الافادة بخصوص الشحن من ارامكس

[tawareq]

استفسار يا شباب خذتلي دواسات رنج فوج من موقع epay سعر القطعه 880 ريال على انه الشحن مجانا لكن انصدمت من ارامكس ضاربين علي 2200 ريال قيمة الشحن

طيب شالحل اذا ابي ارجع القطعه او احاجج ارامكس ان الشحن مجانا من الموقع

افيدونا

[سليمان احمد]

ياخويي ارامكس عندها الوزن الكيلو تقريبا ب 85 ريال اذا ماني غلطان
فانت المفترض تتاكد من الوزن قبل تشتري ويكون موضح في تفاصيل السلعه
وتكون مكتوبه
انا العام طلبت لي قطعه وطلعت ب 1800 والقطعه كانت سعرها مايتعدى ربع المبلغ
فرفضت وقالو لي عندك خيارين انك تستلمها او انه نرجعها للبائع لكن بيتسكر حسابك
ويوم شافوني رفضت قالو عندك خيار انه نرجعها لامريكا لعنوان شخص في امريكا
اخر شي دفعت مجبر
الحل انك ماتجيب شي ثقيل في المرات الجايه
ومالك الا تستلمها
وبالنسبه لمحاججه ارامكس ما بيفيدك لان الشحن المجاني اللي يكتبه البايع
يقصد الشحن مجاني داخل امريكا
ف صعبه تحاججهم استلم وادفع والله يعوضك

[monatee]

انت وين قريت الشحن مجانا؟

وشحنتها دايركت قطر من التاجر نفسه ؟ ولا على بريدك هناك ؟

اذا من التاجر نفسه وعنده شحن دولي مجانا .. ( معني استبعد هالنقطه ) ف مايحق ل ارمكس تطلب منك اي مبلغ

لكن اذا شحن من داخل البلد الموجوده فيه البضاعه .. وبعدين حولتها على بريدك في اراميكس ( اتوقع هذا الي صار )
طبيعي اراميكس بتاخذ منك شحن لما بتوصله لك قطر

شحن التاجر لبضاعته شي .. وشحن اراميكس لبضاعتك شي اخر

ف افضل حل حاليا .. تشوف سعر استرجاع البضاعه كم بتكلفك او اذا التاجر نفسه راضي يسترجع البضاعه

اذا المبلغ قريب من مبلغ الشراء .. ف الافضل ماتستلم الشحنه وتطلب من اراميكس اتلافها

[aloosh]

الشحن المجان في المواقع الامريكيه يقصد به داخل امريكا فقط
ارمكس تاخذ على الوزن
ولا تقدر تطالبهم بشي ابدا
اخذ بضاعتك
ونصيحه اي شي ثقيل خذ شحن بحري عن طريق اي شركه

[بوNasser]

استفسار يا شباب خذتلي دواسات رنج فوج من موقع epay سعر القطعه 880 ريال على انه الشحن مجانا لكن انصدمت من ارامكس ضاربين علي 2200 ريال قيمة الشحن

طيب شالحل اذا ابي ارجع القطعه او احاجج ارامكس ان الشحن مجانا من الموقع

افيدونا


مثل ما قالوا اللي قبلي

ما تقدر تحاجج ارامكس ان الشحن مجاني، اصلا لو كان الشحن مجاني ليش استخدمت ارامكس في هالحالة!! كان خليتهم يشحنون للدوحة مباشرة.

المقصود الشحن مجاني للعنوان اللي معطيه انت للتاجر، و غالبا يكون في نفس البلد اللي فيها البضاعة المشتراه،

فلو كنت شاري من امريكا وقال لك التاجر الشحن مجاني اكيد يقصد داخل امريكا. الا اذا ذكر ان الشحن الدولي مجاني، وفي هالحالة انت تعطيه عنوانك في قطر

في ظني عندك الحين ثلاثة حلول:

الحل الأول: حاول معا ارامكس ان هم يرجعون البضاعة للتاجر (طبعا بعد التأكد من قبوله ارجاع البضاعة وأعادة اموالك).

الحل الثاني: وازن بين المبلغ المدفوع (880 ريال) هل يسوى انك تتخلى عنه للتاجر، وتخلى البضاعة عند ارامكس لين الله يشوف لها (هذا اذا ما شحنوها للدوحة وطالبوك باستلامها غصب، او حطوك في القائمة السودا وكنسلوا حسابك)

الحل الثالث: انك تدفع المبلغ (ولو انه مبلغ كبير)، والله يعينك واعتبر اللي صار درس وعبره.


------------------------------------------------------------------------------------------------------------------------
ملاحظة: في Ebay كثير من التجار عندهم شحن دولي، وانا دايما اشتري ويكون الشحن بالبريد الممتاز، او البريد المسجل، او دي اتش ال، لكن على عنواني في الدوحة.
---------------------------------------------------------------------------------------------------------------------------------------


تحياتي لك وللجميع