مجلس مشترك بين ارضين

[سعود.]

هذا سكتش قابل للتعديل .
من عندة اقتراح يتفضل !!!

98786

[معماري قطري]

والله يا اخوي سعود انت من الأشخاص اللي احبهم

شوف قبل التخطيط لو يرضون بمجلس مشترك بين أرضين .. واجهت نفس الوضع من حول سنة بس كانت الارض وحدة وكبيرة بين بيتين حق اخوان ونووا يبنون في وسطها مجلس ومن المجلس سور يفصل بين البيتين ويسوون كل واحد بيت حق ولده يطل على بيته .. الوضع غير وسهل لكن اذا أرضين ممكن الحل دمجهم في أرض وحدة والبنيان وبعدين فصل الأرض

بالنسبة للمجلس أحلى لو واجهته مفتوحة على الشارع وغرفة السايق حتى لو تكون تحت الأرض .. الحمام اللي في الطرف لو يروح ورا المشب بعد بيكون أحسن ويكون مغاسل وحمام صغير ما تحتاج الا لمتر ونص في 2 حق مغسلة وكرسي وممكن أصغر .. لو حاب باتفرغ له باسويه اوتوكاد في موضوع مراجعة المخططات المعمارية

[سعود.]

أحبك الله الذي احببتني له .
مانستغني عنك يا ( المرجع ) .

المشكلة مايرضون البلدية بناء مجلس مشترك بين ارضين مختلفتين في سند الملكية لازم تكون الارضين لشخص واحد .
الحمام الي بطرف لو رجعتة ورا بياخذ من مساحة المشب . غرفة السايق قبو احس سالفة طويلة وماتسوى علي .

والمصيبة البلدية يقولون سوى مجلس مشترك وماراح نخالف حتى بدون فاصل جداري بين الارضين . عاد هنا تعال اقنع المقاول بهذا الكلام . البلدية اهم شي عندهم الارتداد الامامي والخلفي انه يكون قانوني . حتى سالفة اني اغطي البرندة بسقف خرساني رافضين الا اذا واجهة المجلس الى الداخل يمين او يسار موب على الشارع !!

[سعود.]

المجلس مقسوم بين ارضين ماخذ من كل ارض 10X 8 طلع الاجمالي : 16x10

ارتداد خلفي 2 م وامامي 3 م .

[شموخ دائم]

,

,

مرحبا

صباحكم ورد

البلديه عندها أسبابها وحصلت مشاكل ( سابقا )

كهرباء المجلس من أي بيت !!
بعد عمر طويل لو واحد باع بيته !! شنو وضع المجلس المشترك !!
الي متداخل على ارضين !!

ربما احنا نشوفها ما راح تحصل
ولكن مع الزمن تحصل وتسبب مشاكل

الأفضل المجلس يكون في ارض وحده كامل في الزاويه
قريب البيت الثاني

ويخدم البيتين

الأفضل من وجهه نظر البلديه ما يكون مشاكل مستقبلية


المقاول
مايقدر يمشي على كلام ( شفوي )
لان الغرامه كبيره ماليا و ( ازاله التعدي )
يعني فيها هدم وتكاليف منو بيتحملها !!





,

,

[سعود.]

صباحك فل اخوي ( شموخ )

مثلك عارف ان اكثر توزيع الارضي او الشراء يكونون الاخوان جنب بعض ولو كل واحد بيبني مجلس بروحة ماراح يطلع بحجم مناسب للبعض . ولو تقسم المجلس على ارضين اكيد بيطلع المجلس اكبر واقل مساحة مسحوبة من كل ارض لو ان كل مجلس بروحة . علي ارضين تقدر تسوي مجلسين كبار مجلس رئيسي ومجلس لشباب وتقدر تحط مقلط وغرفة للسواقين وحمامات وممكن البعض يسوي غرف للضيوف ووووالخ . بس لو ان المجلس على ارض وحدة بيكون عندك خياران فقط .

تصغر المجالس واكيد انك شفت مجالس يمكن ماتكفي 15 شخص .
او تكبير المجلس وياخذ مساحة كبيرة من واجهة البيت والعمق .

موضوع الكهرباء والماى بسيطة حلها . مجلسين بجانب بعض مفصولين أعتقد مايفضلها الاغلبية حلاتها مشتركة .
اما البيع اعتقد نسبة حدوثها قليلة جدا . ولو صارت الشاري اكيد بيحط فاصل او بيهدم .

المقصد لو يسمحون بمجلس مشترك ويخففون علينا اعتقد الكثير راح يستفيد .

[معماري قطري]

على كلام إخوي شموخ وأوافقه الرأي ممكن نقسم محتويات المجلس بالكامل لقسمين .. وحتى نخلي كل قسم بحائط مستقل يفصل الأرض وكل قسم كهربته من البيت اللي جنبه .. طبعاً بموافقة البلدية وحسب اشتراطاتها

لو ممكن نزيد مساحة المجلس في أرض وباقي الخدمات في الأرض الثانية أفضل

[معماري قطري]

الحائط الفاصل ممكن يكون طابوق 10 سم حتى نوفر مساحة .. وتكون مفصولة بالكامل بحيث ممكن حتى نهدم جزء ويبقى جزء

[معماري قطري]

عطني بس أقصى مساحة تقدر تاخذها من كل جهة وحتى لو جهة أكبر من جهة وباسوي لك تصور قدمه لهم وخذ موافقة عليه وتوكل على الله

[سعود.]

اخوي بوعبدالله

انا نقطة في بحركم انت واخوي ( شموخ )
ودوم نستفيد من خبراتكم .

بس موضوع مجلسين ( مفصولين بالكامل ) يعني كل مجلس له مدخل بروحة قصة طويلة . مثال :المشب وين بيكون !!

كل شوي المقهوي طالع من مجلس لين المجلس الاخر يصب قهوة وشاي .

[معماري قطري]

بعد شوف المقاول في حل البيسمنت لو حفر مترين ونص بس بتفتك من غرفة الدريول أقل شيء حق جزء وممكن تسوي غرفتين لكل بيت غرفة وتستقطع مساحة بسيطة للحفر 3 في 5 بتكون كافية للغرفة بخدماتها وكافية لشخصين .. بديت اسوي الرسمة وبخلصها بأسرع وقت ان شاء الله وراي كم مشوار وبعدين باكمل

[معماري قطري]

اخوي بوعبدالله

انا نقطة في بحركم انت واخوي ( شموخ )
ودوم نستفيد من خبراتكم .

بس موضوع مجلسين ( مفصولين بالكامل ) يعني كل مجلس له مدخل بروحة قصة طويلة . مثال :المشب وين بيكون !!

كل شوي المقهوي طالع من مجلس لين المجلس الاخر يصب قهوة وشاي .

لا يا اخوي ما فهمتني

مجلس واحد هو المقلط في جهة والمجلس في جهة ومفصولين بحدود الأرض لكن مدخلهم واحد ومثل ما تبغي .. حتى لو بغيت تفصل بالكامل بيتصغر المدخل بس وبيستوي هذا جزء تابع للبيت ذاك والثاني جزء ثاني بالكامل

الحوائط المتلاصقة بس 10 سم وكأنك ما سويت شيء .. حتى السقف مفصول لكن في الواقع الجزئين يكملون بعض لو بغيت الفصل الكامل تحتد تبني جدار صغير وتبيع أو تأجر

[سعود.]

جزاك الله خير يابوعبدالله

انا ودي لو تعطيني اقتراح او تعديل غير البيسمنت . كفاية عندي بيسمنت في الفيلا. واذا سويتة في المجلس بيكلف كثير .

[سعود.]

لا يا اخوي ما فهمتني

مجلس واحد هو المقلط في جهة والمجلس في جهة ومفصولين بحدود الأرض لكن مدخلهم واحد ومثل ما تبغي .. حتى لو بغيت تفصل بالكامل بيتصغر المدخل بس وبيستوي هذا جزء تابع للبيت ذاك والثاني جزء ثاني بالكامل

الحوائط المتلاصقة بس 10 سم وكأنك ما سويت شيء .. حتى السقف مفصول لكن في الواقع الجزئين يكملون بعض لو بغيت الفصل الكامل تحتد تبني جدار صغير وتبيع أو تأجر

الحين فهمت . توقعت تقول فصل كامل .

المعذرة منك

[معماري قطري]

هذي صورة للي تبغيه مع بعض التعديلات .. قسمنا المبنى لقسمين وفتحنا فتحة بينهم وممكن تتسكر .. البلدية ممكن تعترض على إن فيه باب حق السائق وباب للمجلس وفي هالحالة تضطر تفتح باب جانبي مقابل غرفة السائق

بس هذا الحل بيخلي للمجلس خصوصية وللسائق كذلك خصوصية .. المساحة طلعت 16.2 مع الحائط من زاوية خارجية لزاوية خارجية في 10.2 ولو تبغي تصغر 20 أو 40 سم ما عندك مشكلة

منور هرمي في وسط المجلس بيطلع حلو والواجهة مع الباب قزاز والليوان جدام الباب حتى لو خليته بدون تظليل وكذلك جدام باب السائق أحسن للنور والقزاز اليو بي في سي المعزول ما عندك مشكلة في الشمس وحط حديد حماية خفيف للمدخل وخله مفتوح يبين المجلس منور

http://i.imgur.com/oPQIeo0.png

[معماري قطري]

الكراسي لو استخدمت الكلاسيك بيكفي ل 26 شخص والعريضة تقريباً 21

[سعود.]

ماقصرت يابوعبدالله .

اشكرك

[معماري قطري]

ماقصرت يابوعبدالله .

اشكرك

العفو اخوي سعود

سويت مقترح ثاني .. اللي هو ابعاد غرفة السائق للطرف وتوسعت عندي مساحة المغاسل وقدرت اضيف ثالثة .. وممكن مقترح ثالث بعد نغير التوزيع بحيث المدخل حق غرفة السائق يكون في الطرف يسار ونبعده أكثر عن قرب المجلس

هذي الصورة العامة حق الأرضين

http://i.imgur.com/vnj0EHj.png

وهذي صورة مقربة للتوزيع الداخلي

http://i.imgur.com/eg25fNJ.png

وهذا الاقتراح الأخير بعمل تعديل بسيط على ترتيب الغرف

http://i.imgur.com/aKM1FTZ.png

[معماري قطري]

الإكس هو مكان الفراغ بدون سقف وداخل المجلس منور زجاجي هرمي 2 في 2 متر .. ممكن نسوي درايش عالية أما صفين طوب زجاجي أو زجاج معشق بتشكيلة حلوة أو حتى آيات قرآنية

عمل جلسة خارجية صغيرة ممكن جدام المجلس في الليوان الداخلي كراسي خشب بظهر نازل بحيث ما تغطي على الواجهة الزجاجية .. وممكن نرفع أرضية المجلس عتبتين عن أرضية الليوان جدامه بعد يبين منور ويبينون الجالسين فيه .. حلاته بقزاز شفافوبدون ستاير

[سعود.]

جزاك الله خير يابوعبدالله .

[شموخ دائم]

,

,


مرحبا

صبحكم الله بالخير

خاطري في نخي وخبز إيراني
على هذا الفجر الحلو البارد والضباب الخفيف


هذا افضل توزيع ( قانوني ) ومحد يقدر يكلمك

ما شاء الله توزيعات ممتازه
كل واحد يقول الزود عندي
تسلم يدك اخوي معماري
والله يهنيك اخوي سعود

يبلي لنا عزومه في الافتتاح انا كرسي الي قريب من غرفه الطعام
:)

,

,

[سعود.]

ابشر بسعدك اخوي ( شموخ )

بس ترى للحين ناطرين عزيمة ( المجلس السداسي )

:telephone::telephone:

[Riku3]

صارتلي مشكلة مع البلدية في تصميم كنت ابي افصله بس ما كانوا راضين ينحط في الخريطة علشان الدرايش .. فوحدت التصميم وحطيت مكان الجدار في بالي بس ما حطيته في الخريطة .. وخذت الرخصة واشتغلت وخليت المقاول يضيفها في البناء عقب ..

حتى موظف البلدية قالي محد بيدخل بيتك ويحاسبك من صوبنا ومالنا خص دام انك بتمشي على ابعاد الخريطة الخارجية ..

فأنت سو خريطة منفصله ورخصتين بناء بكهربا منفصلة وجدار افتراضي بس لا تخلي المقاول يبنيه بس تأكد من الاحمال في السقف مع المهندس .

[سعود.]

صحيح كلامك اخوي ( riku3 )

هذا نفس كلام مفتشين البلدية يقولون لي ماعندهم مشكلة اهم شي الابعاد والارتداد حسب الخريطة .

[معماري قطري]

,

,


مرحبا

صبحكم الله بالخير

خاطري في نخي وخبز إيراني
على هذا الفجر الحلو البارد والضباب الخفيف


هذا افضل توزيع ( قانوني ) ومحد يقدر يكلمك

ما شاء الله توزيعات ممتازه
كل واحد يقول الزود عندي
تسلم يدك اخوي معماري
والله يهنيك اخوي سعود

يبلي لنا عزومه في الافتتاح انا كرسي الي قريب من غرفه الطعام
:)



,

,


ما شاء الله كاتب معبر

هم احتمال يقولون سو جدارين عشرين سم وبعد هذي مبالغة بس ما تؤثر في التصميم

بعدين للكهرباء افضل توزيع بيكون على بيتين .. والمفروض البلدية فيها ناس متمكنين يشرحون للمراجع الحلول قبل كانوا هذي طريقتهم

[معماري قطري]

صحيح كلامك اخوي ( riku3 )

هذا نفس كلام مفتشين البلدية يقولون لي ماعندهم مشكلة اهم شي الابعاد والارتداد حسب الخريطة .

مسئلة الارتداد هذي هي صلب المشكلة

شارع تجاري طالبوا ناس بارتداد 10 أمتار والمتر له قيمة كبيرة ووافق واحد أرضه كبيرة وغيره اعترضوا وقالوا لهم التخطيط ولد عمكم وافق .. استوى عذر لهم .. وفي النهاية وبعد مطالبات أما يرتدون وياخذون تعويض أو على الحدود القديمة وافقوا على الحدود القديمة

غير عن اللعبة الكبيرة اللي تستوي حتى بعض الموظفين طلعوا بأراضي تجارية

[سعود.]

هلا بوعبدالله

الارتداد في الاراضي التجارية 10 م اعتقد قصدهم علشان موقف السيارات !!!!

[معماري قطري]

هلا بوعبدالله

الارتداد في الاراضي التجارية 10 م اعتقد قصدهم علشان موقف السيارات !!!!

لا بس فكرة لأن الناس بتبني والا قبل دكاكين وفيه مواقف واللي بيبني عمارة ممكن يطالبونه بمواقف تحت .. تحصل المهندس يشوف على الورق ويغمض عينه ويفكر ويقول ارتدوا 10 أمتار

[بوخالد911]

س
لو سمحتوا
هل مسموح بناء قبو تحت المجلس الخارجي؟؟

[معماري قطري]

س
لو سمحتوا
هل مسموح بناء قبو تحت المجلس الخارجي؟؟

حسب ما وصلني من شخص يخطط حديث مع التخطيط طالبوه بارتداد 1.5 متر في حالة بناء قبو للمجلس هذا اللي فهمته منه .. والظاهر بدون ممكن على السور

شوارع أُوروبا نمشي فيها على الرصيف ويكون القبو ممتد تحتنا وندوس على طوب زجاجي عبارة عن منور للقبو وهذا في لندن وفي ميونخ تشوف شبك حديد وتحته الدريشة مالت القبو على نفس خط السور الخارجي

[معماري قطري]

ببساطة التخطيط يبي لهم اعادة تخطيط

وينك يا سعادة وزير البلدية ( بو عبدالله ) تنتبه لهم

[معماري قطري]

شفت بيت مبني في الكويت من تدخل السيارة تبدأ بالنزول لحوش نازل تحت وتلف على شكل نص دائرية وتطلع من باب ثاني .. في وسط الدائرة مواقف وجنبها غرفة سواق في البيسمنت الحوشي .. وبين البابين اللي للدخول وللخروج باب في الوسط تدخل منه تمشي على جسر يقطع بيسمنت الحوش ويوصلك لصالة الدور الأرضي والمجالس الرسمية .. مدخل العائلة وأهل البيت تحت

لين دخلت تحت في القبو يواجهك نادي صحي وسينما منزلية وقسم ترفيه كامل وفي الوسط مفتوح متواصل لأربعة أدوار فوق .. هذي البيوت يا معود على اللهجة الكويتية .. وأرضه صغيرة لكن مستغل المساحة استغلال جيد .. هنا أول شيء بيقولونه ما يصير تفتح 3 أبواب .. وممنوع الحوش بيسمنت وممنوع تبني 3 أدوار .. ةممنوع تسوي طبيلات خاصة قرب الرصيف .. وفي البيت هذا مسوين زيادة برا

[معماري قطري]

لي صديق يبني على أرض على زاوية وأرضه كبيرة حول 4000 متر وناحسوه في فتح بابين من جهة وباب خدمات من جهة ثانية

[عايش فرحان]

حسب قوانين البلدية لازم يكون بينك و بين الجار جدارين.. جدارك و جدار بيت الجار ..
ابني المجلس على هذا الأساس في التصميم بس لا تبني الجدارين الفاصلين و خل البنيان مفتوح على بعض .. وبعدين اذا دعت الحاجة و قررت عزل البيتين تقدر تبتي الجدارين لأنك مؤسس لهم معماريا و انشائياً ..
وسلامتك ..

[سعود.]

لا بس فكرة لأن الناس بتبني والا قبل دكاكين وفيه مواقف واللي بيبني عمارة ممكن يطالبونه بمواقف تحت .. تحصل المهندس يشوف على الورق ويغمض عينه ويفكر ويقول ارتدوا 10 أمتار


شكرا لتوضيح

[سعود.]

حسب قوانين البلدية لازم يكون بينك و بين الجار جدارين.. جدارك و جدار بيت الجار ..
ابني المجلس على هذا الأساس في التصميم بس لا تبني الجدارين الفاصلين و خل البنيان مفتوح على بعض .. وبعدين اذا دعت الحاجة و قررت عزل البيتين تقدر تبتي الجدارين لأنك مؤسس لهم معماريا و انشائياً ..
وسلامتك ..

شكرا لك .

[معماري قطري]

من يومين نتكلم في الموضوع واثنين إخوان ناويين يبنون مجلس بينهم وقلت لهم عن النقاش اللي صار

[سعود.]

المشكلة كل بلدية لها رأي .

اذا هم غير بلدية ام صلال اتوقع بتمشي امورهم .

[معماري قطري]

المشكلة كل بلدية لها رأي .

اذا هم غير بلدية ام صلال اتوقع بتمشي امورهم .

لا هم أفضل الريان

[سعود.]

لا هم أفضل الريان



اذا هم افضل من الريان
كان الله في عون الريان

[معماري قطري]

اذا هم افضل من الريان
كان الله في عون الريان

هم قصدي في الريان تابعين لبلدية الريان

[سعود.]

اها

فهمتك غلط
:sorry:

[شاعر المليون]

فيلا تابعة لبلدية الريان صار لها سنة واعرف اصحابها فيه جدار واحد فقط بينه وبين الجار والمجلس جاي ع نفس طوفة الجار

[شاعر المليون]

كل شيء ترى يمشي حسب مزاج المفتش الي يستلم

[شاعر المليون]

ومجلسه ع الشارع مباشرة بدون ارتداد وبدون سور امامي للمجلس ابدا الدرايش ع الشارع مباشرة لانه مسوي المجلس والمطبخ الخارجي ع نفس الطوفة يعني بالطول

[شاعر المليون]

الفيلا جديدة مسلمة في2016

[سعود.]

تسلم اخوي
ابشرك خلصت معهم .

[معماري قطري]

تسلم اخوي
ابشرك خلصت معهم .

نبي عمولة نص الشهر والمخبى فاضي

[سعود.]

نبي عمولة نص الشهر والمخبى فاضي

جزاك الله كل خير ( ابا عبدالله )

ابشر بالعموله escape
ههههههههه