع على البنك نفسه انا رجع لي فوق الـ 5 شيكات خلاص يعطوني بلوك

ما يصرفون لي دفتر شيكات لين اسدد الي علي
والا بس قدمت عطوني ..

جبر ال جبر

31-10-2016, 01:40 PM

صحيح المنجر شيك ينصرف في دقايق وهو حجز على فلوس صاحب الحساب يعني ضمان

صحيح بس يحجزها لك لصالح المستفيد واذا ماتمت الصفقه يرجعها في حسابك ..و انا شخصيا صارت معاي بس العكس ابي اشتري رقم سياره وراعي الرقم قالي الشيخ ابي الشيك منجر قلت له تم و فالك طيب رحنا البنك انا وهو وكتبت له الشيك منجر وكوني تميز ف البنك ماخذا علي حتى رسوم الشيك وخليت الشيك في مخباي وشافه ويوم وصلنا المرور وقلبنا الرقم بسمي سلمته الشيك يعني عادي مافيها شي اذا الواحد اخذ شيك منجر ماهو نفس الشيك العادي بس هذا ضمان فلوسك والحرص واجب

MAZEN37

31-10-2016, 01:40 PM

علشان هالمشاكل انا احب اتعامل مع وسيط
سواء معرض سيارات او مكتب عقار

ذكي جدااا

31-10-2016, 01:43 PM

جزاك الله خير على التحذير، والله يعوض على اللي راح عليه الشيك.

بس سؤال، هل الواحد يقدر يطلب Manager Cheque من مؤجر بيعطيه الشيكات مقدما بتاريخ كل شهر لفترة الايجار كاملة؟
يصير اذا المؤجر وافق لانه معناته كامل المبلغ برصيده بينحجز لصالح البنك ومايقدر يصرف منه ولا ريال. يعني بالعربي كأنه أعطاه ايجار سنه كامله مقدم.

جبر ال جبر

31-10-2016, 01:44 PM

ويحيك ويسلمك الرحمن ياخوي

مساعة قاعد اسولف مع واحد شغال في مكتب محامه

قلت له ياخوي ليش ما يطبقون نظام الاتصال وطرحناه من قبل انه اذا في شخص ابي استفسر وهو معاي بيحرر لي شيك اتصل في مكتب في العاصمة واعطيهم رقم بطاقته الشخصية واسمه بالكامل ..
قالي لا ما يصير هذه اشياء سرية ..
قلت له اكيد سرية وقال في يمكن شخص عليه شيك شيكين مسترجعين وبينهم فترات

قلت له انا ما اقصد الشيك شيكين هذولي مب مشكلة تعثر شيء

بس على الناس الي شغاله صرف شيكات ..
وشيء ثاني البنك نفسه اشلون يحرر دفتر شيكات لواحد شيكاته ترجع
مفروض اللوم يقع على البنك نفسه انا رجع لي فوق الـ 5 شيكات خلاص يعطوني بلوك

ما يصرفون لي دفتر شيكات لين اسدد الي علي
والا بس قدمت عطوني ..

ترى هذا تصرف سليم اني اسال عن الشخص سواء من البنك المركزي او العاصمه وبعدين اذا هو مش محترم ونصاب ويحرر شيكات بدون رصيد هذا المفروض يعلقون اسمه وصورته عند باب العاصمه هو وغيره من من تسول لهم نفسهم اكل اموال الناس بالباطل ماعاد فيها سريه وستر
انا اتفق وياك بان يكون هناك مكتب متخصص للاستفسارت مابي تفاصيل وتاريخ حياته سؤال واحد فقط عندي فلان بن فلان رقم بطاقته الشخصيه xxxxxxxxممكن ياحضره الموظف تفيدني بس هل عليه شيكات راجعه او سجله نظيف او يكون تطبيق مع مطراش تشوف فقط اذا هالشخص عليه شيكات اولا مالنا خص في باقي اللمخالفات

شبح الصمت

31-10-2016, 01:48 PM

ترى هذا تصرف سليم اني اسال عن الشخص سواء من البنك المركزي او العاصمه وبعدين اذا هو مش محترم ونصاب ويحرر شيكات بدون رصيد هذا المفروض يعلقون اسمه وصورته عند باب العاصمه هو وغيره من من تسول لهم نفسهم اكل اموال الناس بالباطل ماعاد فيها سريه وستر
انا اتفق وياك بان يكون هناك مكتب متخصص للاستفسارت مابي تفاصيل وتاريخ حياته سؤال واحد فقط عندي فلان بن فلان رقم بطاقته الشخصيه xxxxxxxxممكن ياحضره الموظف تفيدني بس هل عليه شيكات راجعه او سجله نظيف او يكون تطبيق مع مطراش تشوف فقط اذا هالشخص عليه شيكات اولا مالنا خص في باقي اللمخالفات

قلنا هالكلام ونعيد مب أي شخص يتصل ويسأل عن احد بتناخذ بياناته قبل لا نعطيه نقوله اصبر اشوي نكلم راعي الشيك الي بيصرف ها الشيخ هل انت بتخلص مع فلان الفلاني نعطيه المعلومات

طبعاً أهنيه شلي بيصير لو صار وتطبق هالموضوع الي يحررون شيكات والله العظيم راح تشووووفهم يتنافضون والا يحررون شيك بالساهل اذا موضوع المكتب فعلوووه

خلنا نشوفهم بعدين اش بيسووون

والي واثق من نفسه بيقولك توكل على الله وعطه المعلومات
واذا مافي تلفون ماعندي اي مشكلة يفتحون في الاماكن المهمه مثل المرور وغيره مكتب استفسارات من قريب ..

مضارب دوسري

31-10-2016, 01:52 PM

انا صارت لي نفس القصه في 2010
كان المبلغ 30000

من عقبها اي احد بيشتري مني سلعه اقووله في وجهه جيب فلوسك كاااش ولا اسف ماراح ابيع

وذاك الشخص تميت معاه سنتين بالتمام والكمال عشان عقب يحكمون عليه بسجن 6 شهور
وعلى ذمة 42 قضيه اخرى بيتم محبوووس

مضارب دوسري

31-10-2016, 01:55 PM

واقووولها وللاسف
ان القانون في صفهم

لان لو قطعت يد السارق لما تجرأ الاخرون على السرقه

يقول بعطيهم شيكات بقيمة 4_5 مليون وبحول كل املاكي باسم اخوي

وبنسجن 4 _ 5 سنوات وعقب بطلع وبيسموني فلان التاجر

هذا اقصر طريق للثروه

ومنهم من عقب سنتين او ثلاث يسوي تسويه مع اللي رافعين عليه قضايا بدفع 40% من فلوسهم
خصوصا اذا المبلغ الاجمالي فوق ال10 مليون

وللاسف في ناس كثير توافق على مثل هالتسويات

يا اخوان احفظوا فلوسكم واموالكم ولا تبيعون شي الا والفلوووس كااااش في جيبك

الى درجه من 3 سنوات كنت ببيع رقم وتواعدنا فالمرور ولما جاني عطاني شيك وهو من ال ثاني قلت له اسمحلي ياخوي انا صار معاي كذا كذا سابقا ضحك وقالي كفووو عليك وراح سحب المبلغ من البنك وجابه لي

شموخ دائم

31-10-2016, 01:56 PM

,

,

مرحبا

شكرا على الموضوع وعلى التحذير

مثل هذي المواضيع ( تزيد الوعي ) بين الناس وترفع الحذر

وتحط الحل والتصرف السليم بمثل هذي المواقف

وهو

( الشيك منجر )

وعلى الناس الحذر

استغرب من بعض الردود الي ( تهاجم ) الضحيه

وتترك الموضوع الأصلي ( النصاب )

كل الناس معرضه للنصب والاحتيال داخل قطر وخارج قطر

لايغرك اسم ( قبيله ) او لقب كبير او اسم معروف او اسم غني او تاجر

ترى أصحاب النفوس الضعيفه موجودين بكل عائله وبكل قبيله

والقانون لازم يكون ( اقوى ) مع ( النصابين ) ومن يتعمد النصب على الناس

هذا لازم ( ينسحب ) من بيته على السجن

وما نتركه كل يوم يزيد النصب على ناس جديده

حتى ننظف البلد منهم

ان شاء الله الحق يرجع لاصحابه والله يعوضهم خير

واذا ما اخذ حقة بالدنيا

بيكون ( غالي ) في الاخره على النصاب

يدفعه الحين ( ارخص له )

,

,

,

المحاميه

31-10-2016, 02:01 PM

موضوع مهم ..

ونقل التجارب اهم ..

الحياة الخالدة

31-10-2016, 03:16 PM

جزاك الله خير على التنبيه
للأسف الشخص الطيب واللي عنده ثقة بالناس .. واللي ما يتوقع المضرة والغدر .. يجونك ناس ينعتونه بالغباء والغفلة .. وغيرها من الأوصاف السيئة .. اللي من المفروض تطلق على الجاني .. وليس المجني عليه

الله يرد الحق من كل ظالم

بوخالد911

31-10-2016, 04:40 PM

ممكن اسم هالنصاب ع الخاص
لا هنت

والله يحفظنا من شرورهم.

طلعة الروح

31-10-2016, 04:43 PM

ليش مايكون البيع عن طريق محل احسن بوايد
ليش يضطر الواحد يتعامل مع الافراد
خاصه ان الثقه هالأيام بضماير الناس باتت شبه معدومه
وان شالله العوض خير

طلعة الروح

31-10-2016, 04:48 PM

بوخالد911

31-10-2016, 04:51 PM

مافي أحلى من الكاااااش
نوط ينطح نوووط

:)

مخطط قطري

31-10-2016, 05:03 PM

المفروض عقوبه الشيك بدون رصيد حبس لمده شهر تنفذ في نفس الدقيقه الي رجع فيها الشيك مب غرامه 50 ريال،،،اكيدبيكثرون
النصابين اذا بس غرامه 50 ريال بحرر شيك بمليون ريال حق واحد بعزل منها 30 الف للمحامي يترافع عني لمده سنتين ويطول في القضيه وبشغلها في السوق وعقب سنتين تكون دبلت وبرجع للرجال الي يطالبني بمليون كل شهر 3000 ريال على مدى 10 سنوات

(بوطلال)

31-10-2016, 09:44 PM

في دبي اذا عندك شيك بدون رصيد وقدمته للشرطه خلال ساعات راعي الشيك ينقط في السجن ومايطلع الا لما يدفع المبلغ اما عندنا الله بالخير اسهل طريقه للنصب هي الشيكات . ضحكت من سالفة واحد محكوم عليه فشيكات بدون رصيد محبوس من سنه بس تدرون وين ؟ في غرفه ملكيه في احد المستشفيات على اساس الاخ مريض مايتحمل السجن !!!!

technical

31-10-2016, 09:52 PM

بسم الله الرحمن الرحيم ، اعتقد أن النصيحة التي تستلمها بتكون بحسب ما ستدفع !

مثلاً إذا تريد تكتب عقد أو تدخل في معاملة قانونية فوق خل نقول مئة الف ريال ، ليش ما أروح عند محمامي واقوله على شروط البيع من دفع أو شروط أو تنفيذ وأخذ رأيه ، وفي أغلب الأحيان لن تكلف الاستشارة أكثر من 500 ريال.

السؤال الذي يجر نفسه لماذا لا تدفع هذه الخمسمائة ويورط صاحب العلاقة في مبلغ فوق مئة الف ريال! ترى قالوا الأولين ما يأكل مال البخيل إلا العيار!

نفس الشيء يجي مع شروط العقد في مسألة التفاوض مع المقاول والمشرف, فتلقى البعض يتفلسف الف فلسفة مع المقاول أو المشرف لكنه ما يتشاور مع خبير عن العقد الذي يجب أن يكتبه وفيه حفظ أقوى لحقوقه.

الصرف على الشور قبل المعاملة سوف يوفر الكثير من الجهد والوقت الذي قد يأتي حال مخالفة الأخر التصور الذي قد يكون لطرف من أطراف العقد أو المعاملة.

أتمنى أن يتكفل المرئ تكلفة السالفه مع متخصص قبل لا يدخل في ما قد يسمسة البعض مغامرة! لكن الجاهل بالمحاذير التي قد تنشب نتيجة توليفة الشروط الموضوعة سواء كانت مكتوبه او عرفيه .

مع التمنيات أن تضع وزارة المالية أو البنك المركزي نظام يمكن صاحبه من مراجعة السجل الاتمان للشخص صاحب العلاقة سواء كان فرد أو شركة!

مثلا يدخل الشخص رقم البطاقة الشخصية الى شاشة كمبيوتر وتقول الشاشة ان معدل التمنان للشخص هذا أو الشركة هذه "الف" أو "أ" ومعدل الشخص هذا او الشركة هذه "ثاء" أو "ث" .

صاحب المعدل أ لا يوجد عليه أي مشاكل مالية أو مطالبات وقد كانت الممارسات المالية التي عبر خلالها 10 مليون خلال السنة الفائت.

أريد أن أكدد أن هذا المعدل للملائة المالية موجود بين البنوك ، لما لا يتم وضعه أمام الأشخاص الطبيعيين والشركات؟ والسلام.

Tomford_qtr

31-10-2016, 10:16 PM

يا كثر الشيكات اللي ترجع من غير رصيد ... وللاسف من مواطنين

طلعة الروح

31-10-2016, 10:37 PM

يا كثر الشيكات اللي ترجع من غير رصيد ... وللاسف من مواطنين

الشيك اداة وفاء وليست وسيلة ضمان أظن عندنا ماشيين على الطريقه الثانية وهاي الي مطول السالفه ومعقد الاجرائات

alberaky

01-11-2016, 12:40 AM

جزاكم الله خير

ريم الشمال

01-11-2016, 03:18 AM

الله يعوض عليه ويرد له حقه

ليس مغفل من أراد أن يعيش حياة سوية ولكن قوانين البلادنا يجب أن تتغير لكي تحمينا من هؤلاء السارقيين النظيفين في الخارج وداخلهم اوسخ من المجاري استحل الحرام ويتشدق
بقوله القانون لا يحمي المغفلين إذا لنغير القانون الذي يحمي السارقين لكي نحمي الاسوياء من المواطنيين .

معماري قطري

01-11-2016, 06:11 AM

R 7 A L

01-11-2016, 06:30 AM

نشكرك على التحذير
مافيها شي اذا طلب الواحد شيك مانيجر
لين متى وحنا نخجل ونستحي من حقوقنا

الماريّة

01-11-2016, 07:12 AM

اعوذ بالله من النصابين واهل النصب

لاحول ولاقوه الا بالله حسبي الله عليه ونعم الوكيل
والله يعوض رفيجك كل خير

وحقه ماراح يضيع عند رب العالمين

:
:

Bo jassim 33

01-11-2016, 07:43 AM

الخلل والتعقيد في الاجراءات
ومافي قانون صارم بهذا الخصوص

انا رافع شيك على واحد مصري من شهر 4
وللحين جلسه وراء جلسه

الله المستعان

شبح الصمت

01-11-2016, 07:49 AM

المقصد من كلام اخوي جبر

الحذر ثم الحذر ثم الحذر

أنه لاحد يقولكم شيك وروح اسحبه

قوله روح اسحب المبلغ كااااااااش وانا انتظرك أياً كانت البايعة الي راح اتم بينك وبينه

لا تستحون من حقكم

لانه في فئة من الناس خربت علينا وخلتنا نحط خط احمر لحدود ثقتنا في الناس الي نقابلهم ..

ليس تقليلأ من قدرهم ولكن حفاظاً على سلامتنا من الخسارة المادية والنفسية والمرمطية من مكان لي مكان ..

مستـريــح البـــال

01-11-2016, 07:51 AM

في هالزمن لا مجال للمشاعر خصوصا في التعاملات المالية ،،،

والمشكلة ان القيمة الفعليه للنقود تفرق يوم عن يوم ،، فدائما المتضرر خسران خسران ..

مشكور ياخوي ، ولا هنت ،،

مخطط قطري

01-11-2016, 09:43 AM

واحد من الإخوان العرب جمع من فترة ومن كم بنك مبلغ مليار ريال بالحيلة وبأوراق مزورة وبرشاوي للموظفين في بعض البنوك

سافر واشتغل بالفلوس وكان يسافر في طيارة خاصة .. لعب على مستوى وما ادري شصار تأخر في السداد أو إنكشف إن بعض الضمانات مزورة وكان منها عقود توريد .. انسحب وانسجن وطلع بعد فترة تم حول سنة وأكثر وبعض اللي حققوا معاهم بعد دخلوا مشاكل وانسجنوا ويمكن بعضهم للحين وهو طلع بدون ما يدفع شيء حسب ما سمعت

لا ابشرك انه انجلد لين ماقال بس وحسب ماذكر انه رجع جزء كبير من المبلغ ولاتنسى انه اغلب قروضه من بنوك وهذولا لو بقو فلوسهم يعرفون شلون يجبونها اذا الي تقصده هو الي ف بالي الي ابوه شيخ دين معروف

qatarman8008

01-11-2016, 09:52 AM

السؤال المطروح هو كيف يتم بيع سلعه او سيارة بدون قبض المبلغ..
انزين حتى لو عطاه شيك بيروح يودع المبلغ في حسابه اول ثم بيحولون الاسامي..
انا اتفق معاك في موضوع انه الشيكات في الدوحة للاسف هذي هي طريقتها..
اذا طلع الشيك بدون رصيد ماتخلص من المحاكم والجلسات .

مخطط قطري

01-11-2016, 10:30 AM

واحب اضيف على الموضوع شي مهم ويليت الساده القضاة يتنبهون له مثلا انا قطري اجيب لبناني وافتح شركه يديده مالها خص ابدا بشركتي الاساسيه وهذي الشركه اليديده افتح فيها عده نشاطات واهم نشاط اعاده تاجير العقاراات واخذ عليه رخصه تجاريه باضافه هذا النشاط واحط في حساب الشركه 10 مليون ريال واضبط امور اللبناني هو المفوض بتوقيع وهو الوحيد الي يوقع الشيكات انا ماوقع ولا شي و اعطيه سياره من سيارتي بورش ولا بنتلي وهي بسمي الشخصي
وهنيه تبتدي اللعبه القذره واستغلال ثغرات القانون اقوله انت ودلالينك انتشروووو وجيبو لنا اكبر عدد من العقارات الجديده الي مش مؤجره ع سبيل المثال عماره 70 شقه في مشيرب يروح له البناني بسياره القطري طبعا اللبناني عوينكم فيه يرسل مناديبه ودلالينه للقطري قبل برستيج اونه ويتفاوضون ويا المالك شخصيا مثلا الشقه بياخذونها منه ب7500 والمالك بيطلب ضمانات اولها كشف حساب من البنك باخر 6 شهور وعادي المالك اذا عنده علاقات بيسال عنهم وهو متوقعين هالشي بيشوف سجلهم ابيض ماعليهم شي وعندهم رخصه بهالشي ولمن يعطونه كشف حسابهم اخر 6 شهور بيشوف انه فيه 10 مليون (وهذا اصلن فقط عمر الحساب ) وعادي يدخلون مليون ويسحبونها وتصير حركه طبيبعه في الحساب ( انا اتكلم عن مالك عقار محترف وحريص يسوي هشكل وياهم وبيخدعونه فما بالكم عن الناس الغشيمه او المغفله سواء عنده فيلا او عماره صغيره او مسكين مايعرف في هالامور يبي ياجر وبس وخصوصا الي عليه مديونيات او عقاره مرهون للبنك ويبي يسدد) المهم يقلون له خلاص بناخذ 70 شقه ب7500 وهذا شيكاتك حق سنتين او 5 سنوات حسب العقد ويعطونه اول شهر مقدم كاش اغراء له وويسون هالشي في اكبر عدد ممكن من العقارات 20 او 30 عقار وفي الجانب الثاني يرحون ياجرون العقار بنصف قيمته الحقيقه مثلا ايجار الشقه 7500 يرحون ياجرؤنه بس ب 3500 او4000فقط بس يطلب من المستاجر الجديد دفع مقدم سنه ولنفرض طلع المقدم سنه 3 مليون ريال لجميع الشقق يعطون المالك نص مليون مقدم شهرو2 مليون ونص في بطونهم وقيس على هالشي 20 او 30 عقار
اللعبه مانتهت هذي عمليه نصب يسونها ومستمرين علها كل نصابين العقار في الدوله بس الاحترافيه وين خلال هالشهر الي جمعو فيه العقارات واجروها وقبضو قيمتها قبل يدخل الشهر الثاني بكم يوم يقوم القطري الكفيل يسمح لمدير الشركه اللبناني بمغادره البلاد طبعا يسحب 10 مليون الاساسيه مالته الي حاطها بشركه ويوديها شركته الاساسيه وتكون دشت ولنفرض 10 مليون جديده حصيله جمع ايجارات مقدمه لسنه عن جميع العقارات يتقاسمونها 5 مليون القطري و5 مليون اللبناني القطري يسحبها ويوديها في حساب اخر غير طبعا حساب الشركه يخلون حساب شركتهم مكشوف اللبناني يطلع ب5 مليون من قطر ع اساس الشركه شرت للاستثمار قطعه ارض او فندق او مطعم او اي شي وتودع 5 مليون ريال في حساب بنك لبناني في الاساس يخص اللبناني الحرامي هذا ويطلع برا قطر يدش الشهر الثاني على ملاك العقارات الشيكات كلها راجعه التصرف كالتالي يلجون لفض المنازعات يبيله ينتظر شهر او شهرين لين يصدر الحكم بالخلاء يروح التنفيذ ينتظر 7او 8شهور لين يتم الاخلاء في احسن الاحوال تضيع عليه سنه مراكض في المحاكم عشان دخيل الله بس يرجع عقاره
عقب ماترجع عقارات الملاك يصير مطالبات على الشركه لانه الي موقع الشيكات بسم الشركه هو البناني والقطري ماله خص ابدا في شي قدام القانون ولاحد بكفو يقوله شي قانونيا
التهم والمبالغ وكل الحقوق ياخذونها من اللبناني كونه هو من وقع الشيكات جنائيا المحاسب فقط اللبناني ويكون هرب خارج البلاد بالفلوس وتقعد تحوس ماتعرف وين تجيب حقكك وتضيع بين 20 محكمه والنيابه طبعا طول هالسنه وانت تراكض بس ماعندك الا تخلي عقارك تدخل في السنه الثانيه تبي مايتسحق من اجره عن كل هالشهور الي ضاعت ادش المحاكم من يديد وتوكل محامي ويبتدون يقاضون الشركه وجلسات يمكن بعد سنه قدام طبعا اللبناني يكون عليه منع دخول البلد بس هذا اكثر شي يقدرون يسونه له وتكون عليه احكام( ماتوقع واحد نصاب بهالمستوى بيصير غبي ويرجع قطر) وحتى الانتربول مايقدر يسويلك شي لانه في اتفاقيه لازم يطلع دوله ثالثه اما في لبنان اموره في الروب يتشمى في السوليدر وشارع الحمراء بفلوس هل قطر ولا حد يقوله شي نرجع للمساكين هل قطر اصحاب العقارات الي صارلهم سنوات مع المحاكم يبون شيي من هالشركه تصير مداولات وجلسات مالها نهايه وتاجيل
والخصم ماستلم اشعار الحضور وروح جيب عنوانه والمحامي مب فاضيلك يعرف انه القانون ضعيف ومايقدر يرجع لك شي وتكون عنده 100 قضيه غيرك سهله وتوصل فيه مايحضر جلساتك ويطقع لين عقب يبتدون يحاسبون الشركه الي عطتهم الشيكات عقب سنوات طبعا مب الحين فالقطري النصاب الكبير الي ضام اللبناني في هالسنوات عايش حياته بطول وعرض واموره كلها سليمه وعقب شيسوي محامي القطري هذا بس بشكل تمثيلي درامتيكي ويطول في الموضوع اكثر ويحجزون الشركه الي مافيها شي الا اسم ع ورق حتى مقر ماعندهم ولا يدفعون رسوم تجديد الرخصه ولايبونها اصلن يجمدونها !!! وعقب يعلن المحامي (محامي القطري النصاب) افلاسها ويجيب مصفي واقعد 5 او 6 سنوات مع المصفي الي اصلن اصول الشركه صفر وتتطلع من المولود بلاحمص بس فقدت اموالك ووقتك واعصابك وصحتك ومخالفات مروريه في كل جسله لانه مافي مواقف والادهى والامر والمضحك في الامر حتى وانت طالب بفلوسك تدفع للمحكمه وتدفع للكاتب وتدفع رسوم ولا مايعتدون بقضيتك ولازم عقدك موثق وتروح البلديه وتوثقه وتدفع 3% من قيمه الايجار الكلي السنوي ولا ماتقبل المحكمه القضيه بعد
فبتحصل نفسك قاعد تخسر في شي 99% انه مب راجع بس الناس متعلقه ب1%
ترى هالامر جدا جدا خطير وياثر في اشياء وايد على صعيد عالي من حياه الناس يليت يكون قانون جديد ينظم هالشي بشكل اقوى واسرع وخصوصا الحمدالله كل شي متوفر وموجود بس محتاجين عقول نيره وتبادر بالشي الافضل للدوله

بوحارب

01-11-2016, 10:50 AM

في ناس مثلا وقت السلف يترجاك ويحلف لك ان بيرجع المبلغ ووو وبعدين مانشوف منه شي بس الفرق ان ماعندك وسيلة ضمان بدفع المبلغ نفس الشيك الحين اذا فكرت اسلف حد اكون حاطه فباليbeforehand ان المبلغ ماراح يرجع وان هالسلفه من باب تفريج كربه

جزاك الله خير على احتساب الأجر

افضل حل عدم تسليف الأخرين وخصوصا اللي ما تربطنا بهم علاقة او معرفه

اما اصحاب الحالات الحرجة او اللي نعرف انه محتاج ومتضرر يستاهل بس ما يكون مبلغ كبير يأثر على وضعي الأقتصادي في تأخر بالسداد

captin

01-11-2016, 12:43 PM

علاوة على كل ما ذكر من ضرر واقع على الضحية سواء مواطن او وافد

بسبب العجز عن السداد سواء بقصد ومتعمد أو بغير قصد

هناك ضرر أكبر

يقع على سمعة الدولة وتصنيفها الائتماني ويحدث سمعة سيئة لبيئة الاعمال والتجارة
ويكون عامل طرد للتجار والمستثمرين الاجانب.

استغرب من جرائدنا المحلية نشر تقارير تظهر ان بيئة الاعمال بيئة ممتازة وجاذبة
دون التطرق لمشاكل السوق المختلفة ومنها حالات التعثر المالي والعجز عن السداد !!!

لو ان صاحب اعمال حب يدخل الدولة ويفتح مشروع واثناء دراسته للجدوى الاقتصادية
اطلع على عدد القضايا الخاصة بالعجز عن السداد وعدد حالات الشيكات المرتجعة في البنوك
ومراكز الشرطة والمحاكم والتأخير في الحصول الدفعات المالية سواء من الافراد او الشركات .

من الطبيعي جدا ان مثل هذا المستثمر سيتخذ القرار بعدم
الاستثمار بالدولة بسبب هاذي السمعة السيئة.
وربما يذهب لدول مجاورة .

هناك خلل في الانظمة والقوانين على الدولة سرعة اصلاح هذا الخلل

CH Engineer

01-11-2016, 01:17 PM

من جشع اصحاب العقار ربي ابتلاهم بهالنصابين

حالات كثيره بدون اي فايده من العقار لمدة سنه
بس الأهم راس المال عنده وبياجر لغيره وبيستفيد

المصيبه الي راحت سيارته وفلوسه والمصيبه الأكبر يشوفها تنباع على قطر سيل

saeed2005

01-11-2016, 01:23 PM

نقاش حلو وودي أسأل سؤال عن أيهما أفضل أن يسجل الشيك باسم شخصي كمدير الشركة أو مالكها أم باسم شركة أو مؤسسة تجارية لها أصول واسم تجاري وشكرا ؟

captin

01-11-2016, 01:31 PM

نقاش حلو وودي أسأل سؤال عن أيهما أفضل أن يسجل الشيك باسم شخصي كمدير الشركة أو مالكها أم باسم شركة أو مؤسسة تجارية لها أصول واسم تجاري وشكرا ؟

في كلا الحالتين اللي يوقع الشيك هو المسائل امام القانون في حال رجوع الشيك بدون رصيد
سواء كان الشيك المعطى شخصي او بإسم الشركة .

لو معاي شريك اجنبي وايضا مخول بالتوقيع وهو اللي وقع الشيك ورجع هو اللي بينطلب مركز العاصمة وهو بيتحول
للنيابة وهو اللي بيوقف اما القاضي في المحكمة

RE-Qatar

01-11-2016, 02:41 PM

صار الوقت اللي لازم يصير تحديث على عقوبات الشيكات بدون رصيد
واحد يرمي شيكات ويوزعها بدون رصيد ولا يفتكر ولا يخاف ولا يكون له رادع من قوانين قديمه !! حاط في باله انه بالساهل يتكفل ويطلع ويكمل شغل النصب ويروح المحكمة ويكمل سنواااات هناك !!!

بوثاني الريان

01-11-2016, 07:34 PM

السلام عليكم ورحمة الله وبركاته
بقولكم قصة أشهر واكبر نصاب صارت من 8 سنوات النصاب الدولي المحترف ف . ب الي كل حق الناس وفلوسهم واحلامهم عن طريق شركة تسمى ا.ق هذا النصاب العود كان يدعي استثمار الأموال في العقارات في دبي وتجارة الأسهم وكانت الناس تدخل معاه بالقوة لأنه مايدخل اي حد الا المعرفة المهم مأطول السالفة الرجال في نهاية 2008 بداية 2009 وعند حدوث الأزمة المالية قال للعالم ماعندي فلوس انا خسرت وهو كان في دبي ومكتب النصب والاحتيال ماله يتصل على العالم تعالوا سوا مخالصة علشان تستلم رأس مالك بدون الأرباح والعالم طبت تبي رأس المال وقعوا مخالصة فيها ثغرة قانويةفلوسك تدفع في وقت يعني على كيفه المهم قبل يوم القيامة يمكن بشوي تلوه من دبي وقطوه في السجن ومحد استلم منه إلا المرض والموت ناس باعت بيوتها ناس حطت كل شي معاه والشيكات بدون رصيد

والجرايد تكتب والصحافة تكتب والعالم تنطر الفرج

وناس انسجنت مالها ذنب إلا تبي تساعد الناس سواء بحسن نيه أو سوء نيه الله العالم وراحت فلوسك ياصابر
والمحاكم بتموت انت وعيالك وعيال عيال عيال عيالك

وتأخذ حقك يوم القيامة

وحسبنا الله ونعم الوكيل في كل ظالم فاجر داعر غرر في أحلام البسطاء

بوثاني الريان

01-11-2016, 07:40 PM

من القصة الحقيقة هذا نستنتج التالي
لاتوثق في اي نصاب كذاب تاريخة اسود
لاتعطي فلوسك واحلامك بيد الآخرين حلمك تحققه بيدك
القانون لا يحمي الضعيف
المحاكم ماتقدر تسوي لك شي دام مافي فلوس في حساب بوالأبراج
فلوس الناس الله عالم وينها ومع من

ليش الصمت عن أكل حقوق العالم لكل هذي السنوات

بوثاني الريان

01-11-2016, 07:41 PM

لا تأخذ شيك ابد من اي انسان سلم واستلم علشان مايقولون لك القانون لايحمي الضعيف اقصد المغفل

راعي الكورفت

01-11-2016, 07:52 PM

السلام عليكم.

انا بعت محل وبعد مانقلت الاسم للشراي .
كتب لي تشيك باسمي بعد ماصار المحل باسمه.
رحت البنك.
وانصرف لي الشيك بالمبلغ كامل .

مش كل الناس نصابين مثل ماانتم تفكرون :)

جبر ال جبر

01-11-2016, 09:20 PM

اول شي اشكر الجميع على المشاركه ،،، بابتدي من اخر مشاركه صحيح كلامك راعي الكورفت مب كل الناس نصابين
ولكن الحرص واجب ،، ولى عوده باذن الله واعتقد التجارب الي سردها بعض الاعضاء مفيده واثرت النقاش

saeed2005

02-11-2016, 08:11 AM

في كلا الحالتين اللي يوقع الشيك هو المسائل امام القانون في حال رجوع الشيك بدون رصيد
سواء كان الشيك المعطى شخصي او بإسم الشركة .

لو معاي شريك اجنبي وايضا مخول بالتوقيع وهو اللي وقع الشيك ورجع هو اللي بينطلب مركز العاصمة وهو بيتحول
للنيابة وهو اللي بيوقف اما القاضي في المحكمة

شكرا أخي كابتن لكن من الملزم بسداد قيمة الشيك الشركة أو الموقع على الشيك

مخطط قطري

02-11-2016, 08:54 AM

شكرا أخي كابتن لكن من الملزم بسداد قيمة الشيك الشركة أو الموقع على الشيك

بنيابه عن اخوي الكابتن ويصلحلي اذا غلطان يفضل الي يوقع الشيك القطري وهو اضمن للحق في وجهه نظري ليش؟؟ لانه اذا اجنبي وسافر خلاص راحت عليك دوره وين تصيده واذا شركه شوي اهون يمكن يرجع حقكك ويمكن لا اذا صفوو الشركه وماعندها اي موجودات ولكن القطري موجود وين بيروح يا يادفع ولا السجن وذيك الساع غصب بيدفع

شموخ دائم

02-11-2016, 12:24 PM

,

,

مرحبا

ما شاء الله في جوانب ممتازه تطرقتوا لها وهي مفيده للجميع

نقطه مهمه

مافي بنك بقطر يمول قرض او سياره او معدات او يمول شي للشركه
الا وياخذ ( شيك ضمان ) شخصي من الكفيل
يعني السالفه تلف تلف وترجع للقطري في الأخير هو الضامن وهو المسئول
في حال عجز الشركه عن السداد يستخدمون شيك الضمان
:)

,

,

saeed2005

03-11-2016, 10:40 AM

بنيابه عن اخوي الكابتن ويصلحلي اذا غلطان يفضل الي يوقع الشيك القطري وهو اضمن للحق في وجهه نظري ليش؟؟ لانه اذا اجنبي وسافر خلاص راحت عليك دوره وين تصيده واذا شركه شوي اهون يمكن يرجع حقكك ويمكن لا اذا صفوو الشركه وماعندها اي موجودات ولكن القطري موجود وين بيروح يا يادفع ولا السجن وذيك الساع غصب بيدفع

جزاك الله خيرا

جبر ال جبر

04-11-2016, 06:40 PM

في شخص من اسره مشهوره بقطر لها ثقلها ومستقل اسم اسرته مع الاسف نصاب وماعنده ذمه وعنده دلالين من الجنسيه المصريه والسودانيه يرحون فليل عند بعض الفلل قيد الانشاء ويحطون لوحه اعلانيه مزوره فيها اسم المشروع ورقم الرخصه ويوهم المشتري بانه هذي الفلل تعود ملكيتها لهذا الشخص وعقب مايروح المشتري من الموقع يشلون اللوحه المزوره واللعبه كلها ع العربون بس يعني يقولون للمشتري انه هذا القطري مديون ومتوهق والحين محد يشتري ف العقارات الناس متخوفه يصير هبوط اكثر وصاحب الفلل يبي يبيع باي سعر لانه متوهق مع البنك بس عشان نعرف انك جاد عطنا شيك عربون بالمبلغ 100 الف او 200 الف وعقب عينكم ماتشوف الا النور،، ويسونها مع كذا شخص ويقولون ترى فلان مكلمنا عنها اخلص عشان ماتفوتك الفرصه وطبعا يعرضونها بسعر مغري جدا يعني الفيلا بملونين يعطونك اياها بمليون وربع عشان بعد ماتشك انهم نصابين ،،،، انتبهو

وحيد-الشوق

04-11-2016, 07:18 PM

الله يجزاكم خير يا اخوان عالتنبية الواحد في هالزمن يبعد عن الشيكات ويريح باله خذ فلوسك كاش اسلم واضمن لك

اتمنى بس تغيير هالثغرات الموجوده حالياً في كثير من القوانيين عالم اغتنت من ورى البوق والنصب ولاحسيب ولارقيب

في شخص من اسره مشهوره بقطر لها ثقلها ومستقل اسم اسرته مع الاسف نصاب وماعنده ذمه وعنده دلالين من الجنسيه المصريه والسودانيه يرحون فليل عند بعض الفلل قيد الانشاء ويحطون لوحه اعلانيه مزوره فيها اسم المشروع ورقم الرخصه ويوهم المشتري بانه هذي الفلل تعود ملكيتها لهذا الشخص وعقب مايروح المشتري من الموقع يشلون اللوحه المزوره واللعبه كلها ع العربون بس يعني يقولون للمشتري انه هذا القطري مديون ومتوهق والحين محد يشتري ف العقارات الناس متخوفه يصير هبوط اكثر وصاحب الفلل يبي يبيع باي سعر لانه متوهق مع البنك بس عشان نعرف انك جاد عطنا شيك عربون بالمبلغ 100 الف او 200 الف وعقب عينكم ماتشوف الا النور،، ويسونها مع كذا شخص ويقولون ترى فلان مكلمنا عنها اخلص عشان ماتفوتك الفرصه وطبعا يعرضونها بسعر مغري جدا يعني الفيلا بملونين يعطونك اياها بمليون وربع عشان بعد ماتشك انهم نصابين ،،،، انتبهو

يقولون محبوس من فترة والله اعلم

مضارب دوسري

04-11-2016, 07:34 PM

في كلا الحالتين اللي يوقع الشيك هو المسائل امام القانون في حال رجوع الشيك بدون رصيد
سواء كان الشيك المعطى شخصي او بإسم الشركة .

لو معاي شريك اجنبي وايضا مخول بالتوقيع وهو اللي وقع الشيك ورجع هو اللي بينطلب مركز العاصمة وهو بيتحول
للنيابة وهو اللي بيوقف اما القاضي في المحكمة

واذا كان شل عليه وسااافر
الشريك القطري وش يصير فيه ؟