أنا الصراحة مستغربة .. وما غريب إلا الشيطان

[الحياة الخالدة]

السلام عليكم ورحمة الله وبركاته

صبحكم/مساكم الله بالخير

http://makkahnewspaper.com/uploads/images/2016/02/07/464621.jpeg

حتى فترة ليست بالبعيدة كان من النادر إن احنا نشوف طلاب/طالبات خارج المدارس في أوقات الدوام الرسمــــي
أما الحين عادي نشوفهم فترة الصبح أو الظهر في الأماكن العامة سواء الأسواق العادية أو المجمعات التجارية أو المطاعم أو غيرها
وعادي يسافرون مع أهلهم ويغيبون عن المدرسة كم يوم
القصد أن الغياب عن المدارس صار عادي جداً

أخبر على أيامنا كان الغياب صعب جداً جداً جداً
حتى الإجازة المرضية ما نحصلها بسهولة

هالشي حاصل والا انا يتراوى لي
وإذا صج موجود .. ماهي الآثار المترتبة عليه ؟؟
شنهي الأسباب ؟؟ وكيف يمكن علاجها وتلافيها ؟؟

تحياتي للجميع مقدماً

[قطريه ماركه]

صار الغياب موضه عندهم و عادة لازم يطبقونها بعد الامتحان كمن يوم
قبل اليوم الوطني و بعد اليوم الوطني
يسوون قروبات و يتفقون
و كل واحد يخلي أهله يشوفون اتفاقيات الغياب الجماعي

صج الامر غريب
الله يصلحهم يارب

[qatarman8008]

انا اشوف مدارس عيالي يطرشون لي تنبيه اول باول عن الغياب..
حتى لو مرضية كثرتها يعتبرونها شي سلبي لان الطالب تفوته دروس ومراجعات مهمة..
اما المولات انا صرت الاحظ انه كثير من الطلاب يروحون بعد المدارس او خلال فترة البريك نص ساعة مباشرة لان تدرون عندهم دريول ويمشونه على كيفهم..
الحين حتى الموضفين صاروا متعودين يفطرون او يتغدون برى الدوام وبشكل يومي وهالظاهرة انا اشوفها سلبية..

[معماري قطري]

كان أحلى ما في أيام الدراسة الغياب والشردات

[monatee]

الله يرحم كنت اسوي فلم لاصار ولا استوى من التمثيل على امي استحق عليه اوسكار عشان اقدر اغيب
:rolleyes:

[لبيبة]

وعليكم السلام ورحمة الله وبركاته،

على الرغم من التشديد في الاجازة المرضية،

وما تنعطى بالساهل،

الا ان نشوف طلاب المفروض يكونون في مدارسهم،

وهم يتجولون في المجمعات التجارية،

الخلل واضح انه من تقصير الاهل في المتابعة والاهتمام،

اتصور لو ما كانت الوالدة الله يحفظها تقوم الصبح قبلنا وتحضر لنا الفطور وتقعد معانا لين نخلص ونكون جاهزين للمدرسة وتراقبنا واحنا طالعين،

كان اكيد اتفقنا مع بعض وقعدنا في البيت في بعض الايام وحطيناها جدام الامر الواقع،

لكن كانت متابعتها وحرصها على حضورنا اليومي وما في مجال نتهرب،

السبب الرئيسي في انتظامنا وتفوقنا في الدراسة،

ولذلك استنتج ان اهالي هالطلاب،

يكملون رقاد الصبح ولايقعدون مع عيالهم ولا يدرون بهم راحوا المدرسة والا راحوا المجمعات التجارية.

[ورد الدوحه]

والله انا مستغربة بعد
أمس رحت الصالون الساعه 12 الظهر شفت طالبه بمريولها العنابي اعتقد المرحلة الاعدادية
قاعدة اتسوي مناكير وبديكير :secret:

[qatarman8008]

كان أحلى ما في أيام الدراسة الغياب والشردات

ذكرك الله بالشهاده..
توني امس في دكان شفت صبي صغير بايق ماي وشارد والهندي انتبه له وقام يركض وراه..
تذكرت يوم كنت ابوق ههههههه..

[qatarman8008]

والله انا مستغربة بعد
أمس رحت الصالون الساعه 12 الظهر شفت طالبه بمريولها العنابي اعتقد المرحلة الاعدادية
قاعدة اتسوي مناكير وبديكير :secret:

مفروض يمنعونهم..
نفس مامنعوا رجال الشرطة والجيش انهم يطلعون اماكن عامة بالزي الرسمي ماعدى في المهمات..

[Rider]

لا تستغربين اختي اذا غاب دور الاب والام وصار السائق ياخذ دور الاب والخادمة دور الام
ارد وكرر فيه اباء وامهات مايعرفون عيالهم اي صف او اي مرحلة دراسية

[ابو عبدالله.]

شيئ مخجل والله

فرض الالتزام على الابناء ما يحتاج اب او ام متعلمه عشان يفهمون اهميه الزام الابناء بالمدرسه

اهلنا ما كانوا متعلمين زمان لكن الزمونا بالمدرسه و حذرونا من الاهمال و علمونا الصح و الخطأ

زرعوا فينا المبدأ مش بس سو او لا تسوي.

التاريخ يعيد نفسه. والي كانوا مهملين و طالعين فيها صيه شفناهم بحاله سيئه في الكبر و الوظيفه و الحياه ككل

الا من رحم ربي و اجتهد و رجع للطريق السليم

الحين نفس السيناريو يتكرر الي يقول لي عيالي شياطين وما يلتزمون وكأنه مش ابوهم ولا علمهم شي من صغرهم ولا يعاقبهم اذا اخطأوا

صرنا نشوف الماضي يتكرر في ابنائهم يعني الاساس في الاسره و الوالدين

كل يوم اوصل عيالي المدارس بنفسي و اشوف اطفال ماسكين يد السواق وكأنه ابوه وداخلين المدرسه. هذا غير الي يبكي و السايق يهديه. او الخادمه تناديه وهو يركض ما يبي يدخل المدرسه

وين الاباء. و وين الامهات ما يلزمون الاب بدوره. على الاقل

السالفه مش بس ادفع المصاريف وتظن انك موفي واجباتك هذا نبات و انت تزرعه يوم بعد يوم

عموما. مهما تكلمنا فلن نغير الواقع. هالامور بتصير سئنا ام ابينا. ولابد يكون هناك متفوقين و مهملين لتخرج لنا اعداد ناجحين و اعداد بأوضاع ثانيه

الشيئ الوحيد الممكن اتخاذه هو المطالبه بتفعيل العقوبات على الوالدين و المنصوص بها بقوانين وزاره التربيه و التعليم بشأن الغياب و اهمال تعليم الابناء والي اعرفه ان هناك عقوبات كبيره اذا لم يتم وضع الطفل في التعليم بسن معينه وايضا الحرمان من السنه الدراسيه اذا غاب اكثر من 14 يوم بلا سبب مقنع و رسمي كالاجازه المرضيه مثلا

[الماريّة]

يمكن هذيلا الفاشلين منهم ^_^

وصبحج الله بالخير

[بومحمد المطاوعه]

مرحبا ومسهلا

اممممم على حسب المدرسه للأمانه

انا ولدي صف أول حزات اغيبه من نفسي لو مريض
ينشبون لي المدرسه
الأخصائيه تتصل وتسأل وتقول جيب له مرضيه اقل شي لأن يأثر على الدرجات
وحتى بناتي حزات الخميس اغيبهم
الأحد يتصلون علي وينشبون بعد

علمآ ان مدارسهم مستقله مب خاصه

[بوخالد911]

اللي اخبره أن المدارس متشددة بعدم السماح بخروج الطلاب إلا بوجود البطاقة الشخصية لولي الأمر

فكيف هالطلاب اطلعوا ؟!؟!!؟

يمكن نطوا من فوق السور بالفسحة

[بو خليفه 123]

يمكن انتي تقيسين الموضوع على البنات ؟!
حن ايام الثانويه شردة يوم الخميس كانت عادات و تقاليد (بلا فخر)

ولا اتمنى عيالي يسوون هالشي . لذلك اقوم بزيارات مفاجأه لمدارس العيال كل حين و آخر .


الله يذكره بالخير الي كان يحرضني على الشرده هو الآن امام مسجد و مدير اداره بوزارة الاوقاف :)

[الحياة الخالدة]

صبحكم الله بالخير
حياكم الله جميعاً .. وأشكركم على المشاركات الطيبة

يعني ما طلعت متوهمة .. والظاهرة بالفعل موجودة
وهي تشمل الطلاب والطالبات
للأهل دور في ظهورها .. وكذلك لإدارة المدرسة
العيال إذا بنتساهل معهم بالعكس هذا أحب ما عندهم
ما عاد الحرص على الدراسة والالتزام نفس قبل .. وهناك الكثير من الأمور اللي تخلي المدرسة آخر اهتماماتهم
طبعاً الكلام ما يشمل الجميع .. فهناك فئة ملتزمة .. لكنها للأسف تقل تدريجياً

[nooora]

الله يصلح حالهم ويهديهم ويحفظهم من كل شر ويستر عليهم
بكره تطلع موضة Over Night بين البنات

[المحاميه]

صححححح نفس ملاحظتي
والله لما اطلع اجازه واطلع الصبح واشوف طلاب أقول شسالفه .. ماعندهم مدرسه

أتوقع غايبين وطالعين يغيرون جو ..
هو التغيير حلو وكسر الروتين زين

بس ياخوفي انهم شاردين من مدارسهم واهلهم خبر خير .. :nono:

[معماري قطري]

في أمريكا كان سكني قرب مدرسة أو مجموعة مدارس وكنت أوقات اشوف رجوع بعض الطلبة الكبار نسبياً حول 14 - 16 البيت مشي .. يعني فيه تسيب وشردات والمشكلة شكلهم يطالعون السيارات ويمشون شوي شوي متمللين وعرضة لأي استغلال من الباقين والمجرمين .. أما وقت الخروج والدخول الفعلي فكانوا رجال ونساء كبار في السن يلبسون ملابس عاكسة وعندهم اشارة قف لتوقيف السيارات والسماح لمرور الطلاب ومتابعة تصرفاتهم

[معماري قطري]

دكتور اشتكى لي مرة بأن ولدي الله يوفقه في دراسته ألحين في بريطانيا .. كان يجيب له شلة شباب ويقول له عطهم اجازة .. يقول عصبت عليه وقلت خلاص انت بنفسك كنت امشيك أوقات لكن جايب لي شلة هالكثر

[وسمي2016]

الله يصلح حالهم ويهديهم ويحفظهم من كل شر ويستر عليهم
بكره تطلع موضة Over Night بين البنات

هاه,,,,, هذي وشي بعد؟؟:con2:؟؟؟

[nooora]

هاه,,,,, هذي وشي بعد؟؟:con2:؟؟؟
شلون سهرة الاولاد يجتمعون في مكان نفس الشي في سهرة بنات ، لكن اللبنات ينخاف عليهن مراهقات تخيل بنت مراهقه غايبه عن البيت ليش عندهم سهره بايتين مع رفيجاتهم ، طبعا يمكن بعلم امهاتهم لكن بعدين تصير عاده ..
الام : وين سايره يا بنتي؟
البنت : يمه اشفيج امس قايله لج عندنا over night
الام : اي والله نسيت من بيوصلكم ؟
البنت : جسوم مع راسه

[راجي الْعفو]

سهرة بنات بالعربي يعني ( مصخرة ! )


بغض النظر اذا كان فيها شي او كانت سهرة عادية


من متى سنع الحريم يسهرون لوقت متاخر برا البيت بروحهم !!

وين الابو ما يحس ان فيه شي غلط صاير ولا السالفة عنده سهلات ؟!!

قاعدين نشوف فلتان تدريجي عند البنات بحجج واهية

البنت صار ع بالها ان مثلها مثل الولد مافيه فرق بينهم و لذلك اسوي اي شي ومافي اي مانع !!

انتو وين عايشين ؟!


سنعوا حريمكم وخل تكون عندكم شوية غيرة !!

[ضوى]

شلون سهرة الاولاد يجتمعون في مكان نفس الشي في سهرة بنات ، لكن اللبنات ينخاف عليهن مراهقات تخيل بنت مراهقه غايبه عن البيت ليش عندهم سهره بايتين مع رفيجاتهم ، طبعا يمكن بعلم امهاتهم لكن بعدين تصير عاده ..
الام : وين سايره يا بنتي؟
البنت : يمه اشفيج امس قايله لج عندنا over night
الام : اي والله نسيت من بيوصلكم ؟
البنت : جسوم مع راسه

الحمد لله ما عندنا هالسنع ولا نتمناه لبنات الناس ، الله يستر علينا وعلى بنات امة محمد عليه الصلاة والسلام

[eXpert*]

شيئ مخجل والله

فرض الالتزام على الابناء ما يحتاج اب او ام متعلمه عشان يفهمون اهميه الزام الابناء بالمدرسه

اهلنا ما كانوا متعلمين زمان لكن الزمونا بالمدرسه و حذرونا من الاهمال و علمونا الصح و الخطأ

زرعوا فينا المبدأ مش بس سو او لا تسوي.

التاريخ يعيد نفسه. والي كانوا مهملين و طالعين فيها صيه شفناهم بحاله سيئه في الكبر و الوظيفه و الحياه ككل

الا من رحم ربي و اجتهد و رجع للطريق السليم

الحين نفس السيناريو يتكرر الي يقول لي عيالي شياطين وما يلتزمون وكأنه مش ابوهم ولا علمهم شي من صغرهم ولا يعاقبهم اذا اخطأوا

صرنا نشوف الماضي يتكرر في ابنائهم يعني الاساس في الاسره و الوالدين

كل يوم اوصل عيالي المدارس بنفسي و اشوف اطفال ماسكين يد السواق وكأنه ابوه وداخلين المدرسه. هذا غير الي يبكي و السايق يهديه. او الخادمه تناديه وهو يركض ما يبي يدخل المدرسه

وين الاباء. و وين الامهات ما يلزمون الاب بدوره. على الاقل

السالفه مش بس ادفع المصاريف وتظن انك موفي واجباتك هذا نبات و انت تزرعه يوم بعد يوم

عموما. مهما تكلمنا فلن نغير الواقع. هالامور بتصير سئنا ام ابينا. ولابد يكون هناك متفوقين و مهملين لتخرج لنا اعداد ناجحين و اعداد بأوضاع ثانيه

الشيئ الوحيد الممكن اتخاذه هو المطالبه بتفعيل العقوبات على الوالدين و المنصوص بها بقوانين وزاره التربيه و التعليم بشأن الغياب و اهمال تعليم الابناء والي اعرفه ان هناك عقوبات كبيره اذا لم يتم وضع الطفل في التعليم بسن معينه وايضا الحرمان من السنه الدراسيه اذا غاب اكثر من 14 يوم بلا سبب مقنع و رسمي كالاجازه المرضيه مثلا

لقد أسمعت لو ناديت حياً ولكن لا حياة لمن تنادي ..

نتمنى تدخل المؤسسات الإجتماعية لردع بعض أولياء الأمور اللي مب كفو تربية ..

[وسمي2016]

الحمد لله ما عندنا هالسنع ولا نتمناه لبنات الناس ، الله يستر علينا وعلى بنات امة محمد عليه الصلاة والسلام

اللهم امين,,,,, صح الله اللسانك اختي ولكل من هو حاضر,,,,الستر والسلامه
من كل شر,,,,,,,,,,اللهم امين

[راجي الْعفو]

اللهم امين,,,,, صح الله اللسانك اختي ولكل من هو حاضر,,,,الستر والسلامه
من كل شر,,,,,,,,,,اللهم امين

امين..دايم ندعي لنفسنا اولا ولهم بالخير والهداية

ونزعل لمصلحتهم عَل و عسى ينتبهون لأخطائها..

الله يصلح الحال..