# تجديد المطبخ الخارجي #

[ضوى]

السلام عليكم ورحمة الله وبركاته ،،

طقت براسي اجدد المطبخ الخارجي وايد صار قديم من 18 سنة ماسويت فيه الا تركيب سقف الالواح الألمنيوم او المعدن مدري شسمه والله ، حاليا ودي اكسره كامل واشويه من جديد وابي اوزع توزيع عدل لك شي موجود الثلاجات الافران ، كل شي يعني ، اللي كنت اتعامل معاه غيرت تلفوني وضاع كل شي معاه من ارقام ونوت وكل شي ماقدرت استرجع ولا شي :cry2: ، اتمنى لو احد فيكم يعطني رقم واحد ثقة يكسر لي ويتشغل لي بالمطبخ على مزاجي وبسعر معقول من غير مبالغة ، طبعا ماراح استغنى عن رايكم ومشورتكم بكل شي راح اسويه ، اذا تذكرت اصور قبل لا اعدل ان شاء الله باصور لكم واخذ رايكم بالتوزيع والتنسيق

انتظر منكم المساعدة ، وشكرا لكم مقدماً

[معماري قطري]

الله يوفقج يا اختي

ما دام تغيير شامل نصيحتي تسوين تغيير وتجديد كامل حتى لوصلة المياه حتى تكونين ضامنة ما يستوي خراب مستقبلي .. وفحص الصرف الصحي مع احتمالية تغييره ومصيدة الزيوت

في هالحالة فيه شيء سهل لو بتسوين مطبخ شرح ومنور وهو شوفي الموجود عندج ووشي امكانية التوسعة .. الدولة حددتنا بارتدادات صراحة تقهر مثل مترين بين الخارجي والداخلي هذي تقدرين تضمينها بوزن المستوى بين الاثنين لو أمكن أو بعتبة وحدة أو رامب بسيط بينهم لسهولة الحركة .. تقدرين تفتحين الحائط بينهم وتسوين واجهة قزاز تفصلهم .. ولازم تفكرين في أمان المطبخين بابعاد الغاز وتمديد بايب خاص لوصلة الغاز للفرن .. كذلك ممكن المطبخ يكون كبير وتقدرين تقسمين جزء بسيط منه حق ستور كبير .. كل اللي تحتاجينه أرفف ألمنيوم أو حديد مثبتة ببراغي في الحائط والحوائط تكون سيراميك أبيض أحلى حتى لو أرخص نوع .. انا لبست المخزن عندي ببقايا السيراميك وخلطت كم لون .. الأرفف مناسب يكون عمقها 40 سم لسهولة التخزين ولتوفير المساحة 40 + حتى 80 ممر + 40 ثانية أرفف = عرض متر وستين سم صافي عرض مناسب .. ميزة المخزن عن الكبتات اللي في المطبخ إنه يكون بباب ويستحسن يو بي في سي وداخله بدون أبواب أرفف فقط لسهولة الترتيب .. تقدرين تسوين مخزنين على كل جنب وفي الوسط مكان الطبخ ولا يحتاج تكيفين المخزن لو تبين ركبي مراوح شفط لتجديد الهواء من وقت لوقت وصراحة ما فيه داعي لها كفاية الهواء لو المطبخ مكيف يدخل وقت فتح الباب

النور الطبيعي مهم كذلك الزراعة ولو فيه امكانية تسوين جلسة للأكل تطل على جزء بسيط مزروع خارج المطبخ بعد حلو تكون بزجاج متصل للأرض أو باب زجاجي حتى لو بفريم بس يكون الباب شوي عريض يعطي رؤية أوسع

[معماري قطري]

استشيري شركة أمن في نظام اطفاء اوتوماتيكي سريع وفي جهاز كشف تسريب الغاز وركبي ليتات وسويشات خاصة بدون شرارة sparkless

[معماري قطري]

السقف في الفراغ أو الممر بين المطبخين خليه قزاز أو بولي كاربونيت أو طبقتين بولي كاربونيت خارجية وزجاج .. البولي كاربونيت بنفسه عزله 10 أضعاف عزل الزجاج وينشر النور بشكل متوازن ورخيص كذلك وممكن تركيبه مائل حتى يصرف أي مطر وشوفي حد شاطر يسويه حتى ما يسرب ماي .. مسويه عندي من 12 سنة واحتجت اسد بعض الفتحات اللي تسرب ماي في الأطراف بس ووضعه زين وكلفني حول 1000 ريال مبلغ تافه ما اذكر بالضبط كم

لو تبين عمال يكسرون ما عندي الا خان اللي دوم اطلبه في أي شغلة وسوى لي تجديد لقراوت حمام وحوض السباحة بسهولة وشغل زين .. وشوفي دوم شغل الصيانة صعب هو يحدد سعر مبدئي لأن كل شوي يجد جديد .. لكن لو بادارة مكتب هندسي وشغل وثائق ومخططات أكيد ممكن تحصلين تسعير دقيق من مقاول مختص وفاهم

[ضوى]

كلامك ذهب وشكلي باسندرك اذا ابتديت ، طرش لنا رقم خان ولا عليك امر واذا عندك احد يركب بلاط وتمديدات وهالسوالف

[معماري قطري]

كلامك ذهب وشكلي باسندرك اذا ابتديت ، طرش لنا رقم خان ولا عليك امر واذا عندك احد يركب بلاط وتمديدات وهالسوالف

يقدر يسوي الشغل كامل بس انتبهي له

لتنسين التنور مهم واتوقع هم يقدرون يسوونه مبني وصغير ملموم للخبز وحتى لذبيحة كاملة .. ما ادري لو ينعمل بكسر فخار من داخل اتوقع بيطلع أفضل بس اشوف الغالبية يسوونه بسيراميك ويمكن السيراميك سهل التنظيف ويعكس الحرارة من كل الجهات .. فيه كذلك أفران فخارية وأفران بالبخار مري محلات المعدات قبل لتبدين تصميم الكبتات والتصميم الداخلي وشوفي اللي يناسبج واشتري حتى يسهل التركيب والتمديد له