ابي تجارب اللي يسافرون لندن داااايم

[دولة قطر.]

بسم الله الرحمن الرحيم

اخواني ابي تجاربكم بالسكن في لندن يعني اللي يبي يسافر لندن وين يسكن تفضل فندق او شقة والشقق التوب وين وهل منطقة مايفير فيها شقق راقية للاجار لعائلة مكونة من 5 اشخاص
واللي عندة عناوين لشقق راقية في مايفير
وشكرا لكم

[naklan]

اخوي اذا انت مسافر سياحة ممكن تسكن في اي مكان
وإذا للعلاج يفضّل تختار منطقة قريبة من المستشفى الي فيه العلاج
الفنادق في لندن حوالي الا لف ريال بس الحين الباوند طايح ممكن في حدود 800 ريال
هذا للأربع نجوم والخمس نجوم 1500 وطالع على حسب الفندق
يفضّل انك تسكن في فندق لمدة اسبوع يكون دورت شقة وتنتقل لها يوجد مكاتب في
كل مكان وبتحصل شقة يفضّل انك تشوف قبل ما تاجر الاجار اسبوعي من 500 باوند الى 1500
على حسب الموقع والنضافة لانه شققهم بعضها ما يصلح للسكن وبعضها خمس نجوم
فيه مكتب لواحد عراقي مقابل المسجد الي في حديقة الريجنت بارك
محترم وومكن تحصل عنده سكن

موفق اخوي

[nooora]

اخوي احذر تتعامل مع العرب في شارع اجود رود حتى العمله ما تغيرها هناك. في استغلاليه. لكن في بعض مكاتب وشغالين فيها عرب ياجرون شقق. عندي اخوي يدرس هناك بس قول لي اي منطقه رايح ومثل ما تفضل الاخ في الرد نازل للسياحه ولا علاج ام دراسه. اي منطقة وبشوف لو اقدر اساعدك

[ذكي جدااا]

انا اسكن دايما بمنطقة البارك لين كل فنادقها فخمه خمس نجوم والليله بحدود الف الى الف وخمس باليوم. بالنسبة للشقق المفروشه ماعندي فكره عنها

[monatee]

عن تجربه ، الشقق عوار راس

لازم تشوفها عشان تسكنها والنصابين وايد

عن 10 شقق شفناها بطلعه الروح وحده منهم تطلع زينه او مقبلوله حتى

والشقق الفخمه والراقيه بعضها سعرها اغلى من سعر فنادق 5 نجوم

وكنا رايحين علاج مب سياحه

[naklan]

اخر مرة خذت شقة في لندن لمدة سنة فخمة بس ما كانت
بفرش كامل عند محطة سنجوس وود مقابل سويس كاتج فرشتها
من ما جميعه وصراحة ارتحت شقة تشرف وكشخة سكنت فيها
حوالي 6 شهور حتى التاكس كنت ادفعه في مكتب البريد
والحلو في العمارة تحتها مواقف للسيارات وحديقة
وابواب بأرقام سرية من كل اتجاه للدخول
للحديقة وبعدها للعمارة

[دولة قطر.]

شكرا لكم القصد سياحة انا في الصيف سكنت في الماريوت بارك لين كان زين ونظيف وتمام بغيت احجز في فندق دورشيستر نظيف وامن
بس كان فل مافي حجز انا بروح سياحة لمدة 20 يوم تنصحوني شقة والا فندق وشكر لكم

[ذكي جدااا]

بالنسبة لي اذا بحجز شقة فأكيد بحجز عن طريق موقع بوكنج لانه معروف ثانيا موقع بوكنج يعطيك تقييم للشقق من ناحية كل شي. واذا عجبتني الشقه اروح بعد اشيك عليها بموقع ثاني اللي هو ترب ادفايزر واتاكد من تعليقات الناس وبعدها اذا تطمنت احجز. لكن ماانصح انك تستأجر عن طريق دلال ولا شخص من غير ماتشوف الصور وتعليقات الناس اللي قبلك واستأجروا.

[naklan]

شكرا لكم القصد سياحة انا في الصيف سكنت في الماريوت بارك لين كان زين ونظيف وتمام بغيت احجز في فندق دورشيستر نظيف وامن
بس كان فل مافي حجز انا بروح سياحة لمدة 20 يوم تنصحوني شقة والا فندق وشكر لكم

20 يوم مدة بسيطة الفندق ابرك
وريح راسك الا اذا كنت تعرف شقة موثوقة
ومجربها من قبل وبتوفر عليك بالنسبة
لي الفندق أبرك والجنية يشجع
طايح

وآلله يوفقك