للطيبين فقط

[الحياة الخالدة]

أيام زمان :

تلفزيون
يفتح 10 صباحاً
ويسكر
الساعة 12 ليلاً !

والعشاء خفيف

والمروحة على 5

وقاعد تحل واجب الخط.

وانت منبطح على ( بطنك)

كانت حياة جميلة
الله عليك يا زمان فات

* كل مانشوف طيارة
نقعد نصرخ
ونسوي لهم مع السلامة مع السلامة

* كنا ننتظر ( سنة رابعة ) ابتدائي
عشان نكتب ( بالحبر )

* تسألك امك
( الساعة كم ) ؟؟؟
تقول لها
الكبير على اربعة 4
والصغير على ستة 6

* نحس بإنجاز وفرح وشي عظيم
إذا
طلعت الشمس
واحنا إلى الآن ( ما نمنا )

* ننتطر الامتحانات
عشان
ما ناخذ ( شنطة )
و ننتظر وقت الشهادة
عشان ( نلبس لبس حلو ونكشخ )

اكيييييد سويت شيء
منها او كلها

1- يوم كنت صغير
( رسمت الشمس)
في زاوية الورقة

2- يوم كنت صغير
كنت تفكر ان
( شكل القلب الحقيقي)
كذا

http://up.mixalwan.com/cdn/u0rvievf.jpg

3- تسكر باب الثلاجة ( شوي شوي )
بس عشان تعرف
متى ( تنطفي اللمبة ) ذكاء

4- حاولت توازن
مفاتيح الكهرباء
بين ( on و off )

5- لما أحد من اهلك
يطلب منك ( كأس ماء )
لازم تشرب شوية
وقبل ما تدخل
( تمسح فمك )
علشان
محد يعرف انك ( شربت )

اكيد
انت (تبتسم الآن )
على تلك الايام الحلوة

------------

( قمة الفخامة )
ايام الابتدائية

لما يعطيك الاستاذ
( طباشير و أوراق )
ويقول لك وصلها
للأستاذ في الفصل الثاني،
( تدخل ذاك الفصل)
قدام الطلاب
تحس نفسك
( مبعوث الأمم المتحدة )

الله يرحم زمان اول

[الحياة الخالدة]

واللي عنده/عندها شي يحب يضيفه من حركات أو تفكيــــر الطيبين
يتفضل
ولا يخاف مب قايلين عنه شيبة أو عجوز
الشباب شباب القلب

[@north_star@]

موضوع جميل اختي الحياة الخالدة وحرك مشاعر الزمن الجميل ........... أيام كنا نسوي فتحة بطاولة الصف عشان نشرب عصير بو نص وأيام نشقح سور المدرسة ونروح المعصرة نشتري سندويش كيمة وغيره من المغامرات والحركات

[الحياة الخالدة]

حيا الله النورثي أول الطيبين الشجعان

مغامرات المدارس يا كثرها .. واعتقد انها كانت بريئة أكثر من الحين

[الماريّة]

حي ذا العين من زمن الطيبين

جعل يسقى ذاك الوقت


من الذكريات الحلوه

نحط البرايه ام مرايه في مراييل المدرسه
ونعكس الضوء على السبوره او على الطالبات نلعوزهم ^_^


/

بعد لما نروح نبري القلم الرصاص عند الزباله الي احذا الباب
بس عشان نتفرج ونسولف خصوصا ثنتين نبري مع بعض ههههههه

[الماريّة]

* كل مانشوف طيارة
نقعد نصرخ
ونسوي لهم مع السلامة مع السلامة
الله يرحم زمان اول



اكثثثر شي عور قلبي هالسطر

اشهدنه صدق حي ذاك الوقت
يوم يكون مجلس التعاون ولما يسافر احد الشيوخ لبلاده
نركض برى نوادع طيارته


حي ثم اشهد بالله اني صادقه عاد الخليج صدق اخوان وقلوبهم على بعض
ويحبون بعض قبل لايدخل بينهم ابليس و الحساد ويفرقون بينهم:eek3:

:eek3:

[ya3coub]

واللي عنده/عندها شي يحب يضيفه من حركات أو تفكيــــر الطيبين
يتفضل
ولا يخاف مب قايلين عنه شيبة أو عجوز
الشباب شباب القلب

انا اصغركم بس لحقت على القليل من الي فوق و طيبه و حلاوه ذيج الأيام

[qatarman8008]

اتذكر ذيك الايام ..
كنت اركض ورى السيارة اللي تبيع صفيحة زعتر وعصير بنص..
لكن يوم العيد جمعت عيدية وشريت سيكل بي ام اكس بو نجوم..
وصرت الاحق الباص وانا كاشخ بالسيكل ههههه..
والهندي حمار يشوفني في المراية اركض بس مايبي يوقف..
يمكن لاني كم مرة خذت منه ولا دفعت له والله اعلم..

[الماريّة]

اتذكر ذيك الايام ..
كنت اركض ورى السيارة اللي تبيع صفيحة زعتر وعصير بنص..
لكن يوم العيد جمعت عيدية وشريت سيكل بي ام اكس بو نجوم..
وصرت الاحق الباص وانا كاشخ بالسيكل ههههه..
والهندي حمار يشوفني في المراية اركض بس مايبي يوقف..
يمكن لاني كم مرة خذت منه ولا دفعت له والله اعلم..

ماجربت تشتري المصاصه العوده من سياره راعي الاسكريم الي تشلخ اللسان تشلخ ^_^

والا هاي بس حركاتنا يالبنات مب عندكم

[الرويـس]

موضوع جميل اختي الحياة الخالدة وحرك مشاعر الزمن الجميل ........... أيام كنا نسوي فتحة بطاولة الصف عشان نشرب عصير بو نص وأيام نشقح سور المدرسة ونروح المعصرة نشتري سندويش كيمة وغيره من المغامرات والحركات

شت
مالحقنا على خطة الطاولة

[@north_star@]

شت
مالحقنا على خطة الطاولة

راحت عليك هههههههههههههه

[الرويـس]

راحت عليك هههههههههههههه

قهرتني
عطنا باقي السوالف

[Dana’1]

لحقت على كثيير منها مو كلها ذكريات روعه ومغامرات خطره احيان أغلب هالذكريات بالجبيل و الريان
الطفوله يا زينها من أيام ومن ذكريات:)

[qatarman8008]

ماجربت تشتري المصاصه العوده من سياره راعي الاسكريم الي تشلخ اللسان تشلخ ^_^

والا هاي بس حركاتنا يالبنات مب عندكم

..
بلى جربته..
مستحيل يكون في الدكان شي ماجربته..
بس سبحان الله كنا ناكل حلويات وصحتنا عال العال مو نفس عيال هاليومين..
الا ضاربه تسوس الا صايده سمنه وبعض الاطفال الله يستر عليهم جاهم سكري بعد..

[مستـريــح البـــال]

ما شاء الله عليكم ذكرتوا الكثير من الذكريات ..

بالنسبه لي اضيف للي انقال ، ايام ( الفسحه) نتخشش ورا المدرسه بغراش الفلفل ، واللي يكون جايب معاه غرشه يستوي رفيج الكل في هاليوم..

اما ايام الامتحانات النهائيه لها طابع وطقوس خاصه ، خصوصا بعد الامتحان نتجمع في مطعم وناكل ، مرحلة الابتدائيه لازم ( كيمه فلفل زياده مع ميراندا ) ، ويوم كبرنا شوي ( معصرة علي نعمه) ..

[النهار]

واللي عنده/عندها شي يحب يضيفه من حركات أو تفكيــــر الطيبين
يتفضل
ولا يخاف مب قايلين عنه شيبة أو عجوز
الشباب شباب القلب

لا حشي ابد مامرت علينا كل الي ذكرتيه درسنا في مدارس خاصه :nono:

[النهار]

ما شاء الله عليكم ذكرتوا الكثير من الذكريات ..

بالنسبه لي اضيف للي انقال ، ايام ( الفسحه) نتخشش ورا المدرسه بغراش الفلفل ، واللي يكون جايب معاه غرشه يستوي رفيج الكل في هاليوم..

اما ايام الامتحانات النهائيه لها طابع وطقوس خاصه ، خصوصا بعد الامتحان نتجمع في مطعم وناكل ، مرحلة الابتدائيه لازم ( كيمه فلفل زياده مع ميراندا ) ، ويوم كبرنا شوي ( معصرة علي نعمه) ..

ياخوي توني من يومين اشوف لافته في غزه مكتوب عليها معصرة على نعمه ههههههههههههههه
نقل من مكانه الي غزه شفت كم موضوع من مده العالم تسأل عن المعصره

[@north_star@]

قهرتني
عطنا باقي السوالف

استر يا شيخ :thumbup:

[بوخالد911]

فعلا أيام وذكريات ذهبية.

كنا قبل نركض ورى سيارة البلدية اللي تطلع دخان أبيض.
كنا نلحقها بالسياكل ونمسك بدي البيك اب.

كانوا هلي يطرشوني اشتري خبز إيراني
ومستحيل ما آكل منه
:).

[الحياة الخالدة]

حيا الله جميع الطيبين والطيبات : يازين سوالفكم وذكرياتكم

واللي يبلفيت توهم صغار للحين مثل النهار .. ان شاء الله يكبرون وتصير عندهم ذكريات حلوة مثلنا
واللي صج توهم صغار ما عاشوا زمن الطيبين مثل يعقوب .. أكيد بالنسبة للجيل اللي عقبهم بعد بيصيرون طيبين ههههههههه

[الحياة الخالدة]

بس اقول لكم شي تذكرته على السريع ومتأكدة بعضكم كان يسوي مثلي
يوم كانت أمي الله يرحمها ويغفر لها تطرشنا نسوي حليب في المرضاعة حق اخواننا الصغار .. طبعاً أيامها كان الحليب البودرة مادري نيدو والا شنو بالضبط
لازم قفشة في المرضاعة وقفشة في حلجنا ونبلعها بسرعة (البودرة طبعاً مب القفشة) قبل لحد يشوفنا .. مع إن يبين الحليب منثر تحت حلجنا وحواليه من العجلة (العيلة) ههههههههههههه

[qatarman8008]

ذكريات صبيانية..
لما نكون نلعب كورة وكورتنا قديمة ومنفشة..
يجي واحد دلوع مانعرفه كاشخ ببدلة رياضة ابو ديج ..!!
وعنده كورة شغل احتراف وقاعد يلعب فيها بروحه قدامنا..
تقول له تعال العب معانا يقول لا..
طيب عطنا الكورة نلعب فيها يقول لا..
ايه ياعم الحج انت كلو لا لا ههههههه..
وناخذ منه الكوره بالغصب ويروح ينادي اخوانه ووما ادري من المهم اطلعوا كثار واجسام ..
كان نقط كورته في الزبالة العودة ونشرد..
طبعا هم اجسام واقوياء لكن مو سريعين في الشردة نفس حضراتنا ههههههههه..
ونطل عليهم من بعيد وهم يفتشون في الزبالة يبون يطلعون الكورة والجو حر والزبالة ريحتها معاناه والله..
احسن يستاهلون ههههههههههه..:dance

[مستـريــح البـــال]

أذكـــر بســـاطة قبل ، وجمعتنــــا على سفــره وحـــده ، وما كان يرضى الوالد ( ربي يحفظه ويعطيه الصحه) ان اي حد ما يكون موجود حزة الغدا ، ومكونات السفره جدا بسيطه ، ولطباخ الوالده ( ربي يحفظها) طعم وذكريات لا تنسى ...

حتى رمضان كان غير ، ولحقت على رمضان في الشتاء وبرد ومطر ،، سمبوسه لها طعم غير عن الحين ،، ما دري كانت لمسات ( طباخ الهنود :con2: ) والا شعور بس ..

ايام كانت مطاعم: البتراء ، وبيروت ، وكنتاكي ،، كشخه وتغيير في الروتين اليومي ..
ومرات نكسر روتين الاكل ، بدجاج الماكينه ..

مثل ما ذكر "بوخالد " السياره اللي ترش دخان نلاحقها بالسياكل وما كنا نشوف شي ، ولين يصفى الجو وتوضح الرؤيه نجمع جرحانا ونحسب الخساير ونعود ادراجنا ..
واغرب مافي الموضوع ان بعد انقشاع الدخان ، نشوف فئه جديده كانت في سباق مع السياره وما تطلع الا في ذيج اللحظه ( ام عنقوزتين بايقه سيكل اخوها ) :pic:

.. ذكريات سريعه ..

[بوخالد911]

يا زينها والله من ذكريات.

[qatarman8008]

https://c.top4top.net/p_726ls6190.jpg (https://up.top4top.net/)
https://d.top4top.net/p_726yfuue1.jpg (https://up.top4top.net/)

[ya3coub]

بس اقول لكم شي تذكرته على السريع ومتأكدة بعضكم كان يسوي مثلي
يوم كانت أمي الله يرحمها ويغفر لها تطرشنا نسوي حليب في المرضاعة حق اخواننا الصغار .. طبعاً أيامها كان الحليب البودرة مادري نيدو والا شنو بالضبط
لازم قفشة في المرضاعة وقفشة في حلجنا ونبلعها بسرعة (البودرة طبعاً مب القفشة) قبل لحد يشوفنا .. مع إن يبين الحليب منثر تحت حلجنا وحواليه من العجلة (العيلة) ههههههههههههه

الاحلى كان السيريلاك و الجيلي جلوبر مدري شسمه فيه صوره ياهل اقرع.

من ألذ اكل الأطفال

[معماري قطري]

بس اقول لكم شي تذكرته على السريع ومتأكدة بعضكم كان يسوي مثلي
يوم كانت أمي الله يرحمها ويغفر لها تطرشنا نسوي حليب في المرضاعة حق اخواننا الصغار .. طبعاً أيامها كان الحليب البودرة مادري نيدو والا شنو بالضبط
لازم قفشة في المرضاعة وقفشة في حلجنا ونبلعها بسرعة (البودرة طبعاً مب القفشة) قبل لحد يشوفنا .. مع إن يبين الحليب منثر تحت حلجنا وحواليه من العجلة (العيلة) ههههههههههههه

ألحين إخوانج لو قروا بيرفعون قضية عليج

[naklan]

ذكريات جميلة بس انا ذكرياتي قشرا وكلها شطانة
احلا الذكريات الاستاد الي يعصب علي يروح فيها اروح افشش
تواير سيارته وارصده بهد الدوام واتلذذ وانا اشوفه يضرب جيك
هههههه والقعدة في اخر الصف في الكرسي الوسط علشان
ضرب الطلاب بالستيك والورق الملفوف

المقصف حكاية بروحه وَيَا حلو الفلافل والبيبسي بعد العراك الطويل
للوصول للمراكز المتقدمة بعد المعركة تحس بطعم للاكل وتحس انك خذته
بعرق جبينك

وأحلا حاجه بعد الريوق نطلع برا المدرسة للي يبيع اسكريم نشتري من
الهندي وبعد ما ناخذ الاسكريم نشيل من النمل الي في الارض ونحطهم في
ضهر الهندي وحنا مجموعة والنمل هذا الأسود الكبير الي قرصته تخليك
يحوس الهندي مسكين ينقلب قرد من التحكك ويفصخ ثيابه
وحنا فطسانين من الضحك عليه الله يغفر لنا

شفتو شلون الهداوه والذرابة
تعلمو مني