استشارة : شراء بلاط ارضيات البيت من الدوحة او السعودية ؟

[الواعد]

السلام عليكم

انا افكر في شراء بلاط البيت الارضيات

من السعودية لكن حاب استشيركم

هل الاسعار هناك افضل بواجد من هنا

وتستاهل العنوة ؟؟؟؟ او متقاربة


س1 : اللي بينصحنا اشتري من السعودية

ياليت يحدد لي الافضل في الاسعار

كمناطق ومحلات هل : الرياض او الدمام او الاحساء او جدة ؟؟؟

نبغي محلات مضمونه انهم يشحنون للدوحة


س2 : واللي بينصحني اشتري من هنا ياليت اسامي المحلات

اللي هنا واسعارها مب غالية ومناسبة

س3 : البعض نصحني اروح للسوق الصيني في دبي ايش رايكم

نبغي مشاركات كثيرة لان هالموضوع شوي يبي له تفكير

[سعود.]

برد على نقطة السوق الصيني فقط .

رحت له قبل البناء اشوفه عادي وبعض الاغراض احس الجودة مش اوكية . اذكر الي اعجبني العشب الاصطناعي كان عندهم نوعية يجيك اطوال الشعب غير متساوي وحتى الوانه يجيك مكس اخضر على شوية صفار ( محمس )
كنه ضاربته شمس يعطيك انطباع بأنة ( طبيعي ) روعه كان حتى في الدوحه والرياض ماشفت نفسه .
وزيارتي كانك تقريبا 2011

http://www.arabtravelersforum.com/travel390151.html

[معماري قطري]

نصيحتي يا اخوي قبل لتروح سو جرد للكميات اللي تحتاجها على المخططات ولو تقدر تستعين بمهندس أفضل وتقرر الحجم وطريقة التركيب بالرسم المفصل بعد أفضل بكثير

وحاول تخلي الغرف سجاد مع حشوة ونوعية فاخرة حتى للدرج لو تحب وعندك عيال كبار .. أما أطفال أكيد بيخربونه

بعدين شوف في الدوحة شالموجود وسعره وحاول تاخذ عينات وتحط ستكر عليها تسجل المعلومات المهمة مثل اسم المحل وسعر المنتج وصناعته وين وبعض المحلات مب باخلين عليك بمواصفاته الهندسية

بعدين السعودية بلاد خير وفيها مواد كثيرة واتوقع اختيارات أكثر وبتكون عندك فكرة شتاخذ .. وممكن تاخذ نوع لمكان وتكمل نوع ثاني من الدوحة .. ولا تنسى تودي عيالك وتشاركهم في عملية الاختيار

للحمامات بعضهم يعطونك التصميم المفضل لنوعية معينة وعلى الخرايط تقدر تحدد حتى البوردر والقطع الخاصة .. لازم تودي معاك سيدي خاص بالرسومات بصيغة اوتوكاد وصور عادية حتى تسهل عليهم الحسبة وممكن التصميم لو المحل يسوي

محلات قطر عندك نابينا - العمودي - العبيدلي للسيراميك - محل عيال عمي الغانم للسيراميك مب قصد دعاية بس عن تجربة خذت منهم بورسلان اماراتي بحدود 40 كان وطلع وايد زين حق عمارة صغيرة كاملة وكله نفس النوع للأرضيات - تدمر - شبيب وعلي العطية - وكافود - وسيراميكا - وغيرهم كثيرين

لو بتسأل عن الماركات اسئل عن بوختال الألماني أو نوع ايطالي نسيت اسمه .. عندك الجوهرة مصري كثير زين وكم نوع مغربي بنقوشات اسلامية قديمة بعد زين .. بعض السيراميك جيد وأجود من البورسلان والبورسلان الصيني أكثره بتلاحظ الصبغ خفيف وسائل على الأطراف .. دقق في القص كيف وحاول تطلع 5 حبات أو أكثر وتحطهم بالعرض على سطح قزاز أو طاولة ولاحظ تغير الحجم فيهم .. مسؤول المبيعات بنفسه بتلاحظه لو مب واثق في بضاعته يقول لك لا تركب زيرو جوينت مثلاً .. وحاول تشوف شهادات المنشأ

مواصفة هندسية مهمة هي درجة الكحت تسمى Mohk Degree وهذي تبدأ من 1 للطبشور الى 10 للألماس .. 5 وفوق مناسب ولو تحصل 8 بيكون قوي ولا تكحته أغلب المواد .. والمواصفة الثانية نسبة التغيير في الأبعاد .. وفيه نفاذية الماء وهذي قليلة جداً ما نتخوف منها

[Azizuk]

شوف اخوي السال

معماري قطري ماقصر بالمعلومات

بس من واقع تجربة في السوق القطري والسوق السعودي

1- اذا بتأخذ من قطري عندك

نابينا

كافود

والحطاب محل جديد لشركة حطاب الكعبي فاتحين محل في طريق سلوى قبل محطة بترول التيسير مقابل قطر للديكور سابقاً مأخوذين ماركة بيراندا الاسبانية

http://www.peronda.com/es

السعر بيعطيك للمتر 250 ريال بس كاسرة لين 200 ريال أو اكثر بالنسبة للأرضيات مقاس 120 * 60

المتحدة عندهم تنزيلات حالياً أمس بادين وعندهم انواع وايد

نجي للسعودية

انصحك بمحل واحد وإلا تعور رأسك السوق كبير ومعظم المحلات تتشابة

بس محل واحد وله عددت أفرع باسم غير

المحل الرئيسي هو مكارم النخبة في الدمام على طريق الجبيل على يدك اليسار وانت رايح الجبيل

مانصحك تروح محلات ثانية غيرة لان هو الكنج عندهم واسم الشركة الاساسية بيت الاباء

بس عنده كذا محل بأسماء تختلف وهم مكارم النخبة و المدى و بيت الاباء

http://ebaahouse.com

نصيحه واحد مجرب لا تعور رأسك بالسوق السعودي خلك على مكارم النخبة

وإذا حاب تشوف محلات ثانية عندك محل الممنزل بس أسعاره قريب أسعار قطر يمكن اقل 20 ريال للمتر

http://www.ceramichome.net

عندك محل محمد محمد الدوسري له فرع في الحساء قريب العثيم مول وله فرع في الدمام شارع الملك عبدالعزيز قريب إمارة الدمام ولهم فرع في الخبر اخر شارع السويكت أو تقاطع 23

http://www.aldossary-stores.com/index.php

اول جرب نابينا في قطر وراح تعجبك البضاعة اللي عندهم صراحه نابينا متمكن في السوق والبضاعة متوفرة عنده وممتازة

كافود ممتاز بعد

والمتحدة عندهم انواع واشكال راقية جداً

وأكرر وأقول قطر نابينا والسعودية مكارم النخبة

[(عبدالله)]

هذا الموضوع له علاقة بيفيدك ولي فيه مشاركة مفصلة

http://www.qatarshares.com/vb/showthread.php?569151-من-شطب-من-السعودية-يتفضل

موفق ان شاء الله

[$الملياردير$]

هلا اخوي الله يوفقك و يهنيك ... من تشتري هذي ترتبط بأمور عديدة ...تختلف من شخص لآخر ... انا بتكلم عن رأي شخصي انا فضلت ان اشتري من الدوحة ... صحيح السعودية ممكن تكون أرخص و تنوع وهذا مايختلف علية اثنين بس في أمور خلتني أخذ من الدوحة منها التشطيب مراحل يقولك شخص انا بروح باخذ كل اللي ابي مرة وحدة هذا ماينفع ... يعني اذا انت في بند تبليط وفيلا وحدة ... العملية مو مستاهلة ... في نقطة مهمة حطها في بالك المبالغ الخاصة بالشحن و السفرة و السكن لا تضيفها لإجمالي التكلفة والنقطة المهه هي التوصيل في الدوحة المحلات الكبرى مسؤلة عن توصيل البلاط و تسليمة من غير تكسير .... أضف الى ذلك سياسة الترجيع للزيادة وتوفير الفائض ... واحد من الربع راح الرياض عشان ناقصة كرتونين بلاط ....انا معاك في مرحلة التأثيث بس في البلاط و غيرة انا ضد ..... لو بنصحك مثل ما نصحني الاخوان في المنتدى وغيرهم بقولك ابعد عن اي شي صيني لان اللي يجي الدوحة مب نخب اول ....والصيني يبهدل العمال في التركيب ... تأكد من نوعية الجلو و الفواصل بين البلاط و لا تركب زيرو في الحمامات ماينصح فيه ... بالنسبة للمحلات سراميك الخليج و المتحدة و بورسلاينا والامانة .... اسأل الله لك التوفيق وحاضر لأي استفسار على العام و الخاص

[$الملياردير$]

في فرق بين سعر البورسلان و السراميك الجودة طبعا للبرسلان و هو أغلى سعرا

[معماري قطري]

في فرق بين سعر البورسلان و السراميك الجودة طبعا للبرسلان و هو أغلى سعرا

بعض السيراميك يجي أغلى بسبب جودته وتصنيعه اللي بواسطة مختصين .. شوف بختال ركبوه من سنين طويلة كتلبيس خارجي حق مباني غانم بن علي صوب السنتر وللحين باقي .. اللي يفرق التركيب .. البورسلان الصيني سيراميك رخيص وطبقة خفيفة مركبة على عجينة البورسلان في الغالب .. هذا تحصله عند بعض المحلات الرخيصة وحاطين عينة منقوشة وبسعر يعتبر جيد لكن تشوف نقشاتها طايرة بس من المشي عليها

فالنتينو كذلك وهذا الاسم اللي للماركة الايطالية واللي نسيته في ردي السابق وشعارهم حرف ال v في دائرة بيضاوية

للجدران في الغالب ما يحتاج بورسلان والمبالغة مب في محلها وللحسبة نزيد للأرضيات شوي 5% كافي بس احتياط نخليها 10% ونتأكد من الكمية المستلمة بعضهم ينقصون الكميات فلا نحتاج لكمية أكثر

معاك حق في إنها ما تستاهل العنوة .. لو البيت مساحته 1000 بتشيل كثير أجزاء منها بتكون بلاط شعبي وقليل رخام وبتصفي يمكن على 500 متر ولو وفرت بتوفر لنفترض 20 ريال في المتر هذي 10000 ريال .. بتروح على السكن والشحن والعنوة .. لكن في المقابل بتستفيد تشوف وممكن تحصل تنوع أكبر

يقدر الواحد يسوي مسح الكتروني قبل ليقرر يروح

[الواعد]

الله يجزاكم خير
ع الردود الطيبة

[بوخالد911]

هلا
لبيتي اليديد
شريت بلاط شعبي اماراتي بو 3 سنتي
من بيت الأحساء
شارع سلوى
المتر ب 42