شباب بغيت مساعدتكم .. بخصوص البيوت الجاهزة بورت كابين ؟؟

[راعي النيسان]

مرحبا شباب ...؟

ممكن احد يدلني على احسن مكان وارخص مكان للبيوت البورت كابين ممكن اشتري منهم ؟؟
انا سمعت في شركة تايوانية تسوي لك بيت تفصيل من مجاميعه ،، بس للاسف محد عارف عنوانهم بقطر !!! والشركة قطرية تايوانية ،، فاللي يعرف او يخبر منيه مناك ... بكون شاكر له ،،

لاني ان شاء الله نويت اشتري لي ارض في القريب العاجل ،، وإذا الله يسر الامور بارتاح من سالفة الايجارات واكون مديون للبنك وبس ولا لاصحاب العقارات :funny: :funny: ..

بنتظار ردودكم باقرب وقت ممكن ...

[مرحوم قطر]

الشيخ يعني بتعييش في بيت خشب

؟.؟

تقدر ؟.؟


وبخصوص البورتاكبن عندك شركة آل عمران

الي على دوار سوق الخميس والجمعه بس مادري كم اسعارهم

[راعي النيسان]

اخوي الغالي المثل يقول مد رجولك على قد لحافك ،،،

والله لو اضطرتني الظروف انا عادي بنام حتى بسيارتي ما عندي مشكلة ، بس المشكلة اهلي واخواني الصغار هم المسؤولية ..
اخس شقة بيومنا هذا أجارها 5000 آلاف ريال ، وارخص بيت شعبي مكسر وتنام ويمكن الطوفة أو السقف يطيح عليك وانت نايم بـ 8000 ألاف ريال ..
وفيلا اسمها فيلا أجارها من 10 ألاف وماشي فوق

ليش يالغالي ارضى بهذه الحالة ؟؟؟ البنوك مفتوحة ما اني ما احب سوالف القروض خير شر ،، اعز نفسي اشرف لي ..
المهم عندي الحين طوفة أنام جنبها انا وأهلي ومرتاح البال ،، بدل البهدلة من بيت لشقة ومن محكمة لمحكمة ،، الحمد لله لقيت موافقة من البنك علشان تمويل شراء الارض ،، الحين ندبرها بكباين وبعدها يصير خير اول ما تصير عندي فلوس راح ابني البيت اللي بخاطري ..

كل شي يبتدي بحلم ومحد يشقح السلم درجات ، كل شي خطوة خطوة ،، اليوم شريت الارض ، بكره ركبت فيها الكبين ، بعدها ابني بيت الاحلام .. والله الموفق ...

بخصوص ابن عمران اخوي اسعارهم غالية ، وشغلهم مب ذاك الزود انا بروحي شايف اعلان بالجريدة عن شركة تيوانية بقطر ولها شريك قطري ،، بس مب عارف شنو اسم الشركة ؟؟؟ يقولك يركبون لك اي شي تبيه في اقل من اسبوع ،، بديكورات احسن من الاسمنت حتى ,,

وعلى فكرة انا مب اول واحد سكن بكبينه ,, الناس كلها في دول العالم عايشة بكباين،، :D
روح اروبا وامريكا شوف بيوتهم خشب ، بس مشاء الله اول ما تشوف البيت ودك تأكله بعيونك من حلاته ،، احلى من بيوت الاسمنت بالف مرة .. وخلنا نصير مميزين شوي ،، على قولة المثل خالف تعرف هههههههههههه :nice: :nice:

[مرحوم قطر]

الله يعينك يا اخوي راعي النيسان وصدق انك مثل المفروض وايد من شبابنا يقتدون فيه

وشلي بالاجارات ارضى بالقليل لين يجيني الكثير وانشالله ابشر بسعدك انا اليوم بكلم كل

الشباب وبخليهم يسالون عن هلشركه وانشالله بنقدر انطلعها واذا ماطلعناها بنطلع شركة

تكون زينه و العصر بروح اتفرفر في طريق سلوى ادورلك

بس انا عندي لك اقتراح اشرايك تخلي البنك يشتريلك بدل الارض بيت لك ولهلك

واتم تدفع في اقصاده لين الله يكرمك وتتزوج وتاخذ ارض الحكومه وتبنيها وتنتقل للبيت

انت وهلك وبعدين اتاجر البيت الي قد شريته عن طريق البنك وتخليه يدفع قصده ابنفسه

لين مايتحرر ويصير ملك لك هذا راي وانشالله تستفيد منه وابشر بدورلك على شركه تسوي بورتاكبن

[مهاوي]

لاحول ولاقوة الا بالله اهل قطر يعيشون بيبوت خشب والاموال تروح لفلسطين وغيرها
واخرتها يقولون ليش تعترضون وليش تتكلمون؟؟

مب ولدنا الحين اولى يبنون له بيت؟؟
يالي قالوا ليشت تعترضين يامهاوي يالله يبنون لولدنا بيت
ولا بس كلام وهياط

الله لايحدك ياخوي عليهم وربي يسر امورك وتبني بيت من اروع مايكون

[راشد محمد]

اخوي الله يعينك ...انا مثل حالتك ما عندي بيت ..شكلي بسوي مثلك

[راعي النيسان]

الله يعينك يا اخوي راعي النيسان وصدق انك مثل المفروض وايد من شبابنا يقتدون فيه

وشلي بالاجارات ارضى بالقليل لين يجيني الكثير وانشالله ابشر بسعدك انا اليوم بكلم كل

الشباب وبخليهم يسالون عن هلشركه وانشالله بنقدر انطلعها واذا ماطلعناها بنطلع شركة

تكون زينه و العصر بروح اتفرفر في طريق سلوى ادورلك

بس انا عندي لك اقتراح اشرايك تخلي البنك يشتريلك بدل الارض بيت لك ولهلك

واتم تدفع في اقصاده لين الله يكرمك وتتزوج وتاخذ ارض الحكومه وتبنيها وتنتقل للبيت

انت وهلك وبعدين اتاجر البيت الي قد شريته عن طريق البنك وتخليه يدفع قصده ابنفسه

لين مايتحرر ويصير ملك لك هذا راي وانشالله تستفيد منه وابشر بدورلك على شركه تسوي بورتاكبن


مشكور اخوي ،،، على التفاعل الطيب ،، بس خبرك المادية قد الحال ،، بعدين ما ابي اورط نفسي باقساط كبيرة ،، البنك اذا شرا لي البيت جاهز اقل شي قسطه بيكون حول 8000 على عشرين سنة و 7000 ريال على 30 سنة ،،، وفي كلا الحالتين بيطير نص الراتب واكثر ،، فوق هذا البيت ما راح يكون على ذوقي اللي ابيه .. بينما لو شريت لي ارض بعيدة عن الدوحة وسعر الفوت رخيص ،، وبنيتها بورت كابين بسوي فيها الهوايل وبسعر ما ينذكر وبيكون القسط للبنك كلش كلش ما ينذكر ،، اللي بدفعه اقساط بسيطة ،، والواحد ياخوك يحسب حسبته لجدام ،، والله يسهل الامور ان شاء الله ..

انا بعد ناوي بكرة اخذ لي لفة على شوراع الصناعية ،، بكرة العصر اذا الله احيانا لين بكرة ،، وبحول الله راح احاول اطلع هذه الشركة .. ولك كل جزيل الشكر مقدما يا مروحوم قطر والله يرحم والدايك دنيا واخرة .. omen

[راعي النيسان]

اخوي الله يعينك ...انا مثل حالتك ما عندي بيت ..شكلي بسوي مثلك

والله ياطويل العمر ،، انا اقولك لو تسوي مثلي صدقني بتستانس وايد صدقني اخوي ترا ما عليك من كلام الناس لو قعدوا يقولون لك بورت كابين وخرابيط وخشب ،، اهم شي راحة البال .. وانا اعرف كذا شخص مسوين هذه الحركة والحمد لله الديكوارت اللي مسوينها في الكباين قسم بالله فنادق خمس نجوم :nice: شغل عدل ،، لو جيت تسوي هذه الديكورات بالبيت العادي كم بيطلع عليك ؟؟؟؟ كافية انه ضمان البورت الكابين العادي اللي يتفصل في الصناعية يعطونك عليه ضمان 10 سنوات ومن الشركات المشهورة يعطونك 15 سنة ،، يعني بالعربي نفس عمر بيوت الاسمنت شنو الفرق ، وعلشان يدوم وياك اكثر كل سنة اخوي اشتر لك قطويين صبغ واصبغ الكابين من برع وبكذيه تحافظ علية اكثر واكثر ، ثاني شي لاتنسى انت اليوم بتشتري الارض بسعر رخيص ، وبعد 10 سنوات الارض سعرها راح يرتفع اضعاف اضعاف ،، بذاك الوقت تقدر تبيعها وتشتري لك البيت اللي بخاطرك ، او ممكن تبيع نصها لو كانت الارض كبيرة ، وبفلوسها تبني البيت اللي بخاطرك ،،

توكل على الله وصدقني ما راح تندم ،، الحسبة وايد سهلة سهلة ،، وبعيدة عن التكلفة .. ولو تبي مشورتي راسلني على الخاص وانا عندي لك كذا اقتراح لاني دارس الموضوع عدل من مجاميعه ...

[راعي النيسان]

اخوي راشد ارسلت لك رسالة خاصة :nice:

[أم فهد]

لو سمحتوا احد يدليني علي شركة تسوي بورت كباين تكون جيدة في السعر والصنع و؟؟؟؟؟؟

[moon15]

والله ياطويل العمر ،، انا اقولك لو تسوي مثلي صدقني بتستانس وايد صدقني اخوي ترا ما عليك من كلام الناس لو قعدوا يقولون لك بورت كابين وخرابيط وخشب ،، اهم شي راحة البال .. وانا اعرف كذا شخص مسوين هذه الحركة والحمد لله الديكوارت اللي مسوينها في الكباين قسم بالله فنادق خمس نجوم :nice: شغل عدل ،، لو جيت تسوي هذه الديكورات بالبيت العادي كم بيطلع عليك ؟؟؟؟ كافية انه ضمان البورت الكابين العادي اللي يتفصل في الصناعية يعطونك عليه ضمان 10 سنوات ومن الشركات المشهورة يعطونك 15 سنة ،، يعني بالعربي نفس عمر بيوت الاسمنت شنو الفرق ، وعلشان يدوم وياك اكثر كل سنة اخوي اشتر لك قطويين صبغ واصبغ الكابين من برع وبكذيه تحافظ علية اكثر واكثر ، ثاني شي لاتنسى انت اليوم بتشتري الارض بسعر رخيص ، وبعد 10 سنوات الارض سعرها راح يرتفع اضعاف اضعاف ،، بذاك الوقت تقدر تبيعها وتشتري لك البيت اللي بخاطرك ، او ممكن تبيع نصها لو كانت الارض كبيرة ، وبفلوسها تبني البيت اللي بخاطرك ،،

توكل على الله وصدقني ما راح تندم ،، الحسبة وايد سهلة سهلة ،، وبعيدة عن التكلفة .. ولو تبي مشورتي راسلني على الخاص وانا عندي لك كذا اقتراح لاني دارس الموضوع عدل من مجاميعه ...

اخوي راعي النيسان فكرة حلوة والله ايوفقك فيها وترى كلام الناس وايد لكن قول للي يتكلمون تعالو دفعو عني قسط الشهر او تعالو وفرو لي مسكن كريم بايجار معقول بتحصلهم كلهم يتهربون منك اخوي اانا وزوجي انمر ابمثل اظروفك ويمكن اسواء وطلعت لنا ارض من الحكومة معا انه زوجي امقدم عندهم من سنة 1998 والارض من كم شهر استلمنا عقدها بس شروطهم وايد ولفتهم بتطول واقل شي يبي لنا سنتين عشان نبني وفكرتك كانت نفس فكرة زوجي بس مساحة بيت اهلة ماتساعد انسوي هالفكرة .... هالفكرة جدا ممتازة ومب انت اول ولا اخر واحد وايد قطرين ساكنين بورت كبن ومستورين واقل شي بقولك شي بعد البورت كبن لو انت بنيت مسكنك الحكومي ان شاءالله ماراح تخسر لانة باعلان في اي جريدة للبيع بورت كبن راح يشترونة منك ويمكن ابنفس سعر الشراء او قريب منة وماخسرت قيمتة انا الصراحة مو مستغربة من الفكرة لانة انا زوجي خذاني معاه في سيارتة ورواني كم ملحق وكم ارض عليهم نفس البورت كبن الا درجة ماصدقتة قلت له هذا مو بورت كبن هذا بيوت عادية قالي مافي فرق بينهم اصلا وعلى فكرة يعطونك ضمان اقل شي 5 سنوات ضد العوامل الجوية اعتقد وضد التلف والصبغ و خمس سنين ان شاءالله اتكون انحلت مشكلتك وولله اعرف وايد صديقات متزوجات من فترة قريبة وساكنين في بورت كبن في ملاحق جانبية في بيوت اهالي ازواجهم وبالعكس وايد سعيدين خاصة انهم مرتاحين من هم الايجار ومشاكلة وبعد مايطلعون في بيوتهم الخاصة الحكومية يقدرون اهل الزوج استغلال الملحق وتاجيره والاستفادة منة والفكرة والله ممتازة وتوكل على الله والله ايوفقك

[ANONYMOUS]

خطوه جريئه اخوي.. والله يوفقك...


انا يوم كنت برا.. كنت ساكن في بيوت خشب مال الانقليز.. والله ولا اروع.. لا وابشرك.. بدون حوش.. وكنت اطلع بوزاري ولا الروب اشرب الكوفي في الفرونت يارد.. لا ومرات اغسل السياره في هالحوش.. اللي مافي طوف.. ونصب بترول لانفسنا.. لاحد يقول انت ولد من.. ولا كم معاشك..

مافي عقد .. اهم شي راحة البال..

[ابوالغالية78]

ياخوي هذي الفكرة قاعدة تحوس براسي من سنة بس ابي اللي يشجعني وابي منك لو عرفت التفاصيل تقولي كم بكلف ومواصفات البورت كابن والاهم الارض بكم ووين لاجل اخذلي وحده حذاك ويمكن عقبها يصير مجمع
انتظر ردك

[cola]

مرحبا شباب ...؟

ممكن احد يدلني على احسن مكان وارخص مكان للبيوت البورت كابين ممكن اشتري منهم ؟؟
انا سمعت في شركة تايوانية تسوي لك بيت تفصيل من مجاميعه ،، بس للاسف محد عارف عنوانهم بقطر !!! والشركة قطرية تايوانية ،، فاللي يعرف او يخبر منيه مناك ... بكون شاكر له ،،

لاني ان شاء الله نويت اشتري لي ارض في القريب العاجل ،، وإذا الله يسر الامور بارتاح من سالفة الايجارات واكون مديون للبنك وبس ولا لاصحاب العقارات :funny: :funny: ..

بنتظار ردودكم باقرب وقت ممكن ...\

السلام عليكم....تفضل هالشركه يمكن اللي تبيها...هي تسوي البيوت من حديد اعتقد

STEEL HOUSE
التلفون:5545388 - 4500882
شارع سلوى -بناية رتاج المكتب رقم 118 المدخل A1

اتمني يااخوي افيدك والله يوفقك.