الاستغلال المادي في ابشع صوره

[جبر ال جبر]

صديق لي عنده عقار ماجره على عائله قطريه توفى ابوهم المعيل لهذي العائله الصغيره والي كان يسدد ايجار البيت
وللامانه كما اخبرني الصديق انه رجل محترم مصلي يودي ايجاره بانتظام وصارله معاه كم سنه
المهم ابوهم توفى من اكثر من 3 شهور وتوه العقد منتهى من ايام وصديقي نظرا للظرف الي هم فيها ماتكلم طول3 شهور وطبعا ماستلم مستحقاته في 3 الشهور الي مضت ,,, اتصل ع جوال الرجال المتوفى رد عليه اخو المره (نسيب المتوفى) يقول اكلمه والله باحترام وادب وقايله اني مالك البيت الا الريال يغلط بالكلام وحسسني اني انا المستاجر مب المالك وماعندي سالفه متصل وماعندي ذوق وانه هم في خير وبيقطون الفلوس في الشارع يجي ياخذها!!!
يوم شافهم مب ويهه حشمه اشتكى عليهم في المركز وجابوه في نفس الوقت وعرف صديقي هذا من ولا قبل يظنه اخو المتوفى وقاله الحين احنا في مشاكل ورث وعندنا امور كثيره مانقدر نسدد لك لين نخلص من امورنا وعقب يصير خير
قال وين كلامك بتقطها في الشارع الفلوس!! يقول لو حالتهم الماديه تعبانه بقول فيهم الاجر ولكن مبينه عليهم النعمه
حتى ابوهم الي توفى الله يرحمه عنده بيت ملك وماجره بس كان يبي يسكن في المنطقه الي فيها بيت صديقي لانه اكثر جماعته فيها وبيته الاصلي اجره سكن عمال
يقول عاءلته مازالت في البيت وعياله صغار مب كبار ومتردد شيسوي وياهم يعرف حالتهم الماديه جيده وعادي يدفعون له خصوصا الايجار منطقي مب عالي عليهم يصبر عليهم شوي ولا يرفع عليهم دعوى ويطلعهم من البيت
العنوان اقصد فيه( النسيب واسلوبه الوقح مع صديقي في بعضهم يهايط وانه يدفع وبيعطي وهو في الواقع يموت ع الريال ومايعطي الناس حقوقها ويستغل وتر العاطفه والشفقه )

[شبح الصمت]

يا خوي جبر اليتامى مالهم ذنب ونسيبه انسان ما عنده ذوق

يكسب اجر فيهم وينتظر حقه
ويتذكر الرجال المتوفى رحمة الله عليه واخلاقه ..


واجره عند رب العالمين

[نمر بن عدوان]

من اسباب نعم الله على هالبلاد بالخير والامن والسكينه هي طيبة هل لبلاد والرحمه الي في قلوبهم لو كان هذا الشخص في بلاد والله يمكن اخوه بيطرده ولايصبر عليه لكن ولله الحمد الرحمه نعمه من الله يهبها من يشاء . نصيحه ياخوي خل يصبر عشان خاطر الايتام ويعطيهم مهله متفق عليها ترضي الطرفين وبعدها من حقه يتصرف ومحد بيلومه والله يعوضه خير

[جبر ال جبر]

شبح الصمت ونمر بن عدوان اشكر تجاوبكم ف الموضوع وبالعكس انا من مؤيدين انه يمهلهم ويصبر عليهم ومالهم ذنب صحيح وخصوصا ابوهم كان انسان طيب ولكن الخوف يستغلون هالطيبه ويمغطونها وياه سنه او سنتين
صحيح صديقي اموره طيبه ومستد بس بعد من حقه الايجار ويشكر على الفتره الي سمح لهم فيها الحين في تقديركم الشخصي كم يعطيهم مهله في مثل هالظروف يعطيهم بعد 3 شهور غيرهم وخلاص ويقولهم دبرو نفسكم بس اذا بيسوي هالحركه لازم من الحين يعطيهم خبر ويدبرون عمارهم في الحصول على مسكن جديد او يدفعون له الايجار ويقعدون او يسوي تسويه بالامر
والمشكله ماعنده الا هالنسيب يتفاهم وياه مافي شخص عاقل في الاسره يعرف ياخذ ويعطي معاه

[نمر بن عدوان]

مثل ماقلت اخوي جبر يعطيهم فرصه متفق عليها واعتقد 3شهور كافيه لان لو مدها اكثر بنكون دخلنا على رمضان والامتحانات وهالشي صعب معاه يشدون من البيت .او يدفعون الايجار وعلى قولتهم صلى الله وبارك .

[fantasy]

اعذروني والله اخالفكم كلكم
انا واحد اخاف ربي و ماحب الظلم لكن هل لو راح وطال بحقه يعتبر ظالم؟؟؟
ياخوي روح اظمن حقك ماذبحنا الا العاطفة والكلام الفاضي، اعذروني بس هذا واقعنا وانت ماراح تظلم حد بمطالبتك بحقك،، روح وثق العقد و اشتك عليهم دام هالنسيب نافخ راسه خل يروح يصرف عليهم
الله يعينك علا اللي مايسوى تسوي فيه خير مهما يكون وعلا قولة المثل خير تسوي شر تلقى

[mr. abdulla]

خذ حقك يا اخوي ... انت نفسك قلت عيال نعمة و ابوهم عند بيت ملك و متخالفين على الورث... لو كانوا أطفال صغار في بيت صغير ماعندهم حد يساعدهم بقولك مساكين... بعدين شنو بيحذف الاجار في الشارع.. روح خذ حقك ...

[راجي الْعفو]

والله الصبر و الرفق و عدم العجله زينين في مثل هالمواقف اذا انه مب مستعجل و محتاج حاليا

ينظر شوي ويشوف اذا انهم حلوا موضوع الورث ع حسب كلامه، ويراعي ظروفهم

والكلام اللي طلع منه يمكن انه كان في لحظة غضب و توتر ..

[ساراام]

بما ان عندهم بيت مأجر خل يعطونه مهله للخروج ويسكنون ف بيتهم

وبنفس الوقت يعطيهم رفيجك مهله لين يفرجها الله ويطلعون

الرحمه زينه

[الرايــق]

ارحمو من في الارض يرحمكم من في السماء .. تفكروا في هذه الجملة..
جبر لليتامي فقط ينتظر شوي ما عليه ويعطيهم مهله يرتبون امورهم ..

[CH Engineer]

عياله صغار الورثه مرته وعياله السالفه مب معقده بس هالسوالف تاخذ سنين فالمحاكم وشؤون القصر

الموضوع يعتمد على رفيجك وعلى الحالة الماديه لام العيال،، راتب الأب يمشي ؟ تستلم راتب؟

خله يرسل مندوب لها يعزيهم ويقولهم عندكم مهله 3 شهور ترتيب وضع وبعدها تستلم ايجارك حتى لو اسحبوا العقد عندك وتقدر تاخذ حقك!

الشغله الثانيه يقدر يرسل المندوب يطلب من زوجة المتوفي تحمل المسؤوليه وقيمة الايجارات بعد 6 شهور فوق ال3 شهور

يعتمد على رفيجك

[بومحمد المطاوعه]

الله يعينه والله يهدي المستاجرين

انزين نفرض ان راعي البيت ( المالك )
عنده ألتزامات ومتوكل على الله ومبلغ الأيجار ,.؟؟

من المسؤول هنا في دفع ألتزامات هذا الشخص راعي البيت ,.؟

كل انسان له ظروف وهذي هي الحياة

اذا مالك البيت ماعنده مانع ولا عنده ألتزامات اخرى ولا متوكل على قيمه الأيجار
خل يعطيهم مهله ويصبر واجره على الله تعالى

اما اذا عنده ظروف وقيمة الأيجار تسكر ظروفه ومصاريفه وديونه
خل يشوف موضوعه مع المحكمه

[أسد الجزيرة]

عادة الحريم تصيبهم صدمة بعد وفاة زوجها و لا تعرف تدبر امرها لانه الزوج كان متكفل بكل شي

الافضل تذكيرهم وديا ترى مصابهم كبير لاه المرة عيالها صغار و لا تعرف اي شي عن امور الايجار وغيرها

[Al-Kuwari]

قال سبحانه وتعالى في سورة البقرة اية110 (وَأَقِيمُوا الصَّلَاةَ وَآتُوا الزَّكَاةَ غڑ وَمَا تُقَدِّمُوا لِأَنفُسِكُم مِّنْ خَيْرٍ تَجِدُوهُ عِندَ اللَّهِ غ— إِنَّ اللَّهَ بِمَا تَعْمَلُونَ بَصِيرٌ)

تأملوا في عبارة وما تقدموا لأنفسكم من خير ,

ان كان صاحب البيت يعتمد عالايجار في امور حياته فلا يمكن ان يلومه احد ان طالب بحقه ولم يرد الانتظار , وان لم يكن يحتاج الايجار وحاله ميسور ومن الممكن ان ينتظر لفتره بسيطة فالشأن شأنه هل يريد ان يقدم لنفسه للأخرة من عمل خير ويعلم انه سيجده عند الله فالله اكد له ذلك بنفسه في الاية المذكورة اعلاه بعبارة تجدوه عند الله , وليعلم انه ان يسر عليهم فالخير الوفير ليس للنسيب الوقح وليس للايتام او الارملة المسكينه وانما هذا الخير له هو فالاخرة وربما فالدنيا كذلك , والقرار قراره فالنهايه , ليحدد ما الاحب الى قلبه جمع الاموال ام الحسنات والخير

[قطريه ماركه]

هو ما شرا البيت و اجره الا عشان يستفيد منه

راعاهم ثلاث شهور الله يجزاه خير .. خلاص يا ويه استح

يروحون بيتهم الملك و يدفعون اللي عليهم و الله يحفظهم

و هو يأجر البيت و الله يوفقه

[جبر ال جبر]

مشكورين جميعا على ابداء الراي في هالمساله الشائكه الربع عندي بعد نفس الكلام فريق يقول يصبر عليهم شوي ونظرا للظروف الي هم فيها وهو ماعنده مانع ابدا في الصبر عليهم ولكن لازم يحسم الامر 3 شهور يشوفها كافيه يقدرون يروحون بيتهم الملك ويطلعون العمال الي فيه وينظفونه ويسكنونه,,, وفريق اخر يقول هو صاحب حق والمفروض خالهم يخليهم عنده دامه شاد حيله وشاط عمره وهو ياجر بيته وماله شغل بمشاكلهم وحصر الورث والمساله يبيلها سنوات مب شهور خصوصا اولاده صغار هو ماله ذنب بكل الي يصير
وبعدين انا ذكرت الرجال الحمدالله الله منعم عليه ومب في حاجه للايجار الفتره الحاليه ولكن الدنيا دواره مايدري بكره شلون وضعه قد يلجا حتى لبيع البيت يوم لك ويوم عليك هذا حال الدنيا وهو ماشرا البيت الا استثمار وفايده له
يعني الشور عشان يكون مرتاح ضميره يعطيهم مهله 3 شهور فقط للخروج من العقار او الدفع او في حل ثاني يضمن الرجال حقه بحيث مايتضررون العيال الصغار خصوصا ابوهم ميت الله يرحمه ويبيح منه ومايبي يزيد عليهم المشاكل وتكفي مصيبتهم هذي