>> شيك على الفاتورة لا تستحي ولا تفتكر بعد <<

[شبح الصمت]

السلام عليكم ورحمة الله وبركاته ،،،

مبروك عليكم شهر رمضان
شهر الخير
شهر العبادة والطاعة
شهر الكنوز
اللهم تقبل صيامنا وقيامنا واجعلنا واياكم من المقبولة ومن عتقاء النار ..

اللهم آمين

الموضوع تم طرحه من قبل ولكن

نذكر انفسنا وغيرنا بالحذر

امس جالس مع الشباب واحد من الربع يقولي ياخي الاحظ يوم اروح الكافيه الفلاني انه الحساب يتفاوت اوقات مع انه نفس الطلب .
يقول لين قبل يومين جابوا لي طلب وشيكت عليه اطلعو مغلطين ..


سبحان الله جينا نطلب الحساب قلت له خلنا نشيك على الحساب شفت المبلغ فوق الحسبه الي حسبتها
واشيك الا طالعين زايدين علينا مبلغ 100 ريال ناديت الموظف

اول شيء الطلب احنا ما طلبناه قال هالطلب مش موجود جبت لكم الثاني الاكبر ( على كيفك اهو تجيب لنا من دون ما تسألنا ) وطبعاً سعره غير
ثاني شيء يوم عطيناه كاش تاخروا علينا برد الباقي مع انه ما كان في زحمة عندهم .
ثالث شيء يوم سالت المسؤولة ليش هالغلط ردت علي برد تحس انه ما عندهم سالفة ما عرفت ترقع قالت لي غلط في المنيو ؟؟ غلط في المينو وتجيبون لنا المنيو وفيه غلط ليش
احنا اشدخلنا ..

المهم في مطاعم الواحد يعطيها اكس ..



عالعموم يالعموم الحذر لانه هالموقف صادني اكثر من مره ..
وكثير منكم صادهم اتوقع

فلا تستحون من انكم تشيكون على الحساب
دافعين من حر مالنا محد له حق يقول ليش بتشيك .


والله يتقبل منا ومنكم ..

[الاعرابي]

صحيح انا صارت معي بدون مبالغة اكثر من 10 مرات خلال السنة هذه فقط
ودائما اشيك في كل شيء اذا شكيت ان السعر فيه لخبطة
المصيبة ان الكل ينصب ويدري انك مواطن وقطري ماراح تدقق ولاراح تلاحظ فقط عبارة عن فرصة سهلة لكسب بعض المال
مطاعم فخمة مطاعم فنادق كافتيريا السينمات الشيش والقهاوي وخصوصا في التوصيل مال طلبات في الفاتورة شيء وهو يقولك شيء
يزود له 5 ولا 10 ريال من عنده
ولاحول ولاقوة الا بالله crazy

[monatee]

الكلام صحيح ، وصرنا نشيك على الفاتوره فكل مره

[الاعرابي]

نسيت اضيف
البارحة تاكسي خذته من الكرنيش والى الريان
بدا معي العداد ب 7 ريال طبعا توقعت انه التسعيره العادية
بحكم انني لا استخدم التاكسي اصلا
اثناء الرحلة كان مكتوب على قزاز السيارة استكر من شركة التاكسي موضح فيها الاسعار
وبداية العداد من الدوحة وداخلها فقط 4 ريال
عند الوصول كان العداد وصل 21 ريال وبعدها فاتحته بموضوع ال 7 ريال وتلخبط الهندي
منطقيا كان لازم ينقص 3 ريال فقط ويصبح الحساب 18
الرجال قال عطني 10 وفكني هههههههههههه
الله واعلم هو نصب في شيء ثاني غير بداية العداد ماندري
لكن انتبهو يا اخوان

[مـراحـب]

ليش نستحي ، ، ، هالأمور ما منها مستحى

لين متى نخلي هالأشكال تستغفلنا ؟ ؟ ؟ ! ! !

قبل بدوا مع القطريين مع سالفة العلوج

وعقبها مع نص الريال

وعقب تلاعب في الفواتير

" انا الحمدلله هالأشكال ما اخليها تستغفلني ، ، ، لي حق اخذه ، ، لهم حق ياخذونه
اشيك ع الفاتورة كلمة كلمة ، ، واشوف القائمة
واحيانا اخذ المنيو واشيك مع الفاتورة

وهم احيانا يحسبون لك غرشه الماي وانا ما طلبتها "

ليكن شعارنا

" لا لا ، ، للاستغفال "

[مخطط قطري]

كلامك صحيح وصارت معاي اكثر من مره وصرت دايمن اشيك على الفاتوره .... وحتى اذا رجعو الخرده مهم جدا تاكد منها بعد

[captin]

كل واحد فاتح بزنس في قطر ينظر للمواطن القطري على انه
لقمة سائغة وانه غني جدا وما تهمه الـ 100 ريال او 200

المطلوب من الجميع التدقيق على الفواتير وعلى الشروط والاحكام والعقود
وهاذي العملية ما راح تاخذ اكثر من دقايق بالكثير.

[شيخ القبيلة]

انا بعد صار لي هالموقف عقب ماطلعت من الماركت وانا فالطريق حسيت ان في زيادة وشيكت الفاتورة لقيت حاطين لي شي انا ماطلبته
والشي الثاني حاسبوااا من الهنود في البقالات الكبيرة تطق هرن تقول له جيب وجيب ويقوللك هالمبلغ
انا كذا مرة حسيت بعدم الثقة وصرت احيانا اطلب منهم يجيبون لي فاتورة اتاكد

[بوخالد911]

انا ولله الحمد
دووووووووم أدقق على الفواتير
وانتبه لهم عدل

[معماري قطري]

تعودت لين شريت أغراض أحفظ بعض الأسعار وهو يحسب أوقات اشوف اختلاف كبير مثلاً غرض عنده لافتة ب 20 يطلع لي ب 40 وما اطول السالفة احاججه وارده خصوصاً في كارفور

[معماري قطري]

مشكلة اللي ما يشوف الكتابة الصغيرة مثلي أوقات حتى اسئلهم كم مكتوب

[ya3coub]

المشكله و البلا فربعنا خصوصا حزة الدفع يقط الكرت ولا يجيك بحيث انه اهو الي يدفع فهم نوعا ما ضامنين خصوصا فالقروبات الكبيره

[بانغ بانغ]

انا اقرا الفواتير وادقق

اتقول مدرس ايدقق على براشيم

اي هاي حقي

[طلعة الروح]

لاحظت في بعض الكوفيهات والمطاعم لو دافعه كاش يتأخرون في احضار الباقي عشان العميل يقوم قبل ماياخذ الباقي وهاي طريقة جديدة صارت تنتشر في بعض الاماكن خاصة الهاي هاي والافضل الدفع بالبطاقه مع هالاشكال.

[السيف5]

شخصيا لازم أدقق على الفاتورة

[البيروني]

محلات الوجبات السريعه تضيف كلمه اكسترا او اضافه حلو او دبل او حجم كبير لزياده المبلغ بالرغم انه الطلب لايحتوي على المذكور
عمليات النصب و الاحتيال كثيره فلابد من مشاهده تفاصيل الفاتوره اذا كنت تجهل السعر الحقيقي
الزبائن الغشيمين هم السبب بهذه الضاهره و يعطي تلك المطاعم جرائه بالنصب و الاستمراريه بينما لو كل زبون خاطبهم و حاسبهم سيتوقفون فورا

[البيروني]

عنوان الموضوع حقيقي بكلمه ( لاتستحي ) البعض بالفعل يستحي
ولكن الواقع يقول ان المطعم يقوم باستغفالك و النصب عليك و اعتبارك جاهل اذا لم تدقق بالفاتوره

[دينالي]

الظاهر في منيو للاسعار لغير القطري وللقطري وهناك عطوك منيو غير القطري بالغلط
على العموم واحد من الربع نفس المحل مره باللبس الوطني ومرة بلبس احد الجاليات وطلع الفرق غير
يعني انتو جايين ديرتنا تسترزقون ماقلنا شي بس ليش النصب استحو شوي

[الماريّة]

والله يااخوي كل شي صار فيه تلاعب

حاطينا مقصه الكل يقص علينا

جايبه لي عامل يركب لي باب بغرفه
قبل يسونه ب800 ريال
الحين يقول 1500 قلت له ليش
قال الباب له حسبه والصبغ له حسبه وكسر الطوفه له حسبه

كل شي صاروا يحسبون عليه
اااااااااالله يكفينا شر حب المال وطمع الانفس

بكره توقعوا يحسبون عليكم العصير بحساب
والعود بحساب والقلاص بحساب

توقعوا كل شي

[دينالي]

والله يااخوي كل شي صار فيه تلاعب

حاطينا مقصه الكل يقص علينا

جايبه لي عامل يركب لي باب بغرفه
قبل يسونه ب800 ريال
الحين يقول 1500 قلت له ليش
قال الباب له حسبه والصبغ له حسبه وكسر الطوفه له حسبه

كل شي صاروا يحسبون عليه
اااااااااالله يكفينا شر حب المال وطمع الانفس

بكره توقعوا يحسبون عليكم العصير بحساب
والعود بحساب والقلاص بحساب

توقعوا كل شي

مشكلة القطري مايبي يعور راسه واول واحد يعطيه سعر يقوله تعال اشتغل ...... انا دورت عمال حق شغله بالبيت عندي وكلمت كذا واحد وكان في فرق في الاسعار الالف او الالفين لاتستهينون فيها

[مخطط قطري]

اعتقد الحين صار وعي وثقافه عند اغلب القطريين قبل ممكن ينصب عليك او يستغفلك مش بذكاء منه لا بس لانه القطري كريم بطبعه ومتعود على ناس راقيه ومحترمه وطيبه مثله فيستبعد كل البعد حد يستغفله او ينصب عليه الحين الحمدالله من 10 اشخاص تحصل 1 او 2 فقط مايشيك ع الفاتوره ويتوكل ع الله بس الاغلب يشيك ويشوف.....
مره من المرات كنا مجموعه اشخاص وفي مطعم( لبناني) حريص اني دايمن امره لانه اكله طيب وهنيه لازم تكون منتبهه اكثر لانه كل ماكثر عدد الاشخاص صرت نيشان لبعض النفوس الضعيفه من اصحاب المطاعم ف انا متفق مع الربع اني عازمهم ومانبي شوشره وازعاج في وقت دفع الحساب عشان يكون شوي الامر فيه ذوق وحضاره لمن طلبت الفاتوره قالي الجرسون الحساب اندفع
شلون ومن دفعه قالي شخص كان موجود في الطاوله الي جنبكم قلت طيب جيبها ابي اشوفها راح وماجابها وتاخر وعرفت انه الموضوع فيه خمله وضربت على هالمطعم اكس الواجب عليه قبل لايقبل ياخذ حساب الطاوله يجي يستاذن مني هل اسمح له يدفع عنكم او لا هذا اول شي ثاني شي تخبطهم وعدم وضوحهم شككني اكثر بالموضوع وخصوصا يدعون مالك حق تشوف الفاتوره لانك مادفعتها بس قلت لهم انا صاحب الطاوله من حقي اعرف شطلبت وكم اندفع عشان ارجع هالمبلغ لرجال الي دفع فكانو ياخرون الوقت عشان يسسون فاتوره جديده بالطلبات واضح جدا انهم حطو فاتوره وهميه غير حقيقه بالسعر وعطوها الرجال

[المحاميه]

التمس لاخيك العذر
مرات فعلا يكون غلط
ومرات استهبال

التشيك مب غلط ومن حقك ك كاستمر


بس ليش ماذكرت اسم الكافيه؟

[المحاميه]

اعتقد الحين صار وعي وثقافه عند اغلب القطريين قبل ممكن ينصب عليك او يستغفلك مش بذكاء منه لا بس لانه القطري كريم بطبعه ومتعود على ناس راقيه ومحترمه وطيبه مثله فيستبعد كل البعد حد يستغفله او ينصب عليه الحين الحمدالله من 10 اشخاص تحصل 1 او 2 فقط مايشيك ع الفاتوره ويتوكل ع الله بس الاغلب يشيك ويشوف.....
مره من المرات كنا مجموعه اشخاص وفي مطعم( لبناني) حريص اني دايمن امره لانه اكله طيب وهنيه لازم تكون منتبهه اكثر لانه كل ماكثر عدد الاشخاص صرت نيشان لبعض النفوس الضعيفه من اصحاب المطاعم ف انا متفق مع الربع اني عازمهم ومانبي شوشره وازعاج في وقت دفع الحساب عشان يكون شوي الامر فيه ذوق وحضاره لمن طلبت الفاتوره قالي الجرسون الحساب اندفع
شلون ومن دفعه قالي شخص كان موجود في الطاوله الي جنبكم قلت طيب جيبها ابي اشوفها راح وماجابها وتاخر وعرفت انه الموضوع فيه خمله وضربت على هالمطعم اكس الواجب عليه قبل لايقبل ياخذ حساب الطاوله يجي يستاذن مني هل اسمح له يدفع عنكم او لا هذا اول شي ثاني شي تخبطهم وعدم وضوحهم شككني اكثر بالموضوع وخصوصا يدعون مالك حق تشوف الفاتوره لانك مادفعتها بس قلت لهم انا صاحب الطاوله من حقي اعرف شطلبت وكم اندفع عشان ارجع هالمبلغ لرجال الي دفع فكانو ياخرون الوقت عشان يسسون فاتوره جديده بالطلبات واضح جدا انهم حطو فاتوره وهميه غير حقيقه بالسعر وعطوها الرجال

إن بعض الظن اثم

انا مش معاهم ..

لكن مرات ملابسات الواقعه تخليك تظن ان شكك في محله ..
انتبه من الظن .. الي مايلامسه يقين ..

[مخطط قطري]

إن بعض الظن اثم

انا مش معاهم ..

لكن مرات ملابسات الواقعه تخليك تظن ان شكك في محله ..
انتبه من الظن .. الي مايلامسه يقين ..

99% من ظني يكون صحيح عندي حدس امني عالي بس الهدف من اثارتي للامر الانتباه ويكون الشخص قلبه حي ونبيه

[شبح الصمت]

الله يجزاكم خير على مشاركاتكم الطيبه واثرائكم للموضوع ..

والحاق لكلام اخوي مخطط قطري

اذا زاد عدد الاشخاص معاك يخربطون او يتعمدون وصارت لي مع اخوي واهله وهلي بعد ضايفين لنا طلب مش موجود .
او اوقات في الطلبات الخارجية يحسب لك طلب وتوصل البيت تتفاجا مش موجود وانت دافع حسابه ..


احس بعض العمال الي يشتغلون في المطاعم يقرون عيون الضيوف
هذولي ربعه ما راح يستحي منهم
هذولي ضيوف جايبهم راح يستحي منهم ويدفع بدون ما يشيك


يعني انتبهو ونهبو عيالكم بعد اذا عطوتهم فلوس انهم يحاسبون ..

[بوخالد911]

مرة صارت لنا كشباب
طلبنا أكل ومشروبات
1 من الربع كنسل السفن أب
قلت حق الجرسون يكنسله من الفاتورة
قالي : اوك

ولما جات الفاتورة شفت مكتوب سفن أب !!!

قلت روووح كنسله

[شبح الصمت]

مرة صارت لنا كشباب
طلبنا أكل ومشروبات
1 من الربع كنسل السفن أب
قلت حق الجرسون يكنسله من الفاتورة
قالي : اوك

ولما جات الفاتورة شفت مكتوب سفن أب !!!

قلت روووح كنسله



اي لانه السفن اب في بعض المطاعم يختلف ويتفاوت بعضهم 8 ريال بعضهم 15 ريال

[كشمه]

والله يااخوي كل شي صار فيه تلاعب

حاطينا مقصه الكل يقص علينا

جايبه لي عامل يركب لي باب بغرفه
قبل يسونه ب800 ريال
الحين يقول 1500 قلت له ليش
قال الباب له حسبه والصبغ له حسبه وكسر الطوفه له حسبه

كل شي صاروا يحسبون عليه
اااااااااالله يكفينا شر حب المال وطمع الانفس

بكره توقعوا يحسبون عليكم العصير بحساب
والعود بحساب والقلاص بحساب

توقعوا كل شي

انا احسبولي فلفل الغراش كريستال ب 2 ريالين في سندويش الشاورما كزياده في الطلب !! المطعم في شارع الغرافة التجاري مشهور

[بـن عدوان]

بالعكس هاي ثقافة وذكاء انه الواحد يجيك

واحس المجتمع الحين غير عن 6 سنوات قبل

قبل احس بعض الشباب يحس بعيب وانه شنو عسى ما شر اجيك ويقوم يدفع

الحين الوضع تغير شوي وصاروا بعضهم يجيكون

[R 7 A L]

مادري احس احراج لما اعزم احد واشيك على الفاتورة

[ذكي جدااا]

شي طبيعي تشييك الفاتوره وماشوف ان الواحد يستحي. دايما اشيك الفواتير

[الماريّة]

انا احسبولي فلفل الغراش كريستال ب 2 ريالين في سندويش الشاورما كزياده في الطلب !! المطعم في شارع الغرافة التجاري مشهور

هذا هو كل شي صار له حسبه

زمن الجشع عند البعض

[معماري قطري]

نبغي كذلك حماية المستهلك تسن قانون الفاتورة تكون مكتوبة بخط واضح وكبير والاضاءة تكون مناسبة للقراءة أو يكون مع اللي يجيبها ليت يقدر يستخدمه اللي بيقرأ .. بعضهم اخليهم يقولون لي كم المجموع وادفع بدون ما اقدر اعرف شالتفاصيل