شنهو اللي نحتفظ فيه منهم ؟؟

[الحياة الخالدة]

السلام عليكم ورحمة الله وبركاته

معليش اسمحوا لي يمكن الموضوع حزين ويصحي ذكريات نحاول نتناساها
بس هو شي يدور ببالي

كلنا توفى لنا ناس عزيزين على قلوبنا .. الله يرحمهم ويغفر لهم ويجمعنا بهم في الفردوس الأعلى
فور وفاة الشخص العادة نحاول نطلع كل شي يخصه من ملابس وأشياء أخرى ونتبرع بما يمكن التبرع به منها

لكن تبقى أشياء يعز علينا التخلي عنها

سؤالي للجميع ولمن يود المشاركة :
شنهي الأشياء اللي تخص أعزاءنا وحبايبنا اللي انتقلوا إلى رحمة الله تعالى .. واللي ممكن نخليها عندنا .. وما نأثم على الاحتفاظ بها ؟؟

[ضوى]

عزيزتي احياة الخالدة ، الموضوع موجع

بس اذا ممكن اسأل شنو اللي ممكن نحتفظ فيه من اشياءهم وممكن نأثم عليه ، مجرد فضول ابي اعرف

[الماريّة]

مرحبتين اختي الحياه

ااااااااااااالله يحفظ لج كل غالي والجميع
ويحفظنا ويطول باعمارنا في الخير

بالنسبه لي
احتفظت بنعال ابوي الله يرحمه الي كان يروح المسيد فيها وبالرادو ماله الي يسمع منه نور على الدرب
واحتفظت بجوازه قديييم ايام الستينات وب ليسن القديم الكرتون العنابي هههه وبمفاتيحه كلها
وكذلك امي احتفظت بنعالها الي دايم تروح فيها مواعيدها

واحتفظت بوحده من ذهبها ( المريّه ) مابعتها كلش وبخليها لبنتي وويتوارثونها حفيداتي وحفيدات بنتي
واحتفظت بعبايتها فيها ريحتها وريحه الزعفران والمسك والحنه للحين فيها

والله يرحمنا برحمته ويغفر لنا
اما انا لتوفيت بعد عمر طويل عيالي مب محصلين شي يحتفظون به مني الا تلسكوباتي
^_^


والله يطول بعمرج فديتج واعمار الجميع

ِ/
\

[الحياة الخالدة]

عزيزتي احياة الخالدة ، الموضوع موجع

بس اذا ممكن اسأل شنو اللي ممكن نحتفظ فيه من اشياءهم وممكن نأثم عليه ، مجرد فضول ابي اعرف

هلا بالغالية .. أدري إنه موجع بس تدرين خويتج أحياناً تصير نكدية

بخصوص الأشياء اللي ممكن نؤثم على الاحتفاظ بها .. مادري يعني
بس يمكن المجسمات أو الصور أو المجوهرات اللي ما تنلبس
يعني ماعرف .. عشان جذي قاعدة أسأل

[ضوى]

هلا بالغالية .. أدري إنه موجع بس تدرين خويتج أحياناً تصير نكدية

بخصوص الأشياء اللي ممكن نؤثم على الاحتفاظ بها .. مادري يعني
بس يمكن المجسمات أو الصور أو المجوهرات اللي ما تنلبس
يعني ماعرف .. عشان جذي قاعدة أسأل

فديت قلبج مب نكد هاي ذكريات

وانا مثلج بانتظر واشوف واحاول اعصر مخي وش عندي من ممتلكات الغاليين الله يرحمهم ويعفي عنهم ويوسع منازلهم ويجعل الفردوس مستقرا لهم

[حمد بن سعد]

الله يرحمج يايمه وجعل قبرج روضه من رياض الجنه


ثوب النشل وصندوق لمبيت

[معماري قطري]

أُمي من أيام كلمتني تقول تبي تمر البيت عندي ومتكيسلة تبي تعطي بناتي أساور جايبهم لها جدي ابو ابوي هدية زواجها

قلت لها باخليهم يجيونج وهم متعودين اسبوعياً يمرونها مرة أقل شيء وراحوا وجابوا الأساور وقلت لهم يحفظونهم ولا يفرطون بهم

عند الوالد صندوق بنادق قديمة تصلح للمتحف من جدوده

كانت عندي قطعة قماش صوف هدية من خالة الوالد الله يغفر لها وكنت محتفظ بها بس سويتها وانا معصقل والحين مب قدي ولا ادري وينها الظاهر أُم العيال صدرتها

[بوخالد911]

الله يرحم المتوفين.
صور الوالد الله يغفر له.

[رجل تعليم]

الله يرحمك يا أبي العزيز ويرحم كل موتى المسلمين
أفتقده الآن أكثر ...كان عمري أحد عشرا عاما فقط حين تركنا وآثر جوار الخالق القدير ...كان الأمر عاديا بالنسبة لطفل صغير مثلي ...أما الآن فالأمر مختلف تماما ..
أود لو أستطيع أن أخبره أنني أشبهه في كل شيء ...هذا ما يقوله لي الناس الى يومنا هذا ممن يعرفونه ..بدوري أتذكر شخصه جيدا وأجد أنني أشبهه تماما ...غضبه وحدته وحزمه وجديته وصرامته المطلقة ...مثله أحب أن أصبر في كى الأحوال ...أتنازل عن كل حقوقي مقابل راحتي وأجري المحفوظ عند الله ...أسير كما كان يسير أبي في الظل الى أن اختطفه المرض من بين أبنائه الست ...
أستغفرك الله أي صفحة فتحت الآن .
لاشيء من أبي غير كلماته ووصاياه التي أحفظها عن ظهر قلب ...بعنا كل ممتلكاته وأشيائه كي نعيش ...بعنا الفأس والمعول والمطرقة واشترينا سكرا ودقيقا فصنعت لنا أمي خبزا لذيذا أكلناه وشبعنا ثم نمنا ...ترك لنا أمي العزيزة وأنا أعتني بها بأجمل شكل والحمد لله ..
ترك لنا صحنا خشبيا مازال في بيت الوالدة ولن يباع أبدا ...صحن او قصرية كبيرة مصنوعة من خشب العرعار عام 1982 مازالت امي تعجن فيها خبزها اللذيذ ونأكل فيها كسكس القمح كلما جمعنا بيتها ...
هذا كل شيء وهذا أجمل شيء
اسأل الله تعالى له رحمة واسعة ولسائر موتى المسلمين

[R 7 A L]

ماعندي شي محتفظ فيه للغالي اسبقوني فيه اخواني

[جارح]

أشياء كثر من الممكن ان نحتفظ بها تخصهم من مقتنياتهم الشخصية ولا اثم فيها ولكن ارى ان أفضل شي لنا ولهم ويوجرون عليه هي وصل صديقهم وقريبهم كما كانوا يفعلون ففيها الذكرى الطيبة والاجر الموصول لهم بعد انتقالهم لرحمة الله

[ya3coub]

عصاه جدي و كان يحب يجمع خواتم معنه ما يبلس بس يومزعهم
نظارته, مسباحه, غترتهزززز اشياء متعدده

بس اهمهم عكازه و نظارته

[ضوى]

ماعندي غير جواز امي الله يرحمها كنا مجددينه لها قبل لا تتوفى بكم شهر ، الله يرحمها ويعفي عنها يااارب ويجعل الفردوس الاعلى مثواها يارب برفقة الحبيب محمد صلى الله عليه وسلم

[MirusS]

مادري دشيت الموضوع وحسيت بحزن وانا اقرا هاهاها
عموما مافي وايد توفوا من الي يعزون علي او قريبين مني
بس اثنين تقريبا ،، وماحتفظت الا بساعه اهداني اياها عمي الله يرحمه .

مادري شنو الحكم الشرعي بالنسبه للاحتفاظ باغراض المتوفين لكن اشوف الافضل التبرع فيها عشان ياخذون الاجر
ماحبذ الاحتفاظ بالاشياء

[الحياة الخالدة]

جزاكم الله خير جميعاً
الله يرحم موتانا وموتاكم وموتى المسلميـــــن .. ويرحمنا إذا صرنا إلى ما صاروا إليه
لما توفت الوالدة الله يرحمها ويغفر لها قالوا لنا طلعو كل ملابسها وتم هالشي خلال يومين حتى الذهب القليل اللي كان عندها قالوا لنا بيعوه وتصدقوا بثمنه
تمنيت لو إني خليت عندي شي منها
طبعاً أكيد نفس ما قال أخوي جارح الأفضل لهم هو الدعاء والتصدق عنهم ووصل من كانوا يصلونهم ويحبونهم
لكن أحياناً لما أحن لها وأشتاق يكون ودي أشوف منها أي شي
عزائي أن بعض وجوه إخواني وخواتي الله يحفظهم تذكرني بها رحمة الله عليها

الله يجمعنا بجميع أحباءنا في الفردوس الأعلى

تحياتي للجميع

[بانغ بانغ]

لازم اتصيحونا من الصبح وعندي اجتماع بعد شوي

المهم احتفظ بصورة لي مع صديق دربي اللي توفى بحادث سيارة وكنا متواعدين نتقابل بعدها بكم ساعه ذاك اليوم

مسكين كان يبي ايقولي سر لكن مات ومات السر معه