يبه او يمه ابي اطلع مع ربعي !!

[حمد 2002]

السلام عليكم ورحمه الله وبركاته

يبه ابي اطلع مع ربعي السوق انمتشى ؟
يمه ابي اطلع المطعم مع رفيجاتي ؟

يمه ابي ايفون الجديد ؟

يبه ابي لابتوب شخصي لي ؟

يمه ابي مصروف 10 ريال مايكفيني 5 ريال ؟

يمه ابي اروح حفله بيت رفيجتي ؟

يبه ابي بولارس ؟

يبه بروح مجلس الربع ؟

قد يتفاجؤن الاباء او الامهات بأسئلت اعيالهم من البنات والاولاد خلال فتره حياتهم من الطفوله الى المراهقه الى ان يكبرون ! ، لكن كيف من الممكن ان يتعامل الاباء ويقومون بالجواب بكل ذكاء وبدون ردت فعل سلبيه منهم ؟ وبشكل يقنع ابناءهم ؟

هالسؤال اتركه لتجارب الاعضاء الكرام !! ..

تحياتي ..

[غريب الدّار]

بس هاذي مب أسئلة ياحمد

هاذي طلبات !!

[الحياة الخالدة]

عليكم السلام ورحمة الله وبركاته

هاذي مب أسئلة .. هاذي طلبات
بس إن شاء الله الاعضاء يفيدونك من خبراتهم

[ولد العرب]

صحفي معيض حاول مره اخرى :taunt:

[ya3coub]

ان شاء الله اصحاب الخبره يفيدونك

[ضوى]

عودت عيالي والصغيرة الحين نفس الشي لما اقول لا مافي اي نقاش ولا ليش ولا اشمعنى لا يعني لا لين اقرر بنفسي اعطي والا ما اعطي مدري انا شخصيتي جذي سالفة التفلسف وياحبيبي واشرح له وهالخرابيط مالت علم النفس ماتمشي عندي

[nooora]

اولا تلبي طلبات للاولاد غالبا تكون سهله. مثلا بأن توافق تشتري له جوال او لابتوب للتعليم ا ان يطلع احيانا مب دائما مع ربعه بعلم ابيه مب من وراه. بعض الامور مثل هذه مافيها شي والموضوع جوال على حسب العمر. طبعا لابتوب وجوال تحت اشراف ايوه دائما وابدا ما ينشغل عن ولده ف مراقبة هذه الامور . والبنت غلط تحضر حفلات رفيجاته او تطلع السوق مع صديقاتها . اما بعض حفلات عائلية الام تكون متواجده معاها والأمهات بين بعض لكن ان بنت ترافج وحده وتطلع معاها احيانا حفله او شي من هالقبيل فهذا غير مقبول. واهم نقطه ان رفض طلبات لهم تكون بطريقه حلوه ومفهومه لان زمن الايناء غير عن زمن ابائهم بالعقل والحكمة نوافق او نرفض طلباتهم

[مناور]

1-طفلك شديد الكذب : انت شديد المحاسبة
2-طفلك لا يملك الثقة بنفسه : أنت لا تشجعه
3-طفلك قليل الكلام : أنت لا تحاوره
4-طفلك يسرق : أنت لم تعلمه فن العطاء و البذل
5-طفلك جبان : أنت تدافع عنه كثيراً
6-طفلك لا يحترم الآخرين : انت لا تحترمه و لا تخفض صوتك
7-طفلك دائم الغضب : انت لا تمح قدراته
8-طفلك بخيل : أنت لا تشاركه
9-طفلك يعتدى غلى غيره : انت عنيف
10-طفلك ضعيف : انت تستخدم التهديد
11-طفلك غيور : انت تهمله
12-طفلك يزعجك : انت لا تحتضنه و لا تقبله
13-طفلك لا يطيعك : انت كثير الطلبات
14-طفلك منطو : انت مشغول

[مخطط قطري]

بنسبه لي طلباتهم مجابه دام عندي الاستطاعه البي لهم رغباتهم لاب توب ايفون ايباد بورلاس هذي اشياء بسيطه الحين الولد يقولك يبه ابي روز رايس يوديني المدرسه مهايط من الحين ومع ذلك ماترده دام عندك قدره ماليه لاتقصر وياهم واسعدهم

[nooora]

بنسبه لي طلباتهم مجابه دام عندي الاستطاعه البي لهم رغباتهم لاب توب ايفون ايباد بورلاس هذي اشياء بسيطه الحين الولد يقولك يبه ابي روز رايس يوديني المدرسه مهايط من الحين ومع ذلك ماترده دام عندك قدره ماليه لاتقصر وياهم واسعدهم

شوف اخوي مافي مشاكل نلبي طلباتهم ومو اي طلب وعلى حسب العمر. اذا الخير واجد مب شرط نزينه بكل شي من فوق لتحت ونوفر لهم كل طلبات نعلمه ان مو اي شي يشتهيه النفس يتملكه ولا كيف نعلمهم ان بالعمل والاجتهاد تقدر توفر لنفسك الي تبيه. يعني باختصار ما ندلعه وايد. حتى اذا ظروف تسمح مو بتلبية طلباتهم نوصلهم لاخر مرحلة السعادة في امور كثيرة علينا توجيههم ونسعدهم بها. لان الياهل اذا شاف اي شي عند رفيجه بيحاول يشتري مثله ما نبيهم يتعودون على كوبي بيست بس شاف شي يبي مثله. ويعطيك العافيه

[7aayaahh1]

طلباتهم أوامر وإلي عندي لهم .. بكرة لين إكبروا تتمنى يطلبون منك ويكونون بحاجتك

[pink pearl]

عودت عيالي والصغيرة الحين نفس الشي لما اقول لا مافي اي نقاش ولا ليش ولا اشمعنى لا يعني لا لين اقرر بنفسي اعطي والا ما اعطي مدري انا شخصيتي جذي سالفة التفلسف وياحبيبي واشرح له وهالخرابيط مالت علم النفس ماتمشي عندي

والله ياضوى الزمن تغير، واللي كان يمشي علينا واحنا صغار ماعاد يمشي على هالجيل، أنا من رايي الطفل من حقه يعرف سبب الرفض و من حقه تحاورينه، على الأقل يعرف وجهة نظر أمه أو أبوه... أنا وهذاني كبيرة إن طلبت شي من الوالدة أو أخواني أو أخواتي أو حتى لو طلبت من شغلي شي ورفضوه على طول، بدون مايوضحون لي السبب، أزعل ويحز في الخاطر... وأشوفه نوع من أنواع الدكتاتوريه

فما بالكم بالصغار ؟؟ أنا ولدي عمره 7 سنوات والثاني 4سنوات أحاول أفهمهم سبب الرفض وأعطيهم بدائل، ومرات كثيرة أحسهم يقتنعون ويتقبلون مني وخصوصا اللي عمره 7، إن رفضتي على طول بدون أي سبب مقنع وبدون ماتناقشينه، احتمال (إن قدر) يسوي هالشي من وراج، وممكن بعد يمارس نفس الأسلوب مع اللي أصغر منه وحتى لما يكبر

[Charisma]

أعتقد *

أن الأسراف في تدليل الابناء وتلبية كل طلباتهم ورغباتهم خطأ كبير جدا ، حتى وأن كان مقتدر ولاتشكل هذه الطلبات أي مشاكل في توفيرها ، وعندي أسباب مقتنع بها وهي ان التعامل بهذه الطريقة مع الأبناء راح ينعكس سلبا عليهم وعلى شخصياتهم وعلى مستقبلهم ( أتكالية - حس المسؤولية - التخطيط - الطموح - المثابره ) ، ممكن نربط طلباتهم ورغباتهم بأنجازات يحققونها سواء في المدرسة او المنزل ..ألخ ، المهم ان تكون هنالك غاية يثابر من أجلها ، مع مراعاة نوعية الطلبات ، وعند الرفض يتم شرح الأسباب مع طرح البديل والتحفيز له .


بعض الأباء و الأمهات يبالغون في تدليل أبنائهم من منطلق ( خلهم يستانسون- انحرمنا وعانينا في طفولتنا مانبي عيالنا ينحرمون - مانبي عيالنا اقل مستوى من عيال الناس ) ربط خاطىء من كل النواحي.

والبعض يعتقد ان توفيرة لكل طلباتهم تغني عن باقي مسؤوليته تجاههم ( محاولة أرضاء للنفس عند التقصير والانشغال عنهم )



https://www.youtube.com/watch?v=pBp--89J1j8