الأثاث هل اوروبي - تركي - صيني - الخليج

[captin]

السلام عليكم ورحمة الله وبركاته ,,

حبيت اسال الاخوان اللي مروا بمرحلة تأثيث البيت وتجاربهم مع الاثاث
هل تم شراء الاثاث من السوق المحلي ولا من اوروبا ولا تركيا ولا الصين.

انا حاليا في مرحلة البحث عن بدائل شراء الاثاث للفيلا وعندي تصميم معين احاول اطبقه
وهذا التصميم يتطلب تصنيع خاص لبعض الاماكن مثل الصالات وغرف النوم والمجلس الداخلي
حتى الطاولات ما اعتقد القى نفسها شي جاهز في السوق

من فترة تعرفت على شركة اسبانية يسون اثاث في اوروبا على التصاميم اللي عندك
لكن اسعارهم التقريبية طلعت غالية نوعا ما على سبيل المثال تأثيث مجلس داخلي
وصالتين ( دور أرضي - دور اول ) وعدد 6 غرف نوم تقريبا راح يكلف مليون ومائتين الف ريال!!

البعض ذكر ان البدائل في تركيا أرخص وبجودة عالية والبعض ذكر الصين او ربما بعض المصانع
في السعودية او الكويت

ياريت اللي كان عنده تصميم خاص وتعامل مع مصنع معين او مورد في مجال الاثاث يفيدنا

[ولد المنصور]

الله يبارك لك ,, وتنزله عبى خير ان شاء الله
انا يوم سكنت اغلب اثاثي من معرض الجميل ,,, موزايك ,, واشوي من السعوديه ..
ومن فتره مريت ابيات الي بالخبر واعجبني وايد اثاثهم وبذات ورق الجدران ,, وانصحك ياخوي فيه .

[شمس المغيب]

شوف هذا الحساب على الانستغرام
في الكويت ويصنعون لقطر
aljerawy_kw

[alme3mary]

www.monahussein.com
جرب هذا الموقع وخلهم يبعثون لك عرض سعر

[معماري قطري]

عليكم السلام ورحمة الله وبركاته

الله يوفق ويعينك ويتمم لك على خير

مبين إنك مسوي تصميم داخلي وتصميم أثاث معين .. وهذا مؤكد بيكون مكلف لأن في الغالب مصنعيته من أخشاب معينة وبتفاصيل معينة ويحتاج بذل مجهود كبير وشغل كبير من اللي بيصنع

لكن لو حبيت بدائل بتحصل أشياء جاهزة وبنص وربع السعر وبدون انتظار وهذا واجب المصمم الداخلي الا يكون التصميم معقد كثير وصعب تحصله فما لك الا تعتمد عليه وهو يتفق لك وياخذ حقه ويعطيك حقك

[معماري قطري]

حتى المصنع اللي بياخذ الشغلة عليه يشتري أو يستورد المواد الخام خصيصاً لشغللتك وينفذها حسب المخططات والتفاصيل وفي الغالب تنفيذ خاص وشغل يعتبر جديد وممكن يدوي بالنسبة له

شوف منجرة السلام كبديل ومناجر ثانية قوية في قطر أو الخليج أفضل لك من البعد كثير

أذكر سالفة أحد الإخوان خذ أثاثه من الصين وفي الشحن جايبينه الظاهر في سفينة ( أُم أحمد - إخت طيارتنا القديمة أُم أحمد ) وتسرب ماي البحر له واخترب أثاثه ودخل في مشاكل مع الشركة .. تدخلت السفارة وعوضوه بمبلغ جزئي

[بوخالد911]

هلا
الله يتمم ع خير.
انا شريت من قطر
ومن مختلف المحلات
نابكو. طبعا لا يشق له غبار. أثاث راقي وممتاز.
خذيت لوحات وجلسات للصالتين

محل ذا ون
من اللاند مارك
غرف نوم صينية حلوة جدا.

موزايك. غرفة نوم وحدة.

محل براند
تركي
بشارع بروة التجاري مقابل مقبرة بو هامور.

بتحصل أشكال وأنواع للأثاث
أهم شي تدور عدل
والله يوفقكم.

[captin]

الله يعطيكم العافية جميعا على الردود والآراء

هو مثل ذكر الاخ معماري انه تصميم خاص باشكال والوان معينة
يعني من الصعب انك تلقى شي جاهز معروض بنفس المواصفات اللي في التصميم

لذلك يتطلب التعامل مع مصنع اثاث يصنع على حسب التصميم بالمواصفات والالوان والاقمشة
والخطوط الذهبية اللي على الكراسي والابعاد لكل قطعة من القطع الخ.


الله يجزاكم خير جميعا

[معماري قطري]

في هالحالة ما لك الا المصمم هو اللي يتابع التنفيذ ويدير عقود التوريد وأكيد بيكون مكلف لأنه بيضطر يسافر ويتابع أقل شيء صوب دول قريبة مثل السعودية والإمارات وإحتمال لبنان هم متقنين في هذي الشغلة بس الشغل معاهم متعب

أشوف شركة جديدة حق التصميم الداخلي فاتحين قريب تقاطع عين خالد وانت طالع من عين خالد وقريب من طريق سلوى تكون يمينك ومعاهم أقمشة القثمي

كرواتيا سمعت إنهم مختصين في شغل الخشب وشغلهم رخيص مقارنة بالخليج

[ja077]

]معرض الجميل للمفروشات
ممكن يسون لك طلبيه حسب التصميم لي عندك
الاستغرامaljameelshowroom

[معماري قطري]

معرض الجميل ما شاء الله قديم ومعروف وين مكانه ألحين

تصدق نسيت حتى وين كان

[captin]

انا تعاملت مع معرض الجميل سابقا في مشروع تجهيز مكاتب في برج
كبير وكانت عندنا فئات وظيفية من وزير ونازل

للاسف نوعية المواد اللي وردوها صينية رديئة ومن ثالث شهر
بدت المشاكل تطلع في قطع الاثاث بدت مقابض الادرج وقطع الخزانات تطيح

طبعا ما نلوم المورد بشكل كامل لانه التزم بميزانية معينة هي اللي خلته يروح للصيني الرديء
لو الميزانية اكبر وفيها مرونة كان راح جاب من ايطاليا او اسبانيا.



هذا الكلام من حوالي 9 سنوات الحين ما يندرى اذا تحسنت الجودة

بس مايمنع الواحد يمر عليهم ويشوف المصانع اللي يتعاملون معاها و جودة المنتجات واذا يسون
تصنيع خاص على حسب تصميم معين

[معماري قطري]

إخوي كابتن الشغل الحكومي في الغالب مواصفاته مبهمة لكن تصميم أثاث خاص لازم يكون فيه ذكر لطريقة التربيط ونوعية المواد حتى أسماء الخشب صعب يلفون عليه

وما دام سويت تصميم داخلي وأنهيته واصل فيه مع المصمم بس حاول تشوف عينات قبل لتشتري وتابع عن قرب .. كثير من المصممين ياخذون كومشنات كبيرة من ورشة التصنيع

[معماري قطري]

الحل الثاني تتفق انت بنفسك وتاخذ لك سفرة لإيطاليا وأسبانيا واستعين بالسفارة هناك بيساعدونك وين تروح .. أوكرانيا سمعت إنها فيها شغل خشب رخيص وجودة عالية .. عندنا في قطر نابينا يصنعون أثاث ويستوردون من ماليزيا وغيرها وأكيد بيفيدونك .. شوف أما مسعود نابينا أو فاروق

[معماري قطري]

اللي يسوي تصميم داخلي انصحه بأن يعمل حسابه ياخذ الأثاث أول بأول حسب التصميم حتى يكون التأثيث سريع وسهل .. لأنه يتكون من كم مرحلة .. مرحلة التشطيب والتأسيس ومرحلة الكهرباء والإنارة ومرحلة الأسقف ومرحلة الأرضيات .. ومرحلة الأثاث الثابت واللي يحتاج تركيب من ضمن مرحلة الأسقف والأرضيات وهذي تخلي القطعة كأنها نحتت لهذا المكان وانعملت خصيصاً له .. وآخرها تجي مرحلة الأثاث العادي وهذي حتى لو طولت شوي وجات على دفعات ما عندك مشكلة تقدر تأثث المهم قبل وتصبر شوي على الباقي

[شموخ دائم]

,

,


مرحبا


اللزيم

:)

اعتقد من الصعب انك تلتزم بالتصميم الي عندك
التزام كلي 100% وتاخذه من قطر بتواجهك صعوبات
في الجوده والفنش واللمسه الاخيره
مع ارتفاع السعر أيضا
الأماكن بقطر للأسف الشركات ( غير محترفه )
ونظام الفرش العادي


اعتقد الخيار الأفضل انك تاخذه من احد المصانع المشهود لها في ( تركيا ) او ( لبنان ) او ( اسبانيا )
مع اني اميل الى ( تركيا )
جوده في الفنش وسعر مناسب معقول ارخص من اسبانيا
وجوده افضل من لبنان

لان الاسباني والا يطالي بيكون تكلفته عاليه جدا وحتى اللبناني غالي جدا
للأسف اخوانا اللبنانيين يضربون السعر علينا


ويكون لهم ممثل في الدوحه شخص او مكتب
او مصمم يتابع
اخذ القياسات من الواقع وليس على الخريطه فقط
لان هناك تفاصيل كثيره تحتاج تنسيق
بين الخريطه والواقع

الخلاصه
تتعامل مع مصنع اثاث تركي ويكون شخص او ممثل يتابع معاك هنا في قطر
ويتواصل معاهم

النصيحه الثانيه

( تضحي ) تخلي نص الأثاث من احد المصانع في خارج قطر
ونص البيت تاثث من داخل قطر
وتضحي بالتصميم ما تلتزم فيه للاماكن الغير مهمه
مثل غرف الأولاد والغرف الغير مهمه ممكن التنفيذ بقطر
الخيارات موجوده بقطر وسعر معقول


بالتوفيق لك



,

,

[ja077]

معرض الجميل ما شاء الله قديم ومعروف وين مكانه ألحين

تصدق نسيت حتى وين كان

شارع المطار

[معماري قطري]

شارع المطار

مشكور الله يسلمك صحيح لهم فترة طويلة وانا نسيت كلش ما امر مناك