محلات تفصيل الخزائن

[التاجرالصغير]

السلام عليكم .. اخواني ابغي احسن مكان لتفصيل الخزائن للملابس من ناحية الجودة والاسعار

هل تفضلون الخزائن الخشب او الالمنيوم..

نصيحتكم بارك الله فيكم

[معماري قطري]

عليكم السلام ورحمة الله وبركاته

القواطع الداخلية الغالبية يسوونها بلايوود وبعضهم إم دي اف ومن نوعيات كثيرة مختلفة وكلها تقريباً مناسبة .. يمكن تحتاج تتأكد إن الحواف مسكرة ببلاستيك أو ما يسمى lamination وهي طبقة حماية رقيقة تمنع اختراق النمل خصوصاً لو نشأ عندك مكان فيه نمل أبيض

الواجهات فيه خشب وفيه ألمنيوم ناعم بتشكيلة الخشب مثل الموجود في الخزائن الأمريكية وجربته انا وكل مرة ارجع وآخذ منه آخرها من أيام مركب أبيض ومن فترة مركب أبيض مزخرف وبخلفية مرايا

عندك الخزائن المبتكرة في طريق سلوى ورا التيسير والأمريكية قبل التيسير بمسافة قرب تقاطع السوق وغير بينهم أكيد كم محل موجود

[التاجرالصغير]

الله يجزاك خير..

[Bo3essa]

رافكو

[بوخالد911]

عالم الخزائن بشارع سلوى
عقب محطة التيسيير.

[التاجرالصغير]

بس يا اخوان ايش اسوي عشان النمل والصراصير اللي تطلع بسبب الخشب ؟

ياليت تفيدونا يا اخوان

[الســـهم]

السلام عليكم ورحمة الله وبركاته ..

اخوي توكل على الله وركب خزاين خشبية، غالبية الشركات تركب خشب معالج حاليا، وهذا احنا مركبين خزاين من سنين بدون أي مشاكل تذكر ..

[معماري قطري]

بس يا اخوان ايش اسوي عشان النمل والصراصير اللي تطلع بسبب الخشب ؟

ياليت تفيدونا يا اخوان

النمل في الغالب يطلع ويتكاثر لو تحت البلاط رمل .. من يحصل فتحة بسيطة في المونة بين البلاط يدخل ويتكاثر وتحصل البيت متروس نمل .. كما إنها نقطة مرور للنمل الأبيض اللي هو أخطر على الخشب ونقطة المرور الثانية هي الجزء اللي يتركب في أطراف الصبية تحت والقابل للانضغاط مثل الكرتون وأصله خشبي .. وشرحت في السابق كيف تسد هذي الوصلة وشرحت كذلك أهمية عمل صبية سكريد تحت البلاط وبدون أي رمل .. الرمل مهما يدعي المقاول إنه معالج ومغسول محد يضمن وجود بيض نمل فيه وشفت هالشيء بعيني حتى في مشاريع حكومية

الصراصير حلها سهل والبيت لو بيبانه الخارجية يو بي في سي محكمة الاغلاق ما يدخلون صراصير من الحوش .. وفي الحوش إن وجدوا نحط لهم بقايا الزيت المستعمل في أي إناء ونشوفهم يغرقون في الزيت .. عن طريق بايبات الصرف الصحي لو ما انعملت زين وما استخدم الرداد اللي هو سدادة عدم دخول أو رجوع الصرف في الاتجاه المعاكس أكيد بتكون طريق سهل حق مستر زهيوي .. حتى لو بيتك جاهز وناوي تركب الرداد تقدر تركبه في المنهول وتوصل مباشر داخل المنهول ويبقى المنهول نقطة تفتيش للحاجة فقط

سويت حوض سباحة وكان شغل المقاول سيئ نوعاً ما ولاحظت وجود نمل وكنت مضطر للدفان حول الحوض لأن مقاول المسابح نصحني بهذا حتى ما تتضرر البايبات لكن انتشار النمل كان كبير .. لاحظت وجود فراغات بسيطة في القراوت ممكن يدخل منها النمل ورجعت ألحين اسوي قراوت جديد ونوعية قوية بعد ازالة القديم ولهم 3 أيام شغالين فيه وبكرة بيخلصون بإذن الله

هذي احتياطات اعتقد بتفيدك حتى لو بيتك جديد

ولو محتد على حل سهل وسريع أغلب الأوقات تكون الزاوية بين الجدار والأرضية مفتوحة مهما حاولوا سدها بقراوت أو مونة .. هذي حلها سيليكون مناسب وبلون مناسب يتم تركيبه في دقايق وشوف يوتيوبيات البناء فيه كم مقطع يفيد بالطريقة المثلى لتركيب السيليكون