الاستعانة بخبراء عالميين لحل أزمة المرور في قطر ............

[مستثمر رشيد]

http://www.raya.com/File/GetImageCustom/85b73841-7086-4108-bc71-f14a90824249/316/235


كشفت مصادر بالمكتب الوطني للسلامة المرورية عن وجود خطة للاستعانة بخبراء عالميين في مجال الازدحام المروري والإشارات الضوئية والتوعية خلال الفترة القادمة.

وأكدت لـ الراية أن عملية اختيار هؤلاء الخبراء خضعت لمعايير بالغة الدقة من أجل الوصول إلى أفضل الخبرات العالمية في هذا الشأن موضحة أنه حتى يتم اختيار الخبير المعني بقضية الازدحام المروري على سبيل المثال فقد تم التواصل مع عدد من المعنيين بقضية الازدحام المروري على مستوى العالم من بينهم مديرو الازدحام المروري بمدينتي لندن وستوكهولم وكذلك بمسؤولين في كندا وعدد من الدول الأخرى لترشيح من يرونه جديرا بالاعتماد عليه من الخبراء في هذا الشأن.


وأشارت إلى تلقي أسماء العديد من الخبراء العالميين في هذا المجال والسيرة الذاتية لكل منهم وقد تم الاستقرار على 3 منهم من السويد وكندا وإنجلترا وسوف يتم المفاضلة بينهم.

وأكدت أنه في حال الاستقرار على اسم هذا الخبير فإنه سوف يتم تكليفه بتقييم وضع الزحام المروري في قطر وتقديم الحلول اللازمة للتغلب عليه.


الظاهر المسؤولين استنفذوا جميع الحلول والان جاء الدور على الخبير الاجنبي


http://www.raya.com/File/Get/1bbb245a-7681-4d51-932e-a3114c8b840d

[غريب الدّار]

الله يجزاهم كل خير

بس خاطري اعرف طووووووووووووووووووووووووووووووووووووووووووووووووو ووووووووووووووووووووووووووووووووووووووووووول هالمدة وش كانوا ناطرين علشان يستعينون بهم ؟؟


يالله

ان تصل متأخرا خير من الا تصل ابدا

ارجع وأقول جزاهم الله خير

[Rider]

يعني بعد بنجيب اجانب يحلون الزحمه وهم سبب الزحمه اصلا قطر مافيه زحمه شوارعها اوكيه بس طلعوا مليون ونص وافد وتنحل الازمه

[غريب الدّار]

يعني بعد بنجيب اجانب يحلون الزحمه وهم سبب الزحمه اصلا قطر مافيه زحمه شوارعها اوكيه بس طلعوا مليون ونص وافد وتنحل الازمه

ليش كم عدد الخبراء اللي بيجيبونهم ؟؟؟ مليون ؟

يابن الحلال كلها كم خبير وباذن الله نشوف النتيجة

شنسوي بعد


قال انفخ ياشريم ، قال مامن برطم

خلها على ربك

[وحيد-الشوق]

ههههههههههههه بيجيبون خبير بيعطونه 100 الف وبياكل وبيمش يده في الطوفه والانجاز صفر نفس اجانب اشغال ومستشفى حمد وغيرهم

[Faz]

ليش اجانب وخبرا من بره وبفلوس

لجنه من المواطنين تكون تطوعيه وناس عندهم خبره في هالشوارع والمناطق من استوينا واحنا فيها وتنحل الامور ان شاء الله

احنا اكثر الناس المتضررين منها وحل هالمشكله بيرجع علينا بالفايده والراحه

[حمد بن سعد]

ان اشوف ومتاكد ان الزحمه مالها شغل في الشوارع لسواقه الي تجيب المرض ولكل ماسك يسار والكل يضرب ابريك بدون سبب والكل يلعب في الجوال (هذي بروحها مرض)

[رُفق المجنّا]

يجيبون الخبير عشان بس يكشخون بهذا الخبر فالجريدة ، خلاص انتهت موضة الخبير الأجنبي !

لجنة تنسيقية بين الجهات المعنية ( اشغال ، وزارة المواصلات والاتصالات ، البلدية والبيئة ، كهرماء ، ... ) ويفرضون فالموضوع ولكن

اللي بصير ان شخص متنفّذ بيلغي عليهم كل الاقتراحات وبـ ضيف نظرته الثاقبه وتحليلاته المقدسة وهو ولا يدري شاللومي

[mr. abdulla]

أتوقع لو يتم تطبيق قانون المرور على الكل و في جميع الأوقات راح تنحل كثير من المشاكل.. مستحيل كل يوم ابي ادخل دوامي احصل سيارات واقفة بشكل غير قانوني قدام بوابة المواقف... و بالساعات ... اذا المرور مشغولين يخالفون ليش ما يسمحون او يستعينون بالفزعة للمخالفات .. او حتى شركة أمنية مثل حماية او group4 يمشون و يخالفون السيارات المخالفة و كل مخالفة لازم تكون مصطحبة بأكثر من صورة لتوضيح المخالفة اذا حبينا نراجع المرور..

بعدين اقترح يزيدون عدد الباصات في الشوارع و مواقف الباصات.. و يخلون الباصات بلاش... في استراليا الباصات في بعض المدن بلاش لتشجيع الناس ركوب الباصات..

اقتراح اخر منع السيارات الي عمرها اكثر من 20 او 25 سنة من السير في الشوارع .. حد من عدد السيارات او جعل امتلاك السيارة صعب...

اقتراح رابع تحديد مبلغ رمزي لدخول الكورنيش او 22 فبراير وقت الذروة ... تبي تأخذ الكورنيش من الساعة ست الى ثمان الصبح ادفع خمسة ريال.. او اطلع للدوام من وقت...

اقتراحات كثيرة غير اللي كتبته.. و يمكن أصلا اقتراحاتي كلها غير عملية ... المشكلة عندنا في عدم التطبيق.. و الله لو الاستشاري يعطينا 30 اقتراح و تكلف الدراسة 10 مليون دولار.. شالفايدة اذا مالنا نية نطبق الاقتراح...

[بوحارب]

ربعنا لازم يخسرون نفسهم فلوس عشان يرتاحون

يبه الزحمه في كل مكان وفي كل بلد وفي كل الدول

بسكم مخاسير ههههه

[بريق الحق]

اشوف خفت الزحمه
مبروك عليكم


كله تخدير لا اكثر (:

[بوحارب]

صادق يابريق

اليوم الشوارع وش زينها

يمكن الجماعة راقدين عقب السهر امس :(

[بريق الحق]

انا رقدت امس بدري وقمت والشوارع فاضيه وتعال فهم كل واحد وهو يبارك ومادري وشو
حُزَّت في خاطري يوم قالي ترى ربعك الي ياو يباركون لي ):

[الحياة الخالدة]

وااااو من السويد وانجلترا وكندا
خبراء على مستوى .. يبيلهم ميزانية خاصة
في زمن التقشف والترشيد .. الله المستعان

[بوحارب]

انا رقدت امس بدري وقمت والشوارع فاضيه وتعال فهم كل واحد وهو يبارك ومادري وشو
حُزَّت في خاطري يوم قالي ترى ربعك الي ياو يباركون لي ):

ههههههههه احسن لك

لا الصراحة ذولي اللي يباركون صج صج يعني عايشين الدور :(

يقولك مثلهم مثل الفلبينيات يوم القرنقعوه هههههههههههههههه

[JN000N]

كم بيعطونهم
وانا اضبط لهم الزحمه واخذ النص بس؟

[الحياة الخالدة]

كم بيعطونهم
وانا اضبط لهم الزحمه واخذ النص بس؟
قدمي سيرتج الذاتية
وركبي عدسات ملونة
وغيري جوازج
وفاااااااالچ طيب

[qatarman8008]

الزحمة المرورية هذي اش سببها..
مصالح الناس كلهم متجمعه في اماكن محدودة..
المدارس الدوائر الحكومية والخدمية وحتى الاسواق كلهم في الدوحة..
الزحمة تصير لان كل واحد في الصبح يحب يودي عياله المدارس ثم يتوجه لعمله..
والظهر يبي يجيبهم من المدارس ويبي يرجع البيت..

[غريب الدّار]

الزحمة المرورية هذي اش سببها..
مصالح الناس كلهم متجمعه في اماكن محدودة..
المدارس الدوائر الحكومية والخدمية وحتى الاسواق كلهم في الدوحة..
الزحمة تصير لان كل واحد في الصبح يحب يودي عياله المدارس ثم يتوجه لعمله..
والظهر يبي يجيبهم من المدارس ويبي يرجع البيت..

كلام سليم وواقعي

بس يتناول سبب واحد من أسباب الزحمة
وأعتقد سبب فعّال

[JN000N]

قدمي سيرتج الذاتية
وركبي عدسات ملونة
وغيري جوازج
وفاااااااالچ طيب

اصبغ شعري والا الامور طيبه؟

[معماري قطري]

من اللي يختارهم ببالغ الدقة؟

اللي خربوا الشوارع في السابق ولا حطوا خطة لتوسعتها بما يناسب زيادة السكان؟

اللي حطوا عمدان حراسة عند الاشارات تعدم السيارات وألحين ما ادري من فهمهم إن شغلهم غلط وصلحوه بغلط ثاني؟

شغلهم يكشخون ويحوطون من بلاد لبلاد ويجيبون اللي ما لهم شغل في بلدانهم

[.قطر.]

شبيسوون يعني التخطيط فاشل من الاساس مايترقع :omen2:

[@north_star@]

يعني الخبراء بيمنعون الناس يمشون 60 على المسار الايسر ؟ وبيمنعون اللي يتعبث بجواله وماسك اقصى اليسار و وراه قطار من الزحمة والا بيمنعون الي يلفون على الناس بدون اشارات ويتسببون بحوادث وبعرقلة حركة السير لانه هالاشكال هم أساس المشكلة

[MAZEN37]

لو يفتحون موقع على النت لتلقي الاقتراحات من الجمهور
بيتفاجئون من الحلول والمقترحات
لانه المشاكل المروريه ما يعرفها الا مستخدم الطريق
كل السائقين وهو يسوق يقول في نفسه لو سوو كذا بتحل المشكله وتحل الاختناقات
انزلوا للشارع ومرتادين الشارع هم ابخص من خبراء ما يعرفون طبيعة شوارع البلد

[راجي الْعفو]

اكبر خبر مضحك لعام 2017

توهم ينتبهون

[سيف الحق]

خبير من خارج البلد ماراح يفيد بشيء الا بعد مايعيش هنا اقل شيء 5 سنوات

وبالنسبه لخبراء من لندن !!
لندن بالرغم من وجود اكثر من 12 خط قطار تحت الارض وأكثر من 200 خط باصات وتطبيق رسوم على الشوارع الداخلية الا انها مزدحمة خصوصاً ساعات الذروة
الزحمة راح تخف اذا خلص مشروع الريل بشرط يجبرون معظم الأجانب على استخدامه

[.قطر.]

يعني الخبراء بيمنعون الناس يمشون 60 على المسار الايسر ؟ وبيمنعون اللي يتعبث بجواله وماسك اقصى اليسار و وراه قطار من الزحمة والا بيمنعون الي يلفون على الناس بدون اشارات ويتسببون بحوادث وبعرقلة حركة السير لانه هالاشكال هم أساس المشكلة

معاك ان طريقه السواقه تلعب دور
المفروض يحطون رادار حق السلاحف لان هم سبب الزحمه

[.قطر.]

لو يفتحون موقع على النت لتلقي الاقتراحات من الجمهور
بيتفاجئون من الحلول والمقترحات
لانه المشاكل المروريه ما يعرفها الا مستخدم الطريق
كل السائقين وهو يسوق يقول في نفسه لو سوو كذا بتحل المشكله وتحل الاختناقات
انزلوا للشارع ومرتادين الشارع هم ابخص من خبراء ما يعرفون طبيعة شوارع البلد
ياليت والله
بينصدمون من الاشياء البديهيه اللي ماسووها
عاد شيسكت معماري بعدين هههههه

[وسمي2016]

انا عندي الحل,,,,,وبحسبها بنصف اجرة الاجانب

,,,,,

[GENIUS]

في النهاية أفكار وحلول الخبراء ماراح تفرق وتختلف عن حلول ربعنا لكن المشكلة مايعتمدون على ربعنا وعيالنا و ذبحتهم أن أفكارهم مستوردة وأشك في نجاحها في أرض الواقع .

ومثل ماقالوا الأخوة اللي سبقوني الحلول لن تأتي إلا من شخص عاشر وعاين المشكلة في أرض الحدث وليس بأرقام وبيانات وغيرها.

تناقشت مع الكثير من ربعنا وعندهم حلول وأفكار مبدعة لكن من يسمعهم.

[وسمي2016]

,,,,,,,,



,,,,,طبعا بحكم وطنيتي وحبي لبلادي نبذل لها انفسنا وارواحنا بلا مقابل ,,,, ,,,,,,


,,,,,

[Dana’1]

لو يستشيرون بزر قطري عطاهم الزبده بالسبب والحل

[PathFinder]

الحل ما يحتاج خبير زيادة المسارات إلى أربعة او حتى 5 مسارات وان تكون كل التقاطعات الرئيسه جسور وأنفاق والتخلص من الدوارات والإشارات

[.قطر.]

الحل ما يحتاج خبير زيادة المسارات إلى أربعة او حتى 5 مسارات وان تكون كل التقاطعات الرئيسه جسور وأنفاق والتخلص من الدوارات والإشارات
علييييك نور
هاي لازم يصير بلا خبير من موزمبيق ولا جزر الواق واق

[بوخالد911]

خبر كالصدمة !!!!

[khalid525]

انا ما عندي مشكلة حتى لو تستعينون بالجن والطبوب يس حلووا لنا مشكلة شارع 22 فبراير

[RE-Qatar]

جزء كبير من المشكلة يتحملة مهندسين من قام ببناء الشوارع والجسور الجديدة
نصيحة للمسؤولين لاتسوون أي جسر فوقه او تحته اشارة
وتكون المخارج من الجسور بدون توقف وقرب اشارة تكون داخل المنطقة بمسافة كبيرة بعيدة عن الجسر والخط السريع
وبخصوص الشوارع لازم تكون متوفرة شوارع موازية جديدة للشوارع القديمة

وبخصوص شوارع الدوحة القديمة صارت المباني من دور واحد إلى 7 ادوار و 11 دور ونفس الشارع ماتغير او توسع !!
وفتج مدن جديدة بعيدة عن المناطق الموجودة حالياً وتتوفر فيها جميع الخدمات لتخفيف الضغط على العاصمة الدوحة

خاطري اعرف الخبير الاجنبي شبيقول

والله يوفق الجميع

[معماري قطري]

ياليت والله
بينصدمون من الاشياء البديهيه اللي ماسووها
عاد شيسكت معماري بعدين هههههه

انا يئست خلاص ساكت ولطيف شحليلي

يعني ألحين تبون تفهموني إن الشغل اللي صار كله شغل زيد وعبيد وسعيد وسعيدان .. كله شغل جون وبخش وسهرمداد .. شدعوى ما نعرف الخبراء الأجانب اللي يصولون ويجولون في أشغال .. شسووا وهذي نهايتهم

ما يجيبون الا اللي زايد عن حاجتهم وربعنا يدورون من فندق لفندق ويسمعون كلام ( الخبير ) لو بيجيبون زيادة

طريق فريجنا الوسطي طريق محوري مسوينه من حارة وحدة وزحمة عليه لا تطاق ولو استوى حادث كارثة ما سووه غير الانجليز متخيلين دواعيس بلادهم وناقلينها لنا .. والرنغ رود واخوه الرنغ رود ذبحونا بالرنغات .. يوم المقابلة مع فطاحل مهندسين أشغال ( مدراء والا المهندسين غير مستوردين ) كانوا واحد يرفع والثاني يكبس مسكين حسن الساعي حشروه في زاوية ضيقة

[ضوى]

والله بجد مب عارفة ليش الخبراء وعندنا ماشاء الله عباقرة في ابتكار الحلول وشفنا ولمسنا هالشي من خلال الحلول اللي طرحوها الكثير من الاعضاء ، مدري عميان هالاوادم مايشوفون مايقرون ؟ والا لازم خساير ودفع فلوس وعقب نقول فشلوا الخبراء في حل الازمة بعد ماخذوا ملاييين ؟؟ ؟

[nooora]

ان شاءالله يحلون مشكلة الزحمة . الظاهر مشكلة في بعض الناس مافيهم صبر يزعل يشوف حد قدامه الا يعديه حتى يرتاح نفسيا. الزحمة مفيدة لبعض مرضى النفسيين يعلمونهم الصبر .

[MAZEN37]

بعطيكم مقترحين
دوار معيذر وانت جاي من اشارات المناصير داخل دوار معيذر الدوار نفسه ماعليه يمين
الحل هو خل الدوار كما هو وعمل مسار علي يمين الدوار يكون مفتوح للي جاي يكمل للامام سيدا
ليش نحشر الي رايح سيدا وكذا بيخف الضغط على الدوار وبيكون انسيابيه للرايح سيدا
المقترح الثاني
الي جاي من اشاراة المناصير ورايح للصناعيه عليه انه يطلع للدوار فوق وبعدين يكمل سيدا ليش ما تكون في مدخل خدمات من تحت بمعنى بدال ما اطلع على الدوار ادخل النفق تحت وعقب ادخل خدمات على شارع 10 بالصناعيه ليش حاشرين الناس فوق على الدوار
المهم مقترحاتي مجانيه

[JN000N]

والله بجد مب عارفة ليش الخبراء وعندنا ماشاء الله عباقرة في ابتكار الحلول وشفنا ولمسنا هالشي من خلال الحلول اللي طرحوها الكثير من الاعضاء ، مدري عميان هالاوادم مايشوفون مايقرون ؟ والا لازم خساير ودفع فلوس وعقب نقول فشلوا الخبراء في حل الازمة بعد ماخذوا ملاييين ؟؟ ؟

لازم عشان ودهم ياكلون من الكيكه
شكلهم مخابيهم فضت ويبون ميزانيه حق الاجازه والسفره

[وسمي2016]

لازم عشان ودهم ياكلون من الكيكه
شكلهم مخابيهم فضت ويبون ميزانيه حق الاجازه والسفره

,,:omen2:,,,انتي يبيلج جائزه,,:ok:,,,,,

[شيخ الديرة]

اتمنى ان تكون الاقتراحات على مستوى استراتيجيات تخطيط المدن وتقليل ضرورة التنقلات المتكررة او طويلة المسافة، وليس اقتراحات على مستوى حبة بنادول وتعال افحصك بكرة

[فيصل99]

اتمنى نشوف خبراء قطررين ادرى بمعاناة اهل البلد ولايمنع ذلك من استشارة الخبراء الأجانب

[R 7 A L]

مايبي لها شي
ضبط و وسع شوارعك
ثقف السواقين
كثف الدوريات
أعمل على المخالفات والقانون بجديه وطبقها على الجميع

[qtr qtr]

مداخل ومخارج شارع 22 فبراير يوسوون اقل شي 3 خطوط مب خط واحد وخطين .
الزام المجمعات بازالة المواقف اللي امام خط 22 فبراير ووضع مسارات اضافيه مكانها والاكتفاء بالمواقف الخلفيه والسفليه .
عمل رسوم عالشوارع اللي تكثر فيها الزحمه في اوقات الذروه او بشكل مستمر .
تعليم ألزامي للسائقين الجدد وسائقي كروه والليموزين بشوارع قطر المؤديه للمناطق المراد الوصول إليها .. لان ملاحظ فيهم عن تجربه اكون فالصناعيه واركب معاهم اقول لهم وصلني الخريطيات الحبايب يضرب خط سلوى متجه صوب دوار مدماك عساس يدخل شارع 22 فبراير متجه شمال .

بلا خبراء بلا كلام فاضي

[هيليوم]

ما يرفع ضغطي الا كلمة ( عالمي ) و ( دولي ) للترويج ، اهم شي يكون شخص فاهم شغله اما العالمية والدولية مصطلحات للتفخيم غالبا ما يكون لها محل من الاعراب

[الدوحه1]

يعني اعترفوا "الجماعه" بالفشل وانهم غير مؤهلين/قادرين على حل مشكلة الزحمه!!!!!
انزين دام انكم "فاشلين" ليش جالسين تخططون للشوارع والمناطق السكنيه الجديده ؟؟؟
وليش ماتعلمو "الفاشلين" من اخطائهم في تخطيط الشوارع والمناطق السكنيه القديمه؟؟؟؟؟
معقوله عندنا العشرات من المهندسين المدنيين القطريين وخبرة بعضهم فوق ال 20 سنه ولا قدرنا نؤهلهم لهالمهمه؟؟؟ وين الخلل؟؟؟

لو القرار بيدي لاخترت مجموعه من المهندسين المدنيين القطريين من أصحاب الخبره والكفاءه واطرشلهم يلفون المدن الرئيسيه الي تعاني من الازدحام ودراسة كيف نجحت هالمدن في حل المشكلة!!!!

[GENIUS]

تعال شوف تخطيط ومساحات الشوارع في المناطق الجديدة عرض الحارة الواحدة 3 أمتار يعني الشارع رايح جاي حارتين 6 أمتار عرضه . يعني سيارتين فور ويل مايطوفون بسهولة مع أن مواصفات وقياسات شوارع مثل هذه لابد أن تكون 3.65 أو 4 أمتار لكل حارة بحسب التخطيط العمراني لكن أفكار اشغال شيء مخالف

[معماري قطري]

يعني اعترفوا "الجماعه" بالفشل وانهم غير مؤهلين/قادرين على حل مشكلة الزحمه!!!!!
انزين دام انكم "فاشلين" ليش جالسين تخططون للشوارع والمناطق السكنيه الجديده ؟؟؟
وليش ماتعلمو "الفاشلين" من اخطائهم في تخطيط الشوارع والمناطق السكنيه القديمه؟؟؟؟؟
معقوله عندنا العشرات من المهندسين المدنيين القطريين وخبرة بعضهم فوق ال 20 سنه ولا قدرنا نؤهلهم لهالمهمه؟؟؟ وين الخلل؟؟؟

لو القرار بيدي لاخترت مجموعه من المهندسين المدنيين القطريين من أصحاب الخبره والكفاءه واطرشلهم يلفون المدن الرئيسيه الي تعاني من الازدحام ودراسة كيف نجحت هالمدن في حل المشكلة!!!!




بدون تطريش ولا شيء كل شيء واضح والمشكلة مشكلة تصميم ومشكلة استراتيجية أشغال

ألحين طبعاً الإدارة الجديدة بتقول استلمنا تركة كبيرة وعلينا نصلح أُمور كثيرة ولازم ندور خبراء .. المشكلة الموجودين لو هذي حلولهم مب على قدر المسؤولية ولا الحدث

مكتب تصميم واحد يكون قوي وعنده مهندسين كفاية وأكفاء بيقدر يقوم بكل شيء بس من يحسن اختياره .. نحتاج ماستر بلان لكل قطر وننزل بالتدريج لمنطقة منطقة .. ماستر بلان ما يتغير مثل ما تغير ماستر بلان الدفنة اللي كان يبدأ بأربع طوابق ثم وراها 8 ثم 12 ثم 16 الى 32 أعتقد وبدأ اللعب على مستوى لحد ما استوى القريب من البحر هو الأعلى وسد على الباقيين وراحت جمالية الامتداد البصري وحق الانفتاح على البحر للبعيد

[RE-Qatar]

اقترح للمسؤولين انهم ينقلون جميع العمال اللي عندهم اعمال في شركات الغاز في الشمال من الصناعية إلى مجمعات سكنية قريبة من المناطق الشمالية لشركات الغاز
لأن من بعد صلاة الفجر يمر على شارع الشمال آلاف العمال في الباصات الكبيرة من كثرهم تقول قطارات . الصبح من الصناعية إلى الشمال والعصر من الشمال إلى الصناعية!!

[غير البشر]

حتى با الاجانب ماراح تنحل الازمه

لانهم فصلو وقالو للخبراء البسو

والحل ان الاجانب راح يقولون الحل الوحيد هو التوسع فقط
يعني تنقل تبنى المباني والطرق والخدمات والفنادق خارج الدوحه

[بوسيف الهاجري]

انا مع الاخ المناضل غير عن البشر حمد شنان
انا اقول يسوون مدن نفس دبي مثل مدينه الاعلام والتكلونوجيا والطبيه وخلافه حتى الوزارات
تكون برا الدوحه وتكون على شارع واحد مثل طريق الشمال وانا ما افضلها ها الموقع اوطريق دخان ولا سلوى
ويخلون العاصمه سكنيه وسياحيه
ويتم اعاده تاهيل الشوارع من جديد

حاليا التوجه للوسيل اغلب الهيات والوزارات انتقلت هناك

[Jspec]

ياجماعه الحل بسيط وقلته من زمان

بس يطورون المواصلات العامه وتكون منتشره في قطر (تكاسي/باصات/ترام) وتكون مواقفهم مكيفه وفيها خدمات يكون فيها مردود ودخل للدوله
ويحطون البترول بعدها اللتر بخمسه ريال

والله تخف الزحمه

[م. عبدالعزيز]

الزحمه ليست مشكلة هندسيه وانما مشكله تخطيطيه

بمعنى:
1- ليش اغلب الدوائر الحكومية الهامة محكورة في منطقة الابراج؟ (دوام الموظفين)
2- ليش ما تتم توزيعه المدارس بشكل منظم ضمن المنطقة القريبة من سكن الطلاب؟
3- ليش تنحط المولات في مكان واحد ؟
4- ليش .............الخ.

[الوسيط العقاري]

http://www.raya.com/File/GetImageCustom/85b73841-7086-4108-bc71-f14a90824249/316/235


كشفت مصادر بالمكتب الوطني للسلامة المرورية عن وجود خطة للاستعانة بخبراء عالميين في مجال الازدحام المروري والإشارات الضوئية والتوعية خلال الفترة القادمة.

وأكدت لـ الراية أن عملية اختيار هؤلاء الخبراء خضعت لمعايير بالغة الدقة من أجل الوصول إلى أفضل الخبرات العالمية في هذا الشأن موضحة أنه حتى يتم اختيار الخبير المعني بقضية الازدحام المروري على سبيل المثال فقد تم التواصل مع عدد من المعنيين بقضية الازدحام المروري على مستوى العالم من بينهم مديرو الازدحام المروري بمدينتي لندن وستوكهولم وكذلك بمسؤولين في كندا وعدد من الدول الأخرى لترشيح من يرونه جديرا بالاعتماد عليه من الخبراء في هذا الشأن.


وأشارت إلى تلقي أسماء العديد من الخبراء العالميين في هذا المجال والسيرة الذاتية لكل منهم وقد تم الاستقرار على 3 منهم من السويد وكندا وإنجلترا وسوف يتم المفاضلة بينهم.

وأكدت أنه في حال الاستقرار على اسم هذا الخبير فإنه سوف يتم تكليفه بتقييم وضع الزحام المروري في قطر وتقديم الحلول اللازمة للتغلب عليه.


الظاهر المسؤولين استنفذوا جميع الحلول والان جاء الدور على الخبير الاجنبي


http://www.raya.com/File/Get/1bbb245a-7681-4d51-932e-a3114c8b840d

والله الأشغال لو يعطون هل قطر المسئولية

مب محتاجين لأي خبير

[بوحمد1]

لا يزيدون ولاينقصون وليش هالخساير

الحل ،،،

تغيير مواعيد الموظفين والمدارس

[معماري قطري]

لو يجيبون نانسي عجرم ( بنت الوكرة سابقاً ) تشخبط لهم شخابيط بتنحل مشاكلهم

[بوحارب]

لو يجيبون نانسي عجرم ( بنت الوكرة سابقاً ) تشخبط لهم شخابيط بتنحل مشاكلهم

ههههههههههههههههههههههههه

نبي توضيح يا معماري

شلون نانسي والوكرة !!!