هذه عقوبة مرتكبي "التفحيط" في دبي

[nooora]

بسم الله الرحمن الرحيم




قرر الشيخ #محمد_بن_راشد آل مكتوم نائب رئيس الإمارات رئيس مجلس الوزراء حاكم دبي، عقاب مرتكبي مخالفة القيام بحركات استعراضية خطرة بسياراتهم في منطقة #سيتي_ووك في #دبي قبل نحو أسبوع وهم سائق السيارة ومن كانوا معه داخل السيارة عقوبة بديلة تتمثل في إمضاء أربع ساعات يوميا في تنظيف الشوارع العامة في دبي لمدة شهر واحد، وذلك على سبيل الخدمة المجتمعية لتعويض ما تسبب فيه هؤلاء المتهورون من أضرار مادية ونفسية من ترويع للمارة وتهديد لسلامتهم.

وكان المستهترون المتورطون في الواقعة قد أقدموا على ارتكاب مخالفة القيام بحركات استعراضية خطرة بمركبة رباعية الدفع في أحد التقاطعات في منطقة "سيتي ووك" بدبي، حيث قام السائق بالدوران بالمركبة عدة دورات بسرعة كبيرة فيما يعرف بـ #التفحيط على الرغم من تواجد العديد من المركبات الأخرى وتواجد أسر ومشاة من جميع الأعمار، بما في ذلك الأطفال، ضاربا عرض الحائط بالقوانين والأخلاقيات العامة للطريق، ما شكل تهديدا مباشرا لسلامة المشاة في المنطقة، حيث بادرت #شرطة_دبي على الفور لتحديد هوية مرتكبي تلك المخالفة الجسيمة، ومن ثم توقيفهم واتخاذ الإجراءات القانونية حيالهم.

[نمر بن عدوان]

https://www.youtube.com/watch?v=u5B5lOWKWQQ

[نمر بن عدوان]

https://www.youtube.com/watch?v=l7PJja1KAjE

[معماري قطري]

التحفيص عنصر جذب سياحي والعقاب كذلك عنصر جذب سياحي

تعجبني دبي

[معماري قطري]

صدقوني اللي يحفص تصيده نشوة غصب عنه والمفروض العقاب على المساعد هو المحرض

[BoFahed]

صدقوني اللي يحفص تصيده نشوة غصب عنه والمفروض العقاب على المساعد هو المحرض

اخوي معماري لو يسوون خدمه مجتمعيه داوم في سياره اسعاف او مستشفى حمد قسم الطواري ل الشباب اللي يسابقون ويستعرضون صدقني بيستهدون غصب من هول الاصابات والكارثه وبتخف اعداد الوفيات الرهيب بين شباينا

ما ابالغ لو قلت انه ما فيه بيت او عايلة قطريه راح شاب من افرادها او قريابها في زهرة شبابه بسبب حوادث المرور

بننقرض ولازم سياسة العصا والجزرة وتعبنا من الواسطات

عندنا اشد القوانين والغرامات بس ما يتنفذ وما فيه للقانون هيبه عندنا بسب الواو قاتلها الله

[style]

وللاسف من يومين شباب من عائله النعيمي اعمارهم 15 سنه ،،توفو بحادث سرعه ...من المسوؤل،،الاب ؟الام؟المرور؟
من؟

[معماري قطري]

واجب الشرطة اخوي بو فهد كبير بس ما نشوفهم حتى لو نتصل بخصوص شكوى معينة يقولون تعالوا المركز

لو يفرضون وجودهم ويفتحون شوي ويطبقون القانون بيمسكون ناس كثيرين .. أولها يخلونه انذار ويسجلونه في نظام المرور وبعدين مخالفات تدريجية وعقوبات مثل هذي حتى ما تؤثر عليهم .. 4 ساعات مب شوي وتحتاج رقابة مشرف وفي دبي شغلهم ترتيب في هذي الأُمور

حضرت انا في أمريكا كورس اجباري مدته 4 ساعات صج مفيد وفيه شد انتباه بس من يغفل الواحد يجيه سؤال من المدرب ويحرجه لو ما كان متابع .. وفي وقت الناس طالعين من مدارسهم وأشغالهم ويحتاجون الراحة .. هذا لو يسوونه عندنا بيفيد كثير في الوعي

[BoFahed]

واجب الشرطة اخوي بو فهد كبير بس ما نشوفهم حتى لو نتصل بخصوص شكوى معينة يقولون تعالوا المركز

لو يفرضون وجودهم ويفتحون شوي ويطبقون القانون بيمسكون ناس كثيرين .. أولها يخلونه انذار ويسجلونه في نظام المرور وبعدين مخالفات تدريجية وعقوبات مثل هذي حتى ما تؤثر عليهم .. 4 ساعات مب شوي وتحتاج رقابة مشرف وفي دبي شغلهم ترتيب في هذي الأُمور

حضرت انا في أمريكا كورس اجباري مدته 4 ساعات صج مفيد وفيه شد انتباه بس من يغفل الواحد يجيه سؤال من المدرب ويحرجه لو ما كان متابع .. وفي وقت الناس طالعين من مدارسهم وأشغالهم ويحتاجون الراحة .. هذا لو يسوونه عندنا بيفيد كثير في الوعي
اتفق معاك اخوي الوعي والتاديب لازم الاثنين مع بعض علشان توصل لنتيجه ايجابية

ثقافة المواتر والاستعراض منتشره عندنا من السبعينات بس ماكانت كارثيه مثل هاليومين


لابد من تقييم الوضع وفيه جهود مباركه ما ننساها بس لازم اشياء تتغير

مثلا كان عندي معامله في المرور قسم المخالفات ما تتخييل الاتصالات اللي تجي للموظف علشان يمشيهم هذا غير اللي يجيك من الخلف وطبعا كلها واسطات اقولك الموظف فصل ولله كسر خاطري اقوله بند الجوال يقولي ما اقدر من الاهل بيزعلون مني

[سعود.]

صدقوني اللي يحفص تصيده نشوة غصب عنه والمفروض العقاب على المساعد هو المحرض


ههههههههههههه
صادق هو الي يعزز له

[السيف5]

يستاهلون الجلد
بنفس المكان اللي حفصوا فيه

[JN000N]

وحرق لسان بعد لان الفاظهم قذره

[محمد11]

وللاسف من يومين شباب من عائله النعيمي اعمارهم 15 سنه ،،توفو بحادث سرعه ...من المسوؤل،،الاب ؟الام؟المرور؟
من؟

المرور ماله خص ..
العتب على الي خلاه يسوق .. العتب على الي يشوف ولده وسيارته مشبوه .. العتب على الام والابو

[بانغ بانغ]

جعلهم الفضيحة على اللي سووه

محمد بن راشد رجل مجتمع وايهمه وضع دبي

مب شرط تسحب لياسن وسجن تكون الرادع .... الخدمة الاجتماعية تفيد وايد

انا سبق وطرحت على كم مسئول هالافكار

ان اللي يعجز والديه عن تربيته وايسوي جرم ، يجبرونه يخدم اجتماعيا مثل العمل في محطة البترول وكنس الشوارع اوالسكيوريتي او اي شغله تخدم المجتمع

[بوخالد911]

يستاهلون وأكثر من جذيه بعد

لو بعد ينظفون الحمامات بيكون ممتاززز

[nooora]

بعد واقعة التفحيط ...الشيخ محمد بن راشد يبهر المارة في دبي وهو ينتظر دوره للمرور بالشارع ...في تقديم قدوة إيجابية خاصة للشباب في الالتزام بالقوانين
https://youtu.be/6gpCe8E_SC4

[رُفق المجنّا]

كان مقترح الخدمة المجتمعية ( مثال: التنظيف بدال السجن) مقترح في الشورى ولكن تعطل أو بالاصح اختفى فجأة

القانون معمول به فالسعودية حسب القاضي.

[شبح الصمت]

يستاهلون في راسه حب ما انطحن يروح شوارع فاضيه لازم يعني وسط العالم وشوفوني

ومن زين استعراضه اهو فاشل والعبري الي جمبه افشل منه .


نفس سالفة عبسي ادعمه عبسي

اخرتها كلوووها .

[بانغ بانغ]

المشلكة في مستشاري شيوخنا

ان ما عندهم اي توجه او نظرة لتطوير البلد او الارتقاء بخدماتها

يا ابيض يا اسود

[السكين]

أحلى عقاب للفئة المستهترة هذه هي تنظيف حمّامات السجون لكسر نفسهم لأنه بمكان كله عساكر ما يقدر يتكلم كلمة . أقسم بالله أستغرب من واحد لحيته طالعة وسنّه كبير وتعدى مرحلة المراهقة وقاعد يستعرض ويعرض حياته وحياة غيره للخطر !

وهذا المعزز الطابوقة إيش وضعه وقاحة وقلة أدب وتحريض !

[ya3coub]

عقوبه ممتازة

ايضا في شخص توه اخذ عقوبة تدخين في مكان عام و تحررتله مخالفه بقيمه 700 درهم اماراتي

المفاجئة كانت لما راح يدفعها قالوله تدفع بس 100 و اتروح كل اماره و تدفع فيها 100 درهم و كل شهر مسموحلك مرة وحده


طبعا هاي مسجات واتس اب سوائا هالكلام صحيح او لا بس في مخالفات تأثيرها و تعبها المعنوي اكثر من الماده نفسها

والله يهديهم و يهدي شبابنا و المرور ايضا و بعض المسؤولين يا رب العالمين

[معماري قطري]

الغالبية يسوون نفسهم مثاليين ما حفصوا كلش

اعترفوا

[بوحنان]

كان مقترح الخدمة المجتمعية ( مثال: التنظيف بدال السجن) مقترح في الشورى ولكن تعطل أو بالاصح اختفى فجأة

القانون معمول به فالسعودية حسب القاضي.

اخوي ما أظن انه تعطل انا أخبر قبل سنتين شايف حكم على شخص قضيته مروريه وكان الحكم من القاضي بمعاونة رجال الدفاع المدني لمدة اسبوعين

[نيساني]

الغالبية يسوون نفسهم مثاليين ما حفصوا كلش

اعترفوا



بالعقل واحد عنده نيسان وش تتوقع :waiting:

ايام الطيش :shy:


ههههههههه

[R 7 A L]

ياليت يخلونهم عندنا ينظفون الروض والاسياف
او ينزلونهم اللولوه اوكتارا ينظفون ايام العطل الاسبوعية

[معماري قطري]

بالعقل واحد عنده نيسان وش تتوقع :waiting:

ايام الطيش :shy:


ههههههههه

استويت اشك إني الوحيد

انا صارت لي سالفة محرجة .. كانت دبة سيارتي تسرب هواء ومستانس على الصوت والسحبية وكل ما ادوس تعوي التواير .. سيارتي كانت جي موديل 1982 بو حنة يحن ولا يمشي بس ذاك اليوم مستوي نشيط .. المهم دخلت سوق العلي أيام عزه وزحمته الصبح ومع كل لفة الصوت وصوت التواير مسوي جو .. وأشوف الناس يطالعوني بشكل غريب قلت زين دوس بعد هذا تشجيع .. انتبهت وراي الا سيارة الشرطة مشغلين الرماقات ويعتبرونها مطاردة وانا غافل عنهم

زين نزل لي رجال شيبة كان وكيل أعتقد وطلبني الليسن وعطته سرعة وانا امش العرق والناس باديين يلتمون على هالمعتوه .. يطالع الليسن ويطالع ويهي ويقول ما يبين عليك تسوي هالشيء قلت له الصوت عذاب .. قال خلاص خذ ليسنك وروح قبل ليلتمون علينا الناس وكنا وسط ساحة ورا محد وصلنا للحين بس صج كان احراج

[معماري قطري]

ياليت يخلونهم عندنا ينظفون الروض والاسياف
او ينزلونهم اللولوه اوكتارا ينظفون ايام العطل الاسبوعية

رحال خايف يصيدوني عاد انا شلون انظف لو طاح شيء صعب القطه الركب والظهر

من فترة حول 11 أو 12 سنة عيالي صغار واحد مركبه جدام وواحد ورا ومشاغب كل شوي نط بين السيتين يلعب ومزعجني قلت خلني اسوي له حركة ولا حسبت النتائج .. كنا طالعين من مسجد المانع بعد صلاة الجمعة ( الله يشفيه سمعت إنه مريض ) المهم ومحلات المانع على طريق سلوى كلها مواقف وسيارات وشوية غبار على الطريق .. قلت احط السيارة في الخالي واسحب الهندبريك وبدون تردد سويتها وافترت السيارة وجابلت اللي وراي .. المشكلة كثير يعرفوني وخلاص هالحركات تبت اسويها بس جات عيني في عين اللي وراي وهو مستغرب شصار في السيارة افترت جذيه وفجأة وانا من الاحراج منزل راسي واحاول الف السيارة اكمل طريقي .. ولدي يقول يبه كنا نمسي سديه سلون لفينا

[nooora]

رحال خايف يصيدوني عاد انا شلون انظف لو طاح شيء صعب القطه الركب والظهر

من فترة حول 11 أو 12 سنة عيالي صغار واحد مركبه جدام وواحد ورا ومشاغب كل شوي نط بين السيتين يلعب ومزعجني قلت خلني اسوي له حركة ولا حسبت النتائج .. كنا طالعين من مسجد المانع بعد صلاة الجمعة ( الله يشفيه سمعت إنه مريض ) المهم ومحلات المانع على طريق سلوى كلها مواقف وسيارات وشوية غبار على الطريق .. قلت احط السيارة في الخالي واسحب الهندبريك وبدون تردد سويتها وافترت السيارة وجابلت اللي وراي .. المشكلة كثير يعرفوني وخلاص هالحركات تبت اسويها بس جات عيني في عين اللي وراي وهو مستغرب شصار في السيارة افترت جذيه وفجأة وانا من الاحراج منزل راسي واحاول الف السيارة اكمل طريقي .. ولدي يقول يبه كنا نمسي سديه سلون لفينا

اخوي معماري قاعد تعترف الحين لازم تتعاقب نخليك تسوق تاكسي بس مو اي تاكسي يسمونه تاكسي طائر عاد لف على راحتك ف الجو هههههههه

[ya3coub]

الغالبية يسوون نفسهم مثاليين ما حفصوا كلش

اعترفوا

للأسف كله صوالين و الحمد الله ما جاتني الفرصه بس ليلحين فالخاطر على خفيف

انا ضد جدام الناس او بالفرجان بس مرات وقت المطر بالذات افصل تراكشن السيارة و عن الخاطر اذا مافي احد عاللفه بس ما اكثر

اما عن التهور كان قبل ما اخذ الليسن بقت السيارة مره و ليومك لا يمكن اعيد الي سويته مادري اشلون جاتني الجرآة قبل

[asulaiti]

أنا أيام الطيش .. خذت سيارة الأهل وأدور بالفريج .. ماكان عندي ليسن .. المهم في ساحة في وسط الفريج ومزروعة عشب .. الساحة كانت ملعب لنا ..
المهم دخلت في وسط الساحة .. في عز الظهر ...... وأدوس له .. وتخميس كم مرة .. لين طلعت غبار ما قمت أشوف جدامي ... وقفت لين تروح الغبرة علشان أقدر أطلع ..
بعد ما راحت الغبرة إلا سيارة الشرطة واقفة جدامي ومشغلة الرماقات !!

صادوه ....

[نيساني]

شرايك معماري

هذا هم الشباب طلعوا اصبر اذا ماطلع نص المنتدى له في ال:vampire:


:app:

[معماري قطري]

اخوي معماري قاعد تعترف الحين لازم تتعاقب نخليك تسوق تاكسي بس مو اي تاكسي يسمونه تاكسي طائر عاد لف على راحتك ف الجو هههههههه

كان خاطري استوي طيار لو طيران شراعي لكن من وصلت 17 جاني السكر وممنوع علي الغطس والطيران والهبوط بمظلة

[معماري قطري]

للأسف كله صوالين و الحمد الله ما جاتني الفرصه بس ليلحين فالخاطر على خفيف

انا ضد جدام الناس او بالفرجان بس مرات وقت المطر بالذات افصل تراكشن السيارة و عن الخاطر اذا مافي احد عاللفه بس ما اكثر

اما عن التهور كان قبل ما اخذ الليسن بقت السيارة مره و ليومك لا يمكن اعيد الي سويته مادري اشلون جاتني الجرآة قبل

أبرك لك والحمد لله اللي نجيت كم مرة من موت محقق وألحين أكيد السواقة بعقل وملتزم بالقوانين الا السرعة أوقات ولو خط فاضي وما فيه رادارات

[معماري قطري]

أنا أيام الطيش .. خذت سيارة الأهل وأدور بالفريج .. ماكان عندي ليسن .. المهم في ساحة في وسط الفريج ومزروعة عشب .. الساحة كانت ملعب لنا ..
المهم دخلت في وسط الساحة .. في عز الظهر ...... وأدوس له .. وتخميس كم مرة .. لين طلعت غبار ما قمت أشوف جدامي ... وقفت لين تروح الغبرة علشان أقدر أطلع ..
بعد ما راحت الغبرة إلا سيارة الشرطة واقفة جدامي ومشغلة الرماقات !!

صادوه ....

خوش صيدة .. الشرطة يستغربون شنسوي فيه شنسوي

[معماري قطري]

شرايك معماري

هذا هم الشباب طلعوا اصبر اذا ماطلع نص المنتدى له في ال:vampire:


:app:

زين لو قرا مدير المرور وقال تعالوا ابيكم في سالفة شبنقول له

انا الحمد لله سابقاً

[nooora]

زين لو قرا مدير المرور وقال تعالوا ابيكم في سالفة شبنقول له

انا الحمد لله سابقاً

اعترافات ههههههههههه
نبي موظف مرور بالمنتدى

[معماري قطري]

اعترافات ههههههههههه
نبي موظف مرور بالمنتدى

تخيلي رجال كبير يسجنونه لمخالفة من حول 30 سنة

صار لي موقف مع قائد الشرطة السابق أو الأسبق في فترة بداية الثمانينات .. أحرجني بكلامه الطيب وكان يقدر يسجنني في اللحظة نفسها ولا كنت اعرفه بس ربعي قالوا لي

[nooora]

تخيلي رجال كبير يسجنونه لمخالفة من حول 30 سنة

صار لي موقف مع قائد الشرطة السابق أو الأسبق في فترة بداية الثمانينات .. أحرجني بكلامه الطيب وكان يقدر يسجنني في اللحظة نفسها ولا كنت اعرفه بس ربعي قالوا لي

بعد 30 سنه يسجنونه.. كان ملفه ف الارشيف ... شوف هذا الفيديو اخوي مطرشه لي ...شوي ويدخل عليهم المطعم .. :looking:
http://anmmmr.esy.es/do.php?id=231

[معماري قطري]

بعد 30 سنه يسجنونه.. كان ملفه ف الارشيف ... شوف هذا الفيديو اخوي مطرشه لي ...شوي ويدخل عليهم المطعم .. :looking:
http://anmmmr.esy.es/do.php?id=231

ما طلع شوفي الرابط في اليوتيوب وحطيه داخل اليوتيوب من اللستة فوق أحسن

[nooora]

اخوي هو مقطع فيديو ف الهاتف ... تضغط على اللينك ثم تضغط على الملف لتزيل الملف كما هو مكتوب .. طلع عندي اللينك شغال .. او كيف ممكن نحمل فيديو وما اظن كليب موجود بيوتيوب

[nooora]

بس اخوي ما تقلده هههههههه

[حليتان*]

يستاهلون