هل هي طرارة من نوع جديد ؟! ومن يفهمهم الخطورة ؟

[fhd4]

السلام عليكم ورحمة الله

بالنسبة للعمالة الموجودة في مواقف السيارات ويلحقون وراك لتنظيف السيارة

أسوأ وأخطر شي في الموضوع هو وقوفهم خلف السيارات أثناء رجوعها … ممكن لا سمح الله واحد تفلت عليه السيارة ويرجع بسرعة ويتسبب في حادث دهس …

طبعاً المسؤول والمتسبب في الحادث بيكون هو السائق أولاً وأخيراً…

عن نفسي ما أعطيهم مجال يكونون ورى السيارة … أول ما ينقز واحد أوقف السيارة وأقوله يبعد وبعدين أفهمه السبب … لكن أكثرهم عمالة بسيطة ومب متعلمين …

ما أعرف الجهة الرقابية والمسؤولة وهل فيه أي متابعة عليهم؟ … ولاحظت بعد وجودهم عند بعض المساجد وقت صلاة الجمعة ويغسلون السيارات وقت الخطبة والصلاة ومنهم مسلمين للأسف …

رايكم في الموضوع ؟

[العفريت 2022]

عليكم السلام ورحمه الله

لاتعتبر في اعتقادي اطراره لان بقدم خدمه مقابل المال

لو عطيته ريال اقل تقدير ممكن يروح يشتري ماي

ونستدل على حديث ابي ذَر رضي الله وعنه :

( عن أبي ذر رضي اللّه عنه أن رسول اللّه قال: بينما رجلٌ يمشي بطريق اشتدَّ عليه العطشُ. فوجد بئرا فنزل فيها، فشرب، ثم خرج، فإِذا كلبٌ يلهَثُ، يأكل الثَّرَى من العطش. فقال الرجل: "لقد بَلَغَ هذا الكلبَ من العطش مثلُ الذي كان قد بلغ مني ".
فنزل البئرَ، فملأ خفَّه ماءً، ثم أمسكه بفيه حتى رقِي فسقى الكلب. فشكر الله له، فغفر له.

قالوا: "يا رسول اللّه، وإن لنا في البهائم أجرا؟ ". فقال: " في كل كبِد رطبة أجرٌ".)

في كل كبد رطبه أجر لم يحدد جنس أو ديانه

بمنحه ريال واحد اكتسبت اجر ورويت عطشه

اما بالنسبة وقوفهم خلف السياره ممكن التنبيه عليه ولو اول ماشفته عطيته فلوس بيروح عنك

شكرًا

[بوخالد911]

اكثروا هالايام
وصاروا منتشرين صوب محلات الكرررك !!!

صايدين المكان الصح !!!

الشرهه على اللي نثرهم بالشوارع

[ضوى]

اكره هالحركة على اساس يبي يساعدني ، الله يحفظهم من كل شر ويحفظنا من كل شر

بو خالد الرزق عند الله ، اكيد اللي نثرهم تخلى عن مسؤولياته تجاههم ووراهم بيوت وعوايل اكيد بيشتغل اي شي عشان يسد

يارب الحمد لله على نعمتك

[R 7 A L]

هذولا تابعين لمن
للمجمع ولا شركات خاصة
وهل استطيع اجيب لي عمال واهدهم في مكان او مواقف عامه يشتغلون لحسابي ؟

[مرتبش]

الله يرزق الجميع
اشوفهم باعداد كبيرة في المجمعات .. ليش نحتاج هذا العدد من العمال وبهذا الاسلوب البدائي .

[nooora]

يعطيك العافيه على طرح هالموضوع
مافيها شي لو الواحد يعطيهم بضع ريالات والصدقه توجب على المسلمين وغير مسلمين
مو كل واحد نصاب وكذاب لاتردوا شخص . الحمدلله على نعمة الامن والامان

[nooora]

وكلامك عدل وقوفهم خلف السيارة خطر احيانا السائق ما ينتبه لهم

[khaldoon]

في مصر في ناس تشتغل بوظيفه اسمها السايس......لما تيجي ترجع بسيارتك للخلف يقعد يسويلك حركات انه يدلك اشلون ترجع من غير ما تخبط و ينبه فيك مع انك ما طبلت منه ولا انت محتاجه.... فلسفه زيادة منه علشان بس توقف و تنزل من السياره تدفعله فلوس انه خدمك و انه لو انه ما ساعدك كان ما قدرت توقف و كان ممكن تخبط...... لازم تدفعله ...لو ما دفعت و رحت بيجيب جماعته المتخبيين و ما اضمن ايش بيسوون في سيارتك وانت بعيد عنها .....يعني بالعربي الفصيح ....بلطجه

[Dana’1]

الحركه هذي توتر بالذات اذا يلصق بالسياره طيب شلون اريوس وبعضهم حتى قدام السياره يأشر قرب اكثر ادعمك مثلا!
مرات ااشر لهم الامور طيبه وكل شي اوك عشان يبعد من قدام واقدر اصف

الله المستعان

[ورد الدوحه]

والله يكسرون الخاطر وااااايد
أحس ماعندهم مكان يرتاحون فيه شمس وحر
لين شفتوهم عطوهم المجسوم وجزاكم الله خير

[النهار]

هذولا تابعين لمن
للمجمع ولا شركات خاصة
وهل استطيع اجيب لي عمال واهدهم في مكان او مواقف عامه يشتغلون لحسابي ؟

معظم هؤلا عندهم تصريح من الجهات المعنيه في الدوله

[الماريّة]

دامني بعطيه مقابل شغله ماتعتبر طراره
هذا رزق

[ساراام]

مساكين كل يوم اشوفهم من صبح واقفين فالمواقف وينطرون رزقهم

لاحظت محد يعطيهم الا البعض ،،اليوم الساعه 9 واحد داخ شكله جاته ضربه شمس

بس مثل ماقلت مشكلتهم يوقفون ورا السياره المفروض شركتهم تنبهم والامور طيبه ان شاءالله

[fhd4]

عليكم السلام ورحمه الله

لاتعتبر في اعتقادي اطراره لان بقدم خدمه مقابل المال

لو عطيته ريال اقل تقدير ممكن يروح يشتري ماي

ونستدل على حديث ابي ذَر رضي الله وعنه :

( عن أبي ذر رضي اللّه عنه أن رسول اللّه قال: بينما رجلٌ يمشي بطريق اشتدَّ عليه العطشُ. فوجد بئرا فنزل فيها، فشرب، ثم خرج، فإِذا كلبٌ يلهَثُ، يأكل الثَّرَى من العطش. فقال الرجل: "لقد بَلَغَ هذا الكلبَ من العطش مثلُ الذي كان قد بلغ مني ".
فنزل البئرَ، فملأ خفَّه ماءً، ثم أمسكه بفيه حتى رقِي فسقى الكلب. فشكر الله له، فغفر له.

قالوا: "يا رسول اللّه، وإن لنا في البهائم أجرا؟ ". فقال: " في كل كبِد رطبة أجرٌ".)

في كل كبد رطبه أجر لم يحدد جنس أو ديانه

بمنحه ريال واحد اكتسبت اجر ورويت عطشه

اما بالنسبة وقوفهم خلف السياره ممكن التنبيه عليه ولو اول ماشفته عطيته فلوس بيروح عنك

شكرًا

جزاك الله خير …

[fhd4]

اكثروا هالايام
وصاروا منتشرين صوب محلات الكرررك !!!

صايدين المكان الصح !!!

الشرهه على اللي نثرهم بالشوارع


الي جابهم إن كان يبي لهم الخير فجزاه الله خير أما إذا استغلال فالله يعينه …

[fhd4]

اكره هالحركة على اساس يبي يساعدني ، الله يحفظهم من كل شر ويحفظنا من كل شر

بو خالد الرزق عند الله ، اكيد اللي نثرهم تخلى عن مسؤولياته تجاههم ووراهم بيوت وعوايل اكيد بيشتغل اي شي عشان يسد

يارب الحمد لله على نعمتك

اللهم لك الحمد على نعمك كلها

[معماري قطري]

احنا شذنبنا ننطر وكل مشاريعنا الحضارية بنشوفها في 2022 أو قبلها بأيام

الحل في رايي أي واحد مثل ذيلا تمسكه الدورية سيدة سجن ويتم التحقيق مع كفيله لو هاده بدون عمل ويتحاسب .. بعدين قانون التعرض للسيارات ومن فيها لازم يتحدد بشكل واضح ويكون اللوم في الحادث على اللي يوقف ورا السيارة وهي بتريوس أو يقطع طريق من مكان غير مخصص للعبور .. مثل ما السيارات عليها قوانين المفروض المشاة وكذلك السياكل بنوعيها

[ممنوع اللمس]

اكثر ناس يضايقوني فالمجمعات
خاصه ياشر لك قدم قدم يعني انا مافهم والا شنو؟

[fhd4]

هذولا تابعين لمن
للمجمع ولا شركات خاصة
وهل استطيع اجيب لي عمال واهدهم في مكان او مواقف عامه يشتغلون لحسابي ؟

شركات خاصة … لكن ايام قبل كانت شركات مرتبة وأنظف … الحين شركات كثيرة وماتدري كفاءتها

[fhd4]

الله يرزق الجميع
اشوفهم باعداد كبيرة في المجمعات .. ليش نحتاج هذا العدد من العمال وبهذا الاسلوب البدائي .

آمين … صحيح كلامك

[عاشق العديد]

السلام عليكم جميع ..

فالبدايه كنت أقول والله يكسرون الخاطر وخل يغسل ..

لكن يوم شفت انه الموضوع أي كلام ومافي غسيل أساسا عدل قمت مستحيل اغسل عندهم لكن اعدادهمممم بكثرررررررررره .. وهذا شي غلط

[بوحارب]

الله يعينهم ويرزقهم

يدورون لقمه العيش ولكن بالطريقة هذي غلططططط وغلط كبير

خصوصا لين يوقف قدام السيارة عشان يقولي فيه موقف هنا !!!

واللي يقهر اكثر لين يلحقني في المواقف ويسألني تبي غسيل

مع العلم موتري يكون مغسول ويلق والتواير تلمع من الباليس والأخ يسأل !!!

يعني ما تشوف الموتر نظيف كيف !

[مرتبش]

نثر العمالة باعداد ضخمة وبرواتب متدنية افرز وضع انساني لايجب السكوت عنه
وهذا مثال للتفكر
http://www.raya.com/mob/getpage/f6451603-4dff-4ca1-9c10-122741d17432/14b3d947-8d1a-4854-96c4-8ce3e42294ef

[الحياة الخالدة]

السلام عليكم ورحمة الله وبركاته
معليش يا جماعة
يعني أكيد محد يكره عمل الخير وأنه يساعد المحتاج ومب شرط كل شي الواحد منا يسويه بيجي هنا يكتبه ويصرح فيه
هذا الموضوع خالصين منه .. في النهاية هو بيننا وبين الله .. وربنا عالم بالنوايا وما تخفي الصدور
لكن مب يجون يستغلونا ويوقفون في طريقنا غصب طيب و يدودهونا
يعني ما عسى الواحد يوقف عند الاشارة الا ياك موول عند التاير ينظف تحته
والا ما عساه يدش المواقف يبي يصف السيارة إلا تخرطف جدامك و اعترض لك مثل القضا المستعجل ووقف يأشر لك تعال جذي وحرك جذاك ويجابلك ويلصق بالطوفة وانت تعال جدم لين اقول لك بس وقف
زين فرضاً الواحد تدوده وتخربط وداس بترول بدال البريك لسبب أو لآخر .. غير بينرعص في الطوفة ويروح من چيس أهله
وتعال فچچ عقب
والا يلقفك من وسط مليون واحد ماشي ويجي لك انت بالذات يقول السلام عليكم بابا والا ماما
ماعليه نعطي ونتصدق والله يتقبل منا .. ولا فيها فضل ولا منة ان شاء الله
لكن مب جذيه عاد

[MirusS]

فعلا غلط هالشي .
بس اكيد مايطرون بهالشكل الا للحاجه

[يمامـة]

احس القلوب ضاقت اكثر من قبل..


الحين اللي يشوف ان هالتصرفات غلط..

ليش ما وقف العامل وسئله هو لأي جهة ينتمي.. وياخذ رقم هالجهة و ينبههم للتجاوزات
اللي تصير من هالعمال.. وتعريض نفوسهم للخطر حسب ما هو مذكور في كلام الأعضاء..


ترى هالعمالة حتى في بلادينهم يلزقون في السيارات يعني مب بس اهنيه..
هذيه طبعهم في بلادينهم.. مب عادة اكتسبوها لما شافوا أصحاب السيارات الفارهة او الناس
اللي عندهم فلوس ..

يا مقسى قلوبكم..

[طلعة الروح]

غسيلهم أي كلام بغض النظر عن الحركات والملاغه اللي يسوونها لدرجة اني اذا طالعه كذا مكان لازم اشوف يا طراره يا عمال عند السياره اعصب بيني وبين نفسي والواحد ينضغط خاصة اذا كان متضايق بدون شي يجون يضايقونه هم بهالوقفه للاسف الطريقه كلها غير حضارية اذا بنفكر فيها من الاساس ونحللها وأغلبهم هالعمال غير حرفيين خاصة اذا ما كانوا تحت شركة معروفه لذلك يجب ان ننتبه اذا كنا نبي نتيجة مرضية اما اذا السالفة سالفة توزيع فلوس لشغل اي كلام فانا مع اني اعطي المال للمحتاج وليس لشخص لا يتقن حرفته لمجرد توزيع المال والاسترزاق.

[شيخ القبيلة]

بالعكس اشوفها عادي جدا واحيانا الواحد محتاج ينظف سيارته ويلمعها
وهالمسكين قاعد يترزق ومقابل الخدمة اعطيه اجر وين الطراره الله يهديكم بس
مب احسن من اللي يطر عيني عينك
ياجماعة خلوهم يترزقون هالفقاره المساكين كفايه واقفين في هالحر وحالتهم حالة والله اعلم بظروفهم