انطباعاتكم وملاحظاتكم عن مول قطر ؟ ؟ ؟ ؟

[مستثمر رشيد]

بسم الله الرحمن الرحيم

الحمد لله سنحت لي الفرصة عصر اليوم لزيارة مول قطر وبصراحة وبصورة عامة يعتبر من أحدث وأرقى المجمعات التجارية على مستوى قطر من ناحية الحجم والفخامة وهو يشابه نوعا ما مجمع الافنيوز في الكويت حيث يمتاز بكبر حجم ممراته وأكثر ما أعجبني بالمجمع هو ساحة المطاعم مع تعدد أسماء تلك المطاعم والعديد منها يتواجد للمرة الأولى في قطر .....

ملاحظة بسيطة بشأن الشوارع المحيطة بالمجمع حيث أن المنطقة تعتبر حديثة وبحاجة إلى لوحات إرشادية كافية بشأن المداخل والمخارج ...

[بانغ بانغ]

يبغيلنا شهر لين انجربه عقب ماتخف الزحمة

عطنا انطباعك عن التمشاية داخل سهلة او صعبة او زحمة

[مستثمر رشيد]

يبغيلنا شهر لين انجربه عقب ماتخف الزحمة

عطنا انطباعك عن التمشاية داخل سهلة او صعبة او زحمة

بالعكس اخوي المول بالداخل كبير وواسع واضاءته ممتازة مع وجود نوافير ومجسمات في الممرات .... اليوم كان زحمة خاصة في ساحة المطاعم .... أتصور وقت الصباح يعتبر مثالي لزيارة المول واستكشاف كامل مرافقه

[بانغ بانغ]

الله يسر لهم وزين سووه بعيد وهاي احسن تحطيط

[رجل الجزيرة]

الله يسر لهم وزين سووه بعيد وهاي احسن تحطيط

أكيد أحسن عشلانه بيكون بعيد عن الزحمة وفي وسط قطر فإمكان أي واحد من الشرق أو الشمال أو الغرب أو الجنوب يقدر يمر عليه وهذا هو الصح وبعد فترة بتقوم حوالينه بيوت كثير لين تكون مدينة.

[دايموند]

وين موقع مول قطر بالضبط؟

[معماري قطري]

مكان ملعب نادي الريان

[م. عبدالعزيز]

ممتاز المول ، ممتاز جدا

الموقع بعيد عن الزحمه
مداخل المول من الهاي واي جسر مباشرة للمواقف
المواقف متوفرة بكثرة على الرغم من الزحمه
المحلات متنوعة
مختلف عن باقي المولات نوعا ما ارقى وعالمي
فيه فندق ملاصق له وهي فكرة جميله مشابهه لفكرة فندق الادرس في دبي مول، بس ما سمح لي الوقت ازوره

العيب الوحيد هي الزحمه على طريق الريان والتحويلات المزعجه ، اتوقع بعد انتهاء اعمال طريق الريان بتكون الروحه له سهلة

اقترح بعمل مولات مثلها بفنادقها في المناطق الجنوبية والمناطق الشمالية

[R 7 A L]

موقعه بحد ذاته افضل شي
حتى لو انه بعيد الا انه يكفيك شر الزحمة

[بوخالد911]

اليوم رحته

من الريان
ولكن مشكلة كثرة التحويلات مناك

انصح الكل يجون من شارع 22 فبراير وانت رايح جسر ايكيا
اخذ الجسر اللي قبله
مخرج شارع الرفاع

هذا أفضل طريق

المول صج فخم وكبيررررررررررررررررر
ويستاهل الزيارة
وفيه ماركات لأول مرة أشوفها.

[monatee]

المول 10/10

لكن الشارع المؤدي له 0/10

[جراسا]

ما احب اروح اي مكان،الا بعد افتتاحه بشهر عالاقل،حتى الواحد يقدر يقيمه،لانه الافتتاح التجريبي تحس كل شي مو مضبوط

[بوخالد911]

نص المطاعم ما جاهزة تماماً.
البعض فاتح والبعض ما كمل تجهيزاته.

[Rider]

ليش متى فتحوه والله ماعندي خبر الا منكم

[المحاميه]

مارحت
وماعرف التفاضيل
واللي اعرفه ان فيه محلات للحين مافتحت
وشكل المجمع حلو، شفته فالتلفزيون

لكن اتمنى ان تكون فيه بعض الماركات :)

[المحاميه]

ليش متى فتحوه والله ماعندي خبر الا منكم

البارحه
افتتاح مبدئي


المفروض مايسون اعلان
مانبي زحمه :eek2:

[دايموند]

مكان ملعب نادي الريان

ووين مكانه هالملعب:playball:


ياخي حطوا لنا الخارطه

[ضوى]

إن شاء الله على تاريخ 16 ، 17 ، 18 يكون جاهز تماما مخططه عليه

[ضوى]

ووين مكانه هالملعب:playball:


ياخي حطوا لنا الخارطه

دايموند لو سمحتي خليج في مول الخور :nono:

[FCB 123]

جربنا مطعم جديد اول مره في قطر
ميني برجر ب 45 ريال ... هذا أرخص شي عندهم
ف تخيل كم برجر تبغي ؟؟؟؟؟

طبعا هذا السعر بدون مشروب أو بطاطس

[Rider]

ووين مكانه هالملعب:playball:


ياخي حطوا لنا الخارطه

مايبغي خريطة اختي كانج رايحه صوب قصر الوجبه بعد ماتعرفينه من الاخر الطريق الي يروح صوب الشحانية المول على يمين وقرب قاعات الافراح

[دايموند]

مايبغي خريطة اختي كانج رايحه صوب قصر الوجبه بعد ماتعرفينه من الاخر الطريق الي يروح صوب الشحانية المول على يمين وقرب قاعات الافراح

انزين لا تصارخ :no:

شكرا لك

[بومحمد المطاوعه]

الله يخلي قوقل ماب ,,

اكتبو اي شي تبونه بيدليكم مايبيلها عوار راس

[بوحارب]

المجمع قريب من بيتي بس مب رايح له الا عقب اسبوعين او ثلاثه

لين تخف الزحمه وتفتح باقي المحلات


بس امس مريت من صوبه اشوف المداخل والمخارج وكانت جيده نوعا ما بس نحتاج لوحات ارشادية اكثر

[الحياة الخالدة]

كأني سمعت أن مول الحزم بعد فتح
حد عنده خبر ؟؟

[الشمالي111]

كأني سمعت أن مول الحزم بعد فتح
حد عنده خبر ؟؟

سمعت نفس الكلام

[رجل الجزيرة]

ووين مكانه هالملعب:playball:


ياخي حطوا لنا الخارطه

تفضلي:


https://www.google.com.qa/maps/place/%D9%82%D8%B7%D8%B1+%D9%85%D9%88%D9%84%E2%80%AD/@25.3261731,51.3677304,14.31z/data=!4m5!3m4!1s0x3e45df7f7747ac75:0x16afba20261f7 9e8!8m2!3d25.3269886!4d51.3499153?hl=ar

[معماري قطري]

ما شاء الله مول ب 4.5 مليار خلص قبل لتخلص تحويلات إيش قال .. ودوم المشاريع الخاصة تخلص قبل الشوارع عندنا والشوارع حتى لافتات للمشروع لو خلصوا حوله تكون مفقودة .. غير عن الأكوام كل جهة والرصيف المكسر وباقي الشغل اللي حول 5% وياخذ سنة بعد الافتتاح

كم مول في شارع النصر قاربوا على الإفتتاح والشوارع ما زخوها منتهية من بداية عمران هذي المنطقة

ما ادري اقول Wake Up Ashgaal والا انطرهم يعدلون بيتهم قبل ليعدلون الشوارع

[معماري قطري]

جربنا مطعم جديد اول مره في قطر
ميني برجر ب 45 ريال ... هذا أرخص شي عندهم
ف تخيل كم برجر تبغي ؟؟؟؟؟

طبعا هذا السعر بدون مشروب أو بطاطس

مثل ما يقولون صغير وشرير

[خوي الدرب]

أين موقع مول قطر ؟

[الحياة الخالدة]

تفضلي:


https://www.google.com.qa/maps/place/%D9%82%D8%B7%D8%B1+%D9%85%D9%88%D9%84%E2%80%AD/@25.3261731,51.3677304,14.31z/data=!4m5!3m4!1s0x3e45df7f7747ac75:0x16afba20261f7 9e8!8m2!3d25.3269886!4d51.3499153?hl=ar


أين موقع مول قطر ؟

أخونا رجل الجزيرة حط الموقع جزاه الله خير

[امل الحياه]

احلى شي في مول قطر انه فتح مطعم البتيل وتابع له تمور البتيل ممتاز

[قطريه ماركه]

متى بيفتحون شانيل خلاص لاعت جبدنا يوم خاطرنا ف شي لازم من دبي و الا اوروبا

نبيه هني عندنا من قريب

و بعد نبي فايف قايز و ان ان اوت برغر و جاك ان ذا بوكس :eek3:

[Bo jassim 33]

متى بيفتحون شانيل خلاص لاعت جبدنا يوم خاطرنا ف شي لازم من دبي و الا اوروبا

نبيه هني عندنا من قريب

و بعد نبي فايف قايز و ان ان اوت برغر و جاك ان ذا بوكس :eek3:


شنو ذي بعد ان ام ار اس بي مادري شنو ؟؟

اكل يعني ولا عطورات

[معماري قطري]

متى بيفتحون شانيل خلاص لاعت جبدنا يوم خاطرنا ف شي لازم من دبي و الا اوروبا

نبيه هني عندنا من قريب

و بعد نبي فايف قايز و ان ان اوت برغر و جاك ان ذا بوكس :eek3:

جاك إن ذا بوكس نكتة .. انا خاطري في رد ريبون وخصوصاً سندويش صدر الدجاج المشوي مع الأناناس عذابي

[بوحارب]

كأني سمعت أن مول الحزم بعد فتح
حد عنده خبر ؟؟

لا

غير صحيح

وموعديني ببطاقة حضور الأفتتاح + خصومات على محلات الحزم

[بوحارب]

باقي مول بوابة الشمال في ازغوى وطوار مول في الدحيل والحزم مول بين المرخية الودفنة

وعقب بنشوف اسعار معقوله في ايجار المحلات ان شاء الله

والحين سمحوا للتجارة المنزلية وسوو لها رخص

يعني الأمور طيبة للجميع

[tawareq]

رحت امس مع العائلة المكان كبير ووايد حلو بالذات الجلسه في الدور الارضي ( المطاعم ) الصراحة روعه
العيب الوحيد اني ضيعت بوابة الدخول مع اني كنت حافظه مثال ( gate 2 ) في الشرقي وفيه الغربي فلازم تحفظ اي بوابه انت داخل منه
ويبيله وقت لين تحفظ المكان عدل

وشكرا

[راجي الْعفو]

لا

غير صحيح

وموعديني ببطاقة حضور الأفتتاح + خصومات على محلات الحزم

عجيب ^_^

انزين خدوني معاكو ^_^

[بوحارب]

عجيب ^_^

انزين خدوني معاكو ^_^

مثل هالدعوات تطلع للناس ال vvvip بس :(

بس مب مشكلة بحاول اشوف لك دعوة

[الحياة الخالدة]

لا

غير صحيح

وموعديني ببطاقة حضور الأفتتاح + خصومات على محلات الحزم

خلك انت .. تم الافتتاح و الطيور طارت بارزاقها
وانت اقعد انطر اللي مواعدك بالبطاقة

[بوخالد911]

أين موقع مول قطر ؟

شووف ردي فووق

[pink pearl]

الحين فتحوا الحزم ولا لا؟


ضيعتونا ><

[بوخالد911]

الحين فتحوا الحزم ولا لا؟


ضيعتونا ><

لا

للحيين.

[رجل مثالي]

بدأت الدوحة في بناء أكبر مركز تسوق بقطر على مساحة تعادل مساحة خمسين ملعب كرة قدم لخدمة جمهور بطولة كأس العالم في عام 2022، حيث يتوقع أن يستقبل عشرين مليون متسوق سنويا.
وقالت شركة "أورباكون للتجارة والمقاولات" التي تقوم بإنشاء وتطوير وتصميم مشروع "قطر مول" إن المركز التجاري سيكون مركز التسوق الرئيسي لجمهور كأس العالم لكونه يقع بجوار الملعب الرئيس الذي ستجرى فيه منافسات مونديال عام 2022 في الدوحة.
وذكرت الشركة في بيان اليوم السبت أن المركز التجاري يقام في منطقة نادي الريان الرياضي، ومن المقرر الانتهاء من الأعمال الإنشائية في المشروع وافتتاحه في الربع الثالث من العام المقبل.
وقال رئيس مجلس إدارة شركة "أورباكون" معتز الخياط إن المركز التجاري سيكون مركزا كبيرا للتسوق ليجذب السياح والمقيمين بقطر، فضلا عن الجمهور الذي سيحضر مباريات كأس العالم، إذ سيضم أكثر من أربعمائة متجر ومنصات للماركات العالمية وفندقا فخما (خمس نجوم) ومراكز للتسلية وتذوق الطعام.
وأضاف أن المركز التجاري سيضم مركزا للسينما يحوي 19 شاشة من ضمنها أول شاشة ليزر بقطر وست شاشات للشخصيات الهامة، وأكثر من ثلاثة آلاف مقعد لصالات العرض السينمائي وعشر ممرات لأزقة لعبة البولينج.

[الماريّة]

تكفووون اذا بتروحون له
روحوا من صوب الريان اسهل لكم واجد واقرب


لحد يجي من صوب خط الرفاع ززززززحمه
خصوصا الحين مع عرضات القبايل

المهم سمعوا كلامي ^_^

[الحياة الخالدة]

هههههههههههه
شكراً على التنبيه يالمارية

[qatari911]

بدأت الدوحة في بناء أكبر مركز تسوق بقطر على مساحة تعادل مساحة خمسين ملعب كرة قدم لخدمة جمهور بطولة كأس العالم في عام 2022، حيث يتوقع أن يستقبل عشرين مليون متسوق سنويا.
وقالت شركة "أورباكون للتجارة والمقاولات" التي تقوم بإنشاء وتطوير وتصميم مشروع "قطر مول" إن المركز التجاري سيكون مركز التسوق الرئيسي لجمهور كأس العالم لكونه يقع بجوار الملعب الرئيس الذي ستجرى فيه منافسات مونديال عام 2022 في الدوحة.
وذكرت الشركة في بيان اليوم السبت أن المركز التجاري يقام في منطقة نادي الريان الرياضي، ومن المقرر الانتهاء من الأعمال الإنشائية في المشروع وافتتاحه في الربع الثالث من العام المقبل.
وقال رئيس مجلس إدارة شركة "أورباكون" معتز الخياط إن المركز التجاري سيكون مركزا كبيرا للتسوق ليجذب السياح والمقيمين بقطر، فضلا عن الجمهور الذي سيحضر مباريات كأس العالم، إذ سيضم أكثر من أربعمائة متجر ومنصات للماركات العالمية وفندقا فخما (خمس نجوم) ومراكز للتسلية وتذوق الطعام.
وأضاف أن المركز التجاري سيضم مركزا للسينما يحوي 19 شاشة من ضمنها أول شاشة ليزر بقطر وست شاشات للشخصيات الهامة، وأكثر من ثلاثة آلاف مقعد لصالات العرض السينمائي وعشر ممرات لأزقة لعبة البولينج.

احنا الحين 2000000 وزحمه وشلل مروري
العشرين مليون كيف الوضع بيكون ؟؟!!

يا هالكاس 2022 الي ذبحونا فيه
ينسحبون ويطورون على راحتهم

[بوحارب]

خلك انت .. تم الافتتاح و الطيور طارت بارزاقها
وانت اقعد انطر اللي مواعدك بالبطاقة
تراهنين على 5000 ريال اذا تم الأفتتاح او لا !!



تكفووون اذا بتروحون له
روحوا من صوب الريان اسهل لكم واجد واقرب


لحد يجي من صوب خط الرفاع ززززززحمه
خصوصا الحين مع عرضات القبايل

المهم سمعوا كلامي ^_^

غلطانة ليش تبين الناس تتوهق من صوب الريان

بالعكس خط الرفاع فاضي واسهل بواجد للوصول الى المول

بس ماتبي حد يدش من صوب فريجهم :(

[الحياة الخالدة]

تراهنين على 5000 ريال اذا تم الأفتتاح او لا !!




غلطانة ليش تبين الناس تتوهق من صوب الريان

بالعكس خط الرفاع فاضي واسهل بواجد للوصول الى المول

بس ماتبي حد يدش من صوب فريجهم :(
الرهان حرام
خلاص لين فتحوا علمنا يالخبير
أدري به راعي المول من ربعك

[الماريّة]

تراهنين على 5000 ريال اذا تم الأفتتاح او لا !!




غلطانة ليش تبين الناس تتوهق من صوب الريان

بالعكس خط الرفاع فاضي واسهل بواجد للوصول الى المول

بس ماتبي حد يدش من صوب فريجهم :(

ياخي مانبي زححححمه
خلهم يروحون مناك :waiting:

[بوحارب]

الرهان حرام
خلاص لين فتحوا علمنا يالخبير
أدري به راعي المول من ربعك
عبالي بعد هههههه

مب رفيجي بس المعلومات توصلني من المكتب الرئيسي ^_*




ياخي مانبي زححححمه
خلهم يروحون مناك :waiting:

الزحمه بتشوفينها تاريخ 17/18 :(:(

[بوخالد911]

تكفووون اذا بتروحون له
روحوا من صوب الريان اسهل لكم واجد واقرب


لحد يجي من صوب خط الرفاع ززززززحمه
خصوصا الحين مع عرضات القبايل

المهم سمعوا كلامي ^_^

كلام ××××

انا جربت من صوب الريان
وندمت

أنصح من شارع الرفاع
وبسسسسسسسسسسسسسسسسسسسسسسسسسسسسسسسسسسسسسسسسسسسسس.

[وحيد-الشوق]

احنا الحين 2000000 وزحمه وشلل مروري
العشرين مليون كيف الوضع بيكون ؟؟!!

يا هالكاس 2022 الي ذبحونا فيه
ينسحبون ويطورون على راحتهم

هههههههههههههههه عالجرح والله

[بوحارب]

كلام ××××

انا جربت من صوب الريان
وندمت

أنصح من شارع الرفاع
وبسسسسسسسسسسسسسسسسسسسسسسسسسسسسسسسسسسسسسسسسسسسسس.

ياويلك لو تمر من خط الرفاع

بقلبك

[بو سالم]

فاستيفال سيتي اكبر منه ب30% على أقل تقدير

[Bo jassim 33]

الوعد هناك اليوم

[ماجد البدر]

كالعادة سمعت ان فيه اكبر سينما في الشرق الاوسط
كل شي يسوونه اكبر شي في الشرق الاوسط

[المبرمج صلاح]

طريق الريان بيكون افضل واسرع بعد عام 2018 لانهم بيكونو خلصو طريق
الريان السريع الجديد مع الجسور و الانفاق

اما حاليا كما قالو الاخوان بوخالد و بو حارب الافضل هو شارع الرفاع

[فيصل99]

شكرا ع نقل تجربتك لنا اخوي

[tawareq]

رحت يوم الاحد ( اليوم الوطني )
للاسف كل عمال الصناعية في المول ( زحمة على الفاضي)

[دايموند]

قعدنا عشرين دقيقه ندور مواقف ودخلت ربع ساعه يوم الجمعه وطلعت زحمه لا تطاااااق واغلبها الجاليه الاسيوية

[الشمالي111]

عادي وزحمه على الفاضي وكل عمال الشركات هناك وكلن ماسك تلفونه ويصور يعني عادي يمرر التلفون من قدام وجهك ولا يفتكر

[khaldoon]

رحت اليوم الوطني و يا ريت ما رحت....اول شي الروحه على جوجل سهله وما تتوه.....

الرجعه على جوجل جننتني....جوجل يرسم الخط للدوحه و الطريق كله تحويلات و مقفل و تميت عشرين دقيقه الف حولين المول و ادخل و اطلع و مب عارف اخرج من محيطه ....جوجل ما نفعني مع التحويلات

كل شي شوفته لا يتناسب مع المكان....يعني عدد المواقف اقل بكثير من حاجة المول.... لهالسبب زحمة جدا المواقف

مكان الطعام و طاولته اقل بكثير من عدد الناس يعني ما في مكان نقعد ناكل و اصلا مستوى الطاولات مب شي بالنسبه لمكان جديد


قولنا نروح مطاعم لها طاولاتها الخاصه و ناكل فيها لقينا طاولاتها بعد اقل من العدد المطلوب و انتظر اربعين دقيقه...طلعت من المول

زحمة وايد....ما انبسطت بالمكان ولا شوفت شي مبهر ولا افكار جديده....اللهم موقف الباصات بس

[معماري قطري]

ما فيه مشروع عندنا يفتتح مكتمل بدون سلبيات للأسف

4500 مليون ريال وهذي السلبيات التافهة المفروض ما يجتمعون

[شيخ الديرة]

ما فيه مشروع عندنا يفتتح مكتمل بدون سلبيات للأسف

4500 مليون ريال وهذي السلبيات التافهة المفروض ما يجتمعون

يتأخرون بالتنفيذ ويستعجلون بالافتتاح

[Rider]

الحمد لله اني مب من رواد المجمعات التجارية ولا افكر أجيه اذا الستي من يوم فتح دخلته يمكن 3 مرات

[دايموند]

والله لو ييسوون يوم للعوائل السبت او الجمعه بتكون فكرة ممتازة

[الحياة الخالدة]

رحت يوم الاحد ( اليوم الوطني )
للاسف كل عمال الصناعية في المول ( زحمة على الفاضي)

والكل قاعد عند النافورة يصور
واللي ينتف أوراق الشجر .. تقول أول مرة في حياتهم يشوفون شجر

[بوخالد911]

ياويلك لو تمر من خط الرفاع

بقلبك

اووك

انت بس لا تنخش
تعاااال قدااااام

[سوبر]

بعد من ضمن الملاحظات على المول هو صغر حجم المسجد . مول بهذا الحجم المفروض يكون في كل زاوية من زوايا المول مسجدين واحد للرجال واخر للنساء . والمول بشكل عام اعتبره جيد

[ابوالعبد]

بصراحه ماكان انطباعي انه مول قطر بيكون تصميمه من داخل عادي كنه دايما نسمع مول ضخم وكبير لكن صراحه ديكوراته داخليه جدا جدا عاديه يعني كانك في ستي سنتر كنت افضله يكون مثل فلاجيو واحلى. ننتظر مول الحزم الي بالدفنه يقلون انه روووعه

[مــاي ورد]

ماحب فيلاجيو

عجبني الشكل الداخلي و الاشجار بس ماعجبني التقليد في بعض الاشياء حق دبي موول

لكن ككل وايد حلوو و شرح تقريبا كاني في دبي موول

[معماري قطري]

قبل كان في فلوريدا وما زال مول عجيب وكبير بس ألحين تغير شوي واخترب نظامه

اسمه sawgrass mills وفي منطقة ينتشر فيها عشب طويل مثل المنشار فيه ابر .. يبعد 3 ساعات عن ميامي ويجونه سياح من كل العالم .. والمول كبير جداً ودور أرضي على شكل تمساح عملاق يدخلون داخله المتسوقون .. وميزة مهمة فيه أي محل يفلس وعليه حكم قضائي ينقل بضاعته له وتنباع بحدود 50% أرخص من المحلات الباقية .. عرباته فيها كرسي جدام وورا سلة والكرسي يجلس عليه شخص بالغ عادي لأن لازم بيتعب

[بنت شرق]

مول جميل وواسع، الطريق من قاعة الرفاع حلو وخالي تقريبا ، عجبنا تنوع الخيارات والمطاعم فيه ، عجبنا أن هل السعودية والامارات يتواجدون
فيه ، الاسعار لك عليها شوي ، و بشكل عام مكان يستحق تكرار الزيارة

[PathFinder]

لم يلفت انتباهي سوى النفق العجيب والطويل عند الخروج. حسيت نفسي غراندايزر

[لقمان]

العيب الشرعى الى فى المول مادرى ليش ما بنو مسجد برع من السوق قريب من المواقف من المفروض يبنو مسجد جامع لانه المسجد واجد صغير كل فرض ممكن تكون هناك الكثر من جماعة ويصلون مع بعض لضيق المسجد الى موجود حاليا

[الزعفراني]

المول حلو .. بس توقعت في مرافق وفعاليات أكثر من مجرد محلات .. ( عدد المحلات 500 محل ) .. الله يعينهم على كش الذبان الايام الجاية ..

عيب المول .. مافيه كراسي استراحة في الممرات نفس لاند مارك وجلف مول :waiting: .. يعني اللي يتعب من المشي او يبي ينطر هله برا المحل ماراح يلقى كراسي

من عيوبهم بعد الابلكيشن مالهم ع الايفون أحس مضروب .. نزلته وحاولت ابحث عشان اعرف الاماكن والاتجاهات .. ماضبط معاي .. ولا فيه نسخة بالعربي ..

بعد من العيوب - قريت هالملاحظة في تويتر - يعرضون صور ومقاطع يقولون تخدش الحياء في بعض الشاشات هناك سواء صور او فيديو ..

بعد من العيوب تجمع الناس في الدور الثاني لمتابعة العروض البهلوانية والاستعراضية في المسرح .. في جهة المطاعم والكوفيهات اللي هناك .. المفروض يمنعون حد ما عدى زباين هالمطاعم ... لكن الباقيين يقدرون من الجهة الثانية يتابعون هالعروض مافي مشاكل ..

واتمنى تخصيص يوم في الاسبوع ع الاقل للعائلات ( مش متأكد إذا في يوم مخصص للعائلات والا لا ) ..

وبس والله

[بوحارب]

مكان المسجد غلط المفروض ما يكون بين المطاعم

ومادري اذا فيه مسجد ثاني في المول ياريت حد يفيدنا

[فارس قطر]

انا والله عجبني موقعة بعيد عن الزحمة ودوخة الراس

[يمامـة]

انتظروني اذا رحته بقول لكم رايي بكل وضوح ان شاء الله..

[بوخالد911]

قلة انتشار أجهزة الصراف الآلي.

[بوخالد911]

لم يلفت انتباهي سوى النفق العجيب والطويل عند الخروج. حسيت نفسي غراندايزر

وووين مكانه بالضبط؟

[بوخالد911]

بعد من ضمن الملاحظات على المول هو صغر حجم المسجد . مول بهذا الحجم المفروض يكون في كل زاوية من زوايا المول مسجدين واحد للرجال واخر للنساء . والمول بشكل عام اعتبره جيد


العيب الشرعى الى فى المول مادرى ليش ما بنو مسجد برع من السوق قريب من المواقف من المفروض يبنو مسجد جامع لانه المسجد واجد صغير كل فرض ممكن تكون هناك الكثر من جماعة ويصلون مع بعض لضيق المسجد الى موجود حاليا

للأسف
معظم إدارات المولات لا تفكر جديا بالمسجد

همهم الأكبر تأجير المحلات.

[الشفق الحالم]

المول مش سيفتي ابدا للاطفال، اللي عنده اطفال بيفهم قصدي يعني اذا معاك اطفال لازم تمسكهم بيدك وماتخلي عينك تغيب عنهم لحظه وذلك لعدة نقاط ؛
السيكيورتي عددهم مش كافي ومب متواجدين عند الالعاب بكثره ولا عند السور بالطابق الثاني
السور بالطابق الثاني جدااا منخفض يعني ولدي بو اربع سنين اذا بيطل من السور يوصل لين كتفه وهذا شي خطير وخصوصا مع غياب رجال الامن
الالعاب تخوف كبيره وماتناسب الاعمار الصغيره وهالنفق اللي يودي لها ماله لازمه لو بعيد الشر صار حريق اشلون بيطلعون العالم من الالعاب الطابق الثاني وبسرعه!