دورة هندسية في المنتدى لتَعَلُم برامج الرسم الهندسية

[معماري قطري]

ترددت كثيراً في هذا الموضوع ومن زمان

فأنا واحد من القلائل اللذين تعلموا برنامج الأُوتوكاد من اصدار 12 في سنة 1994 إلى اصدار 2012 وحالياً ناوي الخوض في 2017 بعد تثبيته بإذن الله

مبدئياً الموضوع سيكون مفتوح للكل يكون معلم ويفيدنا ويكون تلميذ ويستفيد

وأتوقع الكثيرين معنا من المهتمين بعضهم كهواية وتحدي وبعضهم كدراسة وتخصص وممارسة حتى لو قليلة ولهدف معين

البرامج كثيرة وغالبتها متشابهة بس الاوتوكاد عميق وقوي ومعقد

خلوني في البداية احصر المهتمين بعدين نشوف العملية بتنجح أو لا .. المهتم يذكر اهتمامه لطفاً ودرجة معرفته وشيقدر يضيف أو يستفيد حتى نبدأ

[الرايــق]

انا سجلني معاكم .. مع اني استخدمه كتخصص ولكن الاتوكاد بحر
درجة المعرفة تقدر تقول متوسطة

ويعطيك العافية

[معماري قطري]

حياك الله اخوي الرايق وزين اللي مختص والله يوفقك

ممكن نعرف تخصصك .. لأني باركز على الجانب المعماري وممكن تركز على اي جانب والموضوع مب مقيد بتخصص ومثل ما قلت البرنامج بحر

[معماري قطري]

شكلنا يالرايق انا وانت ولا ثالث لنا وشكل الموضوع فاشل

لو قدرنا نجمع 10 متابعين ومشاركين زين نصبر نشوف 8 أشخاص زيادة

[ya3coub]

لا مو بروحكم انا بعد بدخل معاكم للأسف بوظيفتي ما استخدمه و من ايام الجامعه ما استخدمته

و كان عندي اكثر من 7 اصدارات كنت انسخهم بالكراك و اوزعهم ببلاش على الطلاب الي ما عندهم.

و ايام جامعه قطر كنت الأول فالرسم الهندسي.


اتمنى ادخل معاكم لأن اخر اصدار 2007-2011 او 2012 الي صار مجدد و حسيت نفسي شايب اتمنى اذا في اصدار جديد ابي اكون معاكم و استفيد بصراحه لأني مغبر

[بن غيث]

معماري .. في برامج افضل بكثير من الاوتو كاد
واعتبرني مسجل معاكم في اي برنامج هندسي تختاره ..

[معماري قطري]

لا مو بروحكم انا بعد بدخل معاكم للأسف بوظيفتي ما استخدمه و من ايام الجامعه ما استخدمته

و كان عندي اكثر من 7 اصدارات كنت انسخهم بالكراك و اوزعهم ببلاش على الطلاب الي ما عندهم.

و ايام جامعه قطر كنت الأول فالرسم الهندسي.


اتمنى ادخل معاكم لأن اخر اصدار 2007-2011 او 2012 الي صار مجدد و حسيت نفسي شايب اتمنى اذا في اصدار جديد ابي اكون معاكم و استفيد بصراحه لأني مغبر

حياك الله مهندس يعقوب .. هو من اصدار 10 اعتقد تطور كثير وصار أسهل في جوانب كثيرة وصعب في جانب الثري دي

اصدار 2010 اقصد وبعدين 2012 شبيه بس عليه تطويرات 2017 خذته من بانكوك ولا ثبتته للحين عندي كمبيوتر ثاني وطلع خربان باصلحه وباثبته عليه والا على اللابتوب

لو تقدر جهز كمبيوترك باصدار 2012 أو 2017 وشاركنا في مميزاته وشرحه شرح مبدئي .. انا 2012 إن شاء الله بابدأ فيه وأي واحد من الحضور ممكن يبدأ ويضيف ويصحح لفائدة الجميع

[ذكي جدااا]

احنا غيرنا من الاوتوكاد للمايكروستيشن عندنا بالشغل لانه افضل بكثير من الاوتوكاد. انا اشتغلت زمان على ثري دي ماكس وفورم زي وغيرها

[معماري قطري]

معماري .. في برامج افضل بكثير من الاوتو كاد
واعتبرني مسجل معاكم في اي برنامج هندسي تختاره ..

هلا اخوي بن غيث

أسهل ممكن لكن أفضل ما ادري لأن كل الاستشاريين يستعملون الاوتوكاد وفيه منه عدة أنواع مخصصة لإستخدام الطرق والميكانيك والانشاءات

[معماري قطري]

احنا غيرنا من الاوتوكاد للمايكروستيشن عندنا بالشغل لانه افضل بكثير من الاوتوكاد. انا اشتغلت زمان على ثري دي ماكس وفورم زي وغيرها

حياك الله اخوي ذكي جداً

الموضوع منكم واليكم وأي حد ممكن يعطينا نبذة أو يتعمق وما تقصرون .. الثري دي ماكس شفت واحد يشتغل عليه وقال لي سهل تعلمه وناوي ادخل فيه عجبني كثير وممكن تستعمل فيه فايلات الاوتوكاد

[بن غيث]

عرض بتقنيةالواقع الافتراضي .. و 360 درجة

[الرايــق]

يعطيكم العافية متابع نقاشكم ..

خلونا ندخل تكنيكال شوي

ال polyline فيما يستخدم وكيف ..

من يقدر يفيدنا بهالامر المهم

[بن غيث]

معماري
في معرض في دبي اسمه الخمسة الكبار من 21 نوفمبر

[Aozomblue]

يعطيك العافية اخوي معماري ...
سجلني تلميذ مبتدء عندك في الصف .
دمتم بود

[معماري قطري]

يعطيكم العافية متابع نقاشكم ..

خلونا ندخل تكنيكال شوي

ال polyline فيما يستخدم وكيف ..

من يقدر يفيدنا بهالامر المهم

البولي لاين اخوي هو خط عريض ويعتبر خط واحد مكون من عدة خطوط .. تقدر تتحكم في سمكه وتقدر تسوي له اكستروجن اللي هو تعطيه ارتفاع بحيث يعطيك شكل ثلاثي الأبعاد

تقدر تحول الخط العادي أو اللاين العادي لبولي لاين بخاصية الإدت وتقدر تشبك عدة خطوط مع بعض بحيث تكون بولي لاين مغلق وتقدر تفجر البولي لاين لمكوناته الأساسية

[معماري قطري]

معماري
في معرض في دبي اسمه الخمسة الكبار من 21 نوفمبر

الله احب هالمعرض رحت يمكن 5 مرات وزين للتجار وللكل صراحة خاطري اروح بس ما تحصل فندق بسهولة دبي تنملي

[معماري قطري]

يعطيك العافية اخوي معماري ...
سجلني تلميذ مبتدء عندك في الصف .
دمتم بود

الله يعافيك توكل على الله

وهذا صف مفتوح يعني المشاغبة مسموحة وكل واحد يطلع يدرس عادي

[معماري قطري]

حصلت بعض اليوتيوبات حق شرح الاوتوكاد بس غالبيتها دعائية شوف احنا شنسوي واشترك معانا في دورة حتى نوضح كل شيء .. أفضل طريقة للتعلم هي تثبيته وبدء قراءة كتاب معتمد له ويفضل من المؤلف جورج اومورا ونبتعد عن العربي أو المعرب .. بس كتب الاوتوكاد في العادة كبيرة وصفحاتها كثيرة وشرحها ممل

هذي السلسلة فيها شرح بس صعب على المبتديء يفهمه وفيها يقول المحاضر عن برامج الاوتودسك اللي هي الأكثر انتشاراً واستعمالاً خصوصا الاوتوكاد والثري دي ماكس


https://www.youtube.com/watch?v=KFhHLrkFfCA&list=PLnO_IOy6Lj0dMRxy_E7CGT6QHhYQbHf7w

[شموخ دائم]

,

,

مرحبا

حيالله معلمنا واستاذنا معماري

انا تلميذ بالصف ابي اقعد اخر كرسي
يصير ادخل معاي ( شيبس وحب وعلوج ) ؟؟؟
:shy:

انا هاوي برنامج ( الفوتوشوب ) كهوايه

لعب بالصور دمج وتركيب وكتابه

كنت أتمنى اتعلم الاوتوكاد وجربت لكنه صعب علي

متابع

,

,

[معماري قطري]

هذي المجموعة سريعة وأحلى شرحها عيبها يمكن بالانجليزي والبعض بيحصل صعوبة في فهمها خصوصاً المبتدئين في البرنامج

اللي يشتغل ويشوف الفيديو ويطبق أول بأول بيفهم القصد من اللي يقوله الرسام في الفيديو وبيتعرف على الأوامر وشتسوي وبعدين بيتعرف على تجهيز سطح العمل وعمل الاعداد حق الخطوط المستقيمة وقفزات الطول المسماة Snap بحيث ممكن يعطينا طول بدون استخدام الكيبور ويقفز كل 10 وحدات على فرض الوحدة نفترضها سم وهذا أسهل للقياسات المعمارية من عمل مقاسات بالملمتر مثلاً والا ب 1 سم .. نحتاجها لتوضيح بعض الرسومات والتفاصيل لكن في الغالب مقاس الغرفة أو ممر يكون 2.1 متر مثلاً ما يكون 2.1115 متر الأرقام الصغيرة مالها أهمية .. لذلك لازم حتى نعمل الغاء للأصفار خلف الفاصلة بس نكتفي بصفرين يعني نخلي الدقة 0.00 بدال 0.000 وأكثر على أساس يسار الصفر المتر ويمينه السنتيمتر وقليل ما بنحط الصفر الأخير في اليمين اللي يمثل آحاد السنتيمترات يعني بنشتغل بالعشرات ورايح أو 5 سم .. في التفاصيل نقدر نغير الدقة للمليمتر 0.000 لو فرضاً بنوضح سمك بلاطة 8 ملم ومحتويات الأرض تحتها

اللي شاف الشرح المبدئي في اليوتيوب بيعرف شلون يغير الوحدات والدقة من علامة البرنامج حرف A في أقصى أعلى اليسار يضغط بينفتح منيو منه يختار Drawing Utilities ومنه نختار Units ونعدلها

ملاحظ كثير من الاستشاريين ما يسوون هذي الخطوة ولو تجي تقيس بعدهم تحصل تطلع لك أجزاء أرقام قريبة بعد الفاصلة أو البوينت يعني يطلع لك بدل 10 متر 10.0430013 مثلاً والمشكلة هذا الخطأ التافه يخرب بعض المقاسات عندك ولا تكون واقعية وتكون تحت رحمة المقاول وممكن بدل 10 مضبوطة يسويها لك 10.05 ولو بتركب بلاط بعرض 50 سم يفترض تحتاج 20 بلاطة لكن بتحتاج 20 بلاطة وكسرة بلاطة يطلع شكلها شوي مزعج .. أوقات يطبق المقاول رقم شاذ وتتورط



https://www.youtube.com/watch?v=Qka7LBtmjYk&list=PLoOWlcGZhHCaVoHDsDcpaLg-RBz-jwZ8Q&index=6

[معماري قطري]

,

,

مرحبا

حيالله معلمنا واستاذنا معماري

انا تلميذ بالصف ابي اقعد اخر كرسي
يصير ادخل معاي ( شيبس وحب وعلوج ) ؟؟؟
:shy:

انا هاوي برنامج ( الفوتوشوب ) كهوايه

لعب بالصور دمج وتركيب وكتابه

كنت أتمنى اتعلم الاوتوكاد وجربت لكنه صعب علي

متابع

,

,

حياك إخوي شموخ كنت مفكر اسوي سكرين كابجر واحط صور بس للحين مقاطع اليوتيوب توضح أكثر وبشوف شسوي يمكن اطلع شرحي ما ينفهم لأن البرنامج صعب ولازم يتجرب بدون ممارسة محد بيقدر يعرف شيسوي

وهمة الشباب اللي جربوه قبل والحين أكيد بنحصل مدرس أحسن مني

[معماري قطري]

أحسن حل لي وللمتابع واللي حاب يستفيد أنقل مقتطفات من كتلوج الأوتوكاد الرسمي مع تسهيلها بالتعليقات والأمثلة

للي حاب يقرأ بعمق ممكن ينزل المنيول أو الكتلوج من www.4shared.com Autocad Manual.pdf

206 صفحات وباحتاج صور منه للشرح والتوضيح

خطة تعلم الرسم الهندسي حسب التخصص مرسومة هنا

http://i.imgur.com/W9l3lr7.jpg

مقسمة إلى 3 أقسام رئيسية وفيه أقسام ثانية كالكهرباء والميكانيك والصناعة بكافة تخصصاتها .. واللي باركز عليه بداية الخطة للرسم المعماري واللي تبدأ بالتصميم ثنائي الأبعاد العادي

الاوتوكاد 2 دي أو 3 دي وأتمنى نوصل لباقي البرامج مثل 3 دي ماكس والريفيت واللاند كاد للاندسكيبنغ والفوتوشوب وأكيد يوجد بيننا من هو أفهم مني في كل هذي البرامج والباب مفتوح للجميع يضيف ويعدل على كلامي حسب خبرته

الكتاب المذكور للاوتوكاد 2009 الى 2017 كأساس التحديثات بسيطة جداً كل مرة على الشكل العام لكن على قدرة البرنامج أكيد فيه تحسينات كبيرة

اللي استعمله 2012 وطالعت بسرعة في كتاب خاص ب 2016 مع المنيول الأساسي 2009 فيه تشابه كبير في الشاشة في بداية التشغيل

ميزة من 2009 أو 2008 على ما اذكر إن قبل كانت برامج الاوتوكاد توافقها بسيط جداً مع برامج الوندوز الباقية أما هذي الاصدارات واللي بعدها متوافقة وممكن تحط كتابة من الورد وجداول اكسل وتنقل صورة وتتنقل بين برامج تحرير كثيرة مثل الثري دي ماكس وغيرها

هذي صفحة توضح شاشة الاوتوكاد 2016 وهي نفسها تقريباً حق 2012 ممكن اللي يركبه أول مرة ما يطلع له المنيو العلوي كامل .. موضح في خطوة 2 شلون نطلع المنيو اللي فوق اللي موزع لمجموعات منها Draw وتحتها سهم تضغطه يطلع منيو اضافي

http://i.imgur.com/fgIHmw4.png

لازم التجريب المباشر مثال الخط ممكن يبدأ من نقطة ويروح لنقطة لكن صعب نتحكم في طوله وبنشوف طرق التحكم والدقة وكيف نخليه افقي أو بزاوية معينة من خلال الاعدادات

وفوق نشوف عندنا هوم دروب منيو يطلع لنا لستة الأدوات المهمة للرسم .. جنبه انسرت واللي ممكن تستوردون فايل خارجي أو بلوك ( البلوك هو عبارة عن جزء من رسم ممكن تستوردونه أو رسم أثاث أو شيء محدد ممكن اضافته أي وقت) .. وبعدين باقي القائمة ومن نضغط عليها يتغير لنا المنيو بالكامل ويطلع منيو خاص بالكلمة الموجودة

[بن غيث]

جزاك الله خير ..

[Aozomblue]

يعطيك العافية اخوي معماري

[بوخالد911]

متاااابع وبقووووة.

[معماري قطري]

جزاك الله خير ..


يعطيك العافية اخوي معماري


متاااابع وبقووووة.

الله يعافيكم جميع وإن شاء الله الكل يستفيد والبرنامج ممتع بس حد يجربه وللي عنده خلفية هندسية لو بسيطة وحتى في رسم النقوش والرسم العام بيستانس في استعماله

الأوتوكاد فيه اظهارين للشاشة الموديل سبيس والبيبر سبيس اللي هو الفضاء الورقي .. والورقي يستخدمونه الرسامين ويسوون منه مقياس رسم بحيث تصغر النموذج اللي سويته بمقياس رسم معين وتحطه في الورق الهندسي اللي يبدأ ب A4 واللي هو الورقة العادية وضعفها A3 اللي تعتبر دبل من اي فور بس ثنتين جنب بعض .. A2 دبل من A3 وبعدين A1 اللي هي مقياس الخرائط المعتمدة للرسم الهندسي و A0 اللي هي للخرائط المساحية

اللي بنركز عليه السهل ونقدر نطبعه على أي حجم ورق لكن بدون مقياس رسم واقعي ومقياس الرسم يكون المكتوب .. طبعاً اللي هو الموديل سبيس وبنشوف شلون نحول الرسم لصورة أو بي دي اف فايل نقدر نكبره براحتنا ونركز على اللي نبغي من تفاصيل .. وحدة القياس في الموديل سبيس هي 1 : 1 يعني ممكن نقدر نفترض هذا الواحد ملم وممكن نفترضه متر الملمتر 1000 منه = 1متر وعرض الطابوقة 20 سم = 200 ملم .. وهذا القياس أسهل وأسرع لو محد يحب يستخدم الفاصلة العشرية أو 0.00 بس يستحسن المقاس المكتوب يكون بالمتر وأجزاء المتر

الفاصلة العشرية وراها خانات كثيرة في الغالب ما نحتاجها في الرسم المعماري وتكون عندنا الدقة إن كثرت بالمليمتر يعني نحتاج 0.000 بس أو مثل ما احب اخليها 0.00 أقرب للسنتيمتر 1.2 متر مثلاً .. الصفر يمين الأخير حتى ما له داعي الا لو في مقاساتنا أرقام قريبة للسنتيمتر

اللي يحرك الماوس يشوف أرقام في زاوية يسار الصفحة السفلية هذي مؤشر وين الماوس بدقة موجود على مستوى الاكس والواي اللي هو الأُفقي والرأسي .. نضغط على هذي الشاشة الصغيرة الأرقام تختفي وفي بعض الاصدارات كانت تعطيك الرقم والزاوية أو الاكس والواي ولو غيرنا الوحدات لخانتين مئويتين تبين عندنا هنا في الاحداثيات كخانتين لو خليناها أرقام كثيرة تبين الخانة للاحداثيات كبيرة ومزعجة

للتغيير لخانتين نكتب اختصار ينيتس أو UN في خط الأوامر وتطلع لنا نافذة التغيير أو في 2012 عن طريق المنيو الرئيسي من رمز الاوتوكاد في الزاوية اليسار العلوية ننزل ل Drawing Utilities ومنها نختار Units

الزاوية ما نحتاج لدقة لأجزاء الزاوية نخليها 0 والوحدات نتبع الشرح هنا ونخليها 0.00 أفضل

http://i.imgur.com/7Hij5pA.png

كثير من الأوامر ممكن ندورها وممكن نحفظها بالانجليزي وندخلها بالكيبورد في الكوماند لاين

مثال الحدود Limits المذكورة هنا لو نكتبها يطلع لنا نفس الحوار ومنه نختار لكن انا ما احدد حتى اقدر انسخ واسوي نموذج جديد .. تنفع ممكن للكمبيوترات الضعيفة قبل واللي فيها ميموري محدودة

http://i.imgur.com/kXaELm1.png

أتمنى ناس ثبتوا البرنامج ويتابعون حتى نستفيد بالتدريج

[معماري قطري]

اليوم بنبدأ نرسم خطوط وأكيد مستخدمين الاوتوكاد يجيدونها لأبعد درجة لكن للمبتدئين

لرسم الخط أما نختاره من الأزرة في شاشة أزرار الرسم مكتوب عنده لاين أو ندخل حرف L في خانة الأوامر أو ممكن نختاره في المنيو القديم واعتقد فيه طرق ثانية .. منها ببساطة نسخ خط مستقيم ونقله

http://i.imgur.com/ugajvqu.png

في منتصف الصفحة موجود شرح للاحداثيات اللي تبدأ بالاكس وبعدها الواي وبعدها الزد .. الاكس أُفقي لو حركنا الماوس يمين أو يسار تزيد الأرقام أو تقل والواي للاتجاه العمودي .. الزد للاتجاه داخل الصفحة أو خارج الشاشة وهذا يستخدم للثري دي وبنوصل له إن شاء الله

هذي شاشة الاوتوكاد عندي بس انا حاط أزرار اضافية للرسم يمين وأزرار للتعديل يسار .. هذي ممكن نعملها بالدخول على منيو view بالأسود فوق ونختار تول بارز ومنها نختار اوتوكاد ونختار المجموعة اللي نبغيها من الأزرة .. تطلع في الشاشة نسحبها بالماوس ونحطها في أي قسم نبغي

الخطوط المتقاطعة هذي الغرد Grid نقدر نلغيها حتى ما تلخبطنا بضغط f7 أو من تحت نحصل زرها جنب الاحداثيات ثالث زر ونضغطه تنلغي ونضغطة ترجع

http://i.imgur.com/MfuUpTt.png


ما ابغي اشتت التسلسل لكن بعض اللي يفتحون الاوتوكاد بيحصلون هذي الخطوط .. هي استدلالية ونسوي لها ستنغ حق توزيعها كل وحدة قياس وحدة أو أكثر حسب ما نبغي .. انا الغيها دوم واحب ارسم على صفحة بيضاء

لتغيير لون الصفحة والخلفية والخطوط بعد فيه خيارات بندخل لها .. الشاشة الافتراضية السوداء والخط الافتراضي الأبيض لكن انا احب العكس .. البيضاء نخفف اضاءتها شوي من تخفيف اضاءة الكمبيوتر ونبعد الشاشة عنا فوق المتر لو قدرنا


معليش نتابع رسم النجمة وهذي الخطوات اتوقع كلكم قادرين تتبعونها .. بعدين بنتعلم كيف نرسم خط محدد وبمقاس واتجاه محدد

http://i.imgur.com/974vRw7.png

هذا اصدار 2016 اللي في الكتاب اللي انسخ منه لكن 2012 قريب منه وحتى 2009 واللي عنده سؤال لا يتردد يسأل المسئلة سهلة إن شاء الله

طبعاً بعد ما نخلص شغلنا زر الحفظ فوق معروف للكل في اليسار فوق .. وللحفظ لازم نختار فولدر معين واسم معين وممكن الحفظ باسم عربي .. للتصميم تعودت احفظ الفايل بإسم الشخص لسهولة الرجوع له وكل تحديث وتغيير كامل احط رقم ورا الاسم

[معماري قطري]

هذي صورة مكبرة لطرف الشاشة اليسار السفلي

شلت خطوط الغرد عندنا خط الأوامر وتحته الاحداثيات بعد الفاصلية يمين عندنا رقمين فقط .. واللي يهمني اشرح الأزرار وراء الاحداثيات يمين الأول عندنا اسمه المحددات وصراحة ما استخدمه ومن الكتاب اللي حق 2016 ملغينه وفيه اختيارات طبيعي ممكن نحكم عليها إنها غبية أو أوقات تكون لها حاجة ببساطة احنا ما نعرفها ولازم نقرأ عنها أو نجربها

لثاني ال Snap Mode هذا لو نضغط عليه بزر الماوس اليمين يطلع لنا منيو فيه البولار سناب واللي يخلي الماوس يتحرك دائري في قفزات مثلاً لو تحدده بنص درجة أو درجة ولازم تشغل الخاصية حتى يمشي معاك أو الغرد سناب اللي يخلي الماوس يتحرك على شكل قفزات مثال لو حددناه بوحدة طول واحدة يتحرك من صفر لواحد ولإثنين ما ياخذ الأجزاء وممكن نحدده بعشرة تصير القفزات بالعشرات .. يعني تقدر تسوي خط طوله 10 ولا تقدر تسوي خط طوله 11 الا بادخال الرقم بالكيبورد .. العشرة بدقة تسويها بالماوس

للرسم الهندسي للفلور بلانز والتفاصيل المعروفة اللي ما فيها أقل من 10 سم نقدر نحدده ب 0.1 على أساس نسوي خطوطنا بمضاعفات العشرة سم ولو نبغي نسوي تفاصيل بحدود 5 سم نقدر نغيره بعدين ل 0.05

هذي الصورة توضح هذي الأزرة وزر السناب ثاني زر مثل ما ذكرت وبضغطة زر الماوس اليسار نشغله ونضغطة مرة ثانية يبند .. باليمين نقدر نشوف المنيو وندخل الاعدادات ونعدل مسافة السناب أو القفزات حسب رغبتنا

http://i.imgur.com/0VmCOxo.png

هذي الشاشة اللي تطلع لنا وتكون على السناب والغرد ومنها نقدر نعدل حتى مسافة توزيع خطوط الغرد اللي شفناها قبل .. طبعاً مربع الغرد يبين ما عنده صح لأنه مغلق نقدر نعلم عليه ونحط اوكي ينفتح لنا السناب والغرد بعد

فوق فيه اوبشنز غير مثل البولار تراكنغ .. هذا يخلي يطلع لك خط منقط يعلمك انك انت على خط افقي أو رأسي .. تقدر تحط تحديد للزوايا اللي تحبها مثلاً لو تشتغل في مخطط فيه زوايا 45 درجة تختارها فيستوي يعطيك خط ارشادي لكل 45 درجة

انا حبيت ال 22.5 حتى اقسم ال 45 درجة لقسمين وممكن غيري يحط كل 5 درجات

http://i.imgur.com/VrQiPER.png

العملية ما توضح الا بالتجربة

هذا شرح من الكتاب حق اصدار 2016 شوي يختلف لكن المبدأ نفسه

http://i.imgur.com/p7RqWo1.png

شاشة الحوار حق البولار تراكنغ أو التعقب في الاتجاه الدائري

http://i.imgur.com/NMqN8eZ.png

جربوها وشوفوا شالتغييرات وشالاستفادة اللي حصلتوها في رسم خط مستقيم ودقيق في الطول .. السناب بيفيدنا إننا عن طريق الماوس نقدر نشوف الاحداثيات تتغير وتعطينا قفزات طول ثابتة لنا .. والبولار تراكنغ بيعطينا اتجاهات محددة بخط وهمي ونشوف الزاوية عليها

لازم الزرين يكونون مضائين حتى نعرف انهم مشغلين

[معماري قطري]

الزر اللي فيه زاوية قائمة قبل الزاوية والدائرة محددهم بالأحمر ما يصير نستخدمهم مع بعض .. الأول من اليسار يعطينا اتجاهات بس عمودية وافقية والثاني يعطينا حرية أكثر حسب المحددات اللي نحددها في الاعدادات

http://i.imgur.com/NeYCReA.png

وبتابع إن شاء الله وقت ثاني تونا على السيف حتى ما شفنا السيف للحين

[معماري قطري]

مثال توضيحي حق البولار تراكنغ مود بالتزامن مع السناب وانا ما خذت البولار سناب كان بيعطيني قفزات في كل اتجاه حسب الرقم اللي اختاره .. في الاتجاه المربع الزاوية 0 و 90 و 180 و 270 يعطينا الرقم اللي حددناه وانا حددت 2.5 على المربع وليس الدائري لذلك نحصل قفزات في المربع ( الخطوط المستقيمة الرأسية والأُفقية ) ب 2.5 ونقدر نفترضها 2.5 ملم أو ربع سم وبحيث يكون الطول 1000 = 1 متر لو حبينا لتسهيل أبعادنا وعملها أكثر دقة

بالنسبة للزوايا 0 هو اتجاهنا افقي لليمين و 90 لفوق و 180 لليسار و270 لتحت

هذا الخط شلون يبين والخط الارشادي منقط يقول ان إحنا في حدود الزاوية اللي حددناها مكتوبة واضحة 22.5 وطول الخط 607.3 .. ومثل ما ذكرت على الزوايا المربعة 0 و90 بيكون المقاس متغير بمضاعفات 2.5

http://i.imgur.com/IjzpjT5.png

وهذا مثال ثاني لو حركنا الماوس جهة اليمين وهنا حصلنا على مقاس 525 لأنها مضاعفات صحيحة لل 2.5 نلاحظ تحت زر السناب مضغوط وبتحريك الماوس عليه يطلع لنا تعريف مكتوب Snap Mode وزر البولار تراكنغ مضغوط ومضاء ونقدر نطلع منه لو ضغطناه مرة ثانية وكذلك السناب

هذي الطريقة تعطينا سهولة الحصول على قياس دقيق بالماوس وبدون ادخال الأرقام بالكيبورد .. لو نبغي ندخلها بالكيبورد العملية سهلة نضغط زر الماوس اليسار بعد ما ناخذ أمر لاين بالضغط عليه بعد باليسار ثم البدء في مساحة الرسم ونسحب الماوس في الاتجاه اللي نبغي الخط فيه .. إذا كنا في البولار تراكنغ بنقدر نسوي الخط في اتجاه محدد بسهولة أما لو خارجه بتكون العملية صعبة أو علينا ادخال الرقم والزاوية ورمز الزاوية واضح مثل >

http://i.imgur.com/0jhZGZm.png

وباواصل عن قريب إن شاء الله

[معماري قطري]

وين الطلبة ابي اسمع صوت وزعاق وناس تبدأ تسوي أول وظيفة

أول وظيفة نجهز الستنغ مثل ما بدينا ونسوي مثلث أو مربع محدد بمقاس من مضاعفات 2.5 خلونا نسوي سناب متشابه للجميع ولكم الحرية في المربع أو المستطيل وقياسه أو مثلث حسب الزوايا المحددة 22.5 ومضاعفاتها كذلك

[@north_star@]

يعطيك العافية على المجهود الكبير اخوي معماري وان شاء الله الجميع يستفيد من الشرح وانا كنت من عشاق الرسم الهندسي وثلاثي الأبعاد يدويا باستخدام المبادئ الأساسية للرسم الهندسي مثل الخط الأفقي والعمودي ونقطة التلاشي ومستوى خط النظر كعين الانسان وعين الطائر والسمكة لتكوين أشكال ثلاثية الأبعاد . ومتابع معاكم ان شاء الله

[معماري قطري]

يعطيك العافية على المجهود الكبير اخوي معماري وان شاء الله الجميع يستفيد من الشرح وانا كنت من عشاق الرسم الهندسي وثلاثي الأبعاد يدويا باستخدام المبادئ الأساسية للرسم الهندسي مثل الخط الأفقي والعمودي ونقطة التلاشي ومستوى خط النظر كعين الانسان وعين الطائر والسمكة لتكوين أشكال ثلاثية الأبعاد . ومتابع معاكم ان شاء الله

بعلمك طريقة سهلة وسريعة بالاوتوكاد لين وصلنا للرسم الثلاثي .. باختصار تسوي الشكل العام ثري دي وتصوره مخفي تخفي الأضلاع الخلفية وبدل ما تحط مواد وانارة بالاوتوكاد تسوي الظلال يدوي والتلوين يدوي وبعض الأشكال يدوية .. يكون خليط من الكمبيوتر واليدوي ويطلع لوحة فنية .. حتى للانترير ديزاين يفيد

خاطري اشوف تفاعل حد يطبق على الأقل اللي كتبته والا ما فيه فايدة بيصير تضييع وقت .. لو عدد معين يتابعون ويحطون جزء من شغلهم اللي بديته بيكون صج كورس تفاعلي .. خصوصاً تركيزي على المبتدئين واللي مجربين مثلك بيكون سهل عليهم بس الخطوات اللي ذكرتها مهمة وهي أساس للجاي .. الثري دي بعدين بيستوي سهل جداً وبنسوي أشكال معقدة وكثيرة

[معماري قطري]

في الاوتوكاد خاصية إنك تحط المبنى في أي موقع في العالم حسب الإحداثيات وتسوي تشبيه لأشعة الشمس بالوقت اللي تبيه صيف وشتاء

[سالم الزهران]

السلام عليكم , على القوة بو عبدالله

وش اسهل برنامج للرسم الهندسي .... اتذكر مرّة نزلت برنامج تجريبي على اللابتوب بس ما عرفت له

كان حاط فيه بيت مبني و اقدر ادور البيت من جميع الاتجاهات و ادخل البيت و كأنك في لعبة بلايستشن

فيه له شغلات ما عرفتها بس كنت احرك فيه و كان كله رسم بالمرسام فقط .

[معماري قطري]

السلام عليكم , على القوة بو عبدالله

وش اسهل برنامج للرسم الهندسي .... اتذكر مرّة نزلت برنامج تجريبي على اللابتوب بس ما عرفت له

كان حاط فيه بيت مبني و اقدر ادور البيت من جميع الاتجاهات و ادخل البيت و كأنك في لعبة بلايستشن

فيه له شغلات ما عرفتها بس كنت احرك فيه و كان كله رسم بالمرسام فقط .



عليكم السلام ورحمة الله الشيخ سالم الله يقويك وعلى الخير يبقيك

هذا الاوتوكاد فيه ميزة المشي والطيران داخل النموذج ثلاثي الأبعاد وتسوي كليب فيديو حق حركات معينة بس شغلة تحتاج وقت وكمبيوتر قوي .. أذكر سوينا نموذج وكنا نخلي الكمبيوتر يسوي اظهار آخر الدوام ونرجع ثاني يوم الصبح للحين ما خلص

لو حاب تتابع معانا ود كمبيوترك أي محل كمبيوتر خله ينزل عليه اوتوكاد 2017 وحاول تشوف نسخة كاملة .. يعقوب يعرف ينزل البرنامج وانا عندي بس ما جربته أحسن المحلات تنزل نسخة تشتغل وب 100 ريال .. النسخة الأصلية حول 3000 دولار

حتى الرسم الحر تقدر ترسم عليه .. البرنامج قوي وممتع ومتعته أكبر في العمل الجماعي وانا صابر شوي حتى أشوف ناس مهتمة وناويين يواصلون بالخطوات لأن اللي جربوه يعرفون إنه بحر غزير من المعلومات والقدرات

[معماري قطري]

عن سؤالك عن أسهل برنامج برامج كثيرة ورخيصة حتى للتلفون الحين متوفرة وبعضها مجاني

[سالم الزهران]

لا هنت بو عبدالله ,,, بكلم ربعي بو هناد اللي في الآي تي و بشوف اذا يقدرون يوصلوني لنسخة و بعدها اتابع الدروس الاساسية اللي سبق وضعتها لاني ما فتحت على الموضوع من البداية ... اتمنى اني اتعلم و ربما يكون فيها خير ما اعلمه .. العلم نور .

[معماري قطري]

الله يوفقك احنا تونا للحين بتلحق لا تهتم انت وباقي الشباب اللي حابين يتثقفون في هذا المجال

[@north_star@]

بعلمك طريقة سهلة وسريعة بالاوتوكاد لين وصلنا للرسم الثلاثي .. باختصار تسوي الشكل العام ثري دي وتصوره مخفي تخفي الأضلاع الخلفية وبدل ما تحط مواد وانارة بالاوتوكاد تسوي الظلال يدوي والتلوين يدوي وبعض الأشكال يدوية .. يكون خليط من الكمبيوتر واليدوي ويطلع لوحة فنية .. حتى للانترير ديزاين يفيد

خاطري اشوف تفاعل حد يطبق على الأقل اللي كتبته والا ما فيه فايدة بيصير تضييع وقت .. لو عدد معين يتابعون ويحطون جزء من شغلهم اللي بديته بيكون صج كورس تفاعلي .. خصوصاً تركيزي على المبتدئين واللي مجربين مثلك بيكون سهل عليهم بس الخطوات اللي ذكرتها مهمة وهي أساس للجاي .. الثري دي بعدين بيستوي سهل جداً وبنسوي أشكال معقدة وكثيرة

بارك الله فيك على التوضيح وان شاء الله بتلقى تفاعل أكبر من المتابعين

[بن غيث]

https://youtu.be/xmAjvfNL9mA
معماري .. ايش رايك في البرنامج

[معماري قطري]

https://youtu.be/xmAjvfNL9mA
معماري .. ايش رايك في البرنامج

برنامج سهل وحلو وهذي الأوامر كلها موجودة في الاوتوكاد .. بنوصل لها تقدر تضيف قائمة من المواد بعد حق الموديل وتضيف إضاءَة .. من ضمن المواد تقدر توضح المجسم بشكل اشعة اكس تشوف المكونات الداخلية والخارجية

[معماري قطري]

بارك الله فيك على التوضيح وان شاء الله بتلقى تفاعل أكبر من المتابعين

الله يرحم والديك هو يعتبر مراجعة لي وإن شاء الله تركيز على الجديد في 2017 والموضوع بإذن الله بيستمر بتفاعل البعض

صج أول مهمة تنزيل البرنامج من موقع فور شيرد وتثبيته أو تثبيته عن طريق مختص

ملاحظة مهمة البرنامج في حال اشتغاله مع الانترنت الشركة تثبت فايرس بسيط شغلته يعطل البرنامج .. طريقة اشتغاله يسوي لنك مع الشركة ويتأكد من الرقم التسلسلي وإنه أصلي .. ومتى يبدأ يسوي لنك ؟ لين بغيت تسكر البرنامج وتطلع منه .. أول ما تشوف إنه جاري التثبيت كنسل على طول لتغفل لحظة ولو خليته يثبت بيوقف اشتغال الاوتوكاد عندك وبيطلب الرقم التسلسلي

أكيد النسخة الأصلية أفضل وفيها مميزات المراجعة اونلاين وتنزيل بلوكات جاهزة لبعض القطع والأثاث والسيارات

المنيو اللي جنب الرسم draw هو Modify وهو يحتوي على عدة أزرة طالعة منها المحاية معروفة مهمتها لإزالة الخط أو النقطة أو عدة أشياء من اللوحة .. علشان نختار اللي نبغي نزيله ببساطة نضغط عليه بالمربع اللي يطلع بعد ما نختار الأمر .. ممكن نسوي وندو متقطعة بحيث نضغط الزر اليسار ونحرك من يمين تحت ليسار فوق تطلع لنا خطوط متقطعة وهذي تمحي أي شيء تمر عليه .. لو حركنا من يسار تحت ليمين فوق يطلع لنا خط ثابت وهذا لازم يسوي بوكس كامل حول اللي نبي نمحيه ونختار ونمحيه

لازم نجرب الثلاث طرق للمسح اللي ذكرتهم حتى يكون عندنا المام بهم وتحكم .. ولو مسحنا شيء نبغي نعيده نرجع بسهم تراجع فوق Redo متوافق مع برامج الوندوز كلها

للمسح هناك طريقة ثانية اللي هي نضغط على الشيء نختاره أول وبعدين نضغط بالماوس الزر اليمين يطلع لنا منيو وفيه الممسحة ونمسح بعمل كلك عليها

وطبعاً سهم التراجع يخلينا نتراجع خطوات للوراء ونمسح كل اللي عملناه أو نرجعه لحالته السابقة

http://i.imgur.com/22nzORd.png

هنا متابعة مع مثال النجمة والشبكة المربعة

http://i.imgur.com/Xpl8Y7q.png

احنا في مرحلة التعرف على الأزرار واستخداماتها .. نرجع مرة ثانية لمنيو أو مجموعة أزرار الرسم Draw جنب الخط يوجد Poly line وهذا خط ممكن يكون مستقيم ومتواصل مع منحنى وغيره من الخطوط ويكون مساحة مغلقة أو مفتوحة

أول ما تضغط عليه باليسار يتغير مؤشر الماوس لخطين متقاطعين وتطلع لك كتابة في خط الأوامر تقول حدد نقطة البداية .. تحدد البداية بكلك باليسار أو بادخال الاحداثيات اللي تبي تبدأ منها

مثلاً لو أدخلت الأرقام 0 , 0 يفهمها نقطة الزاوية السفلية اليسرى عند أسهم الاتجاهات اكس وواي ومنها تقدر تبدأ تحرك الماوس في أي اتجاه يطلع لنا مسار الخط وعلى فرض إحنا في البولار تراكنغ اللي خذناه قبل والستنغ مال الفايل نفسه مع السناب 2.5 نشوف المسافة 440 وبسهولة ضبطناها بالماوس بدون ادخال بالكيبورد لأنها من مكررات السناب اللي محددينه ب 2.5

انا طبعاً ما بديت من النقطة 0 , 0 بديت من نقطة عشوائية .. هنا نلاحظ تحت تطلع لنا عدة خيارات للبولي لاين .. آرك + هاف ودث + الطول ممكن نحدده بضغطنا لزر الماوس اليمين واختيار الطول وثم ادخاله بالكيبورد .. مع ملاحظة إننا حتى لو في السناب المحدد ب 2.5 نقدر ناخذ طول مب من مكررات 2.5 ويلتزم به البرنامج .. آخر شيء العرض Width وهذا لو اخترناه وممكن كذلك نختاره بكتابة أول حرف في الأوامر W .. بعدها نقدر ناخذ العرض لبداية الخط والعرض لنهايته .. ممكن نفس العرض وممكن غير

أتمنى شرحي واضح وبيوضح أكيد مع التجربة

http://i.imgur.com/NgGqHBp.png

هنا حددت العرض في البداية ب 0 وفي النهاية ب 100 ورسمت الخط بعدها لو باواصل فيه ياخذ العرض الأخير 100 مثل ما نشوف الخط التوضيحي ونقدر نلف الخط حسب ما نبغي وبالزاوية اللي نبغيها وندخل خلاله قوس وهذا كله يعتبر شيء واحد لأنه متصل لو بنمحي أي جزء منه ينمحي كله

http://i.imgur.com/tJcFSz2.png

هنا انا تابعت مع الخط اللي بسمك 100 ونقدر نفترضه 100 ملم لبارتشن طابوق بنص عرض أو لو حبينا نسويه 200 ملم .. بس الطول لازم يتناسب معاه والمتر لازم ناخذه على انه 1000 ملم حتى نحافظ على مقياس رسم واقعي واحد

نشوف كل مرة اخذ زاوية واكمل في الأمر طبعاً بزر الماوس اليسار يعطيني نفس الخيارات نضيف لها خيار close وهذا يعني يوصل بداية الخط بنهايته وهو حالياً شكل غريب شلون لو خذنا اختيار الاغلاق وسكر مع بداية السهم

http://i.imgur.com/3HW1MGX.png

بعد ما نطلع من الأمر بضغط ادخال أو مرتين زر الماوس اليمين تستوي الزوايا أنعم وبدون كسرة

خليت رسمة معين بخط عادي 4 خطوط للمقارنة وممكن نسوي البولي لاين بعرض صفر كامل وبعد يعتبر وحدة واحدة والمربع المعمول بأربع خطوط تمثل الأضلاع يعتبر 4 وحدات

هناك أوامر أُخرى تدخل في البولي لاين منها التحرير وتغيير العرض أو السمك لأي رقم نحب

هنا انا خذت ادت بولي لاين بعد ما ضغطت البولي لاين باليسار علمت عليه وضغطت زر الماوس يمين طلعت لي هذي اللستة .. نقدر ندخل الكوماند كتابيا بالكيبورد بس شغلة نحاول نبتعد عنها قد ما نقدر لأن تذكر الأوامر صعب شوي .. ونقدر نختار الأمر من مجموعة التعديل اللي فيها المحاية

نبدأ أول بالمنيو العادي وهذا حق أي كوماند موجود واتوقع تقدر تسوي له تضبيط وتضيف أوامر لو تحب

http://i.imgur.com/2YFC3C4.png

مثل ما نتوا شايفين الخيارات في البداية يقول أعد الأمر السابق اللي هو edit poly line لأني كنت فيه وطلعت وهنا دوم يطلع لنا الأمر الأخير .. تحتها ريسينت انبوت وفيه سهم لو تسوي كلك عليه بيعطيك الأوامر اللي دخلتها بالترتيب لين 10 أوامر أعتقد .. بعدين كوماند خاص باللاين ويت أو وزن الخط وهذا ما دخلت فيه بس وزن للخط وحدته حتى نقدر نسوي له اظهار حقيقي على الورق .. في فن الرسم الهندسي بعض الخطوط ما لها أهمية كبيرة نخليها باهتة

الكليب بورد هذا تحديث مريح وممتع نقدر نحفظ صورة مثلاً وندخلها على الرسم .. أذكر في برزنتيشن خذت صورة كورولا وحطيتها في واجهة موقف وكتبت على رقمها اسمي .. ووقفت جنبها رولز .. الكل ضحكوا وعلقوا على الحركة .. بعد نقدر ناخذ عناصر من رسمة اوتوكاد ثانية وننقلها لرسمتنا ذي .. لازم بنجي لهذي الأوامر بالتفصيل .. اللي يهمنا ألحين التحرير وهو فوق المسح مكتوب عليه وواضح

http://i.imgur.com/2YFC3C4.png

يطلع لنا منيو ثاني لو اخترنا الأمر اديت بولي لاين مثل هذا الشكل ولازم نجرب شيصير لكل الخيارات أو نقرأ بالتفصيل كل خيار شيسوي ونسويه

باختصار close يسكر آخر الخط مع أوله بخط سيدة .. بعدين لو أجرينا التعديل عليه يطلع لنا خيار افتح بدال اغلق .. Join خيار مهم ويلصق كل الخطوط في بعض بس بشرط يكونون متصلين ويسويهم خط واحد .. حتى لو عندنا خط عادي ونبي نحوله لبولي لاين نختار اديت بولي لاين من مجموعة مودفاي وننزل بالسهم حتى نطلع الأوامر المخفية وبعدين نختار الخط العادي بيطلع لنا خيار هذا ليس بولي لاين هل ترغب في تحويله بس تضغط حرف الواي يتحول وبعدين تختار الأمر مرة ثانية وتعطيه عرض حسب رغبتك وتشبكه مع خطوط ثانية بأمر جوين

http://i.imgur.com/Yfj8mdF.png

الأوامر الثانية ممكن اللي يحب يجربها وبنحاول نرجع لها مرة ثانية

[معماري قطري]

في الرسمة اللي قبل الأخيرة نشوف في الزوايا مربعات زرق هذي اسمها نقاط حق التحرير بالماوس نضغط عليها ونسحب نشوف الشكل يتغير

[معماري قطري]

حتى اللاين العادي ممكن نعطيه وزن أما من خلال الخصائص اللي نقدر نوصل لها بالضغط على الخط باليسار ثم اظهار الخيارات بزر الماوس اليمين ونختار Properties أسفل القائمة .. يطلع لنا جدول كبير من خلاله نشوف خصائص الخط أو أي شيء نختاره في الرسم

من هذا الجدول ببساطة نقدر نختار الخاصية ونغيرها .. وهنا تصوير للجدول بعد ما نختار خصائص الخط على سبيل المثال .. وانا رسمت حوائط بسمك 10 سم بالبولي لاين وخط عادي واخترت خصائص للخط قبل

http://i.imgur.com/gpDxw3s.png

خاصية اللون مثل ما هي واضحة الأسود والاوتوكاد يسمي الأسود أبيض لأن خلفيته الافتراضية سوداء وانا متعود على البيضاء فيبين عندي اللون أسود ومكتوب بواسطة الطبقة أو by layer وطبقات الاوتوكاد تبدأ بالطبقة 0 ونقدر نضيف عدد غير محدد من الطبقات ونتحكم فيها بالاطفاء أو التشغيل أو الاخفاء أو القفل .. ولو خلينا اللون حسب الطبقة نقدر نغير كل الخطوط اللي رسمناها في هذي الطبقة للون ثاني بضغطة زر وحدة بحيث نغير لون الطبقة

زيادة نقدر نخلي الطبقة مثلاً 0 ونغير لون شيء معين وباقي الألوان تكون حسب الطبقة

الليرز أو الطبقات لها مجموعة أزرار يمين فوق .. هنا انا سحبت جدول الخصائص للخط اللي اخترناه وحركته يمين حتى اطلع مجموعة أزرار الطبقات وضغطت السهم اللي يوضح باقي الأزرار

http://i.imgur.com/NlCAYvP.png

أول ما نبدأ رسم اوتوكاد جديد تكون عندنا فقط طبقة 0 ونقدر ننشيء طبقات ثانية بألوان خطوط غير ولكل طبقة خصائصها .. مثلاً للحوائط نفترض بنسوي بولي لاين بدل الخطوط العادية بسمك معين فرضاً للخارجية 40 سم وللداخلية 20 .. نسوي طبقة اسمها حوائط داخلية وطبقة اسمها حوائط خارجية .. وطبقة أساسات لو نبي نوضح مكان الأساسات وأعمدة لو نبغي نوضح مكان العمود .. الشغل بالطبقات يخلي عندنا شوية تنظيم ونقدر نطفي الطبقة نوضح شيء مهم نبغي نوضحه بحيث كثرة المعلومات ما تخربط البرزنتيشن

آذكر سويت نظام حق مجموعة شغل يعتمد على البرزنتيشن الرقمي .. فيه خرائط لكل أبنية المؤسسة مع الطرق والمساحات كاملة هذي في طبقة + طبقة للخطط المستقبلية للمباني وأماكنها + طبقة لتوضيح مبنى الإدارة وتوزيعاته بالكامل + طبقة حق كل مكتب من يشغله ووشو منصبه + طبقة حق أرقام التلفونات .. يعني سويت نظام برزنتيشن اداري معلوماتي جغرافي كامل .. حتى الاجازات ممكن نظمنها للنظام المعتمد على الاوتوكاد .. سويت عرض لهم وكانت العلة في عدم وجود مبرمج يتابع وكان ردي بأن النظام سهل ومستعد اتابع مع أي كاتب واعلمه شيسوي

نفس الشيء تنسيق الشغل الهندسي عبر الطبقات يسهل علينا اضافة معلومات ما لها نهاية .. المقاسات مثلاً المكتوبة هذي سهلة وتوزيع الأثاث

في الوقت الحالي خلونا من الطبقات لأنها تحتاج دراسة مفصلة أكثر يهمني الكل يعرف وجودها ويتعرف عليها ويحاول لو حب يسوي طبقة جديدة ولو اشتغلنا في الطبقة 0 وسوينا كل شغلنا فيها ممكن بعدين نسوي طبقات كما نحب ونوزع شغلنا عليها .. وممكن نخفيها يبين لنا الرسم بدونها أو بالطبقة اللي نبغي نظهرها

الخاصية الثالثة نوعية الخط .. لو نضغطها تطلع لنا لستة خطوط نقدر نختار المقطع مثلاً فيتغير الخط اللي سوينا كلك عليه للمقطع .. بس أحياناً نحتاج نعدل المقياس ليتناسب مع مقياس رسمنا من تحت Line type scale وعندنا اللاين وييت أو وزن الخط هذا بعد ممكن حتى البرزنتيشن الورقي يكون دقيق بألوان وقوة خطوط واضحة وشوي باهتة حق تخلي الرسم يتكلم ويصرح بمكنوناته الهندسية

بقية الخصائص يهمنا منها السمك Thickness وهنا 0 لأنه خط عادي ولو بولي لاين ممكن نغير السمك حسب الرغبة واتوقع حتى الخط العادي ممكن تغيير السمك واللي يحب يجرب

الجيومتري هي الخصائص الطولية ونقاط الاكس والواي والزاوية في مستوى الرسم .. طبعاً الثري دي فيسيولايزيشن ما نحتاجها ألحين بس ممكن نتعرف عليها بشكل عام للي يحب وجايينها بتفصيل أكثر لو دخلنا في الثري دي ديزاين .. نلاحظ الطول محدد بمضاعفات ال 2.5 اللي حددناها للسناب قبل

ألحين نطلع من هذي الخصائص ومن اختيارنا للخط بضغط زر سكيب مرتين ونسوي كلك على خط بولي لاين مقارب للي انا مسويه أو حسب رغبتكم

نختار البولي لاين بزر الماوس اليسار ونلاحظ المربعات الزرق .. هذي هي نقاط نمسكها بزر الماوس اليسار ونقدر نسحب ونغير اتجاه الخط مثل ما تشوفون في الصورة

http://i.imgur.com/syBmmaF.png

وبما إننا في خاصية السناب مود والاوبجكت سناب والبولار تراكنغ نقدر بسهولة نمسك النقطة اللي تتحول لحمراء ونضغط زر الماوس اليسار ونتم ضاغطين ونسحب في الاتجاه والطول اللي نبغيه .. نقدر نضبط الطول بسهولة على 3000 بخاصية قفزات السناب اللي حطيناها 2.5 قبل ونقدر ندخل الرقم 3000 ونضبط الاتجاه بالبولار تراكنغ .. الخصائص اللي اخترناها شغالة

http://i.imgur.com/9yvKq2b.png

خلونا نركز على الخصائص الطولية .. بعد ما فتحت الخط وسحبته مديته ل 3000 ملم + 3000 سابقة + 1800 للعرض + 200 لكتف الباب فرضاً = 11000 أو 11 متر طولي وهذي تنفعنا في الحسابات .. طلعت لنا المساحة وهذي خاصية في البولي لاين تختلف عن خاصية الخط العادي وهي مساحة المنطقة المحصورة في الوسط وبخط وهمي بين بداية ونهاية البولي لاين تسويه كلوزد بولي لاين .. المساحة محطوطة 7800000 أو 7.8 متر مربع

طبعاً لو افترضنا هذا حمام ومغلق مثل ما كان قبل بدون تمديد الحائط سيدة 3 متر بيكون الوضع غير وطول الحائط بيكون 3000 + 3000 + 1800 + 1800 كلها مضروبة في الارتفاع فرضاً 2800 تعطينا مساحة سطحية لأسطح الحمام الداخلية = 26,880,000 = 26.880 متر مربع نشيل منها مساحة الباب 900 في ارتفاع الباب نفترض 2200 ملم .. تطلع لنا 24.9 متر مربع نجبرها ل 25 متر مربع وبتبقى لنا زيادة قليلة جداً مكان الدريشة نفترضها للتكسير أو احتياط نزيد 5% أو 10% كفاقد قص وتكسير تطلع لنا 27.5 متر مربع بلاط

[الرايــق]

يعطيك العافية اخوي معماري قطر متابع معاكم

[معماري قطري]

يعطيك العافية اخوي معماري قطر متابع معاكم

الله يعافيك إخوي الرايق

دخلنا في حساب الكميات المبسط عن طريق البرنامج بعد .. اللي يلاحظ طول البولي لاين يعطيك البرنامج الطول الإجمالي وممكن يتخلل هذا الطول كم عمود ما تأثر كثير في الحساب لكن الجسور أكيد تؤثر .. نحسب الطول والارتفاع تحت الجسر وأحسن نخلي حساباتنا على موديل 3 دي .. أو نحسب حجم الحوائط لو سوينا الموديل كإجمالي ونقسمها على حجم الطابوقة الوحدة بالملم 200 في 400 في 200 للطابوقة العادية يطلع لنا عدد الطابوق اللي نحتاجه وهذا مهم حتى للمقاولين

بنسوي إن شاء الله مثال لنموذج هيكل 3 دي يتكون من أساسات وجسور وأعمدة وأرضيات .. وبندمجها مع بعض حتى تكون وحدة واحدة وبنشوف كيف نحسب حجمها بضغطة زر ونعرف كم نحتاج متر مكعب خرسانة .. طبعاً جرد كميات الحديد يختلف لأن تجي في جداول عدد وطول وقطر

بنشوف أمثلة إن شاء الله كثيرة كلها تصب في التصميم المعماري

هذي نبذة عن نظام الاحداثيات في الاوتوكاد .. النظام أهميته بسيطة في التصميم 2 دي في ثلاثي الأبعاد نحتاج ممكن نحرك الاحداثيات على سطح النموذج مالنا حتى نقدر نتحرك صح

http://i.imgur.com/8wfSFI8.png

http://i.imgur.com/OLL11ze.png

مهم نعرف المبدأ ولو حبينا نقدر ننقل الاحداثيات نخليها في زاوية مبنانا .. وعلى الورلد كوردينيت نقدر نحط نقاط خارطة أرضنا بأرقامها شمال وشرق حسب نقاط الجي بي اس ويكون رسمنا واقعي حتى مع الارتفاع اللي هو اتجاه z

[معماري قطري]

من الأوامر المهمة في مجموعة التعديل الأمر اكسبلود .. يعني تفجير ولين فجرنا البولي لاين يتحول لخطوط سمكها 0 ومتصلة ببعض بس كل واحد خط مب خط متعدد

http://i.imgur.com/roJ2lOD.png

هذا موقع الزر تحت المحاية ويطلع وصف له .. باراويكم كيف يفجر البولي لاين اللي سويته

خذت الأمر وسويت كلك على البولي لاين تحول لعدة خطوط مثل ما تشوفون وسويت كلك على خط حتى يتضح لنا شلون قبل البولي لاين كان كله يتم اختياره الحين لازم نختار بالوندو كل شيء أو كلك على اللي نبي نختاره .. ببساطة تحول من شيء واحد الى أشياء

http://i.imgur.com/zJWktaI.png

حتى نرجعه مثل ما كان أما نتراجع ونلغي الأمر أما نروح حق بولي لاين ادت ونحولهم بولي لاين بخصائص ثانية والا نفس قبل .. انا باسويه بعرض 200 بدال 100

نضغط السهم اللي عند Modify

http://i.imgur.com/LTZ3964.png

يطلع لنا عدد اضافي من الأزرار نختار بي ادت اللي واضح لكم

من ناخذ الأمر نكون داخلين فيه وباختار أي خط من الخطوط اللي فجرناها لمكوناتها الأساسية

http://i.imgur.com/nIpPzjb.png

مثل ما انتوا شايفين يطلع لنا حوار يسئلنا هذا ليس بولي لاين هل تود تحويله نضغط انتر فيتحول أو حرف الواي للتأكيد

http://i.imgur.com/1Fz26XJ.png

بعدها بعد تطلع لنا عدة خيارات .. نختار Join لأن نبغي نوصل الخطوط مثل ما كانت وبعدها نختار Width وندخل العرض الجديد للبداية 200 ويسئلنا عن النهاية نقول بعد 200 فنرجع نحصل على خطنا القبلي بس عرضه 200 بدل 100 و200 تعني 200 ملم وهو عرض الطابوقة العادية

http://i.imgur.com/CKFxlpv.png

هنا مثل المسح حتى نختار بسرعة تضغط زر الماوس اليسار ونسوي وندو متقطعة من تحت يمين ليسار فوق أي شيء تمر عليه تاخذه واحنا نبغي ناخذ كل الخطوط

http://i.imgur.com/VV0CuPn.png

أول ما نضغط انتر أو زر الماوس اليمين بيطلع لنا كلام في لوحة الأمر إن 4 قطع انضافت وهذا يعني عندنا بولي لاين سمكه صفر .. وبيرجع يفتح الخيارات لو نبي نطلع نروح سكيب أو نختار مثلاً كلوز يسوي لنا بولي لاين مغلق يوصل النهاية مع البداية أو نختار ودث وندخل عرض جديد بالكيبورد .. أدخلت 200 وطلع لي هذا الشكل

http://i.imgur.com/07IXQvM.png

التجربة سهلة بس نتبع الخطوات وتترسخ في فكرنا وتستوي سهلة .. لو غلطنا مب مشكلة المهم نعرف شلون نطبق الأوامر

[معماري قطري]

البولي لاين مدخل مهم للثري دي ولازم نسويه مغلق حتى نقدر نعطيه البعد الثالث

الدائرة تعتبر بولي لاين ونقدر نمددها ونسويها سلندر ( برميل ) أو شكل مخروطي

خلونا نرسم دائرة .. الدائرة من مجموعة الرسم ونشوف هنا العدة خيارات لو ضغطنا السهم اللي يعطينا اياها لرسم الدائرة .. الأهم عندنا مركز ونص قطر أو مركز وقطر والنقطتين والباقي سهل الواحد يتعرف عليهم ويحاول يدمجهم مع رسمه أو يجربهم

http://i.imgur.com/ZApVYsw.png

إخترت نقطتين حتى ابدأ من نقطة من منتصف خط البولي لاين لمنتصف الخط المقابلة وسويت لاين حتى اوضح المقاس ومنتصف الخط تاخذ السنترلاين الوسطي .. ونذكر البولي لاين الأخير اللي سويناه سوينا عرضه 200 ولو نسينا بكلك عليه وبزر الماوس اليمين نطلع الخصائص ونشوف عرضه كم

لو افترضنا هذا حمام ونبي نسوي دائرة في السقف لتشكيلة الجبس ونسويها ملامسة للخط مب وسطه نحتد نصغر الدائرة ونخلي القطر 1600.. العملية ممكن نسويها بالأمر scale أو من خلال Properties الجدول أو ببساطة نرسم دائرة غير

هذا الوضع اللي وصلت له مع النقطتين ولاحظوا أمر الدائرة فوق تغير للأمر الأخير اللي خذته

http://i.imgur.com/T0IoEYf.png

خذت الأمر سكيل اللي من خلاله نكبر أو نصغر بنسب معينة .. وبدون ما اختار شاللي ابي اسوي له سكيل .. نلاحظ في خط الأوامر حط سكيل ويقول لي اختار الشيء اللي تبي تسوي له سكيل .. زر السكيل واضح في مجموعة التعديل Modify وبنفس الوقت اقدر اكتب الأمر في الكوماند لاين

الإختيار دوم يكون أما بالضغط على زر الماوس اليسار على الشيء اللي نبي ننفذ الأمر عليه أو بالنافذة المتقطعة من اليمين لليسار أو بالنافذة العادية من اليسار لليمين واللي لازم الشيء يكون داخلها مثل الصورة .. لو كبرت النافذة حق تاخذ كل الأشكال بتاخذ البولي لاين وبتاخذ الدائرة ولازم كلك مرة ثانية واختيار باليمين

http://i.imgur.com/eKIdAAN.png

نسيت شيء مهم اللي هو ال Object Snap .. هذا هو اللي يخلينا نصيد وسط الدائرة أو طرف الخط أو وسط الخط أو شروط كثيرة وانا فيه .. مريت على شرحه باختصار قبل بس مهم اشرحه ألحين .. لأن بعد الاختيار بيسألنا البرنامج أي نقطة تبي السكيل يبدأ منها

الاوبجكت سناب واضح هنا تحت ومتداخل مع زاوية المربع اللي مكتوب فيه الاسم

http://i.imgur.com/UoPIJP7.png

بعد ما نضغط عليه باليسار نشغله أو نبنده ويبين لنا منور لو يشتغل .. لكن لو ضغطنا بزر الماوس اليمين يطلع لنا جدول ممكن نشوف إحنا شمختارين قبل أو ندخل للاعدادات ستنغ ونختار اللي نبغي

ببساطة نهاية الخط أول شيء ووسط الخط وكل اوبشن له علامة تظهر وكتابة تقول لك انت شبتحدد

http://i.imgur.com/XMLwMLR.png

فيه أشياء ما تهمني ما خذتها لكن اقدر اخذها من خلال الضغط على كنترول وزر الماوس اليمين وانا في الأمر .. العملية شوي معقدة بس حفظها سهل لو سويناها مرة .. يعني نجرب نختار أمر مثلاً لاين ويسئلنا الأوتوكاد وين تبغي نقطة البداية حتى نحدد بالضبط نضغط كنترول مع زر الماوس اليمين ويطلع لنا منيو بعدة خيارات مقارب للي فوق .. لو نبي سنتر الدائرة نختار السنتر ونقرب من الدائرة نحصل البوينتر راح للسنتر ومسكه .. لكن إحنا بنسوي العملية بدون ما ندخل في هذي القصة وبنسوي الستنغ حق الاوبجكت سناب

بعد ما نختار Setting في الجدول الفائت يطلع لنا اعداد ال Object Snap ومبدئياً نختار اللي انا مختارة حتى نتابع مع بعض ويسهل علينا الشغل لأن مثلاً بعض الاختيارات تلخبط شوي وتصعب الاختيار

http://i.imgur.com/etG7BGj.png

نلاحظ بعد ما نختار ونحدد الاعدادات من نرجع للأمر Scale ونختار الدائرة ونقرب من مركزها يصيد الماوس مركزها بسهولة وتطلع لنا علامة ومن نقرب قرب المحيط يطلع لنا Quadrant اللي هو نقاط كل 90 درجة على محيط الدائرة

http://i.imgur.com/cBDVE7H.png

بعد ما ناخذ وسط الدائرة بالماوس الزر اليسار يطلع لنا في خط الأوامر وانا مخلي 3 خطوط للتوضيح مثل ما نشوف أول خط يقول اختار الشيء واخترنا الدائرة حق أمر سكيل .. وبعدها حددنا النقطة اللي منها نبدأ السكيل واللي هي المركز والحين يسئلنا عن السكيل فاكتور .. ببساطة هو كم نبغي نكبر أو نصغر للتكبير 1 وزيادة 1.2 يعني نكبر عشرين في المئة 2 نكبر مرتين .. ولو ماخذين أجزاء من رسمة تعتمد 1 كوحدة قياس متر وبننقله لرسمة فيها الواحد مفترضينه 1 ملميتر الجزء اللي ماخذينه بيطلع وايد صغير بالضبط 1 من الألف ويبين في رسمنا الجديد كنقطة .. لازم نكبر بالف مرة 1000 حتى يتساوى مع 1 = 1 ملمتر اللي افترضناها ورسمنا على أساسها

نرجع للسكيل فاكتور .. إحنا نبغي دائرتنا يكون قطرها 1600 بدل 1800 .. نكتبها 16/ 18 أو كما هي 1600/ 1800 في خانة الأوامر

سويت وضغطت انتر وصغرت الدائرة بحيث تلامس الخط ما تمر في وسطه ويبين في الكوماند قبل الأخير ادخال السكيل اللي ابيه

http://i.imgur.com/fUkWuxb.png

اللي ما يتابع بالتجربة وتجريب كل خطوة ما بيستفيد الاوتوكاد خادم مطيع ويشتغل حسب الأوامر ومهم نعرف أي أمر نستخدم وشنسوي حتى نطلع برسم دقيق وصحيح ونكشف أخطاء الاستشاريين بمراجعة بسطة ومن نشوف الستنغ البسيط للوحدات وشكثر أصفار في الخانة الكسرية ما تفيدنا

مع مرور الوقت أكيد بتتكون عندنا فكرة وقدرات ثانية وبنقدر نسوي شغل بدون تفكير كثير .. مثل سواقة السيارة حركات آلية تحفظها وتسويها بدون تفكير

[معماري قطري]

يوم جيت ارسم الدائرية واخترت نقطتين أول نقطة كانت منتصف الضلع العلوي وكان سهل اختارها بالاوبجكت سناب مثل هذا المثال لو رجعت اخترت الدائرة وسويت كوبي لها وكوماند Copy بنجربه موجود في مجموعة أزرار Modify فوق سكيل يسار من نمرر عليه الماوس يطلع لنا اسمه .. نختار بس الدائرة ونختار النقطة اللي نمسكها للنسخ الكوادرنت السفلي بعد بخاصية اوبجكت سناب اللي سويناها وفعلناها ونحرك تجاه الخط فوق ونقرب من نصه تطلع لنا علامة المثلث تعني المنتصف وكتابه ميدبوينت

http://i.imgur.com/nCa4MfE.png

نلاحظ هذي الأدوات قوية وتفيدنا كثير في الرسم الهندسي

[Aozomblue]

يعطيك العافية اخوي معماري

[معماري قطري]

يعطيك العافية اخوي معماري

الله يعافيك اخوي

إجازة هاليومين ولو حد بيستلم يشرح يتفضل أكيد وايد يعرفون

[معماري قطري]

شكل استراحتنا طولت وحانت المواصلة

وانا ادور في فايلاتي القديمة حصلت فايل بيتي وحصلت فيه الخرائط المعمارية كاملة لكن باقي الخدمات للأسف عند الاستشاري .. قلت بادخل خارطة توزيع الحوش كصورة على فايل الاوتوكاد وباسوي رسمه جديدة بالمقاسات .. يعني بانسخها نسخ وممكن نعدل عليها على حسب وتكون فكرة تصميم موجودة بعد للي يحب

نقل الصور للرسم استوى سهل جداً مع الاصدارات من 2008 ورايح .. ببساطة نسوي كلك على الصورة وكوبي في الكليب بورد وندخل الاوتوكاد نروح للزر اللي فاتحه في أقصى يمين الشاشة وناخذ بيست ويطلع لنا حوار وين نحط الصورة نختار نقطة وبعدين شكثر نبي نكبرها أو نصغرها وعلى حسب ما نحب والغرض منها هنا قراءتها ونقل المعلومات وليس عمل سكيل بالضبط لها يتناسب مع سكيل رسمنا

http://i.imgur.com/qNQGZ4g.png

استخدمت نفس الرسم السابق بس مسحت الخطوط اللي سويناها قبل

بسهولة نقدر نحرك الصورة بالضغط على عجلة الماوس والتحريك ونكبرها بتدوير عجلة الماوس مثل ما تشوفون تكبرت وركزت على الصالة الوسطى

طرق التكبير zoom ممكن بادخال الأمر وممكن باختيار المجموعة View ومنها نختار أوامر الزوم حسب ما نحب

http://i.imgur.com/P46joo5.png

تلاحظون زر View فوق مضغوط ومتغير عندنا المنيو للأوامر تغير تام ولو نبغي نرجع للأساسي بالماوس نضغط زر Home

مب غلط الواحد يجرب الأوامر ذي بس انا ما ادخل هذي المجموعة الا نادي والزوم بسهولة من خلال الماوس تعودت عليه .. في الأخير يمين فيه مجموعة فوق اسمها تول بارز هذي مهمة حق الستنغ الأساسي للاوتوكاد ونقدر نختار أدوات معينة نظهرها وبعضها نخفيها حسب ما نحب

http://i.imgur.com/dj3MV7a.png

[معماري قطري]

الصور نقدر ندخل صور كتلوجات ومواصفات معينة ونوعية بلاط أو رخام ونحدد اشتراطات تركيبها وتكون جزء من العقد بسهولة وبوضوح .. حتى صور من الانترنت لسيارات وغيرها

هنا نسخت صورة الدرج اللي مصمم في الرسم وحطيتها وسويت زوم ووضحت الصورتين وين .. والصورة تعتبر شيء واحد مع انها من عدة خطوط وممكن نكبرها ونسوي عليها تحرير وهي عبارة عن وحدة وحدة

http://i.imgur.com/ldi5AYY.png

[معماري قطري]

أسهل طريقة لبدء النسخ هي نسخ شبكة الخطوط اللي تحدد مواقع الأعمدة ومن ثم البناء عليها

لكن مع اوتوكاد 2012 وحتى قبل استوى عندنا نوع من الخطوط اللامنتهية اسمها construction line رمزها يجي فيه سهمين في كل نهاية

مثل هذي

http://i.imgur.com/zJdmO29.png

وفيه عدة نوعيات ونقدر لو حبينا نحطها في طبقة بروحها .. خلونا نسوي طبقة نسميها xline

نروح حق Layers ونختار هذا الزر اللي من خلاله نقدر نسوي لير أو طبقة جديدة

http://i.imgur.com/gr4X19n.png

بعد ما نضغطها يطلع لنا هذا الحوار ونختار الزر اليسار العلوي ونضغط حتى نسوي الطبقة اكس لاين

http://i.imgur.com/0WrCP7Z.png

يطلع لنا هذا الحوار ونكتب مكان ليير 1 الاسم اللي نبغيه ونعدل اللون حسب رغبتنا

انا كتبت الاسم واخترت اللون الأخضر وضغطت انتر وهذي طبقتي موجودة ولازم اختارها بالماوس حتى تكون هي الحاضرة وأي رسم يكون فيها وبارسم بس الكونسترآكشن لاينز وبابدأ بالافقي

بعد ما اضغط رمز الخط الانشائي مثل ما وضحت وين مكانه قبل يطلع لي هذا الحوار وفيه عدة خطوط معلم على الافقي واضغط اوكي وابدأ ارسم

http://i.imgur.com/oUwrKo0.png

سويت في البداية خط كونسترآكشن تحت أحمر وهذا يمثل وجه سور البيت الخارجي وخط فوقه على بعد 200 ملم يمثل عرض السور .. بعده نسخت الخط الأخير على بعد 3000 ملم وبعده سويت خط ثاني يبعد 400 من الأخير وهو سمك الحائط الخارجي للبيت

http://i.imgur.com/Kf78eJm.png

ما اسوي خطوطي ذي حسب الترقيم والحروف الأبجدية .. ذيك سنتر لاين أما ذي تحدد الحائط عندي وحق نفهم مفهوم الخطوط الانشائية أو الكونسترآكشن لاينز

وبكمل وقت ثاني ان شاء الله

[معماري قطري]

واجهت مشكلة يعلق عندي البرنامج ويطفى ويضيع اللي سويته الله أعلم شالحل بس الفكرة وضحت اتوقع من سالفة الخطوط الإنشائية

ممكن نسوي خطوط انشائية عادية أو متقطعة تكون استرشادية ومحدودة الطول ونخليها في طبقة خاصة ونسويها مجمدة بحيث لو مسحنا أو نسخنا ما تنمسح

الشغلة تطول أكيد بحيث إننا ناخذ المقاس كما هو مكتوب ونطبقه كرسم .. فيه طريقة ثانية تحويل خطوط الصورة الى نفس سكيل الاوتوكاد بس لازم تكون صورة واضحة وبعدين نحولها عن طريق برنامج لفايل اوتوكاد .. وقبل كانوا يسوون للرسم تتبع لكل الخطوط بحيث يخلونه في طبقة مثل الشفافية ويرسمون عليها

[معماري قطري]

لفهم موضوع الطبقات أو كما يسمى Layers في الاوتوكاد علينا عمل طبقة وتسميتها لغالبية جزئيات التصميم .. مثلاً طبقة للأثاث .. طبقة للحوائط .. طبقة للأعمدة مثل ما سبق شرحه

شيصير لو كل شيء سويناه في الطبقة الأساسية 0 وحبينا بعدين نفصل .. بعد العملية سهلة وممكن من خلال Match Properties or match الأمر ماتش في مجموعة ليرز يبين مضغوط ويبين الوصف له وهنا خذت رسمة جاهزة أغلبها على طبقة 0 .. براويكم كيف بعد اخفي طبقة 0 وتختفي كل الخطوط المعمولة في هذي الطبقة

http://i.imgur.com/HuvqwzE.png

بالنسبة للأمر الموجود لو خذناه نقدر نحول الطبقة لنفس طبقة الشيء اللي اخترناه .. مثال سوينا رسمة أثاث على طبقة 0 ونبي ننقلها لطبقة f اللي معتبرينها للأثاث أو طبقة أثاث بالعربي حتى ما نضيع نقدر بالأمر هذا ناخذ طبقة الأثاث ونحول الشيء اللي نبي نساوي طبقته مع الشيء اللي اخترناه لنفس الطبقة والعملية يبي لها تجريب حتى تعرفون كيف تستوي

بس يهمنا أكثر مفهوم الطبقات .. انا باطفي طبقة 0 في رسمتي هذي وغالبية الخطوط مسويها على طبقة 0 وهذا قصور في شغلي

نبدأ باختيار الزر هذا ووصفه واضح .. الشيء اللي نختاره بتبند طبقته وانا باختار الحوائط وبتختفي كل الأشياء في طبقة 0

http://i.imgur.com/4tOakkE.png

هذا اللي صفينا عليه بعد تنفيذ الأمر

http://i.imgur.com/ZBHQPxW.png

والطبقة موجودة نقدر نفتحها مرة ثانية .. ولو نروح لسهم الطبقات نضغطة تطلع لنا لستة الطبقات واللي مطفية يبين الليت عندها قاتم ( مبند ) وبضغطة عليه ترجع تنفتح .. فيه جنب الليت زر فريز وهو تقريباً مشابه للأول

http://i.imgur.com/b4K1QYa.png

وزر القفل حق نقفل كل الأشياء على الطبقة ولا نقدر نختارها ولا نقدر نسوي عليها تحرير .. وهذا لسهولة اختيار الأشياء الثانية وحفظ الأشياء اللي في الطبقة المقفولة عن المسح أو التغيير بدون قصد

هنا طفيت كل ليير ثانية وخليت 0 بس .. تلاحظون السيارة ضمن ليير 0 وهذا خطأ المفروض احطها في ليير مثلاً اسميها سيارة رياضية أو مع السيارات الباقية .. المسطحات المائية باقية بعد .. المنهولات والأبواب وأشياء كثيرة يفترض كل شيء في ليير خاصة به أو بمجموعته

كذا نقدر نطبق كل الرسومات على المعماري .. نقدر نحط ليير خاصة بالاضاءة وباقي تخصصات الكهرباء ونشوف تعارضهم بسهولة مع أي شيء ثاني .. ليير الأعمدة والأساسات والجسور .. مكاتبنا الاستشارية يسوون كل تخصص بنفسه وبعضهم لكل تخصص فايل اوتوكاد غير وانا لين جيت اراجعهم اسوي كوبي واحطها على المخطط واشوف التعارض .. بالطبقات العملية كلها سهلة

http://i.imgur.com/IArpUSt.png

[معماري قطري]

اللي عنده ملاحظة أو سؤال يتفضل ولو الشرح أوقات صعب لازم نرجع للبداية حتى نفهم طبيعة الأوامر وتنفيذها ولازم نجرب

[معماري قطري]

لاحظت السيارات في كم طبقة وحبيت اخليهم في طبقة وحدة واسميها سيارات .. سويت الطبقة أول وحددت لها اللون الأحمر وسميتها سيارات .. غيرت أول اللمبرغيني حق هذي الطبقة واللمبرغيني معمولة بخطوط ولا انجمعت وتحولت الى بلوك

البلوك عبارة عن شيء واحد مكون من عدة خطوط ومثل البولي لاين نقدر نفجره لخطوطه الأولية .. ومن اللمبرغيني اسوي ماتش بروبرتيز وانقل خصائصها لباقي السيارات وتتحول في نفس الطبقة .. بوضح الخطوات خطوة خطوة وباشرح البلوك بتفصيل أكثر

بس قبل يوم نقلت خصائص اللمبرغيني للبورش اللي عليها مربع صغير أزرق واللي طلعنا خصائصها بزر الماوس اليمين ونزلت لخصائص أو بروبرتيز مثل ما وضحت سابقاً وصلت لجدول الخصائص .. في أعلاه يبين لنا انه بلوك رفرنس وتحت اللون ممكن نغيره من هذي الخانة بس يبقى في نفس الطبقة اللي اخترناها له

http://i.imgur.com/jByArbv.png

باوضح الحين خصائص اللمبرغيني بس نختارها بالماوس بالوندو المتقطعة أو العادية بس نحوطها كلها يطلع لنا فوق إن اخترنا 88 شيء .. طبعاً بين خط مستقيم وقوس وممكن نقاط .. كان لونها يبين أحمر وهو الغالب بس أكيد داخلة ألوان ثانية .. أنا باغير وباخليها كلها بلون أصفر وباخلي الطبقة هي سيارات وكله من الجدول

http://i.imgur.com/y6rUP6Q.png

طبعا قربت الزوم حتى تبين واضحة وهنا دخلت على اللون بزر الماوس اليسار ومنه اقدر اختار اللون اللي ابي وتحت فيه اختار اللون ينفتح لنا مجال أكبر لإختيار تدرج أكثر في الألوان

إخترت اللون الأصفر مثل ما هو معلم عليه

http://i.imgur.com/0fuwmco.png

وهنا عدلنا الطبقة لتكون بدال متغيرة أو متعددة لطبقة السيارات

http://i.imgur.com/k0qqV8c.png

وهذي النتيجة اللي تطلع لنا بس للحين ما زالت السيارة تتكون من 88 شيء وبنشوف شلون نحولها لبلوك عبارة عن شيء واحد ونسميها لمبرغيني

http://i.imgur.com/06yTM1C.png

عمل بلوك سهل جداً ممكن نعمل أبواب ودرايش ونسميها حسب نوعها ومقاسها ونخزنها في لايبري خاصة ناخذ منها لكل رسم نسويه ويطلع كل شيء سهل وسريع

هنا اخترت بلوك وكرييت لعمل السيارة بلوك مثل باقي السيارات

http://i.imgur.com/wVLC83q.png

بعد ما نضغط كرييت يطلع لنا جدول .. فيه عدة اسئلة عن البلوك اللي بنسويه .. الإسم سميته لمبرغيني صفراء تسر الناظرين .. النقطة الأساسية أو Base Point هي تختار النقطة اللي لو بتسوي ادخال للبلوك بعدين في كل رسمة تطلع لك ممسوكة بالماوس حتى تعرف وين تحط البلوك بسهولة .. معلم على سبسفي فروم سكرين يعني تختار النقطة بالماوس .. بعدها objects تختار الأشياء اللي تبي تحولها لبلوك .. معلم على التحويل لبلوك يعني اللي تختارها بتتحول بلوك وعندك خيارين تختارها وتنحفظ كبلوك في الرسم تقدر تضيفها أي وقت وتمسحها في نفس الوقت أو تحافظ عليها كأشياء مفرقة وتنحفظ كبلوك في ميموري الاوتوكاد وفي الرسم تقدر تنزلها أي وقت

الأخير Behavior تقدر تسمح للبلوك بامكانية التفجير لمكوناته أو لا حسب ما تحب .. انا باخليه بلوك بدون امكانية التفجير باشيل علامة صح عند allow exploding ممكن أخليها لو باسوي بلوك ناوي اغير فيه حسب الحاجة .. مثلاً باب بعرض 90 سم وناوي اركبه على حائط 10 سم ولازم اصغر الفريم وفريم البلوك حق 20 سم .. أختار الاو اكسبلودنغ

http://i.imgur.com/w8rTZ6M.png

من اضغط انتر يطلع لي اختار نقطة الادخال .. وانا افضل نص الصدام ورا أو جدام

بعدها يسئلني اختار الأشياء اللي تبي تحولها لبلوك وانا باختار اللمبرغيني كلها

http://i.imgur.com/eymHwjy.png

ضغطت الماوس يسار بعد ما نزلت في زاوية يمنى تحت الشيء اللي ابي اختاره وحركت يسار حتى تستوي عندي نافذة متقطعة وتغطي الأشياء بالكامل .. اضغط انتر أو اختار بزر الماوس اليمين ويتحول المجموع لبلوك

http://i.imgur.com/lPh0TC5.png

أرجع اضغط على أي نقطة في السيارة تتحول لي للون خفيف مع نقطة زرقاء ومن افتح الخصائص بزر الماوس اليمين يطلع لنا بلوك ويطلع اسمه تحت مثل ما انتوا شايفين

http://i.imgur.com/BeVwqZI.png

[معماري قطري]

بالضغط على زر مجموعة بلوك تنفتح لنا عدة أوامر ونقدر ناخذ انسرت أو ادخال مثل ما هو موضح هنا وتطلع لنا لستة البلوكات الموجودة في الرسمة أو ناخذ براوز ونروح حق فولدر نكون مسوينه فيه بلوكات مخزنينها مسبقاً حتى ما يكبر حجم الفايل بدون داعي

http://i.imgur.com/LKDmPob.png

انا غيرت الليير حق كل السيارات لطبقة سيارات لكن خليت هذي الأخيرة وسويت كلك عليها طلعت لي طبقتها غير وابي اغيرها من مجموعة الطبقات مب بزر ماتش بروبرتيز اللي سويناه قبل .. ببساطة اروح لمجموعة الطبقات وانزل بالسهم لطبقة السيارات واختارها

http://i.imgur.com/wlHaLGM.png

بعد ما اسوي كلك ويطلع لي المربع الأزرق ويطلع اسم الطبقة مثل ما هو واضح انزل لطبقة السيارات بالسهم اللي في اللستة

وبعدها اختار الطبقة اللي ابيها حق تتعين لهذي السيارة وانا هنا ابغي طبقة السيارات انزل لآخر اللستة واختارها بالماوس

http://i.imgur.com/aldJPn9.png

بعد ما نختار الطبقة بزر الماوس اليسار يطلع لنا اللون أحمر وتتغير الطبقة لسيارات لكن ما زلنا في الأمر نطلع منه بزر سكيب أو ناخذ أمر ثاني يتطبق على السيارة كذلك أو نرجع للستة بزر الماوس اليمين ونغير اللون مثلاً .. صحيح لون الطبقة الافتراضي اللي عينناه الأحمر لكن غيرنا اللمبرغيني للأصفر وممكن نغير ذي للأزرق مثلاً

[معماري قطري]

ارفع الموضوع حق الإخت جيديانا طالبة فكرة عن التصميم بالاوتوكاد

[Azizuk]

دوم ماتقصر يامعماري مع الأعضاء

وانت تعتبر القلب النابض وفاكهة قسم البناء

[معماري قطري]

الله يسلمك يا بوسعود وإنت كذلك ما تقصر بمعلوماتك

هذي كانت بدايات لتعلم الاوتوكاد بس وقفت لأن محد حب يمارس ويبدأ .. مثل ما قلت قبل توجد عشرات الأدوات للرسم واخراجه وتوجد اختصارات وطرق عديدة للتنفيذ بهذا البرنامج القوي والغالي بنفس الوقت حيث قيمته كامل فوق 3500 دولار

حتى اختنا متحمسة بس للحين ما ثبتت البرنامج وكذلك عندها الفوتوشوب والثري دي استوديو ويمكن الفوتوشوب أقلها وأسهلها لمهام غير هندسية أو لمزج رسمة الاوتوكاد بالفوتوشوب واظهارها بطريقة مختلفة وكلوحة فنية