المسابقة التراثية(( شيء من الماضي )) [الأرشيف] - منتديات شبكة الأسهم القطرية

alkaabi

24-09-2006, 10:44 AM

السلام عليكم ورحمه الله وبركاته

في البداية مبارك عليكم الشهر

وكل عام وانتوا بخير ...

حبينا نشاركم اخواني واخواتي بشيء بسيط في هذا الشهر الفضيل

وان شاء الله نكون خفاف عليكم

وفكرة المسابقة عبارة عن اسئلة تراثية متنوعة ( بر و بحر )

وراح تكون المسابقة يوميا ماعدا الجمعة والسبت

وهي عبارة عن 5 اسئلة تطرح في كل مرة

والفائز يكون صاحب الاجوبة الاكثر ...

يعني راح يكون عندنا فائز يوميا

او ممكن يكون اكثر اذا كلهم جاوبوا صح

وفي نهاية الشهر الكريم

راح نشوف من اللي اكثر واحد فاز في المسابقة على مدى الايام كلها

والاسئلة راح تطرح يوميا مابين التاسعة والعاشرة صباحا

مدة الاجابات راح تكون من يوم طرح الاسئلة الى ثاني يوم الساعة

التاسعة صباحا

وان شاء انكم فهمتوا طريقة المسابقة

واللي عنده اي استفسار او ملاحظة لايتردد

وللامانةالفكرة منقولة لكن بتصرف

والجائزة عند اختنا روز ممكن تستفسرون عنها :deal:

نبدأ اول حلقة من مسابقتكم شيء من الماضي ...

.................................................. ............................

السؤال الاول :

اذا جاكم احد من الشياب وقال لكم :

في الضحى طاح قوم افرش المده *** وخذ قدوع الصبح والدله ووده

بناخذ كلمة من القصيدة ونبي معناها ... انشوف الكلمة مع بعض :

القدوع .... القدوع شنهو ؟

السؤال الثاني :

ذاك اليوم انتعاش ومغرور رايحيين الحداق ... ويوم ردوا الدوحة شافهم بوطايش

... قالهم : هاه اشصدتوا ؟

قالوا والله ما صدنا الا خباطه .... الخباطه شنهي ؟

السؤال الثالث :

ويش بنتٍ جالسه في حضن ابوها ما تمله *** لو تغيب البنت صار العود مجهول الهويه
ظاهرة طول النهــار وغايبه الليـــــــل كله *** حاضره عيد رمضان وغايبه عـيد الضحيه

شنهو حل اللغز ؟

السؤال الرابع :

نسمع عن سنة الطبعة ... بس نبي نعرف شسالفة سنة الطبعه ؟

شنهو اللي صار فيها بالضبط ؟

السؤال الخامس :

العدنه شنهي ؟

وفالكم طيب ...

ونستقبل اجوبتكم عبر هذا الصفحة الى الساعة التاسعة من صباح الغد ...

وياليت اللي يدخل علينا على الخط يقول لنا من وين يتكلم من اي منطقة ....

والبرنامج راح يكون تحت اخراج مخرجتنا القديرة روز :app:

الووووووووو

نستقبل اول اتصااااااااال :nice:

من معانا يا روز

ROSE

24-09-2006, 10:59 AM

يعطيك العافية اخوي الكعبي على هالمسابقة الرائعة

:app: :app: :app: :app:

ويالله نبي تفاعل الجمهور :looking:

وبنشوف من اللي يمتلك معلومات تراثية جيده :dance

قطرية عسل

24-09-2006, 11:08 AM

القدوع = يقصد تقديم الفالة من فواكة وما شابة :looking:

الخباطة = هي الجنعدة الصغيرة

حرف [ ن ] النون

سنه الطبعة = هي السنه اللي طبع فيها مركب (السفينه) والطبعه اسم خليجي يدل على الغرق

العدنة = انثى الارنب

غزلان

24-09-2006, 11:14 AM

القدوع .... القدوع شنهو ؟

المقداع = انية التمر ويسمى القدوع او لفاله..

==
الخباطه شنهي ؟

الجنعدة الصغيرة

===

ويش بنتٍ جالسه في حضن ابوها ما تمله *** لو تغيب البنت صار العود مجهول الهويه
ظاهرة طول النهــار وغايبه الليـــــــل كله *** حاضره عيد رمضان وغايبه عـيد الضحيه

شنهو حل اللغز ؟
حرف النون

===

سنة الطبعه

الغواصين في الشمال جاتهم ضربة هواء كسرت مراكبهم واغلبية خشب السفن طبع وناس وايد ماتوا في ذاك اليوم واللي نجاء من البحر ذاك اليوم عدد قليل ولقوهم لايثين على السيف حتى اللي في البر ما اسلموا من ضربة الهواء اللي بيته قديم انهدم عليه هو واعياله ....

===
العدنه شنهي ؟
انثى الارنب

0000

شكرا

مغروور قطر

24-09-2006, 12:11 PM

بالفعل موضوع جميل جدا وشكرا لك اخوي الكعبي وان شاء الله لنا مشاركات فيه

Qa6ar

24-09-2006, 02:23 PM

السوال الاول القدوع معناه الاناه اللذي يضع به التمر او التمر

السوال الثاني الجنعده الصغيره

السوال الثالث حرف النون

السوال الرابع الطبعه سنه الغرق الغواصين في الشمال جاتهم ضربة هواء كسرت مراكبهم واغلبية خشب السفن طبع وناس وايد ماتوا في ذاك اليوم واللي نجاء من البحر ذاك اليوم عدد قليل ولقوهم لايثين على السيف حتى اللي في البر ما اسلموا من ضربة الهواء اللي بيته قديم انهدم عليه هو واعياله ....

الخامس العدنه وهي انثى الارنب
..........
ماسرقت شيء من احد

ويعطيك العافيه اخوي الكعبي موضوع حلو وماقصرت

alkaabi

24-09-2006, 06:57 PM

ياهلا فيكم جميعااااااا

وفالكم طيب

ونبي مشاركين اكثر ...

بانتظار البقية

وياهلا ومسهلا

وشاكرللي تفضلوا بالاجابة

:)

alkaabi

25-09-2006, 11:28 AM

السؤال الاول :

اذا جاكم احد من الشياب وقال لكم :

في الضحى طاح قوم افرش المده *** وخذ قدوع الصبح والدله ووده

بناخذ كلمة من القصيدة ونبي معناها ... انشوف الكلمة مع بعض :

القدوع .... القدوع شنهو ؟

الاجابة هي : الفالة او الاكل اللي يقدم ...

يقولك يافلان اقدع :)

......................................
السؤال الثاني :

ذاك اليوم انتعاش ومغرور رايحيين الحداق ... ويوم ردوا الدوحة شافهم بوطايش

... قالهم : هاه اشصدتوا ؟

قالوا والله ما صدنا الا خباطه .... الخباطه شنهي ؟

الجواب الجنعدة الصغيرة

...............

السؤال الثالث

ويش بنتٍ جالسه في حضن ابوها ما تمله *** لو تغيب البنت صار العود مجهول الهويه
ظاهرة طول النهار وغايبه الليـــــل كله *** حاضره عيد رمضان وغايبه عيد الضحيه

شنهو حل اللغز ؟

حرف النون

..............................

السؤال الرابع :

نسمع عن سنة الطبعة ... بس نبي نعرف شسالفة سنة الطبعه ؟

شنهو اللي صار فيها بالضبط ؟

الاجابه : الغاصه الله يرحمهم كانوا في البحر .... وجاتهم ضربة هواء كسرت مراكبهم ... واغلبية خشب السفن طبع .... وناس وايد ماتوا في ذاك اليوم واللي نجاء من البحر ذاك اليوم عدد قليل ... ولقوهم لايثين على السيف ... حتى اللي في البر ما اسلموا من ضربة الهواء ... اللي بيته قديم انهدم عليه هو واعياله ... الله يرحمهم جميعاً

التفاصيل :

مرة في سنة الثلاثينات 1930 المهم انها حولها ...
وغرقت المراكب اللي جايبه للبلاد التموين وصاب البلد القحط ...

والثانية سنة 1971 ايام حاكم قطر الشيخ احمد بن علي
كان رايح المقناص وغرقوا المراكب كلها وماتوا كل اللي عليها

الا 2 هم ابو محمد بن همام والثاني واحد من المرة

فالناس يسمون الثنتين سنة الطبعة والمشهورة الاكثر الاولى
يعني هي تقريبا المقصود فيها سنة الطبعة

...............................................

السؤال الخامس :

العدنه شنهي ؟

الجواب انثى الارنب

alkaabi

25-09-2006, 11:32 AM

والفائز معانا في حلقة الامس

غزلان

qa6ar

واشكر البقية

وان شاء الله نشوف تفاعل اكبر في الحلقة الجاية

وياهلا ومسهلا ....

:)

alkaabi

25-09-2006, 11:44 AM

ياهلا ومرحبا فيكم ...

وحلقة ثانية من مسابقة شيء من الماضي

ونبارك للاخوة غزلان وqa6ar الفائزين معانا في الحلقة الاولى

ونذكر الفائز في النهاية هو صاحب اكثر المرات فوزا طوال ايام الشهر الكريم

ونبدأ اسئلة الحلقة الثانية ...

.................................................. .........

السؤال الاول :

ذاك اليوم بوراشد رايح البحر ... امطلع الطراد من فرضة الخور

ورايح صوب نيوة لحدان ... ويوم رجع ثاني يوم ...

قاله انتعاش : هاه ... اشصدت ؟ ...

رد عليه بوراشد وقاله ما صدت الا اضعوي ..

الضعوي شنهو ؟

.................................................. .....

السؤال الثاني :

لا سلمت الشمس جينا نركض لبيت الشعر *** ونفرح لاقالوا لنا يا صبي شب الفنر

لمن هذه الابيات :

( 1- محمد بن عيسى الكبيسي 2- حسين بن راشد الكبيسي

3- راشد بن حسين الكبيسي )

..................................................

السؤال الثالث :

بانشدك عن رجلٍ مكبل ومسجون *** وربعه تخاطفهم سهوم المنيه
يطيع كل النـــاس عاقل ومجنون *** ولايطلقونه لين يذبح خويه

شنهو حل اللغز ؟

.............................................

السؤال الرابع :

في سنة 1956 صار حريق في دخان وتحديداً في الرق 30 ... او في البئر 30

للبترول ....فشلون صار هالحريق ؟ واشلون قدروا يطفون الحريق ؟

..........................................

السؤال الخامس :

الربدة شنهي ؟

Chambray

25-09-2006, 12:03 PM

السؤال الاول :
ذاك اليوم بوراشد رايح البحر ... امطلع الطراد من فرضة الخور
ورايح صوب نيوة لحدان ... ويوم رجع ثاني يوم ...
قاله انتعاش : هاه ... اشصدت ؟ ...
رد عليه بوراشد وقاله ما صدت الا اضعوي ..
الضعوي شنهو ؟

الضعوي يعني ( ولا شئ ) ! يعني ماصادو شئ ههههههههههه

.................................................. .....

السؤال الثاني :
لا سلمت الشمس جينا نركض لبيت الشعر *** ونفرح لاقالوا لنا يا صبي شب الفنر
لمن هذه الابيات :
( 1- محمد بن عيسى الكبيسي 2- حسين بن راشد الكبيسي 3- راشد بن حسين الكبيسي )
محمد بن عيسى الكبيسي

..................................................

السؤال الثالث :
بانشدك عن رجلٍ مكبل ومسجون *** وربعه تخاطفهم سهوم المنيه
يطيع كل النـــاس عاقل ومجنون *** ولايطلقونه لين يذبح خويه
شنهو حل اللغز ؟
السيــــــــارة

.............................................

السؤال الرابع :
في سنة 1956 صار حريق في دخان وتحديداً في الرق 30 ... او في البئر 30
للبترول ....فشلون صار هالحريق ؟ واشلون قدروا يطفون الحريق ؟
الحريق قعد له يوم كامل مشتعل والواحد يحس بحرارته على مسافه كيلوين او وطفووه عقب ماجابوا مهندس اجنبي ..

السؤال الخامس :
الربدة شنهي ؟
يعني الرباده او كثرة الجلوس وعدم عمل شئ !!

قطرية عسل

25-09-2006, 12:04 PM

01
ما عندة شيء

02
حسين بن راشد الكبيسي

03
السيـــارة

04
لما صار الحريق بسبة انفجار الانبوب .... طبعا ظل الحريق يوم كامل مشتعل ... لدرجة ان الواحد يبعد عنها مسافة كيلو وحرارتها توصله ... وأحضروا مهندس انجليزي... يعري من ريله ... أحضر ديناميت وحطه في التركتر ... وأحضر بيب ماي وحطه على الظو ... وفجر بالديناميت مكان النار وانطفت على طول ... وتركها يوم كامل على اساس يتأكد انها ما راح تشتعل مره ثانيه ... وثاني يوم راح يسكر البير .. وسكروها وخلوه لين ابردت الارض وعقب استخدموه مره ثانيه

ROSE

25-09-2006, 12:05 PM

روووووووووعه المسابقة

يعطيك العافية اخوي الكعبي والاجابات وافيه وسهله :strong :strong

abo rashid

25-09-2006, 12:18 PM

مغروور قطر

25-09-2006, 12:19 PM

الاجابه
1)الضعوي . اي خالي اليدين ماصادو شي

2) حسين بن راشد

3) السيارة

4) الاستعانه بخبرات اجنبيه

5) الربدة . هي متوسطه الحجم من الحبارى

alkaabi

25-09-2006, 12:48 PM

يوم كامل في البحر ما صت شئ
الله كريم

مشكور اخوي على المسابقة

هههههههههههههههههههه

شدعوه يا بوراشد زعلت علينا :D

عادي كان هوا ذاك اليوم ومحد صاد مب انت بس

ونبيك تشاركنا عااااااااد :nice:

alkaabi

25-09-2006, 12:49 PM

روووووووووعه المسابقة

يعطيك العافية اخوي الكعبي والاجابات وافيه وسهله :strong :strong

ياهلا روز

يسلمواااااااااا

بس نبي مشاركتج معانا :court:

شدي حيلج وحاولي :nice:

abo rashid

25-09-2006, 12:53 PM

هههههههههههههههههههه

شدعوه يا بوراشد زعلت علينا :D

عادي كان هوا ذاك اليوم ومحد صاد مب انت بس

ونبيك تشاركنا عااااااااد :nice:
:strong ما ازعل :D

بس انا اهدم في البحر

شنو اهدم

Qa6ar

25-09-2006, 02:32 PM

1- المخلاه فاضيه يعني ماجاب شيء
2-حسين بن راشد
3-السياره
4-لما صار الحريق بسبة انفجار الانبوب .... طبعا ظل الحريق يوم كامل مشتعل ... لدرجة ان الواحد يبعد عنها مسافة كيلو وحرارتها توصله ... وأحضروا مهندس انجليزي... يعري من ريله ... أحضر ديناميت وحطه في التركتر ... وأحضر بيب ماي وحطه على الظو ... وفجر بالديناميت مكان النار وانطفت على طول ... وتركها يوم كامل على اساس يتأكد انها ما راح تشتعل مره ثانيه ... وثاني يوم راح يسكر البير .. وسكروها وخلوه لين ابردت الارض وعقب استخدموه مره ثانيه

5- الربده هي متوسطه الحجم من الحبارى

alkaabi

26-09-2006, 01:01 PM

ياهلا ومرحبا فيكم ...

السؤال الاول :

ذاك اليوم بوراشد رايح البحر ... امطلع الطراد من فرضة الخور

ورايح صوب نيوة لحدان ... ويوم رجع ثاني يوم ...

قاله انتعاش : هاه ... اشصدت ؟ ...

رد عليه بوراشد وقاله ما صدت الا اضعوي ..

الضعوي شنهو ؟

الاجابة :الضعوي يعني ولاشيء ( الفلس )
.................................................. .....

السؤال الثاني :

لا سلمت الشمس جينا نركض لبيت الشعر *** ونفرح لاقالوا لنا يا صبي شب الفنر

لمن هذه الابيات :

( 1- محمد بن عيسى الكبيسي 2- حسين بن راشد الكبيسي

3- راشد بن حسين الكبيسي )

الاجابة : محمد عيسلى الكبيسي

..................................................

السؤال الثالث :

بانشدك عن رجلٍ مكبل ومسجون *** وربعه تخاطفهم سهوم المنيه
يطيع كل النـــاس عاقل ومجنون *** ولايطلقونه لين يذبح خويه

شنهو حل اللغز ؟

الاجابة : السيارة

.............................................

السؤال الرابع :

في سنة 1956 صار حريق في دخان وتحديداً في الرق 30 ... او في البئر 30

للبترول ....فشلون صار هالحريق ؟ واشلون قدروا يطفون الحريق ؟

الاجابة :

لما صار الحريق بسبة انفجار الانبوب .... طبعا ظل الحريق يوم كامل مشتعل ... لدرجة ان الواحد يبعد عنها مسافة كيلو وحرارتها توصله ... ويابو مهندس انكليزي ... يعري من ريله ... ياب ديناميت وحطه في التركتر ... وياب بيب ماي وحطه على الظو ... وفجر بالديناميت مكان النار وانطفت على طول ... وتركها يوم كامل على اساس يتأكد انها ما راح تشتعل مره ثانيه ... وثاني يوم راح يسكر البير .... حتى واحد من الشيبان الله يرحمه يحلف يقول : لقينا الرمل عند الظو مستوي اقطع جزاز ... وسكروها وخلوه لين ابردت الارض وعقب استخدموه مره ثانيه

..........................................

السؤال الخامس :

الربدة شنهي ؟

الاجابة : الحبارى متوسطة الحجم

.................................................. ...

alkaabi

26-09-2006, 01:04 PM

اشكر كل من شاركنا في المسابقة

والفائز معانا في حلقة اليوم

مغرور قطر ...

:)

بوخالد2

26-09-2006, 01:11 PM

تسلم اخووى الكعبي على المسابقه والله توني ادرى عنهااا 00اى والله مابه غير الضعوي هههه

alkaabi

26-09-2006, 01:18 PM

ياهلا ومرحبا فيكم ...

واشكر كل من شار ك في المسابقة

والمتصدرين الى الان

غزلان

قطرية عسل

qa6ar

مغرور قطر

ولكل منهم فوز واحد

وبالتوفيق للجميع

..................................................

والحين مع الحلقة الثالثة من مسابقة

( شيء من الماضي )

.................................................

السؤال الاول :

واحد من الشيبان يشوف واحد من العيال يروح ويرجع ... فقاله الشيبه : :
مثل الكتويل رايج جاي *** انته معاي والا معاهم ؟

بناخذ كلمة من القصيدة ونبي معناها ... انشوف الكلمة مع بعض

: الكتويل .... نبي انعرف شنهو الكتويل ؟

.................................................. .....

السؤال الثاني

بديت القاف واعدل مقاسه *** على ترتيب تفكير آلتماسه
احاول قدر تفكير الظمير *** يصير القاف مافيه انتكاسه

لمن هذه الابيات

...........................................

السؤال الثالث

الصخبر شنهو ؟

...........................................

السؤال الرابع

اذا جينا حق انتعاش وقلناله اشرايك في البحر اليوم ؟

يصلح حق الحداق والا لا ؟

ورد انتعاش علينا وقال : اوووه البحر اليوم مدلخ ..

نبي انعرف اشلون مدلخ ؟

..........................................

السؤال الخامس

اين تقع الجبيلات في قطر ؟

1_ في الشمال 2 _في الجنوب 3 _ وادي في الوسيل

alkaabi

26-09-2006, 01:19 PM

تسلم اخووى الكعبي على المسابقه والله توني ادرى عنهااا 00اى والله مابه غير الضعوي هههه

يامرحبا يا بوخالد

حياك الله

ويالله شد حيلك نبيك تفوز معانا :app:

مغروور قطر

26-09-2006, 01:32 PM

الاجابه.
1) اداه لتحديد الرياح

2)حامد بن مايقه

3)نبات بري

4) الجو موب صافي غبره

5) تقع في الشمال

Qa6ar

26-09-2006, 01:51 PM

1 - اداه لتحديد اتجاه الرياح

2 -حامد بن مايقه

3 - نبات بري

4- الجو مو صافي مغبر

5 - تقع في منطقه الشمال

مغروور قطر

26-09-2006, 01:51 PM

1 - اداه لتحديد اتجاه الرياح

2 -حامد بن مايقه

3 - نبات بري

4- الجو مو صافي مغبر

5 - تقع في منطقه الشمال
:funny: :funny:

Qa6ar

26-09-2006, 02:01 PM

:funny: :funny:

سرقنا اجابتك وانشالله انفوز معك

بعدين ماذكروني االيوم من اليوم الثاني اكيد اسمي سقط سهوا crazy

مغروور قطر

26-09-2006, 02:04 PM

سرقنا اجابتك وانشالله انفوز معك

بعدين ماذكروني االيوم من اليوم الثاني اكيد اسمي سقط سهوا crazy
اعتقد الفائز هو من اجاب اجابه صحيحه ومحد جاوب قبله

Qa6ar

26-09-2006, 02:06 PM

مو مشكله يحطون اسمي تحت اسمك ديكور لوووووول

Qa6ar

26-09-2006, 02:07 PM

ياهلا ومرحبا فيكم ...

واشكر كل من شار ك في المسابقة

والمتصدرين الى الان

غزلان

قطرية عسل

مغرور قطر

وين اسمي:)

قطرية عسل

26-09-2006, 02:36 PM

01 الكتويل كانت عبارة عن أداه تستخدم لمعرفة اتجاه الريح

-------

02 شاعر قطر الكبير حامد بن علي بن مايقه الحبابي

-------

03 الصخبر نبات بري موسمي

-------

04 البحر مدلخ يعني البحر كأنه هايج ... ومايبين القاع ... والرمل اللي أسفل القاع تحرك من مكانه وعفس البطح
مثل ما نقول ما ينفع لا حق حداق ولا حتى حق سباحة

-------

05 أكيد في الشمال .... ويا كثر الفقع

-------

الله يعطيك العافية أخوي الكعبي
بس عليك بــ قطر تراه يغش الاسئلة الاولى كانت من غزلان والثانية مني والاسئلة الحالية من مغرور قطر
عطة كرت أصفر :funny:

Qa6ar

26-09-2006, 02:37 PM

01 الكتويل كانت عبارة عن أداه تستخدم لمعرفة اتجاه الريح

-------

02 شاعر قطر الكبير حامد بن علي بن مايقه الحبابي

-------

03 الصخبر نبات بري موسمي

-------

04 البحر مدلخ يعني البحر كأنه هايج ... ومايبين القاع ... والرمل اللي أسفل القاع تحرك من مكانه وعفس البطح مثل ما نقول ما ينفع لا حق حداق ولا حتى حق سباحة

-------

05 أكيد في الشمال .... ويا كثر الفقع

الله يعطيك العافية أخوي الكعبي
بس عليك بــ قطر تراه يغش الاسئلة الثانية مني والاسئلة الحالية من مغرور قطر
عطة كرت أصفر :funny:

انا زعلات على المسابقه وعطت نفسي كرت احمر مع اجازه

alkaabi

26-09-2006, 02:41 PM

ياهلا ومرحبا فيكم ...

واشكر كل من شار ك في المسابقة

والمتصدرين الى الان

غزلان

قطرية عسل

مغرور قطر

وين اسمي:)

السموحة يا الغالي ...

خبرك الصيام وتأثيره :funny:

وضفنا اسمك للمتصدرين

:)

قطرية عسل

26-09-2006, 02:42 PM

انا زعلات على المسابقه وعطت نفسي كرت احمر مع اجازه

لا تزعـــــــــــــــل من الحق
ما يصير تاخذ مجهود غيــــــــــــــرك :)

Qa6ar

26-09-2006, 02:45 PM

لا تزعـــــــــــــــل من الحق
ما يصير تاخذ مجهود غيــــــــــــــرك :)

من جاب طاري الزعل

لامب زعلان لكن ماخذت مجهود غيري ولكل مجتهد نصيب

ولاتنسين ان حنا انجاوب وحنا صايمين:)

Qa6ar

26-09-2006, 02:47 PM

السموحة يا الغالي ...

خبرك الصيام وتأثيره :funny:

وضفنا اسمك للمتصدرين

:)

يعطيك العافيه اخوي وماقصرت

قطرية عسل

26-09-2006, 02:47 PM

من جاب طاري الزعل

لامب زعلان لكن ماخذت مجهود غيري ولكل مجتهد نصيب

ولاتنسين ان حنا انجاوب وحنا صايمين:)

:nice:

ولـــد قطـــر

26-09-2006, 06:32 PM

ياهلا ومرحبا فيكم ...

واشكر كل من شار ك في المسابقة

والحين مع الحلقة الثالثة من مسابقة

( شيء من الماضي )

.................................................

السؤال الاول :

واحد من الشيبان يشوف واحد من العيال يروح ويرجع ... فقاله الشيبه : :
مثل الكتويل رايج جاي *** انته معاي والا معاهم ؟

بناخذ كلمة من القصيدة ونبي معناها ... انشوف الكلمة مع بعض

: الكتويل .... نبي انعرف شنهو الكتويل ؟

.................................................. .....

السؤال الثاني

بديت القاف واعدل مقاسه *** على ترتيب تفكير آلتماسه
احاول قدر تفكير الظمير *** يصير القاف مافيه انتكاسه

لمن هذه الابيات

...........................................

السؤال الثالث

الصخبر شنهو ؟

...........................................

السؤال الرابع

اذا جينا حق انتعاش وقلناله اشرايك في البحر اليوم ؟

يصلح حق الحداق والا لا ؟

ورد انتعاش علينا وقال : اوووه البحر اليوم مدلخ ..

نبي انعرف اشلون مدلخ ؟

..........................................

السؤال الخامس

اين تقع الجبيلات في قطر ؟

1_ في الشمال 2 _في الجنوب 3 _ وادي في الوسيل

الاجابه.
1) اداه لتحديد الرياح

2)حامد بن مايقه

3)نبات بري

4) الجو موب صافي غبره

5) تقع في الشمال

مع تحياتي لأخواني الكعبي ومغرور

1)الكتويل هو القطو ...... الأداه لمعرفه تجاه الريح (الَديره)

2) حامد بن مايقه

3)نبات بري

4) الجو عكر أو مب صافي نفس ما ذكر اخوي مغرور

5)الجبيلات ((وادي في الوسيل)) وبالتحديد بجنوب الدحيل خلف كلية شمال الاطلنطي الجديدة

alkaabi

26-09-2006, 08:35 PM

ياهلا ومرحبا فيكم جميعاااااااا

وشاكرلكم هالتفاعل الحلو

ويالله نبي مشاركين اكثر واكثر :nice:

alkaabi

27-09-2006, 09:50 AM

alkaabi

27-09-2006, 10:25 AM

مرااااااااااحب

اللي فازوا معانا في الحلقة الثالثة هم :

مغرور قطر

qa6ar

قطرية عسل

واشكر البقية على المشاركة ...

المتصدرين معانا بعد انتهاء الحلقة الثالثة

مغرور قطر

قطرية عسل

qa6ar

ولكل منهم فوزين ...

alkaabi

27-09-2006, 11:44 AM

الحلقة الرابعة ...

السؤال الاول

ياناشدي شلحال مابيش ............. اللي عناي وهمي ابلاش
مبتلش بالود تبليش ............ والزين للولاع بلاش
انا هواي الريم الوحيش ............... اللي بشبك ماهوب ينحاش
لكن في عينه مراهيش ....... اللي برقت بالشفج ماعاش

لمن هذه الابيات ؟

1 عبدالله بن سعد المسند

2 لحدان بن صباح الكبيسي

3 محمد الفيحاني

..............................

السؤال الثاني

انشد ك عن رجال من دون رجليـــن

وله عنـــــد الناس قـــد ر وشـــــــيمه

اسرع من الها تف ومن ارماشة العين

ولا هو ظالم ولا يحب الظلـــــيمه

وش حل اللغز ؟

.......................................

السؤال الثالث

شنهو الليثياث ؟

......................................

السؤال الرابع

اين تقع منطقة الهملة ؟

شمال قطر , جنوب قطر , غرب قطر

....................................

السؤال الخامس

الصهيه شنهي ؟

غزلان

27-09-2006, 12:01 PM

السؤال الاول

ياناشدي شلحال مابيش ............. اللي عناي وهمي ابلاش
مبتلش بالود تبليش ............ والزين للولاع بلاش
انا هواي الريم الوحيش ............... اللي بشبك ماهوب ينحاش
لكن في عينه مراهيش ....... اللي برقت بالشفج ماعاش

لمن هذه الابيات ؟
محمد الفيحاني

==
السؤال الثاني

انشد ك عن رجال من دون رجليـــن

وله عنـــــد الناس قـــد ر وشـــــــيمه

اسرع من الها تف ومن ارماشة العين

ولا هو ظالم ولا يحب الظلـــــيمه

وش حل اللغز ؟

((ملك الموت))

===

السؤال الثالث

شنهو الليثياث ؟

نوع من الحشيش او الأعشاب اعتقد:confused:

==

السؤال الرابع

اين تقع منطقة الهملة ؟

شمال قطر , جنوب قطر , غرب قطر

جوجل يقول في البحرين:)

==
السؤال الخامس

الصهيه شنهي ؟
السخونة

مغروور قطر

27-09-2006, 12:17 PM

الاجابه

1) محمد الفيحاني

2)ملك الموت

3)ممكن نبات

4)الهمله تقع في غرب قطر وقريبه من دخان

5) الصخونه

بنت كحيلان

27-09-2006, 04:34 PM

يااربي حظي مرره شين ماشفت موضوع الاسئله اللي بالوقت اللي كل الاسئله فيه صعبه !!

بحاول وعلى الله ..

محمد الفيحاني

عزرائيل

يمكن انثى الاسد

ما اعرفها !!

الحمى <<== تمويه :)

ولـــد قطـــر

27-09-2006, 06:26 PM

السلام عليكم

اجوبة الحلقة الثالثة ...

السؤال الاول :

واحد من الشيبان يشوف واحد من العيال يروح ويرجع ... فقاله الشيبه : :
مثل الكتويل رايج جاي *** انته معاي والا معاهم ؟

بناخذ كلمة من القصيدة ونبي معناها ... انشوف الكلمة مع بعض

: الكتويل .... نبي انعرف شنهو الكتويل ؟

الكتويل كانت عبارة عن اداه تستخدم لمعرفة اتجاه الريح

السؤال الثاني

بديت القاف واعدل مقاسه *** على ترتيب تفكير آلتماسه
احاول قدر تفكير الظمير *** يصير القاف مافيه انتكاسه

لمن هذه الابيات

حامد بن مايقه الاحبابي

السؤال الثالث

الصخبر شنهو ؟

نبات بري

السؤال الرابع

اذا جينا حق انتعاش وقلناله اشرايك في البحر اليوم ؟

يصلح حق الحداق والا لا ؟

ورد انتعاش علينا وقال : اوووه البحر اليوم مدلخ ..

نبي انعرف اشلون مدلخ ؟

البحر مدلخ يعني البحر كأنه هايج ... ومايبين القاع ... والرمل اللي اسفل القاع تحرك من مكانه وعفس البطح مثل مانقول

السؤال الخامس

اين تقع الجبيلات في قطر ؟

في الشمال

حياك الله اخوي الكعبي

عندي كم نقطة أنا بس أبي أوضح يمكن أنا غلطان .....

القصد مب إني أشكك في معلوماتك لا والله بس إلي إنعرفه من أبهاتنا ومن جدودنا ...

أولاً: الأداه لمعرفه إتجاه الريح كانوا يسمونها أجدادنا ((الَديره ))

ثانياً: الجبيلات ... مكانها نفس ماذكرت ومافي منطقة بالشمال بهالاسم ... وأنا يالغالي من أهل الشمال.... ودوم نقنص بالشمال وعارف القاع عدل ...

وتقدر تروح المنطقة إلي خلف كلية شمال الأطلنطي الجديدة إلى بجنوب دحيل وتقرا إيش إسم المنطقة الموجوده....

وتقبل تحياتي وياريت تستقبل تعليقي بصدر رحب

alkaabi

28-09-2006, 08:26 AM

حياك الله اخوي الكعبي

عندي كم نقطة أنا بس أبي أوضح يمكن أنا غلطان .....

القصد مب إني أشكك في معلوماتك لا والله بس إلي إنعرفه من أبهاتنا ومن جدودنا ...

أولاً: الأداه لمعرفه إتجاه الريح كانوا يسمونها أجدادنا ((الَديره ))

ثانياً: الجبيلات ... مكانها نفس ماذكرت ومافي منطقة بالشمال بهالاسم ... وأنا يالغالي من أهل الشمال.... ودوم نقنص بالشمال وعارف القاع عدل ...

وتقدر تروح المنطقة إلي خلف كلية شمال الأطلنطي الجديدة إلى بجنوب دحيل وتقرا إيش إسم المنطقة الموجوده....

وتقبل تحياتي وياريت تستقبل تعليقي بصدر رحب

حياك الله يا الغالي

حي الله هل الشمال :D

وبالعكس لا ازعل ولاشيء ويشرفني ردك

وبخصوص الاسماء فهي تختلف من بيئة للثانية

واحيانا يكون عدة اسماء بنفس المعنى

عندك مثلا الخيسة موجودة في شمال قطر والخيسة الموجودة عند ام صلال محمد

وكذا منطقة متكرر اسمها

عموما بنعتبر اجابتك صحيحة

وفي رصيدك حاليا فوز واحد :nice:

وياهلا ومرحبا

وياليت نشوف مشاركاتك في الحلقات الجاية :)

alkaabi

28-09-2006, 08:30 AM

السلام عليكم

اجابات الحلقة الرابعة ....

السؤال الاول

ياناشدي شلحال مابيش ............. اللي عناي وهمي ابلاش
مبتلش بالود تبليش ............ والزين للولاع بلاش
انا هواي الريم الوحيش ............... اللي بشبك ماهوب ينحاش
لكن في عينه مراهيش ....... اللي برقت بالشفج ماعاش

لمن هذه الابيات ؟

الاجابة : عبدالله بن سعد المسند (الشاعر)

...............................

السؤال الثاني

انشد ك عن رجال من دون رجليـــن

وله عنـــــد الناس قـــد ر وشـــــــيمه

اسرع من الها تف ومن ارماشة العين

ولا هو ظالم ولا يحب الظلـــــيمه

وش حل اللغز ؟

الاجابة : ملك الموت

................................

السؤال الثالث

شنهو الليثياث ؟

الاجابة : نبات بري

................................

السؤال الرابع

اين تقع منطقة الهملة ؟

الاجابة : غرب قطر وبالتحديد بالقرب من مدينة دخان

................................

السؤال الخامس

الصهيه شنهي ؟

الاجابة : الصخونة

alkaabi

28-09-2006, 08:49 AM

الفائز معانا في الحلقة الرابعة اخونا

مغرور قطر ...:nice:

والترتيب بعد انتهاء الحلقة الرابعة كالتالي

مغرور قطر برصيد 3 مرات فوز

qa6ar برصيد مرتين فوز

غزلان وقطرية عسل وولد قطر برصيد فوز واحد

واشكركم جميعااااااااا

alkaabi

28-09-2006, 10:01 AM

الحلقة الخامسة .....

السؤال الاول :

نسمع دايما كلمة اللاش ...

مثلا يقولك يفداك اللاش

نبي نعرف معنى اللاش ؟

................................................

السؤال الثاني :

بنشدك عن انثى خدومه ناعمه ملساء

وذاك الخيط يتبع بعدها رفعه ونكاسي

ذهابا في ايابا دايم(ن) في مشيها نكسا

وهذا اللغز ترجمته والفته من الراسي

شنو حل اللغز ؟

.............................................

السؤال الثالث :

الخن شنو ؟

............................

السؤال الرابع :

نبي تكملة هالمثل

ابعد اللحم عن اللحم ...................

.................................................. .

السؤال الخامس :

اين تقع منطقة الظعاين ؟

...........................................

ونتلقى اجاباتكم الى يوم الاحد الجاي ان شاء الله

وفمان الله

:)

غزلان

28-09-2006, 10:46 AM

نبي نعرف معنى اللاش ؟

اللاش تعني الخبل.. هو الشخص الردي ..

--

شنو حل اللغز ؟
الجواب الابره

--
الخن شنو

الخن هو الفتحة التي في السفينة ينزل منها البحارة الى الطبقة السفلى من السفينة

--

" ابعد اللحم عن اللحم لا يخرب"او يخيس

--

اين تقع منطقة الظعاين ؟

الشمال

مغروور قطر

28-09-2006, 10:54 AM

1) الشخص الردي او الانسان معتود

2) الابره

3)الخن هو الفتحة التي في السفينة ينزل منها البحارة الى الطبقة السفلى من السفينة

4)ابعد اللحم عن اللحم لا يخيس

5) الظعاين الشمال

alkaabi

01-10-2006, 12:33 PM

السلام عليكم ....

الف مبروك

غزلان

مغرور قطر

اجوبتكم كلها صح

وبالنسبة للظعاين تعتبر شمال العاصمة الدوحة

لكنها على خريطة البلاد في المنتصف تقريبا

وبالضبط بالقرب من ( سميسمة ) على خط الشمال

ويعطيكم العافية

ويبقى اخونا

مغرور قطر في الصدارة برصيد 4 مرات فوز

qa6ar و غزلان برصيد مرتين فوز

قطرية عسل وولد قطر برصيد فوز واحد

واشكركم جميعااااااااا

:)

alkaabi

01-10-2006, 12:50 PM

الحلقة السادسة .....

السؤال الاول :

لي ضاق صدري قلت ماطولك ياليل

الله يعين اللي شقى من حبيبه

حبيت ذاك الزين واسرفت بالحيل

ومن رداة الحط هذا نصيبه

لمن هذه الاعنية ؟

حمد الطيار / سلامة العبدالله / عبدالله الصريخ

................................................

السؤال الثاني :

اين تقع اكبر محمية للغزلان والوضيحي في قطر ؟

.............................................

السؤال الثالث :

ماهو اقدم مطعم في قطر ؟

............................

السؤال الرابع :

نسمع يافلان وشبلاك مغندم ؟

نبي نعرف شنو مغندم ؟

.................................................. .

السؤال الخامس :

اين يقع وادي المقير في قطر ؟

...........................................

مغروور قطر

01-10-2006, 01:00 PM

1) حمد الطيار
2) في محمية المسحبيه باالقرب من ابوسمرة

3)مطعم بسم الله

4)مغندم اي متكدر ومضايق

5) شمال

بوخالد2

01-10-2006, 01:30 PM

1/ حمد الطيار
2/لتقع في محيش
3/مطعم بسم الله
4/مغندم - متكدر متضايق
5/في الشمال اخووى

يعطيك العافيه

Qa6ar

02-10-2006, 11:07 PM

حمد الطيار

محميه المسحبيه

مطعم بسم الله

مغندم او متعومس ضايق خاطرك

في الشمال

alkaabi

04-10-2006, 09:35 AM

الاجابات .....

السؤال الاول :

لي ضاق صدري قلت ماطولك ياليل

الله يعين اللي شقى من حبيبه

حبيت ذاك الزين واسرفت بالحيل

ومن رداة الحط هذا نصيبه

لمن هذه الاعنية ؟

حمد الطيار / سلامة العبدالله / عبدالله الصريخ

الجواب : حمد الطيار

................................................

السؤال الثاني :

اين تقع اكبر محمية للغزلان والوضيحي في قطر ؟

الجواب : محمية محيش غرب البلاد

.............................................

السؤال الثالث :

ماهو اقدم مطعم في قطر ؟

الجواب : مطعم بسم الله

............................

السؤال الرابع :

نسمع يافلان وشبلاك مغندم ؟

نبي نعرف شنو مغندم ؟

الجواب : متضايق اومتكدر

.................................................. .

السؤال الخامس :

اين يقع وادي المقير في قطر ؟

في منطقة الوسيل وسط البلاد ....

...........................................

..................................

alkaabi

04-10-2006, 09:40 AM

والفائز معانا في هالحلقة اخونا

بوخالد2

الف مبروك ...:)

ويبقى اخونا مغرور قطر في الصدارة برصيد 4 مرات فوز

qa6ar و غزلان برصيد مرتين فوز

قطرية عسل وولد قطر وبوخالد2 برصيد فوز واحد

واشكركم جميعااااااااا

alkaabi

04-10-2006, 10:32 AM

الحلقة السابعة

السؤال الاول :

نبي انعرف كيف ادخلت السيارات قطر ؟

وكيف كان وقعها على مجتع تعود على وسائل النقل البسيطه ....

كيف كانة ردة فعل اهل قطر في ذاك الوقت ؟

.................................................. .................

السؤال الثاني

قصت احبالك من عقب وصلها مي *** واستبعدت من عقب ماهي قريبة

من قائل هذه الابيات ؟

................................................

السؤال الثالث :

مغربية وسط سكة تلاقينا ........

من صاحب هالاغنية ؟

.............................................

السؤال الرابع :

النار ماترث الا ............

نبي تكمله هالمثل

.................................................. .

السؤال الخامس :

اين تقع منطقة ام الحول ؟

السديم

04-10-2006, 11:55 AM

مرحبا اخوي الكعبي ..

بصراحه موضوع وايد وايد حلو واحب اني اشارك معاكم ..

نبي انعرف كيف ادخلت السيارات قطر ؟

السيارات دخلت عن طريق البحر ( بالمراكب والسفن ) وطبعا في البدايه الاهالي استنكروها وخافو منها بس عقب تعودو عليها وسهلت الحياة كثير .. وقل استخدام الحمير اجلكم الله كثيرا ..
اول سيارة ادخلت شراها الشيخ عبدالله بن جاسم حاكم قطر السابق شراها بـ600 ربية من البحرين ... وكانوا يسمونها بوكلج ...يقولون له ثلاثة اكلاجه ...كلج يمشي جدام .. وكلج يوقف البريك .. وكلج للريوس ... وكانت السيارة هي فورد موديل 1925 ... وعقب طرشوا جاسم درويش البحرين وشرا سيارة فورد لوري شراه بـ800 ربية .

السؤال الثاني

قصت احبالك من عقب وصلها مي *** واستبعدت من عقب ماهي قريبة

من قائل هذه الابيات ؟

الجواب محمد الفيحاني ..

السؤال الثالث :

مغربية وسط سكة تلاقينا ........

من صاحب هالاغنية ؟

لعلي عبدالستار وغناها في دار الاوبرا المصرية في 1978 كما اعتقد وهي من الحان عبدالعزيز ناصر
اللي مايعرف هالغنية لابد انه يسمعها ويسمع علي عبدالستار فيها لانها من افضل اعمال بونايف يمكن على الاطلاق .. والتلفزيون القطري بث هالاغنية في 22 فبراير من العام نفسه على ما اظن ..

السؤال الرابع :

النار ماترث الا ............الرماد

نبي تكمله هالمثل الرماد قلناها ..

السؤال الخامس :

اين تقع منطقة ام الحول ؟

الجنوب .. صوب الوكرة

مغروور قطر

04-10-2006, 12:01 PM

1)السيارات دخلت عن طريق البحر ( بالمراكب والسفن وكان اول سياره يملكها الشيخ عبدالله بن جاسم
2) محمد الفيحاني

3)علي عبد الستار

4)النار ماترث الى الرماد

5)الجنوب .. صوب الوكرة

alkaabi

04-10-2006, 12:15 PM

ياهلا فيك اخوي

السديم

منور الموضوع

وسعداء بتواجدك معانا

وفالك طيب

:)

بوحمد1

04-10-2006, 12:27 PM

يعطيك العافية اخوي الكعبي

بوحمد1

04-10-2006, 12:28 PM

يعطيك العافية

_QTR_

05-10-2006, 11:43 AM

1- اول سيارة ادخلت شراها الشيخ عبدالله بن جاسم والسيارات دخلت عن طريق البحر :con2:
2- محمد الفيحاني :court:
3- لعلي عبدالستار (بونايف) :D
4- الا الرماد :anger2:
5- الجنوب علي خط ام مسعيد :nice:

ROSE

05-10-2006, 11:07 PM

يعطيكم العافية يارب

وين الكعبي اليوم

قطر

06-10-2006, 01:08 PM

◄○₪₪█▓▒░╠═ قــــــطــــــــر QATAR ═╣░▒▓█₪₪○►

يعطيك العافيه اخوي الكعبي على هالمسابقة اللي اضافة لنا معلومات قيمة عن بعض الاحداث ماكنت اعرفها بصراحه

:)

◄○₪₪█▓▒░╠═ قــــــطــــــــر QATAR ═╣░▒▓█₪₪○►

ولـ الذيب ـد

07-10-2006, 01:10 PM

السؤال الاول :

نبي انعرف كيف ادخلت السيارات قطر ؟

وكيف كان وقعها على مجتع تعود على وسائل النقل البسيطه ....

كيف كانة ردة فعل اهل قطر في ذاك الوقت ؟

السيارات دخلت عن طريق البحر بالمراكب والسفن وكان اول سياره يملكها الشيخ عبدالله بن جاسم

السؤال الثاني

قصت احبالك من عقب وصلها مي *** واستبعدت من عقب ماهي قريبة

من قائل هذه الابيات ؟

محمد الفيحاني

السؤال الثالث :

مغربية وسط سكة تلاقينا ........

من صاحب هالاغنية ؟

لعلي عبد الستار

السؤال الرابع :

النار ماترث الا ............

نبي تكمله هالمثل

الا رماد

السؤال الخامس :

اين تقع منطقة ام الحول ؟

5- الجنوب علي خط ام مسعيد

alkaabi

09-10-2006, 09:42 AM

السلام عليكم ورحمه الله ...

اجوبة الحلقة السابعة

السؤال الاول :

نبي انعرف كيف ادخلت السيارات قطر ؟

وكيف كان وقعها على مجتع تعود على وسائل النقل البسيطه ....

كيف كانة ردة فعل اهل قطر في ذاك الوقت ؟

الاجابة :

اول سيارة دخلت قطر شراها الشيخ عبدالله بن جاسم حاكم قطر السابق بـ600 ربية من

البحرين وكانت السيارة هي فورد موديل 1925

وعقب شرى سيارة ثانية من البحرين وهي فورد لوري بـ800 ربية

وكانوا في البداية يخافون من السيارات وينخشون عنها

والحيوانات كذلك كانت تجفل من السيارات

الى ان تعودوا عليها

.................................................. .................

السؤال الثاني

قصت احبالك من عقب وصلها مي *** واستبعدت من عقب ماهي قريبة

من قائل هذه الابيات ؟

الاجابة : محمد الفيحاني

................................................

السؤال الثالث :

مغربية وسط سكة تلاقينا ........

من صاحب هالاغنية ؟

الاجابة : علي عبدالستار

.............................................

السؤال الرابع :

النار ماترث الا ............

نبي تكمله هالمثل

الاجابة : الرماد

.................................................. .

السؤال الخامس :

اين تقع منطقة ام الحول

الاجابة : جنوب البلاد

alkaabi

09-10-2006, 09:46 AM

اشكر الاخوة اللي شاركونا في الاجابة

والفائز معانا اليوم اخونا

السديم

وهو اللي اجابته خاصة بالنسبة للسؤال الاول

كانت اشمل واوضح

الف مبروك :)

alkaabi

09-10-2006, 10:33 AM

ســـــ ممتاز ـــهم

10-10-2006, 03:09 AM

الحلقة الثامنة ...

السؤال الاول :

يقول الشاعر

اليامن كفخت اسليتـره جنـه الزعـلان
جزع من محلـه فاقـد اعـز ورعانـه

الياقبل يمـوه ابمقدمـه جنـه ابليهـان
واليا اقفي مدبر جنـه اطيـارشيهانـه

لمن هذه الابيات ؟

حمد السعيد / طلال الرشيد/ محمد العطاوي

الجواب حمد السعيد
----------------------------------
السؤال الثاني :

اين تقع روضة بخيلة في قطر ولماذا سميت بهالاسم ؟

اعتقد في الجنوب الغربي (بين دخان وام باب ) وما اعرف ليش سموها بها الاسم .
-------------------------------------------

السؤال الثالث :

الهوبري شنهو ؟

هو نوع من انواع الفقع والله اعلم .
---------------------------------------

باقي الاسئلة نا اعرف حلها .. حبيت اشارك اشوف الشباب وقفوا .

بس بصراحة مسابقة متميزة يالكعبي .

مغروور قطر

10-10-2006, 07:35 PM

1) حمد السعيد

2) مابين دخان وام باب سبب تسميه في نظري ممكن ان تكون بسبب قلة الامطار فيها

3) نوع من الفقع

4) القمر

5)قصاب والجلوه في يده

Dana

10-10-2006, 07:46 PM

1\حمد السعيد
2\2) مابين دخان وام باب سبب تسميه في نظري ممكن ان تكون بسبب قلة الامطار فيها
...للعلم نسخته من اخوي مغرور لاني ماعرف
3\نوع من الفقع
+الهوبري , اول الغيث مطره وهذا النوع مبشر بخروج الفقع
4\ماعرف الرابع بس باغشه القمر
5\قصاب والجلوه في يده

alkaabi

15-10-2006, 12:04 PM

الحلقة الثامنة ...

السؤال الاول :

يقول الشاعر

اليامن كفخت اسليتـره جنـه الزعـلان
جزع من محلـه فاقـد اعـز ورعانـه

الياقبل يمـوه ابمقدمـه جنـه ابليهـان
واليا اقفي مدبر جنـه اطيـارشيهانـه

لمن هذه الابيات ؟

حمد السعيد / طلال الرشيد/ محمد العطاوي

الاجابة : حمد السعيد

.................................................. ........

السؤال الثاني :

اين تقع روضة بخيلة في قطر ولماذا سميت بهالاسم ؟

الاجابة :

تقع بالقرب من منطقة ( الدواجن ) على خط الشمال بالقرب من قرية ( صنيع ) على خط الشمال

يعني وسط البلاد تقريبا

وسميت بهذا الاسم لانها كانت قليلة العشب والخضرة فسميت بخيلة كناية عن البخل في

الخضرة والربيع
.........................................

السؤال الثالث :

الهوبري شنهو ؟

الاجابة :

نوع من انواع الفقع وهو الاصغر تقريبااا

..........................................

السؤال الرابع :

بنشدك عن حرمه يعلم بها ربي

ابوها هو زوجها سبحان الله سبحان

عقده عليها واتم وصار على الدربي

وتم عقده حلال ولا خالف الاديان

وصلوا على المختار شفيعي وحبي

على طه المصطفى من نسل عدنان

شنهو حل اللغز ؟

الاجابة :

حواء عليها السلام

.................................................

السؤال الخامس :

قصاب والجلوة .................

نبي تكمله المثل ؟

الاجابة :

قصاب والجلوة في يده

alkaabi

15-10-2006, 01:09 PM

اشكر كل من شارك معانا في الحلقة الماضية

واعتذر عن انقطاعي للفترة السابقة لسفري للعمرة

والاخ مغرور قطر

والاخت دانا

هم من فاز معانا في الحلقة الماضية :)

ROSE

15-10-2006, 01:40 PM

الحمدلله على السلامة اخوي الكعبي وعمره مقبوله ان شاء الله

انزين وين الاسئلة اللي بعدها

Dana

16-10-2006, 12:13 AM

الحمدلله على السلامه وعمره مقبوله إن شاءالله
ومبروك لي ولاخوي مغرور

روز قولي مبروك:)

alkaabi

16-10-2006, 02:13 AM

alkaabi

16-10-2006, 02:14 AM

الحمدلله على السلامة اخوي الكعبي وعمره مقبوله ان شاء الله

انزين وين الاسئلة اللي بعدها

الله يسلمج اختي روز

وتقبل الله منا ومنج ان شاء الله

وحاضرين ...

واعذرونا ترى والله مشغول حدي crazy

بوخالد2

16-10-2006, 02:20 AM

1/ بن لعبوون
2/ القمر
3/شمال قطر
4/ كووس
5/الشبل

{راشد}

16-10-2006, 02:35 AM

حل الغز يالبيضه ولا السنه ,,
والبيضه يقولون مولوده قبل الدجاجه,,
والمعروف فيه فرق بين الحيوان الثدي والطاير الثدي يولد والطاير يبيض

الهودج الي هو تحط فيه الحريم اول على ظهور الركاب { البعير }

والهواء يمكن قصده حدري او حار

المهاجر

16-10-2006, 02:56 AM

الحلقة التاسعة

السؤال الاول

والشفايا اللي كما ذوب العسل

من جناتها السلسال سال

عاطلات الريم وادمى الرمل

مع نبات ظلهن عندي ظلال

لمن هذه الابيات ؟

صدى الحرمان / عابرة سبيل / بن لعبون

.............................

السؤال الثاني

وانا انشد اصحاب العقول المرشده

عن حرمة محد عرف ميلادها

لاهي بتولد ولا هي مولده

دايم وهي بتوعد على ميعادها

شنهو حل اللغز ؟

........................................

السؤال الثالث

اين تقع روضة ام الشبرم ؟

......................................

السؤال الرابع

واحد يقول حق رفيجه : يا بوجاسم الهواء دوَّق ...

دوق شمعناتها ؟

...........................

السؤال الخامس

الهودج شنو ؟
اجابة السؤال الاول:
بن لعبون
اجابة السؤال الثاني:
السنه
اجابة السؤال الثالث:
السعودية(مدينة الآرطاوية)
اجابه السؤال الرابع:
يعني خواهر اي طاح الهواء وقله سرعة الرياح
اجابة السؤال الخامس:
ما يعرف بالظلة وهو ما يوضع فوق ظهر الجمل وهو مخصص لركوب النساء في الاسفار حماية لهن من الشمس والمطر ومن أعين الغرباء

ROSE

16-10-2006, 03:01 AM

الله يسلمج اختي روز

وتقبل الله منا ومنج ان شاء الله

وحاضرين ...

واعذرونا ترى والله مشغول حدي crazy

مسمووووووووووووووووووووووووح :app: :app:

اهم شي انك رجعت لنا بهالاسئلة الحلوه

ســـــ ممتاز ـــهم

16-10-2006, 03:07 AM

الحمد لله ع السلامة الكعبي

السؤال الاول

والشفايا اللي كما ذوب العسل

من جناتها السلسال سال

عاطلات الريم وادمى الرمل

مع نبات ظلهن عندي ظلال

لمن هذه الابيات ؟

صدى الحرمان / عابرة سبيل / بن لعبون

اظن بن لعبون، ما اعتقد انه شعر نسائي

.............................

السؤال الثاني

وانا انشد اصحاب العقول المرشده

عن حرمة محد عرف ميلادها

لاهي بتولد ولا هي مولده

دايم وهي بتوعد على ميعادها

شنهو حل اللغز ؟

ممكن الشمس

........................................

السؤال الثالث

اين تقع روضة ام الشبرم ؟

هي موجودة في قطر (جواب دبلوماسي ) .

......................................

السؤال الرابع

واحد يقول حق رفيجه : يا بوجاسم الهواء دوَّق ...

دوق شمعناتها ؟

بمعنى خف الهوا او سكنت الريح .

...........................

السؤال الخامس

الهودج شنو ؟

مثل الصندوق يعلق فوق المطايا ويكون مكان مخصص للنساء .

alkaabi

18-10-2006, 02:33 PM

اجابات الحلقة التاسعة

السؤال الاول

والشفايا اللي كما ذوب العسل

من جناتها السلسال سال

عاطلات الريم وادمى الرمل

مع نبات ظلهن عندي ظلال

لمن هذه الابيات ؟

بن لعبون

.............................

السؤال الثاني

وانا انشد اصحاب العقول المرشده

عن حرمة محد عرف ميلادها

لاهي بتولد ولا هي مولده

دايم وهي بتوعد على ميعادها

شنهو حل اللغز ؟

السنة

........................................

السؤال الثالث

اين تقع روضة ام الشبرم ؟

تقع بالقرب من مدينة الكرعانة في قطر

......................................

السؤال الرابع

واحد يقول حق رفيجه : يا بوجاسم الهواء دوَّق ...

دوق شمعناتها ؟

يعني طاح الهوى( قلة سرعة الرياح )

...........................

السؤال الخامس

الهودج شنو ؟

هوما يوضع فوق ظهر الجمل وهو مخصص لركوب النساء في الاسفار حماية لهن من

الشمس والمطر ومن أعين الغرباء

alkaabi

18-10-2006, 02:37 PM

والفائزين معانا بحلقة الامس

الاخ المهاجر جاوب كل الاسئلة صح عدا سؤال الروضة

الاخ سهم ممتاز جاوب كل الاسئلة صح عدا اللغز

الف مبروك للفائزين

وحظ اوفر للبقية واشكرهم على المشاركة :)

alkaabi

18-10-2006, 02:52 PM

الحلقة العاشرة

السؤال الاول

يقول الشاعر

يازين هد الوحش في بعض الايامي

في ديرة قفرة عسرة مضاويها

شالمقصود بالوحش في هالبيت ؟

.............................

السؤال الثاني

انشدك ياسامع من محكوم هو يحكم

يحكم ومايملك الخمس الحواس التمام

صارم اذا قد حكم شديد في المحكم

لاعقل عنده ولا يبصر ضياء او ظلام

شنهو حل اللغز ؟

........................................

السؤال الثالث

نسمع بالهيرات او الهير

الهير شمعناته ؟

......................................

السؤال الرابع

اين تقع منطقة ( زين الاسم )

شمال قطر / جنوب قطر / غرب قطر

...........................

السؤال الخامس

كلنا نعرف طائر الهدهد

اللي نبي نعرفه الهدد يلفي ولا يقيض في قطر ؟

ســـــ ممتاز ـــهم

19-10-2006, 05:28 AM

الحلقة العاشرة

السؤال الاول

يقول الشاعر

يازين هد الوحش في بعض الايامي

في ديرة قفرة عسرة مضاويها

شالمقصود بالوحش في هالبيت ؟

الطير (الصقر)
.............................

السؤال الثاني

انشدك ياسامع من محكوم هو يحكم

يحكم ومايملك الخمس الحواس التمام

صارم اذا قد حكم شديد في المحكم

لاعقل عنده ولا يبصر ضياء او ظلام

شنهو حل اللغز ؟

الميزان

........................................

السؤال الثالث

نسمع بالهيرات او الهير

الهير شمعناته ؟

هي اماكن الغوص اللي متعارف ان فيها الكثير من المحار .

......................................

السؤال الرابع

اين تقع منطقة ( زين الاسم )

شمال قطر / جنوب قطر / غرب قطر

جنوب قطر (تراها هقوه )

...........................

السؤال الخامس

كلنا نعرف طائر الهدهد

اللي نبي نعرفه الهدد يلفي ولا يقيض في قطر ؟

يلفي .

alkaabi

20-10-2006, 05:43 PM

اجوبة الحلقة العاشرة

السؤال الاول

يقول الشاعر

يازين هد الوحش في بعض الايامي

في ديرة قفرة عسرة مضاويها

شالمقصود بالوحش في هالبيت ؟

الاجابة

الطير (الصقر) اللي عاده في البرية ومانصقر ( تدرب )
.............................

السؤال الثاني

انشدك ياسامع من محكوم هو يحكم

يحكم ومايملك الخمس الحواس التمام

صارم اذا قد حكم شديد في المحكم

لاعقل عنده ولا يبصر ضياء او ظلام

شنهو حل اللغز ؟

الاجابة :

الميزان

........................................

السؤال الثالث

نسمع بالهيرات او الهير

الهير شمعناته ؟

الاجابة :

هي اماكن الغوص اللي متعارف ان فيها الكثير من المحار .

......................................

السؤال الرابع

اين تقع منطقة ( زين الاسم )

شمال قطر / جنوب قطر / غرب قطر

الاجابة : شمال قطر

...........................

السؤال الخامس

كلنا نعرف طائر الهدهد

اللي نبي نعرفه الهدد يلفي ولا يقيض في قطر ؟

الاجابة :

الهدهد من الطيور اللي تلفي قطر وماتقيض

alkaabi

20-10-2006, 05:44 PM

مبروك لمشاركنا الوحيد

سهم ممتاز

:)

alkaabi

20-10-2006, 05:47 PM

الحلقة الحادية عشر والاخيرة ....

السؤال الاول

لاتسألوني ليه انا

عاشق خزاما مستهان

واذا عرفتوني انا

تدرون وش سر الغرام

لمن هذه الابيات ومن غناها ؟

..........................

السؤال الثاني

المسكر شنهو ؟

..................................

السؤال الثالث

طاسه على طاسه في البحر ركازه

شنهو حل اللغز

........................................

السؤال الرابع

اليعد شنهو ؟

.....................................

السؤال الخامس

الروشنه شنهي ؟

مغروور قطر

20-10-2006, 06:05 PM

1) خالد الفيصل

2)حواجز بحريه من الحجر الجيري عندها تسبح الاسماك و الحيوانات البحرية

3) الشمس

4) هو من صوف الحيوانات

5) التموين

ولـ الذيب ـد

20-10-2006, 09:11 PM

مغروور قطر

20-10-2006, 09:15 PM

1) خالد الفيصل

2)حواجز بحريه من الحجر الجيري عندها تسبح الاسماك و الحيوانات البحرية

3) الشمس

4) هو من صوف الحيوانات

5) التموين
:eek2: :eek2:

ســـــ ممتاز ـــهم

21-10-2006, 05:46 AM

1- خالد الفيصل

الا بالمناسبة هل حد شاف الخزامى في قطر ؟ واذا ايه وين ؟
------

2- حاجز يسوونه على شكل نص دويرة يصيدون به الاسماك وقت الجزر (الثبر) .

-----

3- شمس

-----

4- اليعد نبات صحراوي .
-----

5- الروشنة : مثل الدرج او الرف يكون في منتصف الطوفة او يكون داش في الطوفة .

تعقيب: التموين كان يسمونه الراشن .

شكرا

alkaabi

23-10-2006, 12:36 AM

اجوبة الحلقة الاخيرة

السؤال الاول

لاتسألوني ليه انا

عاشق خزاما مستهان

واذا عرفتوني انا

تدرون وش سر الغرام

لمن هذه الابيات ومن غناها ؟

الاجابة :

الشاعر خالد الفيصل وغناها محمد عبده

..........................

السؤال الثاني

المسكر شنهو ؟

الاجابة

ٍحاجز يسوونه على شكل نص دويرة يصيدون به الاسماك وقت الجزر (الثبر)

..................................

السؤال الثالث

طاسه على طاسه في البحر ركازه

شنهو حل اللغز

الاجابة :

المحاره
........................................

السؤال الرابع

اليعد شنهو ؟

نبات بري له رائحة طيبة

.....................................

السؤال الخامس

الروشنه شنهي ؟

الاجابة

مثل الدرج او الرف يكون في منتصف الطوفة او يكون داش في الطوفة .

alkaabi

23-10-2006, 12:37 AM

الف مبروك للاخ

سهم ممتاز

الفائز معانا في الحلقة الاخيرة

:)

alkaabi

23-10-2006, 01:05 AM

اشكر كل من شارك معانا في هالمسابقة

طوال الشهر الكريم

وان شاء الله انها نالت استحسانكم

ومانكون ثقلنا عليكم

واعذرونا على التقصير

حاولنا نشاركم ونكون متواصبين معاكم ولو بالقليل

:)

...................................

والفائز معانا بهذه المسابقة للشهر الكريم

برصيد اكثر عدد مرات فوز في حلقات المسابقة

الاخ المتميز

مغرور قطر

الف الف مبروووووك

وهاردلك للبقية واشكرهم على المشاركة

تحياتي للجميع

ROSE

23-10-2006, 02:40 AM

الف مبروووووووووك لاخوي مغروور

واشكرك اخوي الكعبي على ادارة هذه المسابقة الممتعة

بارك الله فيك

:nice:

إنتعاش

23-10-2006, 02:53 AM

تسلم يدينك يالكعبي

على هالمسابقه الحلوه والممتعه

واللي ما حالفني الحظ بالمشاركه فيها

الا انك ماشاءالله عليك ادرتها بشكل رائع والاروع الاعداد الاجمل

عيدك مبارك ياخوي :)

alkaabi

23-10-2006, 04:20 AM

الف مبروووووووووك لاخوي مغروور

واشكرك اخوي الكعبي على ادارة هذه المسابقة الممتعة

بارك الله فيك

:nice:

العفو اختي

روز :eek2:

واشكرج على كل جهد بذلتيه معااااي

وان شاء الله قدمنا اللي يرضيكم

:)

alkaabi

23-10-2006, 04:21 AM

تسلم يدينك يالكعبي

على هالمسابقه الحلوه والممتعه

واللي ما حالفني الحظ بالمشاركه فيها

الا انك ماشاءالله عليك ادرتها بشكل رائع والاروع الاعداد الاجمل

عيدك مبارك ياخوي :)

هلا بالغالي

هلا باهل الرياض والله :funny:

كفاية طلتك علينا بس ;)

ويمكن نطب عليك في الدور 77 بالمملكة :eek2:

مغروور قطر

23-10-2006, 05:35 AM