يحز بالخاطر

[JN000N]

السلام عليكم ورحمة الله وبركاته


،



،



مادري الغلط من وين من الاعلام الي ماندري بصدقه من كذبه
والا من المسؤولين اللي طالت فترة وعودهم بإن الأمور الإدارية والمالية بتتحسن
والا من التفرقة بالحقوق بين كبار الموظفين وبقية عامة الشعب والجهة الاخرى الأجانب



يعني مادري صج أبي اعرف من اصدق والا متى بتتوضح الامور
والا هي بتظل جذي عايمه للابد

مقال ينزل في الجريدة من فترة عن الشيخ عبدالله بن ناصر يذكر فيها ان من حق المواطن بالوظيفة قبل الاجنبي لو كان يستحقها او انه أهل لها والخ الخ

وثاني يوم بالضبط نلقى خبر تعيين مديرة مكتبة (قطر الوطنية) أجنبية!
مع مدح في بروفايلها يوصلها للقمر (وف النهايه ترى كلها علم معلومات ومكتبات) ومب صعب استلام المنصب في ظل وجود بدائل قطرية كثيييرة

مادري بالضبط ايش المعنى بس هل الخبر مضروب بعرض الحيط؟

ضحكتني ردة فعل وحده خليجيه جات تبي تتوظف ف قطر وقالت يوم رحت اقدم عالوظيفه قالي اللي قابلني في الموارد البشرية (مش قطري) ان التوظيف للقطريين ! تقول اقول في قلبي وانت ايش تطلع؟ اذا انت مدير التوظيف اصلا مش قطري!!!!


من كم يوم نزل خبر تعيين جديد وهذا حز ف خاطري وايد
عن موظف اجنبي بيستلم قسم الموارد البشرية في احدى الجهات واللي كان يشتغل مدير بنك في احدى الدول المجاوره!
انزين ليش يعني
ومدير بنك بعد كان وفي نفس الوقت في مدير موارد بشرية قطري
ليش الاجنبي لازم يكون موجود


معليه رضينا بالهم وقلنا مب مشكله الدوله تستقطبهم وفيها فايده لنا والخ الخ ومن هالكلام اللي دوم نسمعه (واكبر كذبه عرفها التاريخ القطري) انهم هني عشان يدربون الكادر القطري تحتهم وبعدها يروحون بلادهم ويستلم القطري المنصب


عموما
عندنا كفاءه قطريين قعدوهم فالبيت منهم دكاتره ومنهم تغربو اكثر من عشر سنين من ايام الثمانينات والتسعينات ورجعو بشهادات تشرف وترفع الراس ومستواها عالي ولكن درجتهم الوظيفية (اقل من الاجنبي الي مادري شفيه زود) والمشكله نفسه هاي الاجنبي المسؤول للظهور اعلاميا يدور الموظفين القطريين واذا كان عنده موظف قطري وموظف توه متجنس ياخذ المتجنس ويترك القطري
ع اساس انهم اثنين نفس الشي يعتبرون قطريين ويمثلون البلاد :)

على فكرة المقصد بهالموضوع بكلمة الاجنبي مب بس الي ما يتكلمون عربي حتى بعض العرب الي انحطو مسؤولين علينا ماقصرو فينا

صارت في بعض الجهات او معظمها

كبار الموظفين هم الاجانب وصغارهم هم القطريين حتى لو عندهم شهادة ماستر او خبره


اكثر شي كان يضحكني
ان مسؤول اجنبي تحته نائب قطري
والمسؤول هذا قالبها حرب على القطري اللي كان حتى ف الويكند يروح يخلص شغله (والي يضحك اكثر ان المسؤول خسس في تقييم القطري الي يوم حاججه انه حتى في الويكند يشتغل قاله شيضمني انك ماتجي تقعد عالجهاز بس ما تشتغل؟!!!)
وفوق هذا المسؤول الاجنبي نفسه لما يطلع اجازه او عنده بزنز ترب (فالسنه عادي عشر مرات بزنز ترب) ملزوم يسوي delegation للنائب القطري
بس شايل عنه الصلاحية في التوظيف او النقل او الترقيه او الميزانية او او او
عيل مسويله ديليقيشن ليش يالحبيب :)


على فكرة وللتوضيح
معظم هذي الامور وغيرها كثير يدري عنها المسؤول القطري الي فوقهم بس مافي اي اكشن حيالها او حتى كلمة (تسر الخاطر) على العكس بالنسبة لهم اهم شي الشغل يخلص




وايد اشياء تصير تحز ف الخاطر بس ما باليد حيله والله كريم

[بانغ بانغ]

اللي ايحز بالخاطر ان القطري اللي ينحط في منصب خاصة من حديثي النعمة ويقعد ضرب في القطريين بحجة الإنتاجية وهم اللي شالين شغله وعقب اينزل تقييمهم

اما الأجنبي ماحط نفسه بنفسه ، القطري حطه بيده

اما الفرقعات الإعلامية ..... مجرد شو وبندول للقطريين

[بعيد النظر]

ربعنا يحبونهم للأسف واتفق معاج في كل اللي كتبتيه ..
وتمر علينا هـ المواقف في الدوام ..


ونقول .. ما بعد الصبر الا الفرج ان شاء الله ..


الأجنبي يحطونه .. ما عنده الا اللغة وعيونه الشقر !!
وتخبط في كللللل شي .. من عقبها !

[الدوحه1]

نموذج من التقطير...

http://gulf-up.com/do.php?img=278387 (http://gulf-up.com/)

http://gulf-up.com/do.php?img=278388 (http://gulf-up.com/)

[ساراام]

شنسوي بعد احنا اللي رفعناهم وجاملناهم ع حسبانا

اما كلام الجرايد انا ماصدق اي شي ينقال لانه كلام ف كلام

[السيف5]

كلامك فعلا يحز في الخاطر ويتعب القلب
انا شخصيا اشك في التقطير طالما هالاجانب ماكلينا اكل حتى بالوظائف العادية
واشوف التقاعد الاجباري لقطريين في الاربعينات لأي سبب كان ..يفتعلونه
والجرائد شغلتها التطبيل ولكن الحمد لله لنا عيون نشوف وعقل يفهم الواقع

[حمد بن سعد]

الله كريم

[Rider]

موضوعج أختي صرخه من صرخات الموطن القطري لي للاسف ماحد راضي يسمعها فخاطري كلام لكن ماقدر اقوله

[الســيل]

اللي ايحز بالخاطر ان القطري اللي ينحط في منصب خاصة من حديثي النعمة ويقعد ضرب في القطريين بحجة الإنتاجية وهم اللي شالين شغله وعقب اينزل تقييمهم

اما الأجنبي ماحط نفسه بنفسه ، القطري حطه بيده

اما الفرقعات الإعلامية ..... مجرد شو وبندول للقطريين


للاسف هذا اللي نواجهه المصيبه مو في الاجنبي المصيبه في القطري اللي يحارب قطري

[kitmat]

الاجانب متوظفين والقطري في بلادة يدور شغل للاسف

[رجل تعليم]

الله يصلح الحال

[qatarman8008]

للاسف هذا هو الحال فعلا..
المشكلة والحل عندنا احنا القطريين..
ما احط اللوم ابدا عالاجانب..

[المحاميه]

اممممم ...

[وحيد-الشوق]

وايد اشياء تحز بالخاطر الله كريم والمشكلة البلاء من ربعنا

رواتب بعض الاجانب وتوظيفهم بدل القطري معادلة صعبة جداً ليس لها حل ولاتفسير :(

[سالم الزهران]

الله يمسيكم بالخير , الامثلة كثيرة و السوالف اكثر

لكن الشيء اللي اذا ذكرته ضحكت واستغربت هو امتحان دوري يلحقونا فيه ويخص اللغة العربية , هالمرةّ الاختبار سوته الجامعة والمشرف عليه اخ مقيم الله يصلح شأنه وبس. المهم سلمونا نتايج الاختبارات و وجدنا الوضع كله رسوووب! فيه اثنين ناجحين انا واحد منهم ( ولا تغترون ناجحين على الحافّة ) .

الحاصل اني ناقشت الدكتور واضع الامتحان و اكتشفت انه يصحح بمزاجيه و لا عنده نموذج اجابه ( ؟)

اخترت شيء واحد من اللي جاوبت عليه ومتأكد انه صح و تفاجئت انه مب عارف ! وقاعد لنا ومنجحنا على الحد الأدنى ؟

للأسف وظيفته مب مرتبطه بها الامتحان , لكن الشيطان سوّل له :)

[بوخالد911]

أكبر أكذوبة هي : التقطير

ولحد يناقض نفسه ويلف ويدور.

[بنت شرق]

بمكان شغلنا ما يوظفون الا القطريين الله اعلم بالاماكن الثانية

[khalid525]

اشوف التزام كبير بالتقطير من قبل المؤسسات والهيئات الحكومية وهناك رقابة من عدة جهات للتقيد بسياسة التقطير ، اما اللي يصر على التعيين بجهه معينة وما يبي غيرها هذا ما اعتبره من ضمن البطالة هذا انسان لديه شروط فما عليه الا ان يصبر لاجل غير مسمى

[معماري قطري]

شخص مطلع يذكر لي إن خبير أجنبي راتبه 500 ألف ريال غير علاوات ثانية وشغله مب صعب جداً

[R 7 A L]

الخلل والخطا من ربعنا هم الي جايبينهم ومعطينهم هالاوفر الي مايحلمون فيه

[غايه الطواش]

جنون شكلكج تقصدين الي نزل تعميمه الاسبوع الي فات
والي اني حسيت بغصه
القطري ممتاز وكفو خلوه ادفايزر وهاذي مادري شبسوي والله ان القطري الي كان ماسك المكان تطور من الاتش ار والحين قاعده تنهار طيب ردو الكفاءه الي كانت موجوده
اوك ماتبونه في ميه قطري كفو لها المكان
هاي مب شي صعب او تخصص مستحيل

اقول قريتي الايميل الامسي عن الاستغناء عن بعض الموظفيين بنهار لو استغنوا عن قطريين وخلو اجانب



لو فكرتي فيها شوي بتشوفين اثنينهم يشتغلون في نفس الموسسه

[JN000N]

جنون شكلكج تقصدين الي نزل تعميمه الاسبوع الي فات
والي اني حسيت بغصه
القطري ممتاز وكفو خلوه ادفايزر وهاذي مادري شبسوي والله ان القطري الي كان ماسك المكان تطور من الاتش ار والحين قاعده تنهار طيب ردو الكفاءه الي كانت موجوده
اوك ماتبونه في ميه قطري كفو لها المكان
هاي مب شي صعب او تخصص مستحيل

اقول قريتي الايميل الامسي عن الاستغناء عن بعض الموظفيين بنهار لو استغنوا عن قطريين وخلو اجانب



لو فكرتي فيها شوي بتشوفين اثنينهم يشتغلون في نفس الموسسه

اي والله ايميل ذاك الاسبوع اللي عور قلبي
جنه مافي الا هالاجنبي الي بيصحح المسار
وايميل امس بعض الاجانب قالو شكلنا الاسبوع الياي ما راح نكون معاكم
قلتلهم شكلنا احنا الي ما راح نكون معاكم
الي يحر اكثر ان موقفين ترقيات ونقل علينا احنا بس صوبنا
بس كل كم يوم موظف يديد ومنصب يديد وشوفي القهر في linkedin

[JN000N]

اللي ايحز بالخاطر ان القطري اللي ينحط في منصب خاصة من حديثي النعمة ويقعد ضرب في القطريين بحجة الإنتاجية وهم اللي شالين شغله وعقب اينزل تقييمهم

اما الأجنبي ماحط نفسه بنفسه ، القطري حطه بيده

اما الفرقعات الإعلامية ..... مجرد شو وبندول للقطريين

نفسه القطري الي وصل وصار ظالم كان يمر بالظلم ويعرف كل البلاوي الي تصير
بس من يترفع ويقبض منصب يبدا يستبد عالبقيه
وطبعا الاجنبي احسن من القطري

[JN000N]

ربعنا يحبونهم للأسف واتفق معاج في كل اللي كتبتيه ..
وتمر علينا هـ المواقف في الدوام ..


ونقول .. ما بعد الصبر الا الفرج ان شاء الله ..


الأجنبي يحطونه .. ما عنده الا اللغة وعيونه الشقر !!
وتخبط في كللللل شي .. من عقبها !

ماعنده شي كلش زود عن الي عندنا
حتى اللغه ما يحتاج يكون هو موجود عشان يتوصى فيها
عيزنا واحنا عيالنا برا يدرسون وفالمدينه التعليميه وف جامعه قطر ويدخلون معاهد وياخذون دورات ويتعلمون
واخر شي هو وظيفه اقل من عاديه ووجوده والعدم واحد لان مسؤوله ما يعتم. عليه وراز الاجنبي بداله

[مستـريــح البـــال]

اللــه المستعان ، ، أدري إن الموضوع فضفضه لا غير . .

ماني بسلبي ، ، بس الواقع واضح ومؤسف للغاية ، ، والله إن الفتره الأخيره إخواننا وعيالنا عقلياً وفكريا أبدعوا في كل المجالات ، ،

بس لين ينصدم في المتحجر على الكرسي وأعوانه ، ، واللي ريقل من الخرعه وعلى باله بتكسير مجاديفهم بيحافظ على كرسيه ، ، يتغير القطري ، ، ويدخل في حروب ونطاحات معهم كل همه يثبت نفسه بس ، ، وهنيه يهمش ، وتهل عليه الإنذارات ، و ...

والله شي يقهر ، ، إجرام في حق قطر وأهلها وعيالها ومستقبلها ، ، علشان حضرة جناب المنصب . .

اللـــــــــــــــــه المستعــــــــــــــــــــــــان . .

[محمد11]

اللي ايحز بالخاطر ان القطري اللي ينحط في منصب خاصة من حديثي النعمة ويقعد ضرب في القطريين بحجة الإنتاجية وهم اللي شالين شغله وعقب اينزل تقييمهم

اما الأجنبي ماحط نفسه بنفسه ، القطري حطه بيده

اما الفرقعات الإعلامية ..... مجرد شو وبندول للقطريين


ابدعت

[ناسداك]

من الحلول الي اشوفها تدريب القطري عن طريق اجنبي و بتابعونه اول بأول يعني تقييم شكلي كل شهر حتى يستوعب المواطن العمل و صدقني في همه في المواطن القطري بس يحاولون يخلونه على جنب واذا ما تعلم المواطن الشغل يسأل المقيم عن السبب و يحاسب , وهم يعقدون الشغل و يصعبونه على المواطن متعمدين هالشي و ولا تنسى رواتب بعض القطاع الخاص اكثر من الحكومة .
بس بصراحة في زمنا هذا محد يعلم حد اي شي للاسف كان من يكون

[ناسداك]

في احد البنوك منذ 11 سنة تقريبا تم انهاء خدمات مدير ادارة الموارد البشرية من جنسية اسيوية بسبب اعطاء بيانات غير حقيقية عن نسبة المواطنين لوزارة العمل و الاسكان و الشؤون الاجتماعية بمسماها القديم

[عايش فرحان]

من خبرتي و معاشرتي للناس في مجال البترول ..

اذا مسئولك القطري .. فاهم شغله و متمكن .. راح تترقى و راح يعلمك شلون تطور نفسك

و اما اذا كان مسئولك القطري .. خذ المنصب بالواسطة او بالحظ .. و هو ما يفهم الشغل .. راح تحصله يحيط نفسه بالأجانب .. و اي خريج قطري يقرب منه او من حاشيته الأجنبية اللي شايلينه و يسوون شغله راح يراويه نجوم الظهر و يخليه يمشي و هو يكلم نفسه ..

[معماري قطري]

مستغرب ليش ما عندنا عقليات تطور الشغل وتنمي قدرات الموظفين أهل البلاد وتعتمد عليهم أكثر وأكثر .. زين مسؤول مصلحتك الشخصية في الإنجاز أكثر حق بلادك ولعيال بلادك

أذكر مسؤولي نقلوه لمشروع كبير ورحت ابي انقل عنده وقاعد في ذاك البرج نص مكاتبه خالية .. الا اشوف ربعنا كلهم عنده وجوه مألوفة وكلهم أجانب يشتغلون الصبح معانا والليل بارت تايم عنده .. قلت له يا اخوي اطلبني انتداب قال عندنا تكدس ولازم نقلل العدد واللي اعرفه يدور ناس .. المهم جاه واحد من ربعنا الصغار بعد لأنه كان من الصف الأول وانا واللي انتقل لمكانه من الصف الثاني .. جاء وفتش وراه وحصل شوية قصور وتلاعب ورجعه وهنا انا تشمت ويحق لي

يستوي صراع بين قطريين على أُمور تافهة وينتهي واحد ضحية والأجانب كاسبين في كل حالة

[S350]

ذبحتونا في هل اجانب المشكلة ان غالب اللي ينتقدون متجنسين الدولة الحمدالله مش مقصرة بشي والشخص اذا شغلة زين بيفرض وجودة والادلة كثيرة..

[JN000N]

ذبحتونا في هل اجانب المشكلة ان غالب اللي ينتقدون متجنسين الدولة الحمدالله مش مقصرة بشي والشخص اذا شغلة زين بيفرض وجودة والادلة كثيرة..

بالعدال على روحك يالقطري الاصلي
زين يلا هات الادله :)

[ameeer3]

لو نرجع وندقق في جنسيات ها الأجانب ، بنلاحظ ان جنسياتهم محصوره( خصوصا الاجانب الي من الجنسية الغير عربيه)

بأختصار: السياسة وملف 2022 هو وراء تعيين ها الأجانب في المناصب والرواتب ... والخ.

[nooora]

انا قريت الموضوع وما مريت على كل الردود. تعليقي على الموضوع ان القطري قاعد ينظلم من قطري قبل الاجنبي . شلون . اذا كان رئيس قسم او مدير قسم قطري هو بنفسه يفضل موظفين الاجانب عنده من قطري .. مادري ليش .. كل شي واسطات حتى لو في وظائف شاغره ما يستفيد منه المواطن

[ناسداك]

انا قريت الموضوع وما مريت على كل الردود. تعليقي على الموضوع ان القطري قاعد ينظلم من قطري قبل الاجنبي . شلون . اذا كان رئيس قسم او مدير قسم قطري هو بنفسه يفضل موظفين الاجانب عنده من قطري .. مادري ليش .. كل شي واسطات حتى لو في وظائف شاغره ما يستفيد منه المواطن
الموظف المسؤول القطري او رئيس القسم القطري او مدير الادارة القطري يفضل الاجانب بسبب فهمهم للشغل تماما و اذا كان في مواطن قطري يركنه الاجنبي على جنب و ما يعلمه اي شيء فكيف تبي المواطن القطري يتعلم انا صار لي 8 سنوات في احدى وزارات الدولة و توني قبل سنة تقريبا فهمت الشغل لازم يهتم المسؤولين القطريين و يساعدون المواطن

[nooora]

الموظف المسؤول القطري او رئيس القسم القطري او مدير الادارة القطري يفضل الاجانب بسبب فهمهم للشغل تماما و اذا كان في مواطن قطري يركنه الاجنبي على جنب و ما يعلمه اي شيء فكيف تبي المواطن القطري يتعلم انا صار لي 8 سنوات في احدى وزارات الدولة و توني قبل سنة تقريبا فهمت الشغل لازم يهتم المسؤولين القطريين و يساعدون المواطن

مدير القطري او رئيس قسم يفضل الاجنبي لان الاجنبي مثل ماشين ويمكن يخلص له شغل بيت بعد ... ماني ذاكرة اسم شخص لكن في جهة معروفه مسؤول قطري مصاحب مدير موارد بشرية اجنبي وكاش قايل له مابي قطريين عندي . مادري ليش يمكن حسد او ان قطري اذا تعيين ما يسكت عن الغلط والمدير يبي ياخذ راحته والاجانب صم بكم .. اول خطوة مدير موارد البشرية يتعين قطري ثانيا المناصب الكبيرة يستلمها قطري بدون كلام. بالذات قسم المشتريات واكيد الكل سمع عن نهب وسرقات ف اقسام المشتريات الي شغالين فيه الاجانب. هذا القسم بالذات يتعين فيه قطريين فقط من صغير لكبير .

[ضوى]

ذبحتونا في هل اجانب المشكلة ان غالب اللي ينتقدون متجنسين الدولة الحمدالله مش مقصرة بشي والشخص اذا شغلة زين بيفرض وجودة والادلة كثيرة..

ماشاء الله كلنا متجنسين بوووو مافينا واحد اصيل افااا والله

[ضوى]

عيل لو اقولج ياجنون اللي اعرفه شبتقولين بتحطين راسج بين ايدج

الله المستعان ونقول مايصح الا الصحيح ولو طال الزمن

[الماريّة]

الله المستعان فعلا الاجانب استولوا على كل شي
وخاشرونا وزاحمونا وضايقونا في بلادنا ورزقنا و في كل شي

ومن شفت من هب ودب من كل دوله ومن كل مكان جا يركض على قطر
ومايتم له سنه الا فيه احسن حال وافخم عيشه وانا داريه انهم محصلين الي بونه
بسهوله والمجال مفتوح لهم


الحين عيالنا ورجالنا كلهم شهادات عليا والي شهادته من برى والي من جامعات قطر
وش الي قاصرهم ماينحطون بدال هالاجانب في هالمناصب

على الاقل القطري قلبه على بلاده بيشتغل حبا في بلاده قبل حبه في راتبه مهب نفس الاجنبي
( لا لي ولا لأهلي ) ماهمه الا المال بس وكل يوم سامعين نصب وسرقات بمبالغ كبيره

ليش يمزيون ويفضلون الاجنبي عليهم بكل منصب وبكل مكان ...

اااااااالله المستعان صدق ياجنون وموضوعج جا بوقته وضرب على الوتر الحساس

وماقول الا ( أأأأأأسين على قطر )) من كل اجنبي ومن كل هب ودب ينبش منها


/
/
/

[بوحارب]

روحي شوفي الأجانب شلون لاعبين في مؤسسة حمد

[A-Alansari]

المشكلة مب في الاجنبي المشكلة في القطري نفسه

لانه الاجنبي ماحط نفسه الي حطه قطري

الفرق بين القطري والاجنبي ان القطري يخاف على منصبه ويحط اجانب حوله عشان محد فيهم يتكلم ويخلصون شغله اما الاجانب يساعدون بعض عشان يتوظفون

[JN000N]

ايواااااه يالماريه

هني الغمنده

الحين ثلاث ارباع هل قطر جامعيين واصحاب شهادات عليا ودكتوراه وماعليهم قصور
هذاك اول كانو ثانويه واعداديه ونادر عندهم جامعيه
الحين شناقصهم عيالنا مايستلمون المناصب؟

[JN000N]

المشكلة مب في الاجنبي المشكلة في القطري نفسه

لانه الاجنبي ماحط نفسه الي حطه قطري

الفرق بين القطري والاجنبي ان القطري يخاف على منصبه ويحط اجانب حوله عشان محد فيهم يتكلم ويخلصون شغله اما الاجانب يساعدون بعض عشان يتوظفون

الاثنين
مب بس القطري
انا اقولك عندنا النوعين
وكلهم وجهان لعمله واحده

[JN000N]

روحي شوفي الأجانب شلون لاعبين في مؤسسة حمد

بس مؤسسة حمد!
بووه يبيلك ابديت عيل
في كل مكان منتشرين مستحوذين على كل شي