ابي شوركم يا اخوان شنو احسن البنوك للقروض

[ابوالعبد]

السلام عليكم شلونكم ياربع وجمعه طيب عليكم يارب
بغيت استشيركمم شنو احسن البنوك الي تاخذ فوائ بسيطه علي القطري لانه ناوي اشتري بيت

طيب بعد ابي شوركم. ناس يقولون لي البيت الي بتشتريه اجره كم سنه عشان اطلع قيمه القرض عقب اسكن فيه ابي خبرتكم بالحياه او مثلا اخذ قرض بقيمه ثلاث مليون وشوس وادور بيتين في اهر دنيا واجرهم عقب بعد خمس سنوات اطلع المستاجر واسكن فيه ابي شورتكم وشكرا لكم.

[monatee]

وعليكم السلام

اخوي الحسبه مب بهالطريقه

يعني ممكن نقولك البنك الفلاني اوكي ، لكن متطلباته مابتمشي معاك

الافضل انت بنفسك تمر على كذا بنك مع شهادة الراتب وتشوف شروطهم

نسب الفوائد للقروض العقاريه متفاوته بين كل بنك واخر

وغير شروط نسبة التمويل ايضا تختلف : مثلا احد البنوك يمولك بنسبه 75% او 70% من قيمه العقار وباقي المبلغ لازم يكون عندك كاش

وبالتوفيق لك اخوي

[ابوالعبد]

ايدفهمت اخوك القصد ياغالي كم نسبه الفوايد ابي بنك ارخص واحد يعني مثلا باخذ قرض ثلاث مليون ودفعه اولى بدفع. مثلا خمسميه الف فحاب اعرف الامسب حسب خبرتكم

[معماري قطري]

شوف بنك التنمية مدعوم من الحكومة ومختص بالقروض العقارية أكثر من غيره

وهو وبنك قطر الوطني خدمتهم جيدة وحاول تطلب منهم تحليل هندسي للعقار لأن عندهم أقسام تفحص وتسعر سعر مناسب ويكون تقريرهم وسيلة ضغط على المالك حتى ينزل سعره شوي لو حبيت .. أو شوف قبل لتشتري مكتب استشاري يفحص العقار ولازم يكون كامل التخصصات الهندسية ما يطرشون لك واحد بتاع كله .. أرشح لك مكتب اتحاد قطر للتخطيط لأنه مكتب قوي ممكن يعطيك تقرير فني مفصل والمكتب شغال مع مكاتب عالمية كبيرة بس فحصهم بيكون مكلف ( إحتمال ) لكن لفايدتك

[ابوالعبد]

فهمت عليك باش مهندس تسلم

[نيساني]

سمعت من فتره انه قانون التمويل تغير وصار البنك يمولك لحد المليون وثمانمية الف والباقي تكملها من عندك والقسط الشهري 11000 لمدة 30 سنه

بنك التنميه يعطيك مليون وميتين بس البيت لازم ينكتب بس بنك التنميه والصراحه ماعرف شوضع البنك الممول بو المليون وثمانميه هل عادي العقار ينكتب بسم بنك التنميه او لا

الله يعينك عزيزي

[شموخ دائم]

,

,


مرحبا


المصرف الإسلامي

قديمك نديمك



,

,

[اسعاف]

اياك ان تتعامل مع بنوك ربوية
فلن تهنأ في بيتك أبدا
لأن الله قال ( فأذنوا بحرب من الله ورسوله)
سؤال: هل فيك شدة تحارب الله ورسوله؟

[معماري قطري]

اياك ان تتعامل مع بنوك ربوية
فلن تهنأ في بيتك أبدا
لأن الله قال ( فأذنوا بحرب من الله ورسوله)
سؤال: هل فيك شدة تحارب الله ورسوله؟

آضم رايي لرايك غلطت في الاشادة ببنوك ربوية

[بوخالد911]

مووووفق.

[نووون]

جربت مع البنك الدولي الإسلامي ... لشراء بيت بمليونين

يعطونك القرض بضمان الراتب .. ويعتمد القسط على حسب الراتب

ممكن تأخذ التفاصيل منهم بزيارة البنك

الزبدة .. انهم ياخذون نسبة قليلة لكن لما تحسبها تطلع عليك حول 700 الف ريال من القيمة الاجمالية للعقار

وهذي فوايد البنك الإسلامي بنظام التوريق

يعني انت خسران اكثر منك ربحان!

وعندهم نظام ثاني الايجارة المنتهي بالتملك

وعندهم الرهن


النصيحة ..

ان الواحد يشتري كاش افضل .. تجمع المبلغ منيه مناك وبأي طريقة حلال

غير البنوك الربوية لاتقربها علشان اتهنى ببيتك وحلالك.

[Class - Qtr]

السلام عليكم

الدولي الاسلامي الافضل من ناحيه القروض عن تجربه شخصيه بشرط تاخذ القرض وقت العروض

انا خذيت ( مليون ريال ) على 6 سنوات والقسط ( 16600 ) والارباح ( 193 الف )

في طريقه ثانيه انك تشبك حساب زوجتك في حساب واحد وتاخذ مبلغ ( مليونيين ريال )

القسط تقريبا في حدود ( 32 الف ) والارباح في حدود ( 400 الف )

بالتوفيق لك اخوي

[ذكي جدااا]

ايدفهمت اخوك القصد ياغالي كم نسبه الفوايد ابي بنك ارخص واحد يعني مثلا باخذ قرض ثلاث مليون ودفعه اولى بدفع. مثلا خمسميه الف فحاب اعرف الامسب حسب خبرتكم
حسب قانون القرض العقاري من المصرف المركزي انك تدفع أربعين بالمية من قيمة البيت يعني اذا بتاخذ بيت بثلاث ملايين لازم تدفع دفعة اولى مليون وميتين والباقي يعطيك اياه البنك ويكون العقار مرهون بأسم البنك.

[Qt.1]

ماظن البنك يعطيك 3 مليون حتى لودفعت نسبه لان اللمت محدد من المصرف المركزي ,

[ameeer3]

فعلن مثل ما تفضلوا الأعضاء ،،

الدولي الاسلامي الأفضل والأحسن للقروض سواء الشخصية أو لشراء سيارة أو منزل ،،

وفي رمضان بعد يسوون عروض ع القروض بفائدة اقل ،،

وحتى في الأشهره العاديه بعد فوائد القروض عندهم اقل من البنوك والمصارف الاخرى بالدوله.

( بالتوفيق وجعله منزل مبارك مقدما )