زوجتي اتفتش جوالي .....

[الكبير]

يحدثني واحد من الشباب اسمه محمد ( بوسعيد) ومتزوج من سنتين وعلاقته بهله الله يسعدهم زينة

فجأة طلبني اخر الليل من كم يوم ايقول ابي اطلق

شنهوووووو اتطلق يا محمد .... امناديني اخر الليل ايش هالكلام !

ايقولي مرتي اتفتش جوالي صار لها كم شهر وانا ساكت واكتشفت كم مسج مع موظفات ومسجات عمل والله .... مع اني ما اكلم لا بنات ولا منتديات ولا مواقع اجتماعية

مشكلته فقط انه شغال في بنك وقسمه كلهم بنات والظاهر ايصير نوع مع التواصل بخصوص العمل

قلت انزل موضوع عشان نستعين بآرائكم لان فعلا مسكين الولد وحالته اشوي ما تسر

الله يستر عليهم وعلينا وعليكم

[الهديل]

ما فهمت
سبب الطلاق
ما فيها شي اذا زوجته فتشت جواله .

[دايموند]

من افعاله شكت..لاتبوق لا تخاف... خلها تفتش شنو بيضره

اذا الطلاق عنده سهل فالله يعينها عليه..

[technical]

بسم الله الرحمن الرحيم ، اعتقد ان الموضوع متفعل من قبل خيال الكاتب ، لأن كيف فتحت الزوجة الجوال والجوال عليه قفل حماية ؟ الزوجة فتحت الجوال لأن الزوج عطاها الأداة اللازمة لفتح قفل الجوال ، مثله مثل كثير من الأزواج !

و ذكر صاحب الموضوع مسألة الأختلاط وفوائدها الوظيفية وإنعكساتها على المجتمع والثقة بين الأزواج بسببها :

- قضية الإختلاط في اماكن العمل لم تعطي المجتمع مردود ذا فائدة تذكر سواء كان ذلك في الغرب ودليل ذلك عدد النساء في البرلمانت الغربية مقارنة بالرجال أو تلك العربية ، والدليل ما يسمى بغرف البنات في الهيئات المختلفة عندنا ، وحتى لما يخلط الرجال مع البنات في فرق تلقاهم ما يقدرون يتفاهمون حول مواضيع بسيطة مثل الإجازة! حنى أني رأيت في بعض الجهات لافتة على جناح كامل (عذرا ممنوع دخول الرجال).

- اصبح أثر مشكلة الإختلاط إجتماعيا على الحريم أكبر منها على الرجال ، كيف؟ عاد البعض ينشد قبل الخطبة البنت تسوق سيارة ولا ما تسوق ؟ و عادهم ينشدون مكان شغلها فيه خلط ولا ما فيه؟ لأن الزواج في نهاية اليوم قرار الزواج قرار من الرجل وليس من المرأة ! عمركم شفتم ابو بنت ولا أمها يروح مجلس رجال ويقول بنتي تخطب ولدكم ؟ :) ، والسلام.

[مضارب دوسري]

انا بس ابي اعرف حاجه وحده

شنو المشكله في ان الزوجه تفتش الجوال او تستخدم الجوال او او
او حتى الزوج يفتش جوال زوجته

عادي ياخي

ولو ان المسجات مافيها بعض الكلمات الخارجه عن نطاق العمل ماظن في اي مره بتزعل




والمفروض هو بكل بساطه يحول لقسم اخر او لبنك اسلامي
وفي هذه الحاله ممكن ما يحتاج كثير يتواصل مع الجنس الاخر الا فيما ندر وبالتالي محد راح يراسله خارج اوقات الدوام!

[مضارب دوسري]

كثرت سالفة زملاء عمل من بنات وشباب

يتواصلون مع بعض ليل نهار على اساس انهم يتكلمون في الشغل

خفوا علينا ياللي بتصنعون القنبله الذريه
او انه يعني كلللش وايد مهتمين في الشغل


ترى في شي اسمه ايميل الدوام يوصلك والجوال في يدك وانت خارج الدوام
ماله لزوم تتواصلون بالتليفون يعني

[الكبير]

بسم الله الرحمن الرحيم ، اعتقد ان الموضوع متفعل من قبل خيال الكاتب ، لأن كيف فتحت الزوجة الجوال والجوال عليه قفل حماية ؟ الزوجة فتحت الجوال لأن الزوج عطاها الأداة اللازمة لفتح قفل الجوال ، مثله مثل كثير من الأزواج !

و ذكر صاحب الموضوع مسألة الأختلاط وفوائدها الوظيفية وإنعكساتها على المجتمع والثقة بين الأزواج بسببها :

- قضية الإختلاط في اماكن العمل لم تعطي المجتمع مردود ذا فائدة تذكر سواء كان ذلك في الغرب ودليل ذلك عدد النساء في البرلمانت الغربية مقارنة بالرجال أو تلك العربية ، والدليل ما يسمى بغرف البنات في الهيئات المختلفة عندنا ، وحتى لما يخلط الرجال مع البنات في فرق تلقاهم ما يقدرون يتفاهمون حول مواضيع بسيطة مثل الإجازة! حنى أني رأيت في بعض الجهات لافتة على جناح كامل (عذرا ممنوع دخول الرجال).

- اصبح أثر مشكلة الإختلاط إجتماعيا على الحريم أكبر منها على الرجال ، كيف؟ عاد البعض ينشد قبل الخطبة البنت تسوق سيارة ولا ما تسوق ؟ و عادهم ينشدون مكان شغلها فيه خلط ولا ما فيه؟ لأن الزواج في نهاية اليوم قرار الزواج قرار من الرجل وليس من المرأة ! عمركم شفتم ابو بنت ولا أمها يروح مجلس رجال ويقول بنتي تخطب ولدكم ؟ :) ، والسلام.

اشدخل حماية

عن نفسي ولا مرة حطيت حماية للجوال

يمكن شكت فيه مرته وانا قلت له تفاهم معها

لان فعلا في ناس ان شكت ، عشعش الشيطان

وانا ما اختلقت القصة يخوي وعلى كيفك صدق او لا

[الكبير]

كثرت سالفة زملاء عمل من بنات وشباب

يتواصلون مع بعض ليل نهار على اساس انهم يتكلمون في الشغل

خفوا علينا ياللي بتصنعون القنبله الذريه
او انه يعني كلللش وايد مهتمين في الشغل


ترى في شي اسمه ايميل الدوام يوصلك والجوال في يدك وانت خارج الدوام
ماله لزوم تتواصلون بالتليفون يعني

بالضبط هاي اللي قلت له

ورفيجي مب معصوم .... يمكن له حركات بعد

[الكبير]

ما فهمت
سبب الطلاق
ما فيها شي اذا زوجته فتشت جواله .

هي شكت فيه وهو مب عاجبه حد يفتح تلفونه

الاثنين خبلان شنسوي

[مضارب دوسري]

بالضبط هاي اللي قلت له

ورفيجي مب معصوم .... يمكن له حركات بعد

الله يكون فالعون
يتنازل ويغير جهة عمله



هذي المهزله وصلت ان الشباب والبنات يطلعون مع بعض
اووووونه عشاء عمل

الله يستر علينا وعلى جميع المسلمين

[الكبير]

ناهيك عن غروبات الواتس للشغل

[مضارب دوسري]

انا وجهة نظري البنت او المره
المفروض مايسمحون لها تشتغل في مكان مختلط مادام عمرها تحت 40 سنه

مدارس
او الوزارات اللي مافيها اختلاط



غير جذي البيت واااجد زين

[technical]

اشدخل حماية

عن نفسي ولا مرة حطيت حماية للجوال

يمكن شكت فيه مرته وانا قلت له تفاهم معها

لان فعلا في ناس ان شكت ، عشعش الشيطان

وانا ما اختلقت القصة يخوي وعلى كيفك صدق او لا

بسم الله الرحمن الرحيم ، يعني الزوج ما حط حماية على الجوال ، ايه السبب ؟ لأن ما عنده مانع أن يطلع الغير على ما فيه ، سواء كان هذا الغير غريب عنه او قريب ، في اي مكان في الشغل او البيت او حتى ذاك النادل اذا نسى جوالة في المطعم ؟

طيب واطلعت زوجته على الجوال وشافت الصور والمسجات ، ايه الذي حصل بعد ما اطلعت عليه ، ما هو الذي قالته او فعلته الذي دفع الزوج لهذه الفوره ، لأن إذا كانت مسألة الإطلاع فقط هي التي دفعته للغضب ، فهذا غير منطقي أمام تلك الأعداد التي قد تكون اطلعت بالفعل على التيلفون من غير علمه ؟ والسلام.

[رجل تعليم]

الله يبعد الشيطان عنهما ويطفئ نار الغيرة الهدامة .
بيوت لا حصر لها تهدمت لأسباب واهية وسخيفة جدا
الله يهديهما معا ويؤلف بين قلبيهما

[معماري قطري]

سبب تافه للطلاق الا لو الزوج يبي سبة

انا تلفوني كله بدون حماية الا يوم سويت تحديث من ايام طلب بصمتي واستوى بالبصمة وافتحه أعطي زوجتي تشوفه حتى تتطمن

[قطر خضراء]

السلام عليكم
أخي الكريم اسمح لي أن أكون معك في غاية الصراحة ولا تزعل مني

قل لصديقك قطر خضراء يسلم عليك ويقول لك اركد يالبزر واحمد ربك انها مامدت بوزها شبرين وطلبت توديها بيت اهلها

تفتيشها لجواله ليست خطيئة تعاقب عليه القوارير وليست أمرا مشينا وإن كنت أعترف أن فيه بعض الاستفزاز لكن أن يصل للتفكير في الطلاق
صراحه ماعنده سالفه

أخيرا فليتقي الله صاحبك وليترك شيطان عمله في البنك ولا يصطحبه معه إلى البيت فيهدمه

[بانغ بانغ]

يخوي بومحمد

الظاهر رفيجك امسوي شي جايد ومرته شكاكه

كلنا مرينا بهالظروف السياسية والامنية داخل البيت يوم من الايام الا وهي مدة اليد عالجوالات

اللي يقول شغل واختلاط ... اللي ايراقب الله في اعماله ، ما بيخاف من بشر ومتطفلين

الله يستر عليهم ومافي داعي مثل هالمواضيع اللي تثير فتن

[بانغ بانغ]

سبب تافه للطلاق الا لو الزوج يبي سبة

انا تلفوني كله بدون حماية الا يوم سويت تحديث من ايام طلب بصمتي واستوى بالبصمة وافتحه أعطي زوجتي تشوفه حتى تتطمن

انا لو احط رقم سري من الcia المرة بتعرفه

[شموخ دائم]

,


,


مرحبا




https://www.youtube.com/watch?v=GM5kfcOHiMk


4 دقايق تغني عن الف رد


,

,

[بريق الحق]

كثرت سالفة زملاء عمل من بنات وشباب

يتواصلون مع بعض ليل نهار على اساس انهم يتكلمون في الشغل

خفوا علينا ياللي بتصنعون القنبله الذريه
او انه يعني كلللش وايد مهتمين في الشغل


ترى في شي اسمه ايميل الدوام يوصلك والجوال في يدك وانت خارج الدوام
ماله لزوم تتواصلون بالتليفون يعني

هذا هو الكلام الصح
قول حق اخوك يدخل المنتدى ويشوف الردود وقوله لا يطلق ويلعب فيه الشيطان

[العقل المدمر]

بدل ما يطلقها خل يطمنها ويشوف ليش تشك اصلا
يعني الطلاق حل الحين :(

[JN000N]

خوش ريال
عشان شكت فيه ونبشت قال بطلق والله المره ماتشك مني والدرب الا اذا جافت الريال فيه شي متغير ولا وراه بلوه
مب كفو عصمه ف يده مع احترامي
هذي على اي سبه بيهدد يطلق الله يصبرها عليه
تفك عمرها منه وتجوف نصيبها بعيد عند حد عاقل واحسن واركد

[كيلو حديد]

هلا جنون
توك بالموضوع الثاني الي يرقص ما يستاهل الزواج
أجل الي تفتش الجوال تستاهل هديه


بصراحه في أمور مهما بلغ تقارب الاشخاص من بعض حتى بين الزوج والزوجه تبقى من
الخصوصيات التي لا يجب تجاوزها بدون اذن
في نظري الجوال أحدها وخصوصا لو تكرر الأمر

نعم ممكن الموضوع يستحق الطلاق لو تجاوز الأمر بدون اذن رغم أن الجوال ممكن ما يكون فيه شيء
القضيه تكمن في هتك الخصوصية وتحاوز الخطوط

سواء الجوال فيه شيء ولا مافيه
وسواء كانت نية الزوجة الشك ولا غيره

بصراحه يجب أن تبقى هناك مناطق خصوصية لا يحق لأحد دخولها إلا بإذن صاحبها

عموما لو رأى منها ما يضره فليمسحه بما يسره منها وينبهها

والله يسعدهم مع بعض

[وحيد-الشوق]

ابي اتطلق عشان مرتي تفتش جوال انتوا من صجكم !!!!!!

مادري شقول صراحه احس اثنينهم مب صاحيين

[JN000N]

هلا جنون
توك بالموضوع الثاني الي يرقص ما يستاهل الزواج
أجل الي تفتش الجوال تستاهل هديه


بصراحه في أمور مهما بلغ تقارب الاشخاص من بعض حتى بين الزوج والزوجه تبقى من
الخصوصيات التي لا يجب تجاوزها بدون اذن
في نظري الجوال أحدها وخصوصا لو تكرر الأمر

نعم ممكن الموضوع يستحق الطلاق لو تجاوز الأمر بدون اذن رغم أن الجوال ممكن ما يكون فيه شيء
القضيه تكمن في هتك الخصوصية وتحاوز الخطوط

سواء الجوال فيه شيء ولا مافيه
وسواء كانت نية الزوجة الشك ولا غيره

بصراحه يجب أن تبقى هناك مناطق خصوصية لا يحق لأحد دخولها إلا بإذن صاحبها

عموما لو رأى منها ما يضره فليمسحه بما يسره منها وينبهها

والله يسعدهم مع بعض

اي نعم
وخيه على ذكر يتمردح
واللي ايينا يخطب من عندنا وندري به يرقص نرده
مانبي ابهات رقاصين :)

بعدين انا كتبت المره مانبشت الا شكت فيه مافي وحده مريضه نفسيا مني والدرب بتمسك تلفون ريلها بتقعد تنبش
الا اذا من اول ماخذها وهذي حالتها وقتها انا اوقف معاه واقوله شلك فيها ختولي عنك هذي مريضه وشكاكه
لكن الريال بنفسه يقول انا اتواصل مع بنات الدوام ع اساس امور تخص الدوام
ليش دوامكم مافيه ايميلات مثلا؟
مرتك مب حابه هالشي احترم رغبتها وامنع اي بنت تتجرأ وتطرش لك شي خاصه ف اوقات مش اوقات الدوام واذا في شي مهم نطرشه عالايميل وانتهى الموضوع
في اشيا وايد صارت عادي وسهالات عند الناس لدرجة انهم يرفضون من يرفضها!!!

[alshammari]

اللي سوته خطأ

ولكن

في امور قبل الطلاق مايجوز تضيع اسرة بسبب جوال

التفتيش والتنبيش خطاْ على الطرفين بصراحة

اللي يشك في الطرف الثاني يواجهه بصراحة ويقول انا شاك في كذا وكذا ممكن اتطمن؟!


انا متزوج لي 11 سنه ولله الحمد ماذكر مديت يدي عشان افتش جوال ام عيالي

[R 7 A L]

الموضوع يضحك ههههه معليش اسمح لي يالكبير

عندي اقتراح قبل لايطلق
قل له ياخذ جوالها ويفتش اذا عادي اسمحت له لازم يسمح لها
اما اذا شافها تعارض هنا لازم يمنعها تفتش جواله ولازم يحترم نفسه ويخلي شغل الدوام في الدوام

[سالم الزهران]

الرجال اللي يلف ويدور ،، مشاكله على نفسه دام انه قايم بحقها وحقوق البيت ،،وش عليها من جواله ؟

ما يصير كل ما صار شيء وصلوها الطلاق ؟ يعني الطلاق وش بيفيدهم الاثنين !

ظاهرة " لو راقل طلقني ؟ " بدأت في مصر واليوم عشرين مليون مابين عانس ومطلقة بمصر !

والمحظوظة منهم ترجع تتزوج واحد من عمر ابوها و غالباً ثانية و لو صبرت على كازنوفا كان ابرك لها لان مصيره يخمد ، خمدت الجمال وهي جمال

[فيصل99]

مراح اتطرق لوظيفة الرجل نبقئ في صميم الموضوع
الرجال اكبر غلط انه يفكر فالطلاق ع مشكله تافهه بالمضمون
خله يتواصل معاها بالكلام يبين له احساسه وانزعاجه من هالحركه وانه تلفونه خاص فيه حتئ لو يكلم صدق وعنده حركات ويعالج موضوع الغيره بالحكمه

المراه مهما كانت من وجهة نظري واحترامي الشديد لها مالها اي حق في تفتيش خصوصيات زوجها من جوال او غيره لانه الزوج هو القيم عليها وع البيت مب العكس ولو فتشت مراح تحصد الا المشاكل المراه الذكيه اذا اكتشفت زوجها ع خطا تصلح المشكله بدون ماتحسس الزوج انها تدري

الله يصلحهم

[Dexter]

عسى ماشر تفتش جواله من كم شهر وهو ساكت؟ امحق زواج وين الثقة في الموضوع؟

اذا مرة من الغيرة ازعلت وتبغي تشوف هذي اوكي عادي، لكن سالفة انها بشكل مستمر ولمدة شهور كل شوي تاخذ جواله وتفتح ماتدخل الراس

والريال صادق اذا ماعجبه الموضوع، اذا مافي ثقة في الزواج فهو مبني على اساس ضعيف وكل طرف يشك في الثاني ووسواس الخ الخ الخ

[راجي الْعفو]

كثرت سالفة زملاء عمل من بنات وشباب

يتواصلون مع بعض ليل نهار على اساس انهم يتكلمون في الشغل

خفوا علينا ياللي بتصنعون القنبله الذريه
او انه يعني كلللش وايد مهتمين في الشغل


ترى في شي اسمه ايميل الدوام يوصلك والجوال في يدك وانت خارج الدوام
ماله لزوم تتواصلون بالتليفون يعني

هذا مب عمل

هذا بصل ^_^

مدري لين الحين على بالهم ان الناس خبله و ما تفهم اللي يصير ^_^


---------

موضوعك يالكبير مضمونه متكرر في أحد مواضيع اخونا غريب الدار بخصوص تفتيش الجوال


اما موضوعه سواء كان غلطان و لا على حق:

فقول له يعالجه بهدوء من غير تنرفز

وبتنصلح الامور بحول الله

[راجي الْعفو]

مراح اتطرق لوظيفة الرجل نبقئ في صميم الموضوع
الرجال اكبر غلط انه يفكر فالطلاق ع مشكله تافهه بالمضمون
خله يتواصل معاها بالكلام يبين له احساسه وانزعاجه من هالحركه وانه تلفونه خاص فيه حتئ لو يكلم صدق وعنده حركات ويعالج موضوع الغيره بالحكمه

المراه مهما كانت من وجهة نظري واحترامي الشديد لها مالها اي حق في تفتيش خصوصيات زوجها من جوال او غيره لانه الزوج هو القيم عليها وع البيت مب العكس ولو فتشت مراح تحصد الا المشاكل المراه الذكيه اذا اكتشفت زوجها ع خطا تصلح المشكله بدون ماتحسس الزوج انها تدري

الله يصلحهم

ولذلك مثل ما الرجل لازم يتفهم ان المره شريكة حياته


لازم المره ايضا تفهم ان الزوج هو راعيها و سيدها و مسئول عنها
وبالتالي طبيعي ان له سلطة عليها

بس المبدأ العلماني: حقوق المرأة

خرب عقول هالحريم و ضيعها

[blackjacket]

عادي اذا ماعنده شي يخشه مافي مشكله
ليش يخاف !!

[Dana’1]

صحيح التفتيش بالعموم وخصوصا بشكل دايم مو زين بس ماتوصل يطلق لاجل هالسبب بس
هي لو ما شافت مسجات من الموظفات ماكان استلجت وقامت تفتش بشكل مستمر
عليه يكلمها وينبها ما تمسك جواله وعليه بعدما يتراسل مع الموظفات ويمنعهن من التراسل حتى لو كان للعمل دام الامور وصلت لهذا الحد
فيه شي اسمه ايميل العمل اذا فيه شي ضروري جدا ومستعجل يتراسلون عليه

[بانغ بانغ]

اللي فهمته من اخونا بومحمد ان حرمة رفيجة شكاكة ويمكن درجة مرض نفسي فاكيد بتلعوزه

كنت اعرف واحد لما ايكلم خواته ، مرته اتشك واتروح اتكلمهم عقب تتاكد

مساكين الله يعينهم

[Riku3]

الشك اذا وصل لمرحلة المرض مشكلة ترى .. ودامها شهور تدّور فيه جواله وتوها تحصل شي ماعجبها .. المفروض تقعد معاه وتوصل رايها بدون زعل وهو المفروض يتفهم .. بس كلنا ندري ان مخ الحريم ما يستحمل التفاهم والنقاش الطبيعي ههههه ..

تحصله قط الميانه مع موظفه في مسج وما عجب زوجته .. هو لو ما يرضى زوجته ترد على مسجات "زملاء" عمل المفروض هو ما يسوي هالشي .. ولو كان غصبا عنه لان شغله مختلط فلازم يكون محترم بالرد ..

وانصحه لو مرته فجأة تغيرت يدور سبب هالتغيير ويحله .. مثلاً لو عندها صديقه تعاني من زوجها وقاعده تنكد على الكل وتشككهم في ازواجهم لان زوجها خاين او هي شكاكه .. او طريقة كلامه وتلميحاته او مزحه معاها مثل الشباب الي يمزحون وايد بخصوص الزواج بالثانية (اكره هالمزح) .. او لو عيونه زايغه .. حتى لو مجرد انه في السوالف عن العمل يقولها فلانه قالت وفلانه سوت ، والمفروض يا انه ما ينقل بعد هالسوالف للبيت او يحاول يتجنب التفاصيل واسماء الموظفات حتى لو كان ما يحتك بهالموظفات لان مجرد الاسم يشعر الشخص بالغيرة .

[بومحمد المطاوعه]

فديت بنتي شهد
عمرها سنه الحين
اهي الوحيده الي تمسك جوالي

والحمدلله اذا مافي ثقه بين الزوج والزوجه ,,
وتطلع امور تفتيش ومن هالخرابيط
اشلون الواحد بيطلع من البيت بيداوم وهو شاك ف زوجته او زوجها ,,

امر غريب والله بعيد الشرر

حلوه هذي باخذ جوال زوجي وبفتشه او باخذ جوال زوجتي وبفتشه ,,

ليش هذي المبدأ اخليه ف راسي وقلبي وافكر فيه ,,
افتح ابواب الشياطين والوسوسه على نفسي ليش ,,

يعني بالفيت اذا بفتش وبصيد خلاص صيده ,, البنت الي مب سنعه بتلعب من ورى زوجها واهلها وبتقط كرامتها ف مزبله
لا بتخاف من زوجها ولا من اهلها اذا من البدايه ماخافت من الله تعالى ’’

وبعدين حلو الواحد يقط تلفونه ولا يحاتي اذا ماعنده سوالف خربطه

شالمشكله تاخذ جوالك زوجتك اذا تحتاجه تتصل او تبي تشوف شي او اي امر اخر

تفضلي هاج التلفون او تفضل هاك التلفون ,, ليش اخلي حاجز بيني وبين زوجتي شريكه حياتي
والحاجز هذا التلفون !!

الله يهدي النفوس ويستر على الجميع يارب
الله يبعد عنا وعنكم شر الوسوسه

[بومحمد المطاوعه]

مستغرب والله ان الجوال شي خصوصي ,,!!
وين الخصوصيه فالجوال
يعني راعي المحل لو اخترب جوالك عادي يتعبث ويشوف محد قال شي خصوصي
اما الزوجه او الزوج لو طاح الجوال ف يديه بنقول ستووووب شي خصوصي

انا عن نفسي اتكلم ولله الحمد مافي شي خصوصي فالجوال
جوالي وانا فالخدمه الوطنيه
مفتوح وف يد شريكة حياتي مفتوح 24 ساعه
سبحان الله مسج من المدارس للعيال او اي شي ضروري
واخبر معطي موتري اخوي الصغير وكنت اكلمها بالخش من المعسكر ههههههه
قالت لي مطرشين مسج مطراش 2 يرجى مراجعه حجز المركبات هههههههههه
ضايقتني زوود الضيقه الي فيني من المعسكر
اخوي الصغير مستعرض فالجمس وطالبيت الموتر:eek2:



نرجع على موضوع الخصوصيه
عيل حتى غرفه النوم شي خصوصي ليش تدخل الزوجه هههههه
او تفتح كبت ملابس الزوج بعد هذي خصوصي يعتبر ,,

ف هذا المبدأ شيلووه من راسكم يا اخوان شمااا

بالعربي لاتبوق لاتخاف
يعني لاتسوي شي غلط علشان ماتنحرج اذا قالت لك ام عيالك عطني الجوال بتصل او ابي اشوف شي

تفضلي بالعكس
لاتبنون حواجز الله الغني عنها

[Riku3]

^
المشكلة لو كان البحث للشك حتى لو انت مب مسوي شي ..

تخيل ان واحد يدورلك الزله لضعف شخصيته وثقته في نفسه او بسبب تأثير عوامل خارجية عليه مثل مشاكل الصديقات او مشاكل عائلية .. وكل هذا ينعكس عليك وانت مب مسوي شي ..

حتى لو ما حصلت شي عليك او انك واثق من نفسك .. الشك مرض لازم يوقف .

انا جوالي طايح وعادي عندي تمسكه بس لو كان غرضها تدور علي الزله اكيد بزعل لاني ما بدر مني اي شي خطأ علشان يخليها تشك فيني ! .

Ps . الله يخليك شهد ويحفظها ^_^ .

[ضوى]

الجوال متاح للاثنين ولكن يجب أن يعي كل من الزوجين أنه لكل منهما قروبات خاصة هذا رجالي هذه نسائي ، قد يتم تداول رسائل خاصة للرجل لاينفع ان تقراها المراة والعكس صحيح ، اما بشكل عام فلا حواجز

[بومحمد المطاوعه]

^
المشكلة لو كان البحث للشك حتى لو انت مب مسوي شي ..

تخيل ان واحد يدورلك الزله لضعف شخصيته وثقته في نفسه او بسبب تأثير عوامل خارجية عليه مثل مشاكل الصديقات او مشاكل عائلية .. وكل هذا ينعكس عليك وانت مب مسوي شي ..

حتى لو ما حصلت شي عليك او انك واثق من نفسك .. الشك مرض لازم يوقف .

انا جوالي طايح وعادي عندي تمسكه بس لو كان غرضها تدور علي الزله اكيد بزعل لاني ما بدر مني اي شي خطأ علشان يخليها تشك فيني ! .

Ps . الله يخليك شهد ويحفظها ^_^ .

عليك نووور
وانا معاك في هالنقطه
ليش الشك بالأساس
الشك باب الشيطان والوسوسه اصلن
ف الواحد يبعد عن نفسه هالأمور

والله مايعيش سعيد الي يطيح في امور الشك
اتحدى اي انسان عايش مرتاح لو فتح باب الشك على نفسه

[بومحمد المطاوعه]

الجوال متاح للاثنين ولكن يجب أن يعي كل من الزوجين أنه لكل منهما قروبات خاصة هذا رجالي هذه نسائي ، قد يتم تداول رسائل خاصة للرجل لاينفع ان تقراها المراة والعكس صحيح ، اما بشكل عام فلا حواجز

معاج في هالنقطه ومب شرط الزوج او الزوجه تفتح الرسائل وتقرأ كل مكتوب او يقرأ كل مكتوب
مافيها شي لو اخذ جوال زوجتي واصور فيه عيالي او اي شي
او لو ابي اسجل رقم او اي امر اخر

لان من يضع الحواجز او الخوف من التفتيش
مستحيل تشوفينهم يعطون الجوال حق بعض يسجل رقم او يشوف الاعدادات او ينزل برنامج او اي شي بشكل عام

هني المشكله ولكن بشكل عام المفروض مافي حواجز
والي بيقعد يفتش جوال زوجته او الزوجه بتفتش الأرقام ولا الواتساب ولا اي امر اخر هذيله ماعندهم سالفه وفيهم مرض الشك والعياذ بالله

[بانغ بانغ]

معاج في هالنقطه ومب شرط الزوج او الزوجه تفتح الرسائل وتقرأ كل مكتوب او يقرأ كل مكتوب
مافيها شي لو اخذ جوال زوجتي واصور فيه عيالي او اي شي
او لو ابي اسجل رقم او اي امر اخر

لان من يضع الحواجز او الخوف من التفتيش
مستحيل تشوفينهم يعطون الجوال حق بعض يسجل رقم او يشوف الاعدادات او ينزل برنامج او اي شي بشكل عام

هني المشكله ولكن بشكل عام المفروض مافي حواجز
والي بيقعد يفتش جوال زوجته او الزوجه بتفتش الأرقام ولا الواتساب ولا اي امر اخر هذيله ماعندهم سالفه وفيهم مرض الشك والعياذ بالله

هههههههههههههههههههه

ذكرتني باللي ايقول للشيخ ...

يا شيخ اني ارى في الظلام ان وجه زوجتي يشع نورا

قاله يالخبل ... هاي مرتك اتفتش جوالك تحت الفراش

[بومحمد المطاوعه]

هههههههههههههههههههه

ذكرتني باللي ايقول للشيخ ...

يا شيخ اني ارى في الظلام ان وجه زوجتي يشع نورا

قاله يالخبل ... هاي مرتك اتفتش جوالك تحت الفراش


ههههههههههههههههه
الله يسعدك
والله تبي الصج
ترى التفتيش شي مرض
صدقني

شك والشك مرض والعياذ بالله

[وليف الشوق]

سؤالي هو هل يتعبر الضرر الذي وقع حسب رأي الزوجه هو ( خيانه ) ؟
هناك حقوق وواجبات من كلا الطرفين ولكن سؤالي هل يحق للزوجه او الزوج التدخل في بعض الخصوصيات التي قد تكون في حدود ضيقه وخاصه ؟
هل يحق للزوجه بطلب الطلاق للضرر ؟ وهل تضررت من هالشي ؟
هل طلبها للطلاق بحجه هذا الموضوع او وجود كارثة او مصيبه اخرى واخطر من الموضوع السابق ؟
لماذا تقوم الزوجه بخلق مشاكل من لا مشكله وتهدد استقرار اسره بأكملها خاصه في وجود اطفال ؟
هل تعلم الزوجه قبل زواجها ان زوجها يعمل في عمل اختلاط ؟
أسئله اتمنى من الزوجه الفاضله والتي لا تخاف الله في نفسها ولا تتقي الله في طلب الطلاق في موضوع بسيط خاصه ان طلبها الطلاق ليس دليل كاف لوقوع الضرر او سبب لطلبها الطلاق من رجل قد تكون لديه كثير من الايجابيات وقليل من السلبيات ؟