سفرتنا هذا الصيف لجنيف + زيورخ + ميلانو

[معماري قطري]

السلام عليكم ورحمة الله وبركاته

مع هذا الصباح الجميل في دوحة الخير بابدأ في نقل تجربة هذي السفرة اللي كانت الأُولى لي لهذي المدن الثلاث .. انا هدفي الاستجمام والمشي ورؤية المناظر الطبيعية والمباني التاريخية ويمكن أغلب تركيزي في الصور على هذي الأشياء

باقي العائلة بناتي وام العيال تركيزهم الأول والأخير على التسوق ثم التسوق ثم التسوق ولو أعلنوا غير ذلك .. والحمد لله العيال الشباب واحد راح لندن والثاني حب يستقر في الدوحة واستوت رحلتنا خفيفة وسهلة

لازم آخذ باقي الصور واضيفها للمجموعة اللي عندي وهذا أكيد بيسوي ربكة لمسار الموضوع لأني أحب يكون معروض بشكل قصصي وتسلسل زمني بس إعذروني هالمرة في الترتيب وبابدأ بالصور اللي عندي وهي قليلة صراحة

بدت رحلتنا يوم 12 8 من بعد الفجر مباشرة وأول الصبح مفتتحين المطار وكانت سهلة نمت وصحيت الا باقي ساعة .. وكنت حاجز سيارة من المطار ولا خذتها رحنا بتكسي لأن سكننا في وسط المدينة وكل شيء قريب .. سكننا في فندق مندرين اورينتال أو اورينتال مندرين وكان جيد وخدمتهم جيدة وقريب من منطقة السوق ومن منطقة المشي على ضفة النهر أو البحيرة

بابدأ بصور للفندق وهذي صورة للتلفزيون وقناة الجزيرة .. التلفزيون مثبت على عمود ووراه دريشتين كبار ويتحرك ويلف شوي بما يناسب اتجاه الرؤية

https://i.imgur.com/jhkds0e.jpg

يمكن بعض الصور ما تبين واضحة بسبب الاضاءة لكن باحطها كلها وانا اصور بطريقة دائرية حتى تتصل الصورة ويوضح المكان

https://i.imgur.com/iSSAUMq.jpg

https://i.imgur.com/06e6Tjk.jpg

هذي صورة صوب باب الغرفة اللي يدخل على لوبي صغير يتفرع منه باب لغرفة ملابس مقابله باب لدورة المياه وباب ثاني يدخل على الغرفة اللي انا اصور وراه .. وهذا يعطي هدوء أكثر لأن الغرفة مسكرة ببابين وكل البيبان هذي لها ربلات عن الصوت

https://i.imgur.com/mUW4PEs.jpg

مكتب صغير في طرف الغرفة

https://i.imgur.com/m3pXMjQ.jpg

https://i.imgur.com/SpoFcB5.jpg

https://i.imgur.com/TLhKnfe.jpg

حركة حلوة حبيتها في الفندق هي هذا الخشب الفاصل بين الرسبشن والمطعم اللي للريوق وريوقهم كان متنوع وخدمتهم ممتازة .. هذا الخشب مركب بينه قزاز ومن تحت انارة

https://i.imgur.com/iUW3iS7.jpg

وهنا نشوف من خلال القزاز وبين الخشب كراسي وطاولات المطعم

https://i.imgur.com/HyUXkMd.jpg

باكمل إن شاء الله وقت ثاني

[الحياة الخالدة]

وعليكم السلام ورحمة الله وبركاته
الحمد لله على سلامتكم أخوي بوعبدالله
ومتشوقين لباقي التقرير بكل تفاصيله
عساك عالقوة

[bohilal191]

الحمدلله على السلامة يالغالي وسلامة الأسفار وفي انتظار باقي الصور ههههههههههه يموتون الحريم في التسوق وياخي استغرب منهم يشترون أشياء من برع وهي موجودة في قطر واذا سألتهم ليش قالوا من برع يعني ماركة هههههههههههههههههههههه

[رجل تعليم]

توحشنا بزاااف هاد النوع من التقارير
يالله هاني متابع معاك حتى الأخير ان شاء الله

[معماري قطري]

وعليكم السلام ورحمة الله وبركاته
الحمد لله على سلامتكم أخوي بوعبدالله
ومتشوقين لباقي التقرير بكل تفاصيله
عساك عالقوة

الله يسلمج ويقويج إختي الحياة

[معماري قطري]

الحمدلله على السلامة يالغالي وسلامة الأسفار وفي انتظار باقي الصور ههههههههههه يموتون الحريم في التسوق وياخي استغرب منهم يشترون أشياء من برع وهي موجودة في قطر واذا سألتهم ليش قالوا من برع يعني ماركة هههههههههههههههههههههه

الله يسلمك إخوي

انا خلاص مستسلم من زمان عارف شغلي .. هالمرة زين خذت التذاكر من وقت وقلت سياحية بس بعدين سوينا أبغريد في عرض من عروض القطرية والفنادق خذتها بالطريقة القديمة من السفريات وشغلي كله كان جاهز من قبل فترة يمكن شهر 3 .. وكانت خطة السفر هالسنة 10 أيام اجازة عيد الفطر تركيا وبعد هذي توفقنا فيها و21 يوم لهذي المدن الثلاث

عن المشتريات صراحة استسلمت ادفع وبس وكل شوي ازيد الميزانية .. قبل وزعت على كل وحدة مبلغ وعندي بنت الله يحفظها كله تقول لي هذي ما تكفي ليوم واحد

[معماري قطري]

توحشنا بزاااف هاد النوع من التقارير
يالله هاني متابع معاك حتى الأخير ان شاء الله

حي الله إخونا المغربي الطيب

هناك التقيت كم مغربي وما شاء الله شعب راقيين .. أحدهم لغته العربية تحت الصفر تفاهمت معاه بالانجليزي وسهل لي ايجار السيارة .. لأني اضطريت أأجر يومين يومين بدال فترة طويلة للمسافات الطويلة وباقي الوقت بالتاكسي أو مشي كل شيء قريب

[معماري قطري]

من أهم المعالم البحيرة واللي حولها كورنيش مشاة وأسواق ومقاهي

https://i.imgur.com/12k8tqx.jpg

وهنا منطقة شغل تحت جسر يقطع البحيرة من الجانبين يسوون الظاهر جلسة خارجية لمطعم

https://i.imgur.com/9Jl0QdV.jpg

بناية ينعمل عليها ترميم والظاهر بناء أدوار أكثر نشوف التغطية ببلاستيك خاص مع السقالات بحيث ما ينتشر الصوت أو الغبار للمحيط والشغل يكون محصور في مكان البناية مع إمكانية الرؤية ولو قليل

https://i.imgur.com/yPG3zwu.jpg

عجبني في بناؤهم اختيارهم لمواد تعيش عمر طويل جداً حتى الحديد اللي للدرابزين ذيه خاص ما يصدي ونفسه في الأرضية

https://i.imgur.com/ZhcIxML.jpg

الجسور مبنية من زمان بس بنيان متين ما يتغير

https://i.imgur.com/B2PKdxj.jpg

درام عادي مصبوغ وموضوع على قاعدة خشب مستعمل للزراعة وتحته يمر مجرى المياه

https://i.imgur.com/yr2FnRB.jpg

https://i.imgur.com/jemaJGt.jpg

القطار الكشرة هذا اللي فوق الجسر سياحي ركبت فيه كسر ظهري يلف حول شوارع المدينة ويتكلم مرشد سياحي

https://i.imgur.com/T4eUtjG.jpg

ولي مواصلة عن قريب بإذن الله

[naklan]

معماري الحمد لله على سلامة الوصول
الصراحة خوش سفرة أوربا دائماً جوها حلو في
الصيف ذكرتني في ميلانو وفنادقها الاثرية وساحاتها
الجميلة والمطاعم الفاخرة اياباه يبيلها كابتشينو
متابع تقريرك الجميل لاهنت

[كويتية74]

الحمدالله على السلامة, تقرير جميل ننتظر الباقي

[بوخالد911]

عودا حميدا بش مهندس.
ننطر باقي الصور
زانا من هواة صور الطبيعة من جبال وسهول وأنهار.

[السيف5]

متابعين معك
ويعطيك العافية لجهدك باعدادك التقرير مقدما

[معماري قطري]

إخواني نكلان واختي كويتية واخواني بو خالد والسيف

شرفتوا الموضوع بمروركم الطيب وإن شاء الله أواصل مع باقي الصور بكرة وسامحوني على التأخير

[رُفق المجنّا]

تقرير جميل فيه مسحة معمارية :)

قوّاك الله ومتابع معاك

[معماري قطري]

تقرير جميل فيه مسحة معمارية :)

قوّاك الله ومتابع معاك

الجميل مرورك وتعليقك الطيب

أوقات احس إن تركيزي على أُمور ما تهم الكثيرين ويهمهم معلومات السوق والمطاعم والمدينة .. عن المطاعم قربنا كان فابيانو في جنيف وقريب منه فيه مطعم كردي يسوي شوارمه جايرو اليونانية ويسوي فلافل وحمص .. فابيانو أكلاته زينة وهو ايطالي اعتقد .. والمحلات ما شاء الله المدينة كلها ماركات وجميع المحلات المعروفة فيها

شفت بنك قطر الوطني قريب منا .. قلت خلاص باخلص لي معاملة منه لكن تفاجأت بأنه للاستثمار ولا له بالمعاملات الخاصة نهائياً

وأتابع ببعض الصور بدون تعليق الا لو فيه حاجة وهنا واضحة نظافة البنيان والمواد .. الأرضيات كلها من أفضل ما يكون لسهولة المشي بدون أخطار سقوط وللكل من مختلف الأعمار وللعربات والدراجات كذلك

https://i.imgur.com/Achzp3J.jpg

https://i.imgur.com/IRKR5PT.jpg

بعض المباني القديمة متأثرة من تحت بسبب الرطوبة لكن الحديثة متخذين لها حلول جذرية من ضمنها قطعة ألمنيوم عازلة مغروسة تحت لتغطية الحائط من تحت لفوق وبعضها مغطاة برخام أو حجر

https://i.imgur.com/I9EUlFN.jpg

مثال هذا البنيان القديم وكثير من نفس النوع في مدينة جنيف مبنيين قبل معرفة الخرسانات المسلحة والأساسات بمعناها التقليدي .. فتحصل الأساس قطع حجر كبيرة ثم تصف عليها قطع حجر منتظمة ومقصوصة مثل هذي ثم يأتي الطابوق بالاسمنت لكن لا وجود للخرسانة مثل اليوم والجدران تكون حاملة للوزن وليست كما هو اليوم الحامل هو الهيكل الخرساني أو الحديدي

https://i.imgur.com/qLxX9iW.jpg

https://i.imgur.com/DVM8b1j.jpg

https://i.imgur.com/e1cPvTA.jpg

العمل اليدوي واضح حتى في الزاوية فهي مقوسة وصعبة في وقتنا الحالي لعدم وجود الحرفيين السابقين وللتوجه لعمل مباني رخيصة

نلاحظ النوافذ للدور الأول عليها تيجان وتشكيلات أحلى بسبب قربها للرؤية لذلك الاهتمام ينصب عليها وتترك البقية أقل منها زينة

https://i.imgur.com/Xa217rT.jpg

[معماري قطري]

اختلطت علي المناظر شوي بحيراتهم تتشابه رحنا منطقة فيها بحيرة نسيت اسمها وهذا فيديو عنها واحتمال يكون في بحيرة جنيف


https://youtu.be/ANTaMyJFRMA

[معماري قطري]

أستكمل باقي الصور واحط فيديوهات أكثر إن شاء الله

https://i.imgur.com/6DIHttU.jpg

أول سيارة أجرتها يومين يوم رحنا جبل شامونيه في فرنسا ويبعد حول ساعة ونص اعتقد ويوم رحنا بحيرة نسيت اسمها مب انترلاكن ثانية بس مشهورة ولازم باتذكر اسمها أو باسئل عنه .. السيارة عن طريق الفندق أجرتها وبالصدفة كانت من هرتز وكنت حاجز عندهم مرسدس فان بعد وصيتهم يجيبونه حق سفرة جنيف زيورخ .. السفرة بعد كانت ممتعة وخذت منا حول 4 ساعات تغدينا خلالها في الطريق

هنا وقفتها قريب بس ما صورتها ولا حد صورها الظاهر ما عجبت حد غيري كانت فولفو اكس 60 اعتقد صغيرة بس عملية ومريحة مقارنة بالفان الكبير

عاد مواقفهم تحط 3 يورو حق نص ساعة وما تلحق تقعد تاكل او تدخل محل الا خلصت النص ساعة ولازم ترجع تحط 3 يورو ثانية حق نص ساعة ثانية وسويتها انا لأن تغدينا في مطعم قريب بس بين المرتين مرت دقيقتين تقريباً .. وحطيت الفلوس والورقة مرة ثانية ورجعت تغديت .. اكتشفت بعدها مخالفة ب 40 يورو خلال الدقيقتين وحاطينها على مشاش السيارة الجهة الثانية

تشطيب الجدار الحجري عجبني والمدينة خليط من اللوحات الفنية الجميلة

https://i.imgur.com/IFtgJH3.jpg

https://i.imgur.com/PGmtLjk.jpg

البحيرة مرة أُخرى

https://i.imgur.com/GjeFm7V.jpg

https://i.imgur.com/8wOQkck.jpg

https://i.imgur.com/az5PIwP.jpg

https://i.imgur.com/L31mjTo.jpg

https://i.imgur.com/hwRf1qS.jpg

https://i.imgur.com/pOwER8Y.jpg


https://youtu.be/h3Eoio9Cj7c

[معماري قطري]

الفيديو الأخير كنت ناوي احطه مع دفعة رحلة الشلال بس أكيد بتستوي خلطة لتسلسل الرحلة

[بوخالد911]

واااصل بش مهندسنا
والله يواليك العافية.

[معماري قطري]

مسار الرحلة كان رحلة خارجية وحدة للحدود الفرنسية وجبل شامونيه هناك .. إخترنا يوم الأثنين على إنه أقل زحمه لهذي المناطق وطلعنا بعد الريوق .. خذت الرحلة منا حول ساعة من جنيف لين هذا الجبل عن طريق الجي بي اس وبرمجه لي المغربي اللي جاب السيارة من الشركة

الطريق روعة وملتف وفي أماكن نزول ومرات ارتفاع .. والجبل هذا في تقاطع ثلاث حدود فرنسا وسويسرا وايطاليا .. واللي له نية يروح يحاول يحجز ليلة أفضل له يتمشى في المدينة أكثر أو حتى أكثر من ليلة بعد زين ليلتين يتراوى لي كفاية

تمنيت احصل صور للقرية وفيها سوق مصغر مفتوح ومطاعم تغدينا هناك ورحنا للتلفريك لأكبر قمة .. وكان لازم ننتظر حول ساعتين وشوي حتى نركب وبعدها حول ساعتين هناك فوق بعدين نرجع .. ما يحق للواحد يرجع قبل لتنتهي الساعتين ويسلمونه رقم كبينة للذهاب ورقم هناك للعودة .. وسالفة الأثنين بداية اسبوع عمل طلعت غلط وطلعت اجازة رسمية للفرنسيين ومن هشكل صادتنا زحمة كبيرة

أترككم مع بعض صور شامونيه


https://youtu.be/Ro8EZjHcVXo

https://i.imgur.com/AQO9cZp.jpg

https://i.imgur.com/H8zDpP0.jpg

هنا حصلنا واحد يبي يصور عند القمة صورناه

هذي القمة بارتفاعها لو نبغي نقارن بارتفاع وسط قطر اللي يعتبر أرفع شيء عن سطح البحر وهو بحدود 15 متر صوب الشحانية وجبل الوكرة ما ينسمى جبل تل بارتفاع الله أعلم 25 متر ولا شيء عند 3842 متر

https://i.imgur.com/bDxrLBw.jpg

وهذا مسار الرحلة يعتمد على الزحمة خصوصاً بعض الطرق تتحول من مسارين لين مسار ويكون المرور فيها شبه متوقف

https://i.imgur.com/ldK2v0O.png

وهذي كل صور شامونيه وللأسف ما صورنا السياح والمدينة اعتمدت على صور الأهل بس ما حصلت الا القليل خصوصاً لمناظر الطريق

كانت خطتنا نروح ثاني يوم أنسي اللي تبين في الخريطة وهي بحيرة وقرية هادية بس جاوا خذوا السيارة من الفندق الساعة 7 الصبح وكنت احسبهم بياخذونها الليل لو الليل المفروض يكتبون 19 .. يعني استوينا مأجرينها يوم ومدفعينا حق يومين لأن طول الليل ما نستفيد منها فقط مؤجر لها موقف في الفندق

[معماري قطري]

واااصل بش مهندسنا
والله يواليك العافية.

ما ادري شفي النت اخوي بو خالد الظاهر دليم وربعه بيقطعونه عنا بصعوبة اقدر انزل صور من قوقل ايرث واسوي ابلود للصور اللي عندي

[بوخالد911]

ما ادري شفي النت اخوي بو خالد الظاهر دليم وربعه بيقطعونه عنا بصعوبة اقدر انزل صور من قوقل ايرث واسوي ابلود للصور اللي عندي

الله يقطع دليم وربعه

:)

[راجي الْعفو]

والله و خربوك يا بوعبدالله
صور سياحية و حركات ^_^
جذي سوى فيك الحصار ^_^
راعي النظاره اللي صورته..كنت ساومته عالنظاره مقابل الصوره .. الدنيا مهي ببلاش^_^

[معماري قطري]

والله و خربوك يا بوعبدالله
صور سياحية و حركات ^_^
جذي سوى فيك الحصار ^_^
راعي النظاره اللي صورته..كنت ساومته عالنظاره مقابل الصوره .. الدنيا مهي ببلاش^_^

يا اخوي راعي النظارة ذيه صورته بعد صورة ثانية ما ادري شعنده شكله يتجسس علينا

عارف إني بالخبط الترتيب .. حصلت فيديو حق القطار اللي يكسر الظهر في جنيف

ما صورت الرحلة كاملة والا كان ودي بس الذاكرة عندي شبه منتهية قصدي اللي للتلفون وكذلك الذاكرة الفعلية


https://youtu.be/Z6iV-ZQsuJ4

شوف يا راجي هذا نفسه بالضبط حصلناه ثاني يوم كان متنكر لابس كبوس يوزعونه دعاية حق شركة ليبارا وهي شركة اتصالات

https://i.imgur.com/Xr94ycM.jpg

هذي صورة جوية حق فندق مندرين في جنيف وكان هو أغلى فندق سكناه بس رايي ما يسوى مقارنة مع الفندق اللي في ميلان واللي ملك لكتارا ذاك صج يفرق وبنوصل لصوره إن شاء الله وأنصح أي حد بيسافر ياخذه عن طريق موقع الفندق أو سفريات تورست .. إحنا حصلناه من السفريات ب 1390 ومن المواقع كان بحدود 1900 والغرف ديلوكس مع الفطور

https://i.imgur.com/NptH4Vs.jpg

مسار رحلتنا كان جنيف ومنها رحنا شامونيه مثل ما وضحت بالخارطة قبل .. كنا مخططين نروح أنسي بس ما حصلت فرصة .. بعدين رحنا بالسيارة لزيورخ في رحلة حول 4 ساعات وكانت مريحة وممتعة .. من زيورخ رحنا لوزيرن وهذي قرية فيها بحيرة وسياح كثيرين ومرتبة .. ورحنا كذلك انترلاكن وانترلاكن حبيتها وايد خصوصاً الهواء له ريحة غريبة مثل الغيم .. اللي يخطط يروح يسكن في انترلاكن يومين ويسوق حول المناطق اللي حولها حتى 4 أيام تسوى لكن صعوبة الحصول على سكن ما خلتنا نفكر نحجز هناك ما فيه حجز أصلاً

حصلت صورتين من صديق لي حالياً في شامونيه وهذي لجوانب القرية

https://i.imgur.com/7ZKDdbE.jpg

الجو يبين بارد ولا يصلح هالوقت لأن التلفريك يوقف لو الجو ما يناسب وفي الصيف درجة الحرارة برا توصل لتحت الصفر

شتوا العالم وإن شاء الله يرسل لي صور اضافية

https://i.imgur.com/F6MH7PI.jpg

خلوني اكمل صور جنيف وننتقل إن شاء الله لزيورخ بعدين .. وهذي صورة لغرانيت متكسر وانا اصور واحد يطالعني مستغرب يتراوى لي يقول طلعت الفضايح .. هذي القطعة كبيرة وطريقة تركيبها ميكانيكل بلاصق خاص قوي يثبتها في القطعة البيضاء وتتثبت من تحت مع الجدار بالرصيف اللي ضاغط عليها .. لكن لأي سبب ممكن تنكسر لو انضربت برجل حد قوة أو شيء ضرب فيها .. كان أفضل تركيبها ميكانيكل بحديد وثم تعبئة الفراغ باسمنت مع ترك فراغ بسيط بين الرصيف والغرانيت وتعبئته بالماستك حتى يسمح بتمدد الغرانيت قليلاً

https://i.imgur.com/bvzQNPv.jpg

https://i.imgur.com/8VbYaf8.jpg

[معماري قطري]

وهذا فيديو لبحيرة جنيف


https://youtu.be/QKnI6ig2coQ

[معماري قطري]

لقطات للجبل ما ادري حطيتها أو لا


https://youtu.be/XMkb1ulegtM

[راجي الْعفو]

يحبك يابوعبدالله ههههه فعلا مصادفة عجيبه .. مرّتين ^_^

[معماري قطري]

يحبك يابوعبدالله ههههه فعلا مصادفة عجيبه .. مرّتين ^_^

صراحة أكثر بس بعض الصور مب حاطها

[بوخالد911]

تستهويني جدا المناطق الجبلية.

[معماري قطري]

تستهويني جدا المناطق الجبلية.

متابعتي قليلة والمفروض اواصل لكن إن شاء الله قريب

أكثر شيء احب الجبال اذا معاي حد يخاف وسرعت شوي .. اللي يسوق ما يستمتع كثر اللي معاه بس بشرط يوثق ولا يخاف بعضهم يغمض عيونه

[معماري قطري]

باكمل اليوم صور جنيف إن شاء الله

لازم تجذبني المباني القديمة وأفكر في بنيانها ومن بناها وطريقة التفكير المعماري ذاك الوقت

https://i.imgur.com/9vILAXL.jpg

هنا المبنى جزء قديم له فوق ال 100 سنة وجزء أحدث منه بكثير .. نلاحظ القديم واحتمال اكون مخطيء وله عمر طويل حول 400 سنة وفوق .. الحجارة تحت كبيرة وعريضة وعبارة عن حجارة جيرية كان يسهل جلبها لوجودها على سطح الأرض وليس في الجبال .. كما يسهل تشكيلها بطريقة يدوية .. وأنا على يقين بأن هذا الجزء من البنيان بني بدون أساسات بالمعنى المتعارف عليه حالياً .. الحجارة الكبيرة هي القاعدة ثم يصف فوقها الطوب الطيني اللذي يعالج بالحرق بالنار أو بالشمس

نلاحظ كذلك عدم اتزان النوافذ في خط واحد وتآكل المبنى بسبب التقادم

https://i.imgur.com/v1558ZO.jpg

https://i.imgur.com/GcTjjaC.jpg

https://i.imgur.com/A1TFbZD.jpg

https://i.imgur.com/0EzciuW.jpg

إطلالة غرفتنا كانت خلفية وهذا سكايلايت مطعم الفندق شبه مسطح

https://i.imgur.com/Q2L3cwZ.jpg

تفاصيل الحجر والرخام للمباني رائعة وجميلة ومتقنة

https://i.imgur.com/Gm578S3.jpg

https://i.imgur.com/hSfxNtv.jpg

https://i.imgur.com/DYt1iAx.jpg

https://i.imgur.com/NT7Imvb.jpg

https://i.imgur.com/oFiBCau.jpg

https://i.imgur.com/9fwiph1.jpg

وهذا فيديو للبحيرة


https://youtu.be/YYKH8z9QDps

https://i.imgur.com/nWGHlZ0.jpg

https://i.imgur.com/hZC0bHH.jpg

https://i.imgur.com/Q1MYnPi.jpg

https://i.imgur.com/JfprBbi.jpg

https://i.imgur.com/8ZlUNKv.jpg

https://i.imgur.com/EFp9hnv.jpg

https://i.imgur.com/9ZGtRKw.jpg

https://i.imgur.com/ZxEOjVK.jpg

https://i.imgur.com/OTxwa1A.jpg

[بوخالد911]

عساك ع القوة.

[معماري قطري]

عساك ع القوة.

الله يقويك إخوي بو خالد

[معماري قطري]

المرحلة الثانية كانت زيورخ ومنها رحنا للوزيرن وهي مدينة صغيرة تعتبر قرية وفيها بحيرة وكثير سياح .. مرتبة ونظيفة وحبيتها وتبعد حول نص ساعة ومدينة انترلاكن وبعد صغيرة ووسط الجبال وجايين حق صورهم

رحلتنا لزيورخ خذت حول 4 ساعات من ضمنها توقف نص ساعة للغداء في برغر كنغ سريع وخفيف وحسب رغبة الجمهور .. وصلنا الفندق المحجوز مسبقاً ومدفوعة قيمته عن طريق السفريات في الدوحة متأخرين ولا عطونا الغرفة المطلوبة قالوا هذي مؤقت لين بكرة بنغير لكم .. هذا فندق الماريوت وأحسن شيء فيه البزنس لاونج فيه خفايف وانا حبيت اتعشى بدري من 7 فيه والعشاء خفيف .. صراحة ما يسوى لأن على كل غرفة 95 فرنك وكل اللي يشربونه هناك قهوة وشاي وهو متوفر في الغرف مجان وبعض السلطات والأكلات اللي تنحط الساعة ست وتنشال 7 ونص وفي الليل يبقى شوية جبن وخبز الواحد يقدر يشتري للغرفة بربع المبلغ اليومي وياكل طول الفترة

إغتريت في الماريوت كإسم ومن اللي سمعته عن هذا الماريوت بالذات لكن ما عجبني نهائياً وانا عضو معاهم من زمان

أول غرفة عطونا الطابق الثالث وفي مبنى ملحق لمدة ليلة بس .. مطلة على سقف مزروع وفيه خلايا نحل والنهر يبين طرفه في الخلف

https://i.imgur.com/puDaB96.jpg

https://i.imgur.com/QvqkjOK.jpg

الغرفة باللون البني الداكن الكئيب

https://i.imgur.com/wUa0hhN.jpg

https://i.imgur.com/Kn8MuOZ.jpg

الثلاجة كانت ما تبرد عدل وهذي عادة الماريوت في كم مكان والأنسولين يحتاج برودة كافية والمشكلة يقولون جيبه بنحطه في ثلاجة أبرد وانا احتاج دوم ومع كل وجبة .. شكلي لازم اكتب حق ادارتهم

https://i.imgur.com/ifqc9r2.jpg

أكثر شيء حبيته التمشي في الحديقة قرب الفندق والمرور على هذا النهر من خلال جسر للحديقة

https://i.imgur.com/87SsCMC.jpg

https://i.imgur.com/ayB1zjG.jpg

أشجار الحديقة كنت اشوفها واصلة الدور الثالث والفندق مرتفع .. صج أشجار ضخمة بعضها جذعها من تحت فوق المتر

https://i.imgur.com/iT5Z7dj.jpg

https://i.imgur.com/39m54Lx.jpg

هذي جذعها فوق المتر بس في الصورة ما يبين مثل الطبيعة

https://i.imgur.com/wFjfod1.jpg

https://i.imgur.com/1A8ytv7.jpg

هذا فندقنا ورا الشجر

https://i.imgur.com/8zTZafw.jpg

سور بسيط غالب الوقت مفتوح والظاهر حاطينه عن لحد ينام في الحديقة خصوصاً إنها فيها جامعة فنون أو عمارة لأني لاحظت مرات الطلاب يرسمون برا ويستغرقون في التفكير والتأمل

https://i.imgur.com/1uAmitm.jpg

في أول مدخل الحديقة من جهة الفندق

https://i.imgur.com/dTT1fPt.jpg

الأسماك اللي في النهر

https://i.imgur.com/98n5b8o.jpg

https://i.imgur.com/04AN14t.jpg

الجسر اللي يقطع النهر يودي للحديقة وراه وفندق الماريوت جدامنا فيه نفق بسيط يطلع مباشرة على باب الفندق

https://i.imgur.com/wxSPs08.jpg

باواصل إن شاء الله مع الصور بكرة

[معماري قطري]

أكيد بارجع لصور الحديقة ومحيط الفندق بس اليوم بانقل مقاطع وصور لأول رحلة خارج زيورخ كانت لشلالات الراين

ما توقعت المنطقة كبيرة هشكل ولياقتي لكم عليها خصوصاً مع المشي في مناطق مرتفعة ونازلة وركوب درج .. كنت متابع للسكر وسوى لي رعب بنزوله السريع وخربت على البقية الاستمتاع لفترة أطول وزين وصلنا لمطاعم وتغدينا وانضبط السكر بصعوبة

هذا فيديو لجزء من الشلالات


https://youtu.be/prBRdBnfWKc

https://i.imgur.com/YTGcPM9.jpg

https://i.imgur.com/XKlfiJr.jpg

https://i.imgur.com/8PTCRif.jpg

https://i.imgur.com/IdhyOre.jpg

https://i.imgur.com/bVP0FPQ.jpg

وين راجي العفو بالصدفة حصلنا رفيجنا هناك بعد

https://i.imgur.com/EMHESqn.jpg

المكان كبير وفيه مناطق كثيرة حتى الصخرة اللي في الوسط يروحون لها بالقارب

https://i.imgur.com/vPmVW5o.jpg

كانت الأجواء حلوة والبرد معقول ونزل شوي مطر

https://i.imgur.com/7nG4cRl.jpg

https://i.imgur.com/phYxrOd.jpg

https://i.imgur.com/e7UF7ql.jpg

https://i.imgur.com/nIhJEBj.jpg

https://i.imgur.com/D9N5WLJ.jpg

[معماري قطري]

مسافة الرحلة قصيرة ومن الفندق حط لنا العنوان اللي عند الباب في الجي بي اس وأنصح من يروح هناك يتفرغ يوم يروح من بعد الريوق مباشرة


https://youtu.be/Nu0m2TwiqJQ

[معماري قطري]

https://youtu.be/bMdRyz4I9Xw

[معماري قطري]

هذا أحسن مقطع ومن تصويري


https://youtu.be/CcO42VGjXA8

[معماري قطري]

أتابع مع لقطات من زيورخ وهذي لبركة ونافورة في الحديقة القريبة من الفندق

https://i.imgur.com/OVLq0SI.jpg

هذي جهة البنايات يمشي الواحد شوي ويوصل لموقع شركة هرتز لتأجير السيارات ويقدر يحصله في قوقل مابز ويمشي له بسهولة بعد ما يحجز .. لأنه مثل ما ذكرت ما يحتاج سيارة الا للمسافات الطويلة

وايد صورت هذا الجسر الخاص بالمشاة وتحته بايبات كبار مصبوغة هي اللي حاملته وبعدد بسيط .. دوم أفكر ليش ما يسوون مثله للمشاة للجزيرة على الكورنيش لتطوير الجزيرة

https://i.imgur.com/YUvHIPZ.jpg

مقسوم نص للمشاة ونص للسياكل بس محد يلتزم في ألمانيا غير عندهم التزام قوي

https://i.imgur.com/LWDx955.jpg

https://i.imgur.com/zDjZtS9.jpg

ناس يركبون على حاجز الجسر ويطبون في النهر يسبحون وبعدين يركبون الدرج الموجود هناك

https://i.imgur.com/jxEIKI6.jpg

https://i.imgur.com/ZO5zpQi.jpg

الجسر والأعمدة البسيطة اللي حاملته قبل المغرب الصورة غير واضحة

https://i.imgur.com/uB80pDS.jpg

الجدار الخرساني الحامل لجسر السيارات وتحته نفق للمشاة والسياكل يوصل للجسر اللي يودي للحديقة

https://i.imgur.com/6H1aQQ5.jpg

فندق الماريوت يسار الصورة وقريب منه جسر السيارات مسار رايح ومسار جاي وممر المشاة قرب النهر يوصل كذلك لمحطة القطار .. قناة النهر غزيرة وأكيد وقت الأمطار يرتفع منسوب المياه ويزيد جريان النهر وشفت هذا آخر الأيام

https://i.imgur.com/48DB65Q.jpg

https://i.imgur.com/NEv1MQF.jpg

مبنى في مسافة وسط الحديقة فيه دورات مياه عمومية مغطى بلحاء الأشجار اليابس وسهل ازالته باليد لكن الكل يحافظ على منشأءات بلاده

https://i.imgur.com/43IxV7S.jpg

https://i.imgur.com/VjHmdHo.jpg

الأرضيات بعضها بحص صغير بحدود سمك أقل من السنتيمتر وبعضها عشب وبعضها حجر مقصوص مثل هذي الصورة

https://i.imgur.com/Wf1n9Cg.jpg

الحديقة يفصلها من جهة مجرى النهر عن الشارع والبنايات

https://i.imgur.com/rHLa7u3.jpg

إتقان في تركيب أرضيات الحجر

https://i.imgur.com/eXAOhdM.jpg

العجيب ولا قطعة مشابهة للثانية

https://i.imgur.com/WjhT0NR.jpg

ممر البحص وبعده العشب والناس يلعبون

https://i.imgur.com/kXzZqgf.jpg

ميزة هذي الحديقة إنها تقريباً 0 صيانة أو فري مينتنانس على عكس حديقة اسباير واحد قال لي رقم ميزانية سنوية مهول لها ( 800 مليون ) والله أعلم

https://i.imgur.com/bBTsCCS.jpg

https://i.imgur.com/SprQC1H.jpg

بعد جسر المشاة بمسافة قصيرة ينزل مستوى النهر ومسوين شلال صناعي وهذا مقطع فيديو له


https://youtu.be/JZUs8jCZJFE

[معماري قطري]

https://youtu.be/5OUe7cNNTds

[معماري قطري]

رحنا بحيرة لوزيرن أو مدينة لوزيرن وفيها بحيرة كبيرة

المدينة حديثة وكلها سياح

هذي لافتة من عدة لافتات تدليكم وين المواقف وشكثر مواقف فاضية .. إحنا وقفنا في ناشيونال هوف .. يا محبهم حق كلمة هوف حفظت هوبتابانهوف اللي عنده خبرة يقول شتعني

https://i.imgur.com/S4oOvqj.jpg

تغدينا في مطعم هندي قريب من هذا المحل ومن طلعنا مرينا عليه .. مختص بالحلويات والشكولاته

https://i.imgur.com/GN61Y5P.jpg

بعدين قعدنا على البحيرة تحت شجرة مظللة علينا والتقطت هذي الصور

https://i.imgur.com/KXFO995.jpg

https://i.imgur.com/lJPNJaR.jpg

https://i.imgur.com/gyXfVv0.jpg

https://i.imgur.com/UnyQd41.jpg

https://i.imgur.com/9SPbHgT.jpg

https://i.imgur.com/B0Hngpr.jpg

الناس سعداء بالصيف

https://i.imgur.com/uNVVzWm.jpg

أحلى منظر عندي يوم اشوف السكر زاحف في المجال الأزرق

https://i.imgur.com/TqEOpkN.jpg?1

الحين متعديه بمراحل وتوه بادي يرجع 136

صورة حلوة لأحد الطيور ما ادري الطيورات

https://i.imgur.com/Sljlf0q.jpg

https://i.imgur.com/OB4lav4.jpg

نسيت اقول إن مسافة الرحلة لهذي القرية حول ساعة بالسيارة من زيورخ وعلى طريق انترلاكن

[بوخالد911]

1000 شكر لك بش مهندس.

[معماري قطري]

1000 شكر لك بش مهندس.

مليون الله يسلمك واعذرني عن التأخير والكسل في اكمال الباقي وان شاء الله قريب أكمل باقي الصور ورحلة انترلاكن وميلان ما بقى الا القليل

[معماري قطري]

من أكثر المناطق اللي حبيتها منطقة انترلاكن .. الجو هناك له ريحة غير كنا نشم غيم نقي وبارد .. للأسف الصور قليلة وانشغلنا طول الطريق الجبلي انا بالسواقة واللي معاي الظاهر متمسكين ونسوا التصوير .. الرحلة خذت حول ساعتين ويمكن شوي أقل وغالبية الطريق لفات وشوارع ضيقة من مسار واحد

هذي الجبال والغيم فيها

https://i.imgur.com/H9x5c6h.jpg

كنا ناويين نسكن في هذا الفندق لكن كان محجوز بالكامل واكتفينا بالمرور والعودة في نفس اليوم والمنطقة تستاهل يومين أو أكثر للي يحب .. فيها مطعم مندي ومطعم أفغاني باكستاني مشترك تغدينا فيه

هذي صورة للفندق الأجمل في هذي المنطقة واللي ما حصلنا فيه حجز

https://i.imgur.com/k6ucdzQ.jpg

جانا مطر خفيف ما منعنا من شوية تسوق

https://i.imgur.com/aP3JMDX.jpg

https://i.imgur.com/fOa2EOw.jpg

وهذي نهاية صور انترلاكن القليلة كلش

الرحلة الأخيرة كانت حق ميلان بالقطار وميلان قعدنا فيها بس 4 أيام وكانت من أجمل مدن الرحلة خصوصاً إن الفندق كان راقي جداً وبعد السؤال بعد ما رجعنا عنه عرفت إنه ملك لقطر ممثلة بكتارا للضيافة

https://i.imgur.com/MDktu90.jpg

سكة القطار صورة منها هذي الصورة ولا اذكر شكنت مركز فيه

التذاكر طلعت حق 4 أشخاص درجة أولى بحدود 900 يورو واللي يحجز سيارة قبلها بفترة ممكن تطلع عليه أرخص بس القطار مريح وشوي ممل كل شوي يوقف في محطة ومدة الرحلة قريب 4 ساعات .. النكتة نزلنا وطلعنا من المحطة وتنقينا تكسي يكفي شناطنا والسواق بدأ يشيل وراويته العنوان الا عصب ويأشر لي على الفندق وينزل الشناط .. طلع الفندق حول 100 متر الى 200 متر من المحطة .. الصدمة كان الجو حار مقارنة بسويسرا بس في الليل يستوي معقول وآخر يومين برد شوي

القطار من داخل

https://i.imgur.com/4KTmytR.jpg

جزء من لوبي الفندق وفيه توقيت ثاني واحد من يمين مكتوب عليه الدوحة وهي العربية الوحيدة ( دول الحصار لحد يسكن فندقنا )

https://i.imgur.com/bs1mZIV.jpg

أول ليلة طلعنا رحنا الدومو وهو سوق شبه مفتوح .. ودونا الفندق في سيارة مازيراتي كواتروبورتو والسواق يشرح لنا عن المعالم .. السيارة توصيل مجاني بس تحتاج طلب مسبق وأوقات انتظار شوي وللمناطق القريبة بس .. وذهاب وعودة

الدومو صراحة كله عرب وناس واستحيت اصور صورت السقف والقبة ذي والأرضية

https://i.imgur.com/bj9qXkx.jpg

https://i.imgur.com/FqnMUsD.jpg

https://i.imgur.com/hnXR3m9.jpg

وأخيراً لليوم هذا فيديو للرحلة


https://youtu.be/-XVI6nm8l-I

[معماري قطري]

طلعت أخبار وصور عن الانتهاء من تطوير منتجع بيرجنستوك التابع لكتارا في مدينة لوزيرن السويسرية وصراحة بعد اللي شفته من فنادق كتارا بابحث عنها في أي مكان اروح له

باطلع وباواصل ببقية الموضوع عن قريب بإذن الله