رخام وحجر للبيت لو سمحتوا يا اصحاب الخبره ؟؟

[نفسي عزيزه]

الي عنده خلفيه عن رخام اسباني 60*60 كريما مارفل درجه ثالثه او رابعه
قالو لي الفرق بينه وبين الدرجات الي اعلى موضوع العروق ان اكثر شوي وفي ناس قالو لا جودته تعبانه
بس فرق السعر كبير بين هذا وبين الدرجه الاولى

معماري قطر والي يعرف يخدمني بهالموضوع ولاعليكم امر :shy:

[معماري قطري]

إذا قطع 60 في 60 سهلة معاينتها واختيار الجيد .. بعض العروق تكون مخفية وتنفتح تستوي فجوات واتوقع فيه لها طرق معالجة وحتى حماية بعد التركيب والتلميع

أكيد شموخ دائم خبرته كبيرة في الرخام وانا من محبين ومفضلين البورسلان لا يحتاج حماية ولا فيه عروق والجيد منه مقاسه واحد ينفع زيرو جوينت وفيه نوعيات سلابات كبيرة وبتشكيلة رخامية .. أجود كثير واحتمال السعر مقارب أو أرخص بس انتبه للتركيب وخله يكون بلاصق خاص ومناسب وكذلك القراوت لو بتركب زيرو جوينت خذ السائل ولو بتركب بفواصل فيه نوعيات ناعمة ما فيها حبات رمل مثل البودرة تجي وما تتغير ولا تتقشع من مكانها ولا تسرب ماي بين البلاطات

[معماري قطري]

لو تنقل الموضوع لأعمال البناء والديكور أكيد بيكون أفضل لأن كثير مختصين يمرون هناك

[نفسي عزيزه]

شكرا لك يالذيب انت دايم راعي مشوره وراي عسى عمرك طويل .. وشكرا على الاداره الكريمه لنقلهم الموضوع بالقسم المناسب ومنكم نستفيد

[معماري قطري]

الأسبان والايطاليين شاطرين في الرخام ويفرزونه من البداية لعدة درجات بواسطة التصوير الإشعاعي .. واللي ياخذ درجة أقل يتحمل شبيواجه .. حتى البورسلان نفس الطريقة لكن بعض المحلات تشتري الرخيص والمعيوب وتبيعه على إنه درجة أُولى وغالي .. طبعاً عيوب البورسلان التقوس وعدم ثبات المقاس ولا يركب زيرو جوينت وهذا تلاحظه بسهولة لو طابقت عينات فوق بعض وشفت الحواف كيف تختلف وشفت القطعة ما تركب على القطعة بالضبط ويبين فراغ بينهم

نحتاج رقابة أكثر من الدولة ومن مختبراتها واللي يغش المفروض عليه عقاب ولازم يتم اختيار عشوائي من كل بضاعة تدخل البلاد ويتم تدقيق مواصفاتها المكتوبة مع الفاتورة وكذلك يتم فحصها في المختبر لمعرفة مدى صحة الفواتير والمواصفات ومن وين حصل الغش ولو من التاجر يحاسب وتمنع بضاعته من الدخول

[معماري قطري]

شكرا لك يالذيب انت دايم راعي مشوره وراي عسى عمرك طويل .. وشكرا على الاداره الكريمه لنقلهم الموضوع بالقسم المناسب ومنكم نستفيد

العفو يا اخوي

انا ركبت حق بيتي رويال بيج مفروز في ايطاليا بس عماني المنشأ وكان سعره 350 .. ركبته للدرج بس .. ما فيه عروق وشغل التركيب والقص كان مسكت بس بعد فترة بهت وتشمخ شموخ صغيرة وجنبه البورسلان فرق كبير بينه وبين البورسلان في اللمعة .. أكيد يحتاج صنفرة ويمكن يحتاج طبقة حماية خاصة بس كل هذا شغل متواصل ودفع فلوس مستمر Running Cost مثل ما يقولون البورسلان ركب وانسى

[نفسي عزيزه]

انا كان قصدي نوعه 60-60 اقل نوع وارخصه مش حجمه


قصدك ان الرخام متعب صيانه وسنفره لازم شهريه ويتعب مع الوقت ؟ والبورسلان افضل ومايحتاج صيانه وانعم والمع ؟

ووين هالبورسلان هذا شنو افضلهم ووين مكانه والمتر بكم واسف اسالني وايد وبارجع للرخام بعد بس حبيت اعرف عن البورسلان بعد والرخام بعد

تسلم لطول بالك يالغالي

[نفسي عزيزه]

شنو افضل نوع بورسلان يالذيب الاسباني او في افضل منه ووين مكانه بالدوحه؟

[معماري قطري]

انا كان قصدي نوعه 60-60 اقل نوع وارخصه مش حجمه


قصدك ان الرخام متعب صيانه وسنفره لازم شهريه ويتعب مع الوقت ؟ والبورسلان افضل ومايحتاج صيانه وانعم والمع ؟

ووين هالبورسلان هذا شنو افضلهم ووين مكانه والمتر بكم واسف اسالني وايد وبارجع للرخام بعد بس حبيت اعرف عن البورسلان بعد والرخام بعد

تسلم لطول بالك يالغالي

لا يا اخوي الصنفرة والتلميع حسب رغبتك وما تكون شهرية وحسب الدوس عليه والاحتكاك به وحتى كل نوع له مقاومة معينة للكحت والتشمخ .. الحماية أنواع عديدة ومن عدة شركات وماركات منها ثري ام وبعد حسب الدوس عليه تحتاج تغيير وكثير ناس ما يحطونها .. بعض الرخام كذلك يتأثر من مواد التنظيف ولو صب عليه حامض يتآكل ويخترب .. البورسلان على العكس تمام حتى ما يتشرب ماي تقريباً ولا يتغير لونه

البورسلان في غالبية محلات بيع مواد البناء مثل العمودي وتدمر وغيرهم كثيرين حتى عند كافود اعتقد ومحلات كثيرة طلعت تبيع .. الأسباني وسط وسعره معقول والصيني لو كان الطلاء سميك وباقي المواصفات من عدم تغير المقاس ومن عدم التقوس زينة ويركب زيرو جوينت بعد جيد .. الإيطالي والألماني التوب وبعد شبيب وعلي العطية عنده نوعيات زينة وانا مجرب من عندهم

جربت غرانيت هندي حق عمارة وبقع وزيت ولا يسوى سعره .. وجربت بورسلان من دولة كانت صديقة ب 40 ريال للمتر وركبته حق بناية سكنية من سبع شقق لها كلها وطلع وايد زين

[معماري قطري]

شنو افضل نوع بورسلان يالذيب الاسباني او في افضل منه ووين مكانه بالدوحه؟

يا اخوي في قطر كل محل يورد غير عن الثاني وطريق سلوى فيه محلات من كل صوب .. حتى المتحدة عندهم والأفضل غالي .. فيه نوع فيه كسر ذهب ما اذكر سعره كم بس غالي وايد شفته في محل ناسي اسمه ومن المحلات الجديدة الصغار

فيه نوع شوي خشن وحجري ركبت منه حول حوض السباحة ما يزلق ووايد زين كان عند بورسلينا اللي قرب شركة الطارق في طريق سلوى إسباني بعد

[معماري قطري]

وقت التركيب يستوي اللعب من العمال خصوصاً لو القطع كبيرة لازم تتفق معاهم ما يركبون الا في وجودك أو وجود المهندس المشرف لأنهم ما يحطون مونة كفاية ويستغلون غياب المشرف أو المالك ويسوون روبة اسمنتية يصبونها ويركبون فوقها بسهولة يصفون البلاطات صف .. في البداية تبين زينة لكن بعد كم سنة تتفكك

[نفسي عزيزه]

بيض الله وجهك يالغالي كفيت ووفيت معلوماتك طيبه واستفدت منك الكثير ومالنا غنى عن مشورتك بسبب خبرتك ولنا اساله ان شاء الله جديده معاك عسى ربي يطول بعمرك بالصحه والطاعه

[معماري قطري]

بيض الله وجهك يالغالي كفيت ووفيت معلوماتك طيبه واستفدت منك الكثير ومالنا غنى عن مشورتك بسبب خبرتك ولنا اساله ان شاء الله جديده معاك عسى ربي يطول بعمرك بالصحه والطاعه

لا تهتم قلبي مفتوح للجميع ومسيو شموخ دائم أكيد عنده خبرة في الرخام ويعرف كم الأسعار وشأفضل النوعيات ووين تحصلها