سكن للعاملات او العمال؟

[مــاي ورد]

السلام عليكم

ان شاء الله بفتح مشروعي الصغير قريبا ومحتاجه له عاملات فلبينيات

السؤال ان ماقدر اسكنهم عندي في البيت فابي اعرف هل في اماكن سكن للعاملات مشترك مثلا وكم الايجار العادة يوصل ووين هالاماكن؟

السؤال الثاني هل في فلبينيات ممكن أجرهم للعمل في المحل بدون ما انقلهم على كفالتي ؟ مثلا يكونون باسم شركة معينه او مكتب معين وانا استخدمهم واعطيهم راتب وكم تكلفه هالشي؟

لان بس انا متوهقه ان مادري وين احطهم ومابي اتحمل مسؤليتهم او يسون لي مشاكل عقب فترة الدوام


و هاي اول مشروع لي في حياتي ومتخوفه وعندي اسآله وايد اتمنى من اهل الخبرة مساعدتي والدعاء لي بالتوفيق

[مــاي ورد]

محد يعرف!!!

[معماري قطري]

دخلي المواقع الإنجليزية مثل قطر ليفينغ وشوفي حطي اعلان اتوقع بتحصلين سواء عاملات أو سكن

أو حطي في الجرايد اللي بالانجليزي اعلان صغير .. كذلك في بعض الأماكن التجارية فيه لوحة اعلانات أذكر التموين العائلي والسنتر

منطقتنا العزيزية متروسة فلبينيين أشوفهم يطلعون يمشون حق فيلاجيو والظاهر يشتغلون هناك .. وعند بيتنا كانوا يسوون حفلة في الكرسمس وليتات وموسيقى في الحوش بلغت عنهم وسكتوهم

[معماري قطري]

السؤال المباشر للي في المحلات بعد فكرة جيدة

[شموخ دائم]

,

,


مرحبا

موفقين يا رب

مثل ما تفضل اخوي معماري ( اعلان ) في الجرائد الانجليزيه والمواقع

بتلاقين كثير اسيويات ازواجهم يشتغلون بقطر
وهي تبحث عن عمل
بتكون ساكنه مع زوجها
وعلى كفالته

وسوي مقابلات معاهم واختاري الأنسب حسب الوظيفه واللغه والخبره
وحسب مكان السكن كل ما كان سكنهم قريب من الشغل مالك
بيكون افضل

وبعدها ممكن تطلبين منهم يجيبون ورقه ( اعاره ) للعمل موقت عندك
او ممكن من وزاره العمل يسمحون لهم بالعمل في محلك بصفه مؤقته

وممكن تسوين عقد ( وتوثقينه ) في وزاره العمل ويصبح قانوني مو شرط على كفالتك

انا جربت مره واخذت موافقه ( مؤقته ) 6 شهور لواحد يشتغل في ( الحكومه ) الصباح و مساء عندي

الموضوع يحتاج محاولات وتعب شوي وصعوبات بكل شي خاصه في البدايه

التجاره كلها تعب ( لا يوقف طموحك ) على بعض المصاعب تجاوزيها

وبعدها مع الوقت والخبره بتعرفين ( الحل ) لكل مشكله

ان شاء الله تتوفقون

,

,

[مضارب مستثمر]

اختي اذا بتجيبينهم على كفالتك افضل بكثير من تاخذين محلي بدون نقل

بياخذون رواتب اعلى وممكن تروح عنك في اي وقت,,,ولأدنى سبب,,,,,,

بالتوفيق ,,,,وبما انك مبتدئه يبيلك تتحملين شوية مصاعب ولكن مع
مرور الوقت بأذن الله تهون,,,,وبعد ذلك جني الثمار,,:pic:,,,,

[مــاي ورد]

مشكورين جزاكم الله خير