الحرام والحلال عند الذي مال في زمن المال والانحلال

[غريب الدّار]

الله يصبحكم بالخير

موضوعي يمكن لايروق للبعض او يمكن لايروق للكثيرين ، لكنها كلمة حق وواقع

الكل تابع الأيام القليلة اللي مضت بعض مشايخ الدين (مثل مفتي المملكة) اللي كنا نقدرهم ونحترمهم (بل يصل الموضوع إلى التقديس عند البعض) وهم يقفون مع القرار الظالم بالحصار ، ونسوا او تناسوا ان الحصار يعني حصار شعب وحصار دولة ومنع الغذاء عنها (او هكذا كانت النية التي ابطلها الله سبحانه وتعالى )

وللأسف بعض مشايخ الفضائيات انبروا للظهور بمظهر المؤيد للحكومة مثل العريفي اللي طلع وأيد الاجراءت الظالمة على قطر

اقول :
يجب الانتباه لمثل هؤلاء ، خصوصا ان اتباعهم وانصارهم كثيرون ، ولا استبعد ان يكون احدهم روّج لفكرة ان العريفي مجبور او مسجون علشان بكرة اذا تغيرت الاوضاع وزال الخلاف يقلب مرة ثانية ويقول انا كنت مجبور

راح اناقش وياكم مسألة ( مجبور) :

1- من بداية الأزمة وكثيرين تكلموا وسبوا وتطاولوا على قطر وشعب قطر ورموز قطر ، هل نقدر نعدهم كلهم مجبورين ؟ على هذا الأساس : عكاشة مجبور ، ناصر القصبي مجبور ، اللي في تويتر مجبورين ، بل ان القيادات في دول الحصار نقدر نقول عنها مجبورة بعد وامريكا هي اللي فرضت الوضع !!!! اذن فهي حجة واهية
2- ليش من بداية الأزمة ماطلعت سالفة (مجبور)؟ العريفي تكلم بعد تقريبا عشر ايام او اكثر من بداية الازمة ، ليش ماسمعنا حد قال عن اللي تكلموا قبله انهم مجبورين ؟ اعتقد انها ظاهرة تقديس الفرد وراء الموضوع لأن بالنسبة للبعض العريفي لايمكن أن يخطئ أبدا!!
3- اليس العريفي وغيره دايما يقولون : افضل الجهاد كلمة حق عند سلطان جائر؟؟ الا ينادي بالجهاد المزعوم في سوريا وغيرها دائما؟ طيب وينه عن جهاد الكلمة؟ ليش ماقال كلمة حق؟
4- العريفي كان ساكت ، وكان واجب عليه انه يقول كلمة الحق ويوضح الموقف ، ماقال شي ومحد تكلم ، ولو تكلم وكان مع قطر راح يعدونه بطل طبعا ، الحين تكلم ضد قطر وبعد هو صح ومجبور؟؟؟ !!!!!!!!!!!!! وش هالانسان اللي كل تصرفاته صح؟؟؟ !!!!! مايغلط ابد
ساكت فهو صح ومحد طلب منه الكلام
تكلم مع قطر فهو صح
تكلم ضد قطر بعد صح
!!!!!!!!!!!!!!!!!!!!!
5- اذا كان مجبور فعلا ، هل نقدر ناخذ منه اي فتاوى او علم؟؟ وش اللي يضمنا ان معظم فتاواه تم اجباره عليها؟ هل نقدر ناخذ منه اي علم شرعي ؟؟ هو مجبور يقول كلام كثير معناها ، وش درانا ان كثير من الآراء اللي قالها ماكان مجبور عليها؟ اذن ماراح نقدر ناخذ منه اي شي ابد
6- في ناس قالوا هاذي اوامر ولازم ينفذها ، وهاذي اساءة له اصلا ، يعني يتحرك بأوامر !!!! كيف نقدر نتعامل مع شخص يتحرك بأوامر؟
7- لاحظوا شغلة مهمة : القانون في دول الحصار يمنع التعاطف مع قطر ويسجن على هالشي ، لكن هل في قانون يلزم بالتطاول على قطر؟؟؟
8- البعض قال انه كان ساكت من بداية الأزمة على أساس حديث الرسول عليه السلام : (من كان يؤمن بالله واليوم الآخر فليقل خيرا او ليصمت) صدق رسول الله ، حلو الكلام ، بس هو تكلم في الأخير بكلام مافيه خير !!!!!! يعني ماطبق الحديث اصلا
9- قبل فترة كانوا يقولون ان العريفي انسجن لانه عارض الحكومة ، وسووا منه بطل ، طيب ليش ماعارض الحين ؟ اذا كان فعلا عارض الحكومة وقتها



اللي ابي اقوله يااخوان ان ماينطبق على الشيخ العريفي ينطبق على كل المشايخ الذين ظهروا وايدوا او تطاولوا
لان الحصار موجه لشعب كامل ودولة ، والمسالة مسألة خلاف سياسي ، وكان يجب درأ الفتنة بالكلمة الطيبة

واعتقد ان لازم يكون لنا درس (طبعا اتكلم عن المستوى الشعبي لان المستوى الرسمي له ناسه ) ، ان هاذول وغيرهم ماراح ينفعونا في اي شي بالمرة ، بل بالعكس ، وقت الصج يقلبون علينا الدنيا ، والواقع خير شاهد على ذلك ، مسألة ان نجيبهم بذيك الحكاية علشان برنامج او ندوة او محاضرة ، وتذاكر درجة اولى ، وفنادق خمس نجوم ، هاذي اعتقد يجب ان يعاد النظر فيها او ايقافها ، وحتى لو صارت اعتقد يجب ان يقل عدد الحضورإلى أقصى حد ، الموضوع واضح
ومع اني والله احترم جميع الآراء لكن لازم الكل قبل لا يعلق يوعى حقيقة هامة : لا لتقديس الأفراد ، ولحد يقول الموضوع موجه ضد أحد ، المشايخ (المحترمين) على العين والراس ،وفي مشايخ كثار عندهم علم غزير ومواقف مشرفة لكنهم مب معصومين ، بكل بساطة ، ومايجوز ان حد يتطاول او يؤيد اجراءات ظالمة وبعدها نجيبه ونحطه على روسنا !!!! لانه راح يمارس نفس الشي عقب الى مالانهاية



في النهاية : هاذي كلمة حق لا يراد بها الا وجه الله سبحانه وتعالى ، فإن أصبت فالله يثيبني ، وإن أخطأت فأسأل الله أن يتجاوز عني في الدنيا والآخرة




غريب الدّار
21/6/2017