هل في زياده او نقص في مواد البناء بعد الحصار ؟

[koketa]

السلام عليكم

جاتني موافقه البلديه الحمد لله والحين ادور مقاول شاطر لبناء فيلا

السؤال الحين هل سأواجهه صعوبات وتأخير بسبب نقص أو ارتفاع اسعار المواد ؟

شاركونا تجاربكم اللي بدأ يبني فيلا في هاي الوقت.

[مواقف النجادة]

يختلف من مقاول الى مقاول
في مقاولين يقولون لك الحصار ماله تاثير و الأمور طيبة و هولاء جيدين و حق شغل
و في اللي يتعذر لك بالحصار و يطلع لك اعذار .. و هالنوعية لو مافي حصار ..بعد بيطلعون لك اعذار ..
العضم ما فيه مشكلة.. و لين ما توصل التشطيب أتوقع السوق راح ينسى البيبات البحرينية و كيبلات دبي والحجر السعودي و الجبس بورد الاماراتي و السعودي
البدائل موجودة في السوق حاليا ..و كلما طال الحصار قلت إمكانية عودة منتجات دول الحصار الى وضعها السابق
انا عن نفسي قاعد اسوي جبس حق بيتي و قالي المقاول بداية العقد انه راح يجيب جبسن بورد اماراتي عن طريق عمان .. قلت له اذا عرفت انك استعملت أي منتج في بيتي من دول الحصار اعتبر العقد ملغي

[شموخ دائم]

,

,

مرحبا

اخوي الكريم

المصاعب والمشاكل عند الشركات مستمره وهو جزء من عملهم
والمقاول ( شغلته يحل المشاكل ) ويوجد الحل والبديل
أي مشروع صغير او كبير كله تحديات

المطلوب منك ما تفكر بهذه المشاكل

المطلوب منك
1- ترتب خريطه تحط فيها احتياجك بشكل عقلاني دون مبالغه في مكتب جيد يكون ناصح لك وخبره بمجال عمله
2- تحط استشاري على مستوى عالي من الخبره ومكتب معروف بحسن التعامل وفيه مهندسين شاطرين وقادرين
على تحمل المسئوليه
3- تبحث عن مقاول سمعته طيبه بالسوق ويمتلك الاداره والعماله وحسن اداره المشروع


اترك المشاكل الي بالسوق لكل شي حل

أحيانا تبي تبني شغله صغيره بالبيت
تطلع لك 50 مشكله تلاقي وايرات في الأرض تحتاج مواد ما تعرف من وين ومنو يوفرها لك
تلاقي صعوبات مو متوقعه اثناء التنفيذ وتحتاج أفكار وحل لها

كل شي له مشاكله
:)

لا تشيل هم

ركز على مشروعك ( المواصفات ) والشركه الي بتنفذ لك تكون فيها كفائه وامكانيات

واترك اهل الاختصاص يقومون بشغلهم

من استشاري ومقاول

توكل على الله

والله يعينك ويسر امورك يارب

,

,

[بوجبر]

مواد الجبس والكهرباء طارت...

[ولد المنصور]

واذا تبي شركه فوق الممتازه ومجربه من سنيين ابشر ...

[koketa]

مواد الجبس والكهرباء طارت...

الحين شلون ؟ هل في مصادر أخرى ؟

[معماري قطري]

السلام عليكم ورحمة الله وبركاته

الشباب ما قصروا بنصايحهم والخبير شموخ دائم حدد المهم .. اللي بيبني لازم يركز على الجودة حتى ما يتورط والجودة مب بالضرورة تكون غالية ومستحيل تكون رخيصة .. المقاول الردي واللي يعطي سعر رخيص يغش علشان يطلع فايدته والا يركز على النواقص ويقول بعدين ما اتفقنا عليها ويكون صادق بس يعملها بخبث ولا يذكرها من البداية ويخليها لوقتها حتى يطلب مبلغ مضاعف

والمقاول الجيد لازم يربطه عقد جيد وتفاصيل دقيقة وهذي ما يسويها الا مكتب هندسي جيد ولازم توقيع العقد في حضور وباشراف المكتب الهندسي

بو جبر يقول أسعار الجبس والكهرباء زادت واتوقع صحيح بس بالنسبة للكهرباء لحد يسترخص ولازم ياخذ الأجود والأفضل وباشراف هندسي مختص بعد وبتركيب مقاول متمرس وفاهم .. والجبس يتم انتاجه في كل دول العالم مب بس السعودية والغمارات ( ما ادري ليش كله اغلط في اسمها ما احبها كلش )

في النهاية ادارة العقد وعمل مناقصة لحدود 10 مقاولين متقاربين في السمعة والشهرة ومعروفين بجودة العمل وسرعة الانجاز بنحصل السعر يفرق يمكن بمقدار نص مليون أو حتى مليون وفوق .. بنقدر نتفاوض مع من نرتاح له ونتوكل على الله في شغلنا معاه .. وهذي أهم خطوة وكثيرين يعملونها بنفسهم وبدون ادارة هندسية مع إن المكاتب الهندسية المشرفة تكون جاهزة لهذي العملية وسهلة عندها لمعرفتهم بعدة مقاولين وممكن المالك يضيف من يحب من المقاولين وفي النهاية هو يختار ويمكن يختار الأغلى لو شاف اللي أقل منه لهم شروط غير أو مب مضمونين

وأنصح بقراءة موضوع العقود وفيه مثالين أو ثلاثة لعقود ممكن الاستفادة منها أو من النقاط اللي في الموضوع

[م. عبدالعزيز]

صل الاستخارة والامور طيبه
ترا مشاريع الدولة ما شاءالله ماشيه والحمد الله من ملاعب وبنية تحتية ، والناس تبني روح المناطق الجديده تلاقي المقاولين شغالين
اهم شي شوف لك مقاول زين وما يتعذر لك بأعذار مثل هذي ويخليها حجه يرفع عليك السعر

[بوجاسم_قطر]

مرحبا اخوي
ألي سمعته من الربع في بناء العظم مافي هناك زيادة والأمور طيبه
بس في التشطيب بعض المواد زاد سعرها لفترة محدودة لين مايتوفر البديل واكيد بعدين الأسعار كلها راح اتعدل
يعني في مثل حالتك، اذا وصلت لمرحلة التشطيب بتكون الأمور تحسنت..

صل استخارة وتوكل على الله والله يوفقك

[معماري قطري]

نصيحتي للي يبي يبدأ يبني هذا وقت البداية مع تحسن الجو على الأقل يضمن صب الخرسانات قبل نهاية شهر 3 .. ويسوي عقده كامل حتى لو هو بيشتري مواد التشطيب .. يخلي التركيب والنقل لو مطلوب والفحص والاستلام على المقاول وكذلك التخزين ويكون المقاول مسؤول عن أي هالك يتعدى ال 10% زيادة المحسوبة

ويبني هيكل خرساني قبل وطبيعي بعد الأساسات يدفن ومرحلة ثانية الطابوق وثالثة التمديدات والبايبات بعدين التبليط والبلاستر أو الصبية الأرضية والبلاستر بعدها التبليط وباقي الأُمور سهلة لو خطط لها صح

للي بيبنون بيسمنت الوضع يختلف لأن يفضل يعمل تصريف مياه للبيسمنت .. قصدي مياه جوفية ومياه أمطار متسربه حتى لو يعمله ويخليه احتياط ما يكلف شيء .. منهول جانبي + بايبات بفتحات تصيد أي رطوبة وتنقلها بسلوب مناسب للمنهول + مضخة عادية ترفع الماء لفوق .. كله ما اعتقد يكلف 10000 والوقاية خير من العلاج